২০২২ চনৰ ভিতৰত দেশত নতুন শিক্ষা নীতি : প্ৰধানমন্ত্ৰী

0 1,255

দৈনন্দিন বাৰ্তা ডেস্ক : এক নতুন যুগৰ বীজ ৰোপন কৰিব নতুন শিক্ষা নীতিয়ে। একবিংশ শতাব্দীত ভাৰতক নতুন দিশ দেখুৱাব ৷ কেন্দ্ৰৰ প্ৰস্তাৱিত নতুন শিক্ষা নীতিক লৈ এনেদৰে মত প্ৰকাশ কৰে প্রধানমন্ত্রী নৰেন্দ্ৰ মোডীয়ে ৷ শুকুৰবাৰে মোডীয়ে এনইপি ২০২০, স্কুল এডুকেছন কনক্লেভত যোগদান কৰে ৷ তাতেই নতুন কেন্দ্ৰীয় শিক্ষা নীতি লৈ মত প্ৰকাশ কৰে প্রধানমন্ত্রীয়ে ৷ মোডীয়ে কয় মাৰ্কশ্বিট কেতিয়াও কোনো ছাত্ৰৰ শিক্ষাৰ পূৰ্ণাংগ মূল্যায়ন হ’ব নোৱাৰে ৷ নতুন ৰাষ্ট্ৰীয় শিক্ষা নীতিত মাৰ্কশ্বিট সৰ্বস্ব শিক্ষা ব্যৱস্থাৰ সলনি ঘটাই সাৰ্বিক শিক্ষাত জোৰ দিয়া হৈছে ৷ কেৱল শ্ৰেণী কোঠাত আবদ্ধ থাকি শিক্ষা নহয় ৷ শিক্ষাক শ্ৰেণী কোঠাৰ দেৱালৰ বাহিৰলৈ আনিবলৈ তেওঁ আহ্বান জনায় ৷ কেৱল পুথিগত বিদ্যা নহয়, শিক্ষাৰ ব্যৱহাৰিক প্ৰয়োগৰ কথা কয় প্রধানমন্ত্রীয়ে৷ মোডীয়ে কয়, নতুন শিক্ষা নীতিত পঞ্চম শ্ৰেণী পৰ্যন্ত প্ৰতিটো শিশুক মাতৃভাষাত শিক্ষা দানৰ ব্যৱস্থা কৰা হ’ব ৷ ইয়াৰ লগতে মোডীয়ে জনাই যে ২০২২ চনৰ ভিতৰত দেশৰ সকলোতে নতুন এই শিক্ষা নীতি প্ৰৱৰ্তন কৰা হ’ব ৷ এই নতুন শিক্ষা নীতিৰ সাৰ্থক ৰূপায়নত সকলোৱে একেলগে কাম কৰিব লাগিব ৷