ভাৰতীয় নাৰ্ছ নিমিষা প্ৰিয়াক বচাবলৈ এটাই (Nimisha Priya) উপায়, আশা পূৰণ হ’বনে? ১ দিনৰ পিছত য়েমেনত ফাঁচী দিব নিমিষাক।

সমগ্ৰ দেশে কেৰেলাৰ নাৰ্ছ নিমিষা প্ৰিয়াৰ জীৱন ৰক্ষাৰ বাবে প্ৰাৰ্থনা কৰিছে। পৰিয়ালৰ পৰা আৰম্ভ কৰি চৰকাৰলৈকে সকলোৱে যৎপৰোনাস্তি চেষ্টা কৰিছে। বিষয়টো উচ্চতম ন্যায়ালয়ত উপনীত হ’ল যদিও ভাৰত চৰকাৰে আদালতত যি ক’লে তাৰ পাছত ভাৰতীয় পর্যায়ত নিমিষাক বচাবলৈ সকলো আশাৰ অন্ত পৰিল৷ এতিয়া মাত্ৰ এটা বিকল্প বাকী আছে।

১৬ জুলাইত মৃত্যুদণ্ড দিয়া হ’ব নিমিষা প্ৰিয়াক। এতিয়া য়েমেনত মৃত্যুদণ্ড ভয়ত থকা কেৰালাৰ নাৰ্ছ নিমিছা প্ৰিয়াক বচাবলৈ প্ৰায় সকলো আশা শেষ। এই বিষয়ত ভাৰত চৰকাৰে উচ্চতম ন্যায়ালয়ক সকলো কথা স্পষ্টকৈ কৈছে। সোমবাৰে উচ্চতম ন্যায়ালয়ত কেন্দ্ৰটোৱে কয় যে য়েমেনত হত্যাৰ অপৰাধত মৃত্যুদণ্ডৰ সন্মুখীন হোৱা কেৰালাৰ ভাৰতীয় নাৰ্ছ নিমিষা প্ৰিয়াৰ গোচৰত হস্তক্ষেপ কৰাৰ ক্ষমতা সীমিত। কেন্দ্ৰই ইয়াক “অতি জটিল বিষয়” বুলি অভিহিত কৰি কয় যে ইয়াৰ বাবে অতি কম কূটনৈতিক বিকল্প উপলব্ধ।

ন্যায়াধীশ সন্দীপ মেহতাৰ নেতৃত্বত গঠিত বিচাৰপীঠৰ সন্মুখত হাজিৰ হৈ ভাৰতৰ এটৰ্নী জেনেৰেলে কয় যে য়েমেনত কি হৈছে সেইটো জানিব পৰাৰ কোনো উপায় নাই। তেওঁ আৰু কয় যে চৰকাৰে ৰাজহুৱা অভিযুক্তকে ধৰি য়েমেনৰ বিষয়াসকলৰ সৈতে যোগাযোগত আছে আৰু আলোচনা অব্যাহত থকাৰ সময়তে প্ৰিয়াক ফাঁচী দিয়াটো পিছুৱাই দিয়াৰ চেষ্টা কৰিছে।

ভাৰত চৰকাৰে আদালতত কয় যে প্ৰিয়াৰ জীৱন ৰক্ষাৰ একমাত্ৰ ব্যৱহাৰিক বিকল্প এতিয়া কেৱল আপোচহে, যদিহে মৃত য়েমেনৰ নাগৰিকজনৰ পৰিয়ালে ইয়াক গ্ৰহণ কৰিবলৈ সাজু হয়। ১৮ জুলাইত পৰৱৰ্তী শুনানি নিৰ্ধাৰণ কৰাৰ সময়ত বিচাৰপীঠে নিজৰ আদেশত কয় যে, “পৰৱৰ্তী তাৰিখত পক্ষসমূহে গোচৰৰ অৱস্থাৰ বিষয়ে আদালতক অৱগত কৰিব পাৰে।” কিন্তু তেতিয়ালৈকে হয়তো বহু দেৰি হৈ গৈছে। কাৰণ নিমিষাক ১৬ জুলাইত য়েমেনৰ ৰাজধানী ছানা’ৰ কাৰাগাৰত ফাঁচী দিয়াৰ কথা।

মানুহে এতিয়াও ভাবি আছে যে নিমিষাৰ জীৱন ৰক্ষা কৰিব পৰা কিবা এটা বিকল্প থাকিব লাগিব। গতিকে এতিয়া বাকী থকা একমাত্ৰ বিকল্পটো হ’ল চৰকাৰে উচ্চতম ন্যায়ালয়ক কোৱা কথা – আপোচ মানে ‘ব্লাড মানি’।

‘ব্লাড মানি’ শ্বৰীয়ত আইনত এক বিধান, য’ত মৃতকৰ পৰিয়ালক আৰ্থিক ক্ষতিপূৰণ দি অপৰাধীৰ শাস্তি ক্ষমা কৰিব পাৰি। বিশেষকৈ অনিচ্ছাকৃত হত্যাকাণ্ডৰ ক্ষেত্ৰত এই কথা প্ৰযোজ্য। নিমিষাৰ ক্ষেত্ৰত তেওঁৰ পৰিয়াল আৰু ‘ছেভ নিমিষা প্ৰিয়া ইণ্টাৰনেশ্যনেল একচন কাউন্সিল’ই তালালৰ পৰিয়ালক ১০ লাখ মাৰ্কিন ডলাৰ (প্ৰায় ৮.৬ কোটি টকা) আগবঢ়াইছে। কিন্তু এই ক্ষতিপূৰণ গ্ৰহণ কৰিবলৈ এতিয়াও সাজু হোৱা নাই তালালৰ পৰিয়াল। একাংশ সূত্ৰৰ মতে, তেওঁলোকে ইয়াক নিজৰ সন্মানৰ প্ৰশ্ন বুলি অভিহিত কৰিছে।

কেৰালাৰ পালাক্কাড জিলাৰ পৰা অহা নিমিষা প্ৰিয়াই ২০০৮ চনত নাৰ্ছ হিচাপে য়েমেনলৈ গৈছিল।তাত চিকিৎসালয়ত কাম কৰিছিল আৰু পিছলৈ ২০১৫ চনত য়েমেনৰ নাগৰিক তালাল আব্দো মাহদীৰ সৈতে ক্লিনিক আৰম্ভ কৰিছিল। য়েমেনৰ আইন অনুসৰি বিদেশীক ব্যৱসায় আৰম্ভ কৰিবলৈ স্থানীয় অংশীদাৰৰ প্ৰয়োজন। কিন্তু তলালৰ লগত তাইৰ সম্পৰ্ক অৱনতি ঘটিল। নিমিষাৰ অভিযোগ যে তালালে তেওঁৰ পাছপ’ৰ্ট জব্দ কৰিছিল, আৰ্থিক আৰু শাৰীৰিকভাৱে হাৰাশাস্তি কৰিছিল আৰু ভুৱা নথি-পত্ৰৰে নিজকে স্বামী বুলি দাবী কৰি শোষণ কৰিছিল।

২০১৭ চনত নিমিষাই তালালক পাছপ’ৰ্ট ঘূৰাই পোৱাৰ প্ৰয়াসত এনাস্থেচিয়াৰ বেজী দিছিল যদিও ভুল ড’জৰ বাবে তালালৰ মৃত্যু হয়। ইয়াৰ পিছত ২০১৮ চনত নিমিছাক গ্ৰেপ্তাৰ কৰি হত্যাৰ গোচৰত দোষী সাব্যস্ত কৰা হয়।২০২০ চনত ছানাৰ এখন আদালতে তেওঁক মৃত্যুদণ্ডৰ শাস্তি প্ৰদান কৰে, যিটো ২০২৩ চনত য়েমেনৰ উচ্চতম ন্যায়িক পৰিষদে সমৰ্থন কৰে।

নিমিষাৰ জীৱন এতিয়া তলালৰ পৰিয়ালৰ সিদ্ধান্তৰ ওপৰত নিৰ্ভৰশীল। যদি তেওঁলোকে ক্ষতিপূৰণৰ বাবে সন্মতি দিয়ে, তেন্তে নিমিষাৰ শাস্তি ক্ষমা কৰিব পাৰিব। কিন্তু এতিয়ালৈকে কোনো ইতিবাচক সঁহাৰি পোৱা নাই আৰু সময় দ্ৰুতগতিত শেষ হৈ গৈ আছে। ভাৰত চৰকাৰ, নিমিষাৰ পৰিয়াল আৰু সমৰ্থকসকলে সম্ভৱপৰ সকলো চেষ্টা কৰি আছে যদিও পৰিস্থিতি জটিল।