নাজিৰাৰ মেকীপুৰস্থ পূজা মণ্ডপৰ প্ৰাংগণত অনুষ্ঠিত কংগ্ৰেছৰ বিশাল নিৰ্বাচনী প্ৰচাৰ সভাত অংশগ্ৰহণ কৰি ভাৰতীয় জাতীয় কংগ্ৰেছৰ সাধাৰণ সম্পাদিকা তথা সাংসদ প্ৰিয়ংকা গান্ধীয়ে ভাষণ প্ৰসংগত বি জে পি নেতৃত্বাধীন মিত্ৰজোঁটৰ চৰকাৰখনত তীব্ৰ সমালোচনা কৰি ভ্ৰষ্টাচাৰ, দূৰ্নীতি, ছিণ্ডিকেটৰাজ আদি এই চৰকাৰখনে সমগ্ৰ দেশৰ লগতে অসমৰ খিলঞ্জীয়া জনগণৰ অধিকাৰ, স্বাধীনতা খৰ্ব কৰিছে। অসমীয়াৰ প্ৰাণৰ সত্বা , যুৱ প্ৰজন্মৰ হাৰ্টথ্ৰব জুবিন গাৰ্গৰ ৰহস্যময় মৃত্যুৰ ঘটনাই সমগ্ৰ ভাৰত তথা বিশ্ব বাসীক কন্দুৱাই ৰাখিছে ।
এইজনা মহান মানৱৰ ন্যায়ৰ ক্ষেত্ৰত বি জে পি নেতৃত্বাধীন চৰকাৰে চৰম প্ৰতাৰণা কৰিছে। আগন্তুক সময়ত অসমত কংগ্ৰেছ মিত্ৰজোঁটৰ চৰকাৰে এশ দিনৰ ভিতৰত শিল্পী জুবিন গাৰ্গৰ ন্যায় নিশ্চিত হ’ব আৰু তেখেতৰ হত্যাকাণ্ডৰ লগত জড়িত সকলক আইনগত দৃষ্টান্ত মূলক শাস্তি পাব সেয়া চিৰন্তন সত্য বুলি কংগ্ৰেছ নেত্ৰী প্ৰিয়ংকা গান্ধীয়ে ঘোষণা কৰে। সভাত অসম প্ৰদেশ কংগ্ৰেছৰ সভাপতি তথা লোকসভাৰ উপ দলপতি তথা যোৰহাট বিধানসভা সমষ্টিৰ প্ৰাৰ্থী গৌৰৱ গগৈয়ে ভাষণ প্ৰসংগত নিৰ্বাচনত কংগ্ৰেছ মিত্ৰজোঁটৰ প্ৰাৰ্থীক ভোটদান সাব্যস্ত কৰি অসমৰ পৰা দূৰ্নীতি, ভ্ৰষ্টাচাৰ অপশাসন দূৰ কৰিবৰ বাবে ৰাইজলৈ আহ্বান জনায়।
ছত্তীছগঢ় প্ৰাক্তন মুখ্যমন্ত্ৰী ভূপেশ ৱাগেল , অসম বিধানসভাৰ বিৰোধী দলপতি তথা নাজিৰা সমষ্টিৰ প্ৰাৰ্থী দেৱব্ৰত শইকীয়া, শিৱসাগৰ সমষ্টিৰ প্ৰাৰ্থী তথা ৰাইজৰ দলৰ সভাপতি অখিল গগৈ, ডিমৌ সমষ্টিৰ প্ৰাৰ্থী অজয় গগৈ , মাহমৰা সমষ্টিৰ প্ৰাৰ্থী জ্ঞান দ্বীপ মহন , সোণাৰি সমষ্টিৰ প্ৰাৰ্থী উৎপল গগৈ , প্ৰাক্তন কেন্দ্ৰীয় মন্ত্ৰী পৱন সিং ঘাটোৱাৰ, প্ৰাক্তন মন্ত্ৰী ডঃ হেমপ্ৰভা শইকীয়া আদিকে ধৰি ভালেকেইজন শীৰ্ষ কংগ্ৰেছ নেতাই বক্তব্য প্ৰদান কৰে।
