কাৰ্বি আংলং জিলাৰ ডিফুস্থিত কাৰ্বি আংলং ক্ৰীড়া সংস্থাৰ খেলপথাৰ অনুষ্ঠিত হৈ থকা খেল মহাৰণ ১৯ বছৰ অনুৰ্ধ্ব ছোৱালী ফুটবল প্ৰতিযোগিতাত লখিমপুৰ আৰু ধেমাজি জিলা দলে অগ্ৰগতি লাভ কৰিছে ৷ আজি পুৱাৰ ভাগত অনুষ্ঠিত হোৱা এখন খেলত লখিমপুৰ জিলা ছোৱালী ফুটবল দলে মৰিগাঁও জিলা ছোৱালী ফুটবল দলক ২-১ গ’লৰ ব্যৱধানত পৰাস্ত কৰি অগ্ৰগতি লাভ কৰিবলৈ সক্ষম হৈছে ৷ লখিমপুৰ জিলা দলৰ হৈ অইচেং পেগু আৰু সন্ধ্যা উপাধ্যায়ে গ’ল দুটা দিবলৈ সক্ষম হয় ৷
লখিমপুৰ জিলা দলটো ১৫-১৭ বছৰীয়া খেলুৱৈৰে গঠিত আৰু প্ৰায়কেইগৰাকী খেলুৱৈ লখিমপুৰ ছাইৰ খেলুৱৈ ৷ দলটো যথেষ্ট অভিজ্ঞতাৰ পৰিপুষ্ট ৷ আজি অনুষ্ঠিত হোৱা আন এখন খেলত ধেমাজি জিলা দলে তুলনামূলকভাৱে দুৰ্বল মানকাচাৰৰ দক্ষিণ শালমৰা দলক ৫-০ গ’লৰ ব্যৱধানত পৰাজিত কৰি অগ্ৰগতি লাভ কৰিছে ৷ ধেমাজি জিলা দলৰ হৈ লখিমপুৰ ছাইৰ নিৰ্ভৰযোগ্য লেফ্ট উইংগাৰ অষ্টমী বড়োৱে ২ গ’ল, ষ্ট্ৰাইকাৰ জয়ন্তী চৰেণে ২ গ’ল আৰু গোগামুখ স্পৰ্ট একাডেমীৰ অভিজ্ঞ ৰাইট বেক্ মৰমী বড়োৱে ১ গ’ল দিবলৈ সক্ষম হয় ৷ উত্তেজনাহীন খেলখনত দক্ষিন শালমৰা দলে কোনো সময়তে গ’লৰ ধেমাজিৰ বিপক্ষে সুযোগ সৃষ্টি কৰিব নোৱাৰিলে ৷
