মিজোৰাম চৰকাৰে টকিঅ’ অলিম্পিয়ান লালৰেমচিয়ামীক হকীৰ মুখ্য প্ৰশিক্ষক হিচাপে নিযুক্তি দিয়াত অনুমোদন জনায়।বৃহস্পতিবাৰে সন্ধিয়া মিজোৰামৰ মুখ্যমন্ত্ৰী জোৰামথাঙ্গাই এই কথা ঘোষণা কৰে হকী তাৰকা লালৰেমচিয়ামী মিজোৰামৰ একমাত্ৰ খেলুৱৈ আছিল যিয়ে টকিঅ’ অলিম্পিকত ভাৰতক প্ৰতিনিধিত্ব কৰিছিল।মিজোৰাম ক্ৰীড়া আৰু যুৱ সেৱা বিভাগৰ অধীনত লালৰেমছিয়ামীক হকীৰ মুখ্য প্ৰশিক্ষক হিচাপে নিযুক্তি দিয়া হৈছে, যি হৈছে এ গোটৰ পদ।
টুইটাৰযোগে মুখ্যমন্ত্ৰী জোৰামথাঙ্গাই কয়, “মিজোৰাম চৰকাৰে ৰাষ্ট্ৰীয় হকী খেলুৱৈ শ্ৰীমতী লালৰেমছিয়ামী আৰু টকিঅ’ অলিম্পিক ২০২০ত #Mizoram একমাত্ৰ অলিম্পিয়ানক ক্ৰীড়া আৰু যুৱ সেৱা বিভাগৰ অধীনৰ মুখ্য প্ৰশিক্ষক (হকী) গ্ৰুপ-এ পদলৈ নিযুক্তি দিয়াত অনুমোদন জনাই গৌৰৱান্বিত হৈছে”।
ইয়াৰ পূৰ্বে, ৰাজ্য চৰকাৰে লালৰেমচিয়ামীক অলিম্পিকত অংশগ্ৰহণ আৰু প্ৰদৰ্শনৰ বাবে সন্মানিত কৰিবলৈ ২৫ লাখ টকাৰ নগদ পুৰস্কাৰ ঘোষণা কৰিছিল। ২৫ লাখ টকাৰ ভিতৰত, চৰকাৰে ২৪ জুনত তেওঁৰ মাতৃ লালজাৰমাৱীক ১০ লাখ টকা হস্তান্তৰ কৰিছিল।লালৰেমচিয়ামী ২৫ আগষ্টত ৰাজ্যখনত উপস্থিত হ’ব আৰু তেওঁৰ আগমনৰ পিছত তেওঁক ৰাজ্যিক আদৰণি জনোৱা হ’ব।