Nature Camp 3.0 । পু এন ফ’ ৱাইল্ড, অসম বিজ্ঞান সমিতি, ঢকুৱাখনা শাখা, মেগামিক্স প্ৰকৃতি সংঘৰ উদ্যোগত আৰু অসম বিজ্ঞান সমিতি , ঢকুৱাখনা শাখা মহিলা কোষৰ সহযোগত ইংৰাজী ৪ জুলাইৰ পৰা ৭ জুলাই, ২০২৫ লৈ আৱাসিক প্ৰকৃতি শিবিৰ ৩.০ অনুষ্ঠিত হৈ যায়।

পৰিৱেশ বিষয়টো কেৱল কিতাপৰ মাজতে সীমাবদ্ধ নহয়। পৰিৱেশ বিষয়টো জানিবলৈ, বুজিবলৈ হ’লে আমি ইয়াৰ বিষয়ে পুংখানুপুংখভাৱে অধ্যয়ন কৰিব লাগিব লগতে পৰিৱেশক ওচৰৰ পৰা অনুধাৱন কৰিবলৈ হ’লে পৰিৱেশ মাজত নিজেই থাকি সম‌য় অতিবাহিত কৰিব লাগিব ।

বৰ্তমান সময়ত আমাৰ ছাত্ৰ-ছাত্ৰী সকলৰ প্ৰতি সততে এটা প্ৰশ্নৰ সন্মুখীন হোৱা দেখা যায় বা অভিভাৱক সকলে নিজৰ সন্তানৰ বিষয়ে কোৱা শুনা যায় আজিকালি ইন্টাৰনেট,ম’বাইল, লেপটপ আদি অধিক সময় দিয়াৰ বাবে ছাত্ৰ-ছাত্ৰী সকলে আমাৰ ধুনীয়া পৰিৱেশটোৰ সৈতে কৰবাত নহয় কৰাবত একাত্ম হব পৰা নাই যেন অনুভৱ হয়। পৰিৱেশ বিষয়ক কথাবোৰ ওচৰৰ পৰা অনুভৱ কৰিবলৈ আৰু আমাৰ ছাত্ৰ-ছাত্ৰী সকলক আমাৰ ধুনীয়া পৰিৱেশটোৰ সৈতে একাত্ম কৰিব পৰাকৈ এটা পৰিৱেশ গঢ়ি দিবৰ বাবে বিগত বৰ্ষ বোৰৰ দৰে এই বছৰো আয়োজন কৰা হৈছে আৱাসিক প্ৰকৃত শিবিৰ।
আৱাসিক প্ৰকৃতি শিবিৰ সম্পৰ্কে পু এন ফ’ ৱাইল্ডৰ প্ৰতিষ্ঠাপক মানস প্ৰতিম দত্ত, ধ্ৰুৱ জ্যোতি চেতিয়া আৰু বিমান সন্দিকৈয়ে জানিবলৈ দিয়ামতে অসম বিজ্ঞান সমিতি, ঢকুৱাখনা শাখাৰ সম্পাদক বিমান সন্দিকৈয়ে আঁতধৰা উদ্বোধনী অনুষ্ঠানৰ উদ্বোধন কৰে অসম বিজ্ঞান সমিতিৰ প্ৰধান সচিব শ্ৰীযুত মৃণাল কুমাৰ হাজৰিকাই। ভাষণপ্ৰসংগত হাজাৰিকাই পৰিৱেশ আৰু প্ৰকৃতিৰ নিয়মাৱলী লগতে অসমৰ বিজ্ঞান চৰ্চাৰ ইতিহাস সম্পৰ্কে বহুখিনি কথা ব্যক্ত কৰে। উদ্বোধনী অনুষ্ঠানত পৰিৱেশমিত্ৰ দেৱজিৎ ফুকন , দিগেন্দ্ৰ নাথ হাজৰিকা, ডঃ নৰেন্দ্ৰ নাথ দত্ত , পৰমানন্দ দত্ত, পদ্মা বৰা , স্বৰ্ণ লতা গগৈ চমুৱা ,হীমাশ্ৰী চমুৱা, হেমন্ত কুমাৰ বৰুৱা আদি উপস্থিত থাকে । প্ৰথম দিনৰ প্ৰথম কাৰ্যসূচী হিচাপে আৱাসিক ছাত্ৰছাত্ৰীৰ চিনাকি অনুষ্ঠান আৰম্ভ হয় পূৰ্ণিমা দেৱীৰ সঞ্চালনাত। ইয়াৰ পিছতেই তিনিজন সমল ব্যক্তি ক্ৰমে সত্যব্ৰত গগৈ , যুগল সন্দিকৈ আৰু নয়নদীপ দত্তই হাতে কামে বিজ্ঞান , দৈনন্দিন জীৱনত গণিত আদি বিভিন্ন দিশ অৱলোকন কৰে ।

দ্বিতীয় দিনৰ কাৰ্যসূচী আৰম্ভ হয় পক্ষী নিৰীক্ষণৰ জৰিয়তে । উক্ত কাৰ্যসূচী ৰূপায়ন কৰে অসম বিশ্ববিদ্যালয়ৰ গৱেষক ছাত্ৰ শ্যামল শইকীয়াই । ইয়াৰ পিছতে পৰিৱেশমিত্ৰ দেৱজিৎ ফুকনৰ পৰিৱেশ, প্ৰকৃতি আৰু মানুহ বিষয়ক বক্তব্য আগবঢ়ায়। নেচাৰ্চ বেকনৰ প্ৰতিষ্ঠাপক অসম গৌৰৱ সৌম্যদ্বীপ দত্ত জৈৱবৈচিত্ৰ আৰু মানুহ বিষয়ক আলোচনাচক্ৰত অংশগ্ৰহণ কৰে আৰু প্ৰশিক্ষাৰ্থীসকলৰ সৈতে বাৰ্তালাপ অনুষ্ঠানত অংশ লয়। ইয়াৰ পিচতেই ডঃ অমল চন্দ্ৰ দত্ত দেৱে প্লাষ্টিকৰ পৰা সম্পদলৈ শীৰ্ষক এটি আলোচনা power point presentation কৰে। ৰাতিলৈ ত্ৰীবেণী গগৈ আৰু ৰুবি বৰাই পৰ্বতাৰোহনৰ আদিপাঠ বিষয়ক এটি মনোগ্ৰাহী আলোচনা আগবঢ়াই।
তৃতীয় দিনৰ কাৰ্যসূচী আছিল ক্ষেত্ৰ অধ্যয়ন , পৰ্বতাৰোহন আৰু ট্ৰেকিং । ত্ৰিবেণী ৰঞ্জন গগৈ, ৰুবী বৰাৰ নেতৃত্বত শিবিৰৰ ছাত্ৰছাত্ৰীক লৈ যোৱা হয় অৰুণাচল প্ৰদেশত অৱস্থিত ৰূপহী জলপ্ৰপাতলৈ । দিনটো ট্ৰেকিং , ক্ষেত্ৰ অধ্যয়ন, জলপ্ৰপাতৰ পৰিৱেশ নিকাকৰণ , বনভোজ আদিৰে দিনটোৰ সামৰণি পৰে । ট্ৰেকিংৰ দলটোত য়াচমিন চুলতান, দেৱজিৎ ফুকন , স্বৰ্ণলতা গগৈ, মানস প্ৰতিম দত্ত , ধ্ৰুৱ জ্যোতি চেতিয়া , সুনীল চেতিয়া, বিমান সন্দিকৈ আদিয়ে সহযোগ কৰে ।

চতুৰ্থ দিনৰ কাৰ্যসূচী আৰম্ভ হয় প্ৰদীপ কুমাৰ দত্ত ৰ জীৱাশ্ম ইন্ধন আৰু মানুহ বিষয়ক আলোচনাৰ জৰিয়তে । মাজুলীৰ সুনীল কুমাৰ বৰাৰ থলুৱা মাছ সংৰক্ষণ আৰু আমাৰ প্ৰকৃতি বিষয়ক এক তত্ত্বগধুৰ আলোচনা আগবঢ়াই । সামৰণি অনুষ্ঠানত উপস্থিত আছিল ডঃ নৰেন্দ্ৰ নাথ দত্ত, দেৱজিৎ ফুকন, বিনোদ ফুকন, স্বৰ্ণলতা গগৈ, আদি উপস্থিত থাকে । প্ৰতিজন অংশগ্ৰহণকাৰীকে একোটাকৈ টি-চাৰ্ট, একোখন মানপত্ৰ, সমল ব্যক্তিসকলক কৃতজ্ঞতা পত্ৰ, কাপোৰৰ বেগ, বিচনী আদি প্ৰদান কৰা হয়।
লখিমপুৰ , ধেমাজি, আৰু মাজুলী জিলাৰ মুঠ ৪৩ জন ছাত্ৰছাত্ৰীৰে অংশগ্ৰহণ কৰা প্ৰকৃতি শিবিৰৰ শ্ৰেষ্ঠ শিবিৰাৰ্থী বঁটা লাভ কৰে ঢকুৱাখনা মহাবিদ্যালয়ৰ প্ৰাণীবিজ্ঞান বিভাগৰ ছাত্ৰী পৰি দলেয়ে।