ভৱিষ্যদ্বাণী কৰিলে ৰাহুল গান্ধীয়ে৷ পশ্চিম এছিয়াৰ যুদ্ধই ভাৰতীয় বজাৰতো প্ৰভাৱ পেলাইছে৷ ডলাৰৰ বিপৰীতে টকাৰ মূল্য হ্ৰাস পাইছে৷ গেছৰ দাম বৃদ্ধি পাইছে৷ অৱশ্যে ইয়াৰ সঠিক প্ৰভাৱ পাঁচখন ৰাজ্যৰ নিৰ্বাচন শেষ হোৱাৰ পিছতহে বুজিব পৰা যাব৷ শনিবাৰে লোকসভাৰ বিৰোধী দলপতি ৰাহুল গান্ধীয়ে মূল্যবৃদ্ধিৰ ইংগিত দি এক্স পোষ্টত এই দাবী কৰে৷ তেওঁ লিখিছে, ‘নিৰ্বাচন শেষ হ’লেপেট্ৰ’ল-ডিজেল আৰু ৰন্ধন গেছৰ দাম বৃদ্ধি হ’ব৷’ পৰিস্থিতিৰ সৈতে মোকাবিলা কৰাৰ কোনো পৰিকল্পনা নথকাৰ বাবে তেওঁ কেন্দ্ৰীয় চৰকাৰক আক্ৰমণ কৰে৷ যোৱা কেইদিনমানৰ পৰা ডলাৰৰ বিপৰীতে টকাৰ মূল্য তীব্ৰভাৱে হ্ৰাস পাইছে৷ শুকুৰবাৰে ৮৬ পইচা হ্ৰাস পাই প্ৰতি ডলাৰত ৯৩.৭৫ টকা হয়৷ সহজ ভাষাত ক’বলৈ গ’লে এতিয়া ৰ ডলাৰৰ অৰ্থ হ’ল প্ৰায় ৯৪ টকা, যিটো সৰ্বকালৰ সৰ্বনিম্ন৷ এই বিষয়টো লৈ ৰাহুলে লিখিছে, ‘টকা ডলাৰৰ বিপৰীতে ১০০১ দিশে আগবাঢ়িছে৷ বৃদ্ধি পাইছে ইন্ধনৰ দাম৷ এইবোৰ ভৱিষ্যতে মূল্যবৃদ্ধিৰ ইংগিত৷ ‘টকাৰ মূল্য হ্ৰাস পোৱাৰ ফলত সমগ্ৰ অৰ্থনীতিৰ ওপৰত প্ৰভাৱ পৰিব বুলি ভাবে ৰাহুলে৷ কেন্দ্ৰীয় চৰকাৰে অৱশ্যে ইয়াক ‘স্বাভাৱিক’ পৰিঘটনা বুলি অভিহিত কৰিছে৷ কিন্তু ৰাহুলৰ মতে, ‘সেয়া সঁচা নহয়৷’ তেওঁৰ মতে চাৰিটা খণ্ডই আটাইতকৈ বেছি ক্ষতিগ্ৰস্ত হ’ব৷ ৰাহুলৰ মতে, ‘প্ৰথমে উৎপাদন আৰু পৰিবহণৰ খৰচ বৃদ্ধি পাব৷ দ্বিতীয়তে, আটাইতকৈ ডাঙৰ লোকচান হ’ব ক্ষুদ্ৰ আৰু মজলীয়া উদ্যোগৰ৷ তৃতীয়তে, অত্যাৱশ্যকীয় সামগ্ৰীৰ দাম বৃদ্ধি পাব৷ চতুৰ্থতে, বিদেশী বিনিয়োগকাৰীয়ে বিনিয়োগ প্ৰত্যাহাৰ কৰিব, যাৰ ফলত শ্বেয়াৰ বজাৰত চাপ পৰিব৷’ অতি সোনকালে এনেকুৱা হ’ব বুলি দাবী কৰি ৰাহুলে কয়, ‘এয়া মাথোঁ সময়ৰ কথা৷ নিৰ্বাচন শেষ হোৱাৰ লগে লগে পেট্ৰ’ল-ডিজেল আৰু গেছৰ দাম বৃদ্ধি পাব৷’ এপ্ৰিল মাহত অসম, পশ্চিমবংগ, কেৰালা, তামিলনাডু আৰু কেন্দ্ৰীয়শাসিত অঞ্চল পুডুচেৰীত বিধানসভা নিৰ্বাচন অনুষ্ঠিত হ’ব৷ ৰাহুলে যে সেই দিশলৈ ইংগিত দিছে সেয়া স্পষ্ট৷ এই পৰিস্থিতিৰ সৈতে কেনেদৰে মোকাবিলা কৰিব লাগে সেই সন্দৰ্ভত কেন্দ্ৰীয় চৰকাৰৰ কোনো পৰিকল্পনা নাই বুলিও ৰাহুলে আক্ৰমণ কৰে৷ তেওঁৰ ভাষাত, ‘মোদী চৰকাৰ এইক্ষেত্ৰত কেৱল শূন্য৷ চৰকাৰে যি কৈছে সেয়া সত্য নহয়, আপোনাৰ হাতত যি আছে সেয়া সত্য৷’ যুদ্ধ আৰম্ভ হোৱাৰ পৰাই বন্ধ হৈ আছে হৰমুজ প্ৰণালী৷ ফলত যোগানৰ নাটনি হৈছে৷ এল পি জি চিলিণ্ডাৰ আচলতে উপলব্ধ হ’বনে নাই তাত সন্দেহ আছে৷ বন্ধ হৈ পৰিছে অগণন হোটেল আৰু ৰে©ু†ৰেণ্ট৷ অৱশ্যে সকলো স্বাভাৱিক বুলি আশ্বাস দিছে কেন্দ্ৰীয় চৰকাৰে৷ কিন্তু বহুতে পতিয়ন যোৱা নাই৷ ইয়াৰ বিপৰীতে এল পি জি ডিলাৰত ভিৰ বাঢ়িছে৷ প্ৰতিদিনে দীঘলীয়া শাৰী গঢ় লৈ উঠিছে৷ অৱশ্যে টকাৰ মূল্যৰ উঠা-নমাক লৈ কেন্দ্ৰৰ কাষত থিয় দিছে কংগ্ৰেছৰ সাংসদ শশী থাৰুৰে৷ তেওঁ কয়, ‘ইয়াৰ আঁৰত আন্তঃৰাষ্ট্ৰীয় কাৰণ আছে৷ বিষয়টো চৰকাৰৰ হাতত নাই৷’

অসমবাসীৰ হিয়াৰ আমঠু জুবিন গাৰ্গৰ প্ৰতিকৃতিত গোৰ মৰাৰ অভিযোগত অভিযুক্ত এজন ব্যক্তি কংগ্ৰেছ দলৰ সৈতে জড়িত বুলি অভিযোগ কৰিছে মন্ত্ৰী পীয়ূষ হাজৰিকাই৷ ছ’চিয়েল মিডিয়া প্লেটফৰ্ম এক্সত দিয়া এক পোষ্টত হাজৰিকাই দাবী কৰে যে ছাদুল্লাহা শিকদাৰ নামৰ অভিযুক্ত ব্যক্তিজন এজন কংগ্ৰেছ নেতা৷ তেওঁ লগতে অভিযোগ কৰে যে শিকদাৰ আৰু তেওঁৰ ভাতৃ আবু শিকদাৰৰ কংগ্ৰেছৰ জ্যেষ্ঠ নেতাৰ সৈতে সম্পৰ্ক আছে৷

হাজৰিকাই ৰিপুণ বৰা, ৰকিবুল হুছেইন, গৌৰৱ গগৈকে ধৰি কংগ্ৰেছৰ বিশিষ্ট ব্যক্তিসকলৰ নামো উল্লেখ কৰি এইক্ষেত্ৰত তেওঁলোকৰ ৰাজনৈতিক সমৰ্থন আছে বুলি দাবী কৰে৷ বিজেপি নেতাগৰাকীৰ এই মন্তব্যই এতিয়া শ’লঠেকত পেলাইছে কংগ্ৰেছক৷ কাৰণ জুবিন গাৰ্গৰ বাবে ন্যায় বিচৰা কংগ্ৰেছৰ নেতাই এতিয়া জুবিনক অপমান কৰাৰ কথাই প্ৰতিক্ৰিয়াৰ সৃষ্টি কৰিছে৷

ইপিনে জুবিন গাৰ্গক অপমান কৰা ছাদুল্লা শিকদাৰক কঠোৰভাৱে সকীয়াই দিছে মন্ত্ৰী পীয়ূষ হাজৰিকাই৷ উল্লেখ্য, জুবিন গাৰ্গৰ ছবিত গোৰ মাৰিবলৈ দুঃসাহস কৰা ছাদুল্লা শিকদাৰ হৈছে ৰকিবুল হুছেইনৰ ঘনিষ্ঠ চিৰাং জিলা কংগ্ৰেছৰ সাংগঠনিক সাধাৰণ সম্পাদক আবু তালেপ শিকদাৰৰ ভাতৃ৷

যুদ্ধৰ প্ৰভাৱ এতিয়া ছবি জগতৰ ওপৰতো পৰিছে৷ আন্তঃৰাষ্ট্ৰীয় মনোৰঞ্জনধৰ্মী আলোচনী ‘ভেৰাইটী’ত প্ৰকাশিত এক বাতৰি অনুসৰি চেন্সৰ ব’ৰ্ডে [চিবিএফচি] ‘দ্য ভইচ অৱ হিন্দ ৰাজব’ ছবিখন ভাৰতত মুক্তিৰ ক্ষেত্ৰত বাধা প্ৰদান কৰিছে৷ গাজাৰ এটি ৬ বছৰীয়া শিশুৰ কৰুণ ভাগ্যৰ ওপৰত আধাৰিত এই ছবিখন৷ এই ছবিখনে আন্তঃৰাষ্ট্ৰীয় পৰ্যায়ত বহুল প্ৰশংসা লাভ কৰিছে৷ ইয়াৰ উপৰি অস্কাৰৰ মনোনয়ন লাভ কৰিছে৷ এই সকলোবোৰৰ পিছতো কিয় এই ছবিখনক অনুমতি দিবলৈ অস্বীকাৰ কৰিলে ছেণ্ট্ৰেল ব’ৰ্ড অৱ ফিল্ম চাৰ্টিফিকেচনে? ছবিখনৰ বিতৰকসকলে দাবী কৰিছে যে চিবিএফচিৰ এই পদক্ষেপৰ মূল কাৰণ হৈছে ইজৰাইলৰ সৈতে ভাৰতৰ দ্বিপাক্ষিক সম্পৰ্ক ক্ষতিগ্ৰস্ত হ’ব পাৰে বুলি কৰা আশংকা৷ কাউথেৰ বেন হানিয়াৰ পৰিচালনাত নিৰ্মিত এই ছবিখন মাৰ্চ মাহত ভাৰতত মুক্তি পোৱাৰ কথা আছিল৷

‘ভেৰাইটী’ৰ সৈতে হোৱা এক সাক্ষাৎকাৰত মনোজ নন্দৱানা নামৰ এজন বিতৰকে কয় যে চেন্সৰ ব’ৰ্ডৰ এজন সদস্যই তেওঁক পোনপটীয়াকৈ জনাইছে, ‘যদি এই ছবিখন ভাৰতত মুক্তি পায় তেন্তে ভাৰত-ইজৰাইলৰ সম্পৰ্ক ভাঙি যাব৷’ নন্দৱানাৰ দৰে বিতৰকসকলৰ যুক্তি হ’ল আমেৰিকা, ব্ৰিটেইন, ইটালী বা ফ্ৰান্সৰ দৰে দেশতো ছবিখন মুক্তি পাইছে৷ ইয়াৰ ফলত ইজৰাইলৰ সৈতে সেই দেশসমূহৰ সম্পৰ্কত কোনো প্ৰভাৱ পৰা নাই৷ তথাপি কোৱা হৈছে যে চেন্সৰ ব’ৰ্ডে নিজৰ সিদ্ধান্তত অটল৷ গাজাৰ ৬ বছৰীয়া শিশুৰ মৃত্যুৰ কৰুণ সত্য কাহিনীৰ আধাৰত নিৰ্মিত এই ডকু-ড্ৰামা ধাৰাৰ ছবিখন৷ ২০২৪ চনৰ জানুৱাৰী মাহত হামাছ আৰু ইজৰাইল সেনাৰ মাজত হোৱা যুদ্ধৰ সময়ত গাজাত এখন গাড়ীত আবদ্ধ হৈ পৰিছিল হিন্দ৷ অভিযোগ অনুসৰি ইজৰাইল সেনাৰ আক্ৰমণত শিশুটি আৰু তেওঁৰ পৰিয়ালৰ ছজন সদস্য নিহত হৈছিল৷ তেওঁক উদ্ধাৰ কৰিবলৈ অহা দুজন পেৰামেডিকেল কৰ্মীৰো মৃত্যু হয়৷

এই ঘটনাই ইজৰাইলৰ মানৱ অধিকাৰ উলংঘাক লৈ আন্তঃৰাষ্ট্ৰীয় সমাজত ব্যাপক ক্ষোভৰ সৃষ্টি কৰিছিল৷ ছবিখনে ভেনিচ আন্তঃৰাষ্ট্ৰীয় চলচ্ছিত্ৰ মহোৎসৱত ‘গ্ৰেণ্ড জুৰী বঁটা’কে ধৰি মুঠ জ্জটা বঁটা লাভ কৰে৷ কিন্তু ভাৰতীয় দৰ্শকে হয়তো ছবিখন চাব নোৱাৰিব৷ প্ৰশ্ন উত্থাপন হৈছে, ভাৰত-ইজৰাইলৰ সম্পৰ্ক ইমান ঠুনুকা নে? ইৰাণৰ সৈতে যুদ্ধ আৰম্ভ হোৱাৰ ঠিক আগতেই ভাৰতৰ প্ৰধানমন্ত্ৰীয়ে সেই দেশ ভ্ৰমণ কৰিছিল৷ প্ৰধানমন্ত্ৰী মোদীকো তেওঁলোকৰ সংসদৰ অধ্যক্ষৰ পদক প্ৰদান কৰা হয়৷ কেৱল এখন চিনেমাৰ বাবেই ইমান ভাল সম্পৰ্ক নষ্ট হ’ব পাৰেনে? নে এইক্ষেত্ৰত আন কোনো গোপন স্বাৰ্থই কাম কৰিছে?