কেন্দ্ৰীয় চৰকাৰৰ শিক্ষা মন্ত্ৰালয়ৰ উদ্যোগত শুক্ৰবাৰে প্ৰধানমন্ত্ৰী নৰেন্দ্ৰ মোদীৰ সৈতে অনুষ্ঠিত হোৱা দেশব্যাপী ছাত্ৰ-ছাত্ৰীৰ জনপ্ৰিয় কাৰ্যসূচী “পৰীক্ষা পে চৰ্চা”ৰ নৱম সংস্কৰণত নলবাৰী জিলাৰ পি.এম.শ্ৰী আদৰ্শ বিদ্যালয় , বৰক্ষেত্ৰীৰ ছাত্ৰ মৃদুমলয় বৰ্মনে অংশগ্ৰহণ কৰি সমগ্ৰ অসমবাসী ৰাইজলৈ গৌৰৱ কঢ়িয়াই আনিছে। উল্লেখযোগ্য যে সমগ্ৰ ভাৰতবৰ্ষৰ অধিকতৰ ছাত্ৰ – ছাত্ৰীৰ মাজৰ পৰা নিৰ্বাচিত হোৱা মাত্ৰ ১০ গৰাকী শিক্ষাৰ্থীৰ ভিতৰত মৃদুমলয় বৰ্মন অসমক প্ৰতিনিধিত্ব কৰা একমাত্ৰ শিক্ষাৰ্থী আছিল। বিদ্যালয়খনৰ নৱম শ্ৰেণীৰ ছাত্ৰ মৃদুমলয় বৰ্মনৰ ঘৰ বৰক্ষেত্ৰী ৰাজহ চক্ৰৰ অন্তৰ্গত মুকদি গাঁৱত।এই বিশেষ অনুষ্ঠানটো কালি দিনৰ ১০ বজাত বিভিন্ন মাধ্যমৰ জৰিয়তে দেশজুৰি লাইভ অনুষ্ঠানত সম্প্ৰচাৰ কৰা হয়। কালিৰ অনুষ্ঠানটোত প্ৰধানমন্ত্ৰী নৰেন্দ্ৰ মোদীয়ে ছাত্ৰ-ছাত্ৰীৰ সৈতে সৰল আৰু প্ৰেৰণাদায়ক আলোচনাৰ জৰিয়তে পৰীক্ষাৰ ভয়, মানসিক চাপ, সময় ব্যৱস্থাপনা আৰু জীৱনৰ লক্ষ্য আদি সম্পৰ্কে গুৰুত্বপূৰ্ণ পৰামৰ্শ আগবঢ়ায়।
কালিৰ অনুষ্ঠানত সম্প্ৰচাৰ কৰাৰ সময়ত বিদ্যালয়খনত পৰীক্ষা পে চৰ্চা ৰ কাৰ্যসূচী উপভোগ কৰিবলৈ বিদ্যালয়ত উপস্থিত থাকে নলবাৰী জিলাৰ বিদ্যালয় পৰিদৰ্শক জয়ন্ত ঠাকুৰীয়া, বিদ্যালয়খনৰ অধ্যক্ষা নিলাক্ষী বৰা, শিক্ষক-শিক্ষয়িত্ৰী আৰু ছাত্ৰ-ছাত্ৰী সকল। পৰিদৰ্শক ঠাকুৰীয়াই অনুষ্ঠানটোৰ লগত সংগতি ৰাখি ছাত্ৰ- ছাত্ৰীৰ আগত সুপৰামৰ্শ প্ৰদান কৰাৰ লগতে বিদ্যালয় খনলৈ গৌৰৱ কঢ়িয়াই অনা ছাত্ৰ মৃদুমলয় আৰু বিদ্যালয়ৰ অধ্যক্ষা , শিক্ষক- শিক্ষয়িত্ৰী সমন্বিতে সকলো ছাত্ৰ – ছাত্ৰীক অভিনন্দন জ্ঞাপন কৰে। লগতে সকলো শিক্ষাৰ্থীয়ে যাতে অনাগত দিনবোৰত বিদ্যালয় খনলৈ এনেদৰেই সুনাম কঢ়িয়াই আনিব পাৰে তাৰ বাবে উৎসাহ প্ৰদান কৰে ।উল্লেখযোগ্য যে পৰীক্ষা পে চৰ্চাৰ নৱম সংস্কৰণত দেশজুৰী অধিক ছাত্ৰ- ছাত্ৰীয়ে নিজৰ প্ৰশ্ন সমুহ আগবঢ়াইছিল যদিও তাৰ মাজৰ পৰা পি এম শ্ৰী আদৰ্শ বিদ্যালয়, বৰক্ষেত্ৰীৰ মৃদুমলয় বৰ্মনৰ প্ৰশ্নটোৱে প্ৰথমে জিলা , তাৰ পিছত ৰাজ্য আৰু শেষত সমগ্ৰ ভাৰতবৰ্ষৰ মুঠ ৩৬ গৰাকী শিক্ষাৰ্থীৰ ভিতৰত নিৰ্বাচন লাভ কৰে। ইয়াৰ পিছত তেওঁ দিল্লীত এক কৰ্মশালাতো যোগদান কৰি ৩৬ গৰাকী শিক্ষাৰ্থীৰ ভিতৰত মুঠ ১০ গৰাকী শিক্ষাৰ্থীৰ এগৰাকী হিচাপে নিৰ্বাচিত হৈ আমাৰ দেশৰ প্ৰধানমন্ত্ৰীৰ সৈতে পোনপটীয়াকৈ মনৰ অনুভৱ ব্যক্ত কৰাৰ সুযোগ লাভ কৰে।
অসমৰ মৃদুমলয় বৰ্মনে এই মঞ্চত অংশগ্ৰহণ কৰাৰ ফলত বিদ্যালয়ৰ লগতে সমগ্ৰ অঞ্চলৰ মাজত ব্যাপক উৎসাহ আৰু আনন্দৰ পৰিৱেশ সৃষ্টি হয়।মৃদুমলয়ৰ সাফল্যত গৌৰৱান্বিত হৈ বিদ্যালয়ৰ অধ্যক্ষা বৰাই কয় যে এনে অনুষ্ঠানসমূহে ছাত্ৰ-ছাত্ৰীৰ আত্মবিশ্বাস বৃদ্ধি কৰাৰ লগতে ইতিবাচক মনোভাৱ গঢ়াত সহায় কৰে। কালিৰ লাইভ অনুষ্ঠান উপভোগ কৰাৰ পিছত বিদ্যালয়ত এক শিক্ষামূলক আৰু উৎসাহজনক পৰিৱেশ দেখা যায় আৰু ছাত্ৰ-ছাত্ৰীসকলে অনুষ্ঠানটোত উত্থাপিত বিষয়সমূহৰ পৰা যথেষ্ট অনুপ্ৰেৰণা লাভ কৰে।
