যোৱা বছৰৰ এনে সময়তে কলিয়াবৰৰ পূৱ প্ৰান্তত অৱস্থিত বাগৰিৰ এটা অঞ্চলৰ বিশুদ্ধ খোৱাপানীৰ অভাৱৰ এক বাতৰি কৰি চৰকাৰৰ দৃষ্টিগোচৰ কৰিবলৈ চেষ্টা কৰিছিল কলিয়াবৰৰ সংবাদকৰ্মীয়ে। দৈনন্দিন বাৰ্তাৰ পৃষ্ঠাতো স্থান পাইছিল সেই বাৰ্তাৰ। কালক্ৰমত দেখা গ’ল চৰকাৰখনে বিষয়টোত কোনো দৃষ্টি নিক্ষেপ নকৰিলে।
পৰৱৰ্তী সময়ত কলিয়াবৰ প্ৰেছ ক্লাবে চিন্তা কৰিলে যে, বিশুদ্ধ পানীৰ অভাৱত থকা অঞ্চলৰ লোকসকলৰ সুবিধাৰ বাবে কিবা এটা কৰাৰ। সেই চিন্তাৰ ফচলৰূপে বছৰৰ পাছত বছৰ ধৰি পাহাৰৰ পৰা বৈ অহা জুৰিৰ পানী জমা হৈ থকা খালৰ পৰা শোধন নকৰাকৈয়ে খাই জীৱন নিৰ্বাহ কৰি অহা কলিয়াবৰৰ বাগৰিৰ আমদাংগা আৰু পাহাৰগুৰি গাঁৱৰ একাংশ দৰিদ্ৰ পৰিয়ালক আজি কলিয়াবৰ প্ৰেছ ক্লাবে একোটাকৈ পানী ফিল্টাৰ প্ৰদান কৰে। কলিয়াবৰ প্ৰেছ ক্লাবৰ এই পদক্ষেপক গাঁওবাসীয়ে ভূয়সী প্ৰশংসা কৰাৰ লগতে প্ৰেছ ক্লাবৰ এই উপহাৰৰ অনন্য আখ্যা দিয়ে ভুক্তভোগী পৰিয়ালকেইটাই।
কলিয়াবৰ মহকুমাৰ কুঠৰী গাওঁ পঞ্চায়তৰ অন্তৰ্গত বাগৰি সমীপৰ আমদাংগা আৰু পাহাৰগুৰি গাওঁ বাসীয়ে যুগ যুগ ধৰি পাহাৰৰ জুৰিৰ পানীকে শোধন নকৰাকৈয়ে সেৱন কৰি আহিছে। ভাৰতবৰ্ষই স্বাধীনতা লাভ কৰা ৭৫ বছৰ অতিক্ৰম কৰাৰ পাছতো কলিয়াবৰৰ এটা অঞ্চলৰ গঞা ৰাইজে এটুপি বিশুদ্ধ খোৱা পানীৰ বাবে হাহাকাৰ কৰিবলগীয়া হোৱা কথাই বৰ্তমান সময়ত ৰাজ্য চৰকাৰ খনৰ ফোপোলা স্বৰূপটো পুনৰ উদঙাই দেখুৱালে বুলি মন্তব্য কৰে সচেতন মহলে।
উল্লেখ্য যে, আজি বাগৰি অঞ্চলত পাহাৰগুৰি আৰু আমদাংগা গাওঁবাসীৰ ওচৰত উপস্থিত হয় কলিয়াবৰ প্ৰেছ ক্লাবৰ উপদেষ্টা ডিম্বেশ্বৰ হাজৰিকা, সভাপতি, উপ-সভাপতি, সম্পাদক ক্ৰমে তৰুণ মুক্তিয়াৰ, অমূল্য বৰা, গৌতম কুমাৰ বৰা, প্ৰাক্তন সভাপতি তপন শইকীয়া সদস্য আশীষ কুমাৰ শইকীয়া, পংকজ শইকীয়া, দিবাকৰ দাস প্ৰমুখ্যে পোন্ধৰ জনীয়া দলটো। এই উদ্দেশ্যৰে কাজিৰঙা ৰাষ্ট্ৰীয় উদ্যানৰ বাগৰি বনাঞ্চলৰ উপ-বনাঞ্চলিক বিষয়া শান্তনু গগৈৰ উপস্থিতিত এখনি ৰাজহুৱা সভা অনুষ্ঠিত হয়। সভাত কলিয়াবৰ প্ৰেছ ক্লাবৰ তৰফৰ পৰা প্ৰত্যেক গৰাকী গাঁওবাসীক একোটাকৈ পানী ফিল্টাৰ প্ৰদান কৰা হয়। কলিয়াবৰ প্ৰেছ ক্লাবৰ সদস্য পংকজ শইকীয়াই আঁত ধৰা সভাখনিত ক্লাবৰ সভাপতি তৰুণ মুক্তিয়াৰ, উপদেষ্টা ডিম্বেশ্বৰ হাজৰিকা, প্ৰাক্তন সভাপতি তপন শইকীয়া, সম্পাদক গৌতম কুমাৰ বৰাৰ লগতে বন বিষয়া শান্তনু গগৈয়ে গাঁওবাসীৰ পানীৰ সমস্যা আৰু সমাধান প্ৰসংগত ভাষণ দিয়াৰ লগতে একোটাকৈ পানী ফিল্টাৰ প্ৰদান কৰে। এই কাৰ্যসূচীত বিশেষ ভাৱে সহযোগিতা কৰে গাঁৱৰে যুৱক ৰঞ্জু তাঁতী আৰু ওৱাৰ্ড সদস্যা দিপ্তী দাস চৌধুৰীয়ে।
গাঁও দুখনৰ ক্ৰমে অৱনী তাঁতী, গণেশ গগৈ, ৰাজু কৰ্মকাৰ, নিৰু শইকীয়া, সাগৰমণি তাঁতী, জীতেন তাঁতী, নন্দ চাওতাল, ৰুক্মিণী গুৱলা, কৃষ্ণ বৰা, যুগল গগৈ, মিনতি বৰ্মন, পুনম ঘোষ, অতুল তাঁতী, লীলা তাঁতী, ভগীৰথ কৰ্মকাৰ, শীলা কুৰুৱা, ভজন্তী তাঁতী, ৰঞ্জিত তাঁতী, হৰি তাঁতী, লালবাহাদুৰ ছেত্ৰী, সন্তোষ তাঁতীকে ধৰি প্ৰায় ৪০ টা পৰিয়ালক একোটাকৈ পানী ফিল্টাৰ প্ৰদান কৰা হয়।
কলিয়াবৰ প্ৰেছ ক্লাবে পানী শোধন কৰি খাবৰ বাবে এইয়া সামান্য ব্যৱস্থাৰে উন্নয়নৰ ফটাঢোল বজাই তৰণই নোপোৱা চৰকাৰখনৰ দৃষ্টি আকৰ্ষণৰ চেষ্টা কৰিছে। সকলোৱে আশা কৰে অতি কম দিনৰ ভিতৰত চৰকাৰৰ সংশ্লিষ্ট বিভাগে যাতে বাগৰিৰ উক্ত গাঁও দুখনৰ লগতে সমীপৱৰ্তী অঞ্চলত বিশুদ্ধ খোৱা পানীৰ সু-ব্যৱস্থা কৰি পৰিয়াল কেইটা বিশেষকৈ গাঁও দুখনৰ উঠি অহা প্ৰজন্মক জীয়াই অধিকাৰ দিয়ে। এই ক্ষেত্ৰত বিভাগীয় মন্ত্ৰী জয়ন্ত মল্লবৰুৱাৰ পৰৱৰ্তী পদক্ষেপ কি হ’ব সেয়া হ’ব লক্ষণীয়।
