অসম চৰকাৰৰ জলসম্পদ বিভাগৰ মন্ত্ৰী শ্ৰী পীযুষ হাজৰীকাই আজি দুপৰীয়া গুৱাহাটীৰ চানমাৰীস্থিত জলসম্পদ বিভাগৰ মুখ্য অভিযন্তাৰ কাৰ্যালয়ত আকস্মিকভাৱে উপস্থিত হৈ বিভাগীয় কাম কাজৰ পৰ্যালোচনা কৰাৰ লগতে বিষয়া-কৰ্মচাৰীৰ কৰ্মসংস্কৃতিৰ উমান লয় | বানপানীৰ সময়ত জিলাসমূহত বিভাগৰ বিষয়া কৰ্মচাৰীৰ ব্যস্ততা বৃদ্ধি পাই থকালৈ চাই মন্ত্ৰী পীযুষ হাজৰীকাই বিভাগৰ মুখ্য কাৰ্যালয়ত থকা বিষয়া-কৰ্মচাৰীসকলৰ একাংশক প্ৰয়োজন সাপেক্ষে জিলাসমূহলৈ বদলি কৰাৰ পোষকতা কৰে | তেঁও কয় যে যদি মুখ্য কাৰ্যালয়ত অতিৰিক্তভাৱে বিষয়া কৰ্মচাৰী আছে, তেন্তে তেঁওলোকক জিলাসমূহলৈ পঠিওৱা হ’ব | জলসম্পদ বিভাগৰ মুখ্য অভিযন্তাৰ কাৰ্যালয়ত মুঠ ৩৫৬ জন বিষয়া-কৰ্মচাৰী থকাৰ বিপৰীতে জিলা আৰু মহকুমা সমূহত যদি মাথো পাঁচজনকৈ ব্যক্তি থাকে তেনে অৱস্থাত মুখ্য কাৰ্যালয়ৰ ৩০% বিষয়া কৰ্মচাৰীক জিলা অথবা মহকুমাৰ “ফিল্ড অফিচলৈ” পঠায় তেতিয়া বিভাগটোৰ যথেষ্ট ভাল হ’ব বুলি উল্লেখ কৰে মন্ত্ৰী গৰাকীয়ে |
উল্লেখযোগ্য যে আজি মন্ত্ৰীগৰাকীৰ আকস্মিক পৰিদৰ্শনৰ সময়ত মুখ্য অভিযন্তাৰ কাৰ্যালয়ৰ মুঠ ৩৫৬ জন বিষয়া কৰ্মচাৰীৰ ২৪ জন অনুপস্থিত আছিল | ইয়াৰে আগতীয়াকৈ ছুটি নোলোৱাকৈ অনুপস্থিত থকা ১৪ জন বিষয়া কৰ্মচাৰীৰ এদিনৰ দৰমহা কৰ্তন কৰিবলৈ মন্ত্ৰীগৰাকীয়ে নিৰ্দেশ দিয়ে | আনহাতে প্ৰশাসনীয় সংস্কাৰেৰে বিভাগটোক আৰু উন্নত কৰিব লাগিব বুলি উল্লেখ কৰি মন্ত্ৰী শ্ৰী পীযুষ হাজৰীকাই কয় যে এই ক্ষেত্ৰত বানপানীৰ পাছতে বিভাগৰ বিষয়া কৰ্মচাৰীৰ কঠোৰ বদলিকৰণ কৰা হ’ব |
আজি এনে আকস্মিক পৰিদৰ্শনৰ সময়ত কাৰ্যালয়ৰ কিছু লেতেৰা পৰিৱেশ দেখা পাই মন্ত্ৰীগৰাকীয়ে বিভাগীয় বিষয়াসকলক সাত দিনৰ ভিতৰত পৰিষ্কাৰ পৰিৱেশ সৃষ্টি কৰিবলৈ নিৰ্দেশ দিয়ে | আনহাতে বিভাগৰ সকলো বিষয়া কৰ্মচাৰীকে উপযুক্ত কৰ্মসংস্কৃতিৰে বিভাগটোক আগবঢ়াই নিবলৈ তেঁও আহ্বান জনায় | বিষয়া কৰ্মচাৰীসকলক উদ্দেশ্যি তেঁও কয় যে বিভাগটোৰ লগতে সমাজ আৰু জাতিটোক আগবঢ়াই নিবলৈ সকলোয়ে কৰ্মসংস্কৃতিত গুৰুত্ব দিবই লাগিব | আনহাতে এয়া মন্ত্ৰীগৰাকীৰ প্ৰথম আকস্মিক পৰিদৰ্শন, পৰৱৰ্তী সময়ত তেঁও সঘনাই আকস্মিক পৰিদৰ্শনৰ জড়িয়তে বিভাগীয় কাম কাজৰ পৰ্যবেক্ষণ কৰি থাকিব বুলি উল্লেখ কৰে|
