‘এক ভাৰত’ৰ ধ্বজাবাহক হৈছে যুৱপ্ৰজন্ম : চৰ্দাৰ বল্লভভাই পেটেলৰ ১৫০ জন্মবাৰ্ষিকী উপলক্ষে গুজৰাটৰ বডোদৰাত আয়োজিত একতা যাত্ৰাত কেন্দ্ৰীয় মন্ত্ৰী সৰ্বানন্দ সোণোৱালৰ অংশগ্ৰহণ

“চৰ্দাৰ বল্লভভাই পেটেলে কল্পনা কৰা ‘একত্ৰিত ভাৰত’ৰ পৰা প্ৰধানমন্ত্ৰী নৰেন্দ্ৰ মোদীৰ নেতৃত্বত শ্ৰেষ্ঠ আৰু আত্মনিৰ্ভৰশীল ভাৰতলৈ দেশখনে একতাৰ বাটেৰে আগবাঢ়ি গৈ আছে”: সৰ্বানন্দ সোণোৱাল

কেন্দ্ৰীয় বন্দৰ, জাহাজ পৰিবহণ আৰু জলপথ মন্ত্ৰী সৰ্বানন্দ সোণোৱালে আন নেতাসকলৰ সৈতে চৰ্দাৰ বল্লভভাই পেটেলৰ ১৫০সংখ্যক জন্মবাৰ্ষিকী উপলক্ষে গুজৰাটৰ বডোদৰাত আয়োজিত ৰাষ্ট্ৰীয় একতা যাত্ৰাত অংশগ্ৰহণ কৰে। সোণোৱালে কয় যে এই ৰাষ্ট্ৰীয় একতা যাত্ৰাই “দেশব্যাপী দেশপ্ৰেমৰ এক শক্তিশালী ঢৌ সৃষ্টি কৰিছে আৰু চৰ্দাৰ বল্লভভাই পেটেলে কল্পনা কৰা ঐক্যবদ্ধ ভাৰত সুৰক্ষিত কৰাৰ ক্ষেত্ৰত যুৱসমাজৰ দৃঢ় সংকল্পক প্ৰকাশ কৰিছে।”

বডোদৰাত এই পদযাত্ৰাই তৃতীয় দিনটোত প্ৰৱেশ কৰাৰ পাছত সেৱাছীৰ আৰণ্য ল’নত অনুষ্ঠিত উদ্বোধনী সাংস্কৃতিক কাৰ্যসূচীত ভাষণ আগবঢ়াই কেন্দ্ৰীয় মন্ত্ৰী সৰ্বানন্দ সোণোৱালে কয় যে এই যাত্ৰা আমাৰ সামূহিক সংকল্প আৰু ৰাষ্ট্ৰীয় গৌৰৱৰ এক প্ৰমাণ। “আমাৰ যুৱক-যুৱতীসকলৰ উৎসাহে প্ৰমাণ কৰিছে যে এক ভাৰতৰ আত্মাই প্ৰতিগৰাকী নাগৰিকক এতিয়া গভীৰভাৱে অনুপ্ৰাণিত কৰে। প্ৰধানমন্ত্ৰী নৰেন্দ্ৰ মোদী ডাঙৰীয়াৰ গতিশীল নেতৃত্বত ভাৰত ‘শ্ৰেষ্ঠ ভাৰত আৰু বিকশিত ভাৰত’ৰ অভিযানৰ সৈতে আগবাঢ়ি গৈ আছে,” সৰ্বানন্দ সোণোৱালে কয়।

এই পদযাত্ৰাটোৰ আৰম্ভণি অংক্লাবৰ হৰেকৃষ্ণ মন্দিৰৰ পৰা আৰম্ভণি হৈছিল আৰু ছাত্ৰ-ছাত্ৰী, সাংস্কৃতিক দল তথা সমাজসেৱী সংগঠনৰ ব্যাপক অংশগ্ৰহণ দেখা গৈছিল। ‘মাই ভাৰত’ৰ মতে এই পদক্ষেপৰ অধীনত ইতিমধ্যে ৬২০তকৈও অধিক জিলা আৰু ৪৪০টা লোকসভা সমষ্টিত ১,৫১৪টা পদযাত্ৰা অনুষ্ঠিত হৈছে, য’ত ১৫ লাখৰো অধিক নাগৰিকে অংশগ্ৰহণ কৰি সৰ্বমুঠ ১০,০০৭ কিল’মিটাৰ পথ অতিক্ৰম কৰিছে।

উদ্বোধনী কাৰ্যসূচীত “বিথালভাই – মণিবেন – চৰ্দাৰ” বিষয়বস্তুৰ বিষয়ে চৰ্দাৰ গাথা শীৰ্ষক কাৰ্যসূচী পৰিবেশন কৰা হয়। তাৰপাছত গ্ৰামসভা, নৃত্য নাটিকা আৰু ভজন সন্ধ্যাৰ দৰে সাংস্কৃতিক অনুষ্ঠানৰ জৰিয়তে ঐক্যৰ বাৰ্তা প্ৰচাৰ কৰা হয়।

শনিবাৰে এই পদযাত্ৰা বডোদৰাৰ বিভিন্ন গুৰুত্বপূৰ্ণ স্থানৰ মাজেৰে আগবাঢ়ি নৱলখী ময়দানত এক বৃহৎ সাংস্কৃতিক অনুষ্ঠানৰ জৰিয়তে সমাপ্ত হ’ব।

চৰ্দাৰ বল্লভভাই পেটেলৰ ১৫০সংখ্যক জয়ন্তী উপলক্ষে আয়োজিত এই ১১ দিনীয়া যাত্ৰাই ৰাষ্ট্ৰীয় সংহতি আৰু আত্মনিৰ্ভৰশীলতাৰ আদৰ্শক লৈ ভাৰতক উজ্জীৱিত কৰি তুলিছে।

উক্ত কাৰ্যসূচীত সৰ্বানন্দ সোণোৱালৰ সৈতে কেন্দ্ৰীয় মন্ত্ৰী মনসুখ মাণ্ডৱ্য, কেন্দ্ৰীয় পথ পৰিবহণ আৰু ঘাইপথ মন্ত্ৰ্যালয়ৰ ৰাজ্যিক মন্ত্ৰী অজয় টামটাৰ লগতে সাংসদ, বিধায়কসকল আৰু অন্যান্য গণ্য-মান্য ব্যক্তিসকল উপস্থিত থাকে।