আমেৰিকাত লং জাম্পত সোণৰ পদক অৰ্জন অসম সন্তান ৰিম্পী বুঢ়াগোহাঁইৰ।(Rimpi buragohain)
WORLD POLICE MEETৰ প্ৰতিযোগিতাত এই সাফল্য এথলীট ৰিম্পীৰ।
শিৱসাগৰ জিলাৰ মৌজাৰ পুনিবিল গোহাঁই গাঁৱৰ নিৱাসী ভৰত বুঢ়াগোহাঁই কন্যা ৰিম্পী বুঢ়াগোহাঁই।
লং জাম্পত সোণৰ পদক অৰ্জন কৰে এথলীট ৰিম্পী বুঢ়াগোহাঁইয়ে।
আলাবামাৰ বাৰ্মিংহাম চহৰত অনুষ্ঠিত হৈছিল এই প্ৰতিযোগিতা।
২৭ জুনৰ পৰা ৬ জুলাইলৈ অনুষ্ঠিত হ’ব ৱৰ্ল্ড পুলিচ এথলেটিকছ চেম্পিয়নশ্বিপ।
অসম ৰাইফলছৰ হৈ প্ৰতিযোগিতাত নামিছিল ৰিম্পী বুঢ়াগোহাঁই।
গুৱাহাটী: Kharghuli Murder গুৱাহাটীৰ খাৰগুলি অঞ্চলত সংঘটিত এক ভয়ংকৰ হত্যাকাণ্ডই চহৰবাসীক আলোড়িত কৰিছে। ৬৯ বছৰীয়া বৃদ্ধা বন্দনা দাসক নৃশংসভাৱে হত্যা কৰাৰ অভিযোগ স্বীকাৰ কৰিছে তেওঁৰ কেয়াৰটেকাৰে। আৰক্ষীৰ তদন্তত উদ্ঘাটিত হয় যে ৰাতুল দাস নামৰ কেয়াৰটেকাৰজনে এই ভয়ংকৰ অপৰাধ সংঘটিত কৰাৰ কথা স্বীকাৰ কৰিছে।
স্বীকাৰোক্তিৰ আধাৰত, ৰাতুল দাসে জানিবলৈ দিয়ে যে, বন্দনা দাসৰ পৰা মানসিক আৰু মৌখিক অপমান সহ্য কৰি তেওঁ মানসিকভাৱে ক্ষুব্ধ হৈছিল। বন্দনাই প্ৰায়েই তেওঁৰ আৰু তেওঁৰ পৰিয়ালৰ বিষয়ে অপমানজনক ভাষা ব্যৱহাৰ কৰিছিল বুলি অভিযোগ কৰে ৰাতুলে। তেওঁ কোৱাৰ মতে, বন্দনাই তেওঁৰ শিশু সন্তানৰ বিষয়ে অপমানজনক কথা কোৱাটো তেওঁ আটাইতকৈ অপমানজনক বুলি অনুভৱ কৰিছিল। এই সকলোয়ে তেওঁৰ মনত দীৰ্ঘদিন ধৰি ক্ষোভ সৃষ্টি কৰি ৰাখিছিল।
অপৰাধ সংঘটিত হোৱাৰ নিশা, ৰাতুলে মদ্যপান কৰি ঘৰলৈ উভতি আহে। মাদকৰ প্ৰভাৱত থকা অৱস্থাত আৰু মানসিক উত্তেজনাত তেওঁ নিয়ন্ত্ৰণ হেৰুৱাই বিভীষিকাময় এক কাণ্ড ঘটায়। আৰক্ষীৰ জিজ্ঞাসাবাদত ৰতুলে জানিবলৈ দিয়ে যে, তেওঁ প্ৰথমে বৃদ্ধাক গলাচেপি হত্যাকাৰ্য সম্পন্ন কৰে আৰু তাৰ পিছতেই কাঁচি ব্যৱহাৰ কৰি গলত গভীৰ আঘাত দিয়ে।
ঘটনাৰ পাছত পুৱা বন্দনা দাসৰ মৃতদেহ তেওঁৰ ঘৰতে উদ্ধাৰ হয়। তেওঁৰ কোঠাৰ দুৱাৰ খোলা অৱস্থাত পোৱা গৈছিল, যাৰ ফলত প্ৰথমতে আৰক্ষীয়ে সন্দেহ কৰে যে, হত্যাকাণ্ডত কোনো ঘনিষ্ঠ ব্যক্তি জড়িত হ’ব পাৰে।
আৰক্ষীয়ে তদন্ত আৰম্ভ কৰাৰ পিছতে দুই কেয়াৰটেকাৰ—ৰাতুল দাস আৰু কুঞ্জলতা দাসক সোধ-পোছৰ বাবে আটক কৰে। ইয়াৰ পিছতে ৰাতুলে হত্যাকাণ্ডৰ কথা স্বীকাৰ কৰে।
শাওণ মাহটো ভোলানাথৰ বিশেষ মাহ (Foods to Avoid in Sawan) বুলি গণ্য কৰা হয়। বয়োজ্যেষ্ঠসকলে প্ৰায়ে কয় যে এই মাহত কিছুমান খাদ্য খাব নালাগে। কেৱল ধৰ্মীয় কৰাণে নহয়, বৈজ্ঞানিক কাৰণো আছে।
শাওণ মাহত বতৰৰ বহুতে পৰিৱৰ্তন হয়। শাওণ মাহত মানুহৰ জীৱনশৈলীৰ লগতে খাদ্যাভ্যাসও সলনি হয়। শাওণ মাহত কি কি খাব নালাগে জানো আহক-
শাওণত গাখীৰৰ সামগ্ৰী নাখাব। কাৰণ মাটিত থকা বেছিভাগ পোকৰ সংক্ৰমণ ঘাঁহ বা সেউজীয়া বস্তুত বিয়পে। ঘাঁহবোৰ গৰু বা ম’হে খায় আৰু সেই গাখীৰ আমাৰ ঘৰলৈ আহে, যিটো স্বাস্থ্যৰ বাবে ক্ষতিকাৰক হ’ব পাৰে। দৈ খাব নালাগে কাৰণ বৰ্তমান পৰিৱেশত আৰ্দ্ৰতা আৰু বীজাণু বাঢ়িছে, যাৰ ফলত ক্ষতিকাৰক বেক্টেৰিয়া বাঢ়ি যায়। ইয়াৰ উপৰিও দৈ ঠাণ্ডা, যাৰ বাবে ঠাণ্ডা আৰু কাহৰ ভয়ও দেখা যায়।
আয়ুৰ্বেদৰ মতে বৰষুণৰ বাবে মানুহৰ পাচনতন্ত্ৰ দুৰ্বল হৈ পৰে। আনহাতে নহৰু আৰু পিঁয়াজৰ প্ৰকৃতি গৰম, গতিকে শাওণত নহৰু আৰু পিয়াজ খোৱাৰ ফলত পেট ফুলা, গেছ আৰু বদহজমৰ সমস্যাৰ সৃষ্টি হ’ব পাৰে।
আনহাতে শাওণত বেঙেনা খাব নালাগে। শাওণত বেঙেনাত পোক-পৰুৱা যথেষ্ট বৃদ্ধি পায়, যাৰ ফলত সংক্ৰমণৰ সম্ভাৱনা বৃদ্ধি পাব পাৰে।
শাওণত সেউজীয়া পাতৰ পাচলিও খাব নালাগে, কাৰণ এই বতৰত মাটিত থকা বেছিভাগ পোক-পৰুৱা ওপৰলৈ আহি সেউজীয়া পাতৰ শাক-পাচলি নষ্ট কৰি পেলায়, যাৰ বাবে ভাইৰাছ সংক্ৰমণৰ আশংকা বৃদ্ধি পোৱাৰ আশংকা থাকে।
গতিকে শাওণ মাহত এইসমূহ খাদ্য খাব নালাগে।
ডিজিটেল ডেস্ক: Pankaj Pathak গোৱালপাৰাত পংকজ পাঠকৰ সৈতে সংঘটিত কাণ্ডে ৰাজ্যজুৰি সৃষ্টি কৰিছে প্ৰতিক্ৰিয়া। এক শিৱিৰত সংঘটিত অপ্ৰীতিকৰ ঘটনাত পংকজ পাঠকক কাণত ধৰাই ক্ষমা বিচাৰিবলৈ বাধ্য কৰা দৃশ্য ভাইৰেল হোৱাৰ পাছত এই বিষয়টোৱে নতুন মোড় লৈছে।
ঘটনাটোৰ পাছতে পংকজ পাঠকে নিজৰ ছ’চিয়েল মিডিয়া একাউণ্টত এটি বিশেষ মন্তব্য কৰি কয়, “মই জীয়াই আছোঁ ৰাইজ”। লগতে তেওঁ ঘোষণা কৰে যে কাইলৈ কোকৰাঝাৰত তেওঁ উপস্থিত থাকিব কেম্পৰ বাবে।
এই ঘটনাৰ প্ৰেক্ষাপটত পংকজ পাঠকক সমৰ্থন আগবঢ়াইছে বীৰ লাচিত সেনা। সংগঠনটোৰ কামৰূপ জিলা সমিতিৰ মুখ্য সচিব বিকাশ অসমে স্পষ্টভাৱে কয় —
“জাতি তথা ৰাইজৰ বাবে কাম কৰা কোনো অসমীয়াক কোনেও হাত নলগাব। আমি মুখ্যমন্ত্ৰী ডাঙৰীয়া আৰু অসম পুলিচৰ হস্তক্ষেপ বিচাৰিছোঁ। কাৰো কুচক্ৰান্ত নচলিব। এজন অসমীয়াৰ হিচাপে পংকজ পাঠকৰ সৈতে আছোঁ।”
এই মন্তব্যৰ পাছত বহু অসমীয়াই সামাজিক মাধ্যমত বিভিন্ন ধৰণৰ প্ৰতিক্ৰিয়া ব্যক্ত কৰিছে। পংকজ পাঠকৰ সৈতে হোৱা আচৰণ শোভন নহয় বুলি একাংশে মন্তব্য জনাইছে, আনহাতে আন কিছুয়ে বিষয়টোক লঘুভাৱে ল’বলৈ আহ্বান জনাইছে।
মই দুমাহমান পূৰ্বে দিল্লীত ইউৰোপৰ(Startup India) এগৰাকী জ্যেষ্ঠ মন্ত্ৰীক লগ পাইছিলোঁ। তেতিয়া তেওঁ ভাৰতৰ ডিজিটেল পেমেন্ট বিপ্লৱক লৈ আশ্চৰ্য্য প্ৰকাশ কৰিছিল। সমগ্ৰ ভাৰতৰ জনসাধাৰণে ম’বাইল ফোনৰ ব্যৱহাৰেৰে পেমেন্ট কৰা কাৰ্য্যই তেওঁক অধিক আকৰ্ষিত কৰিছিল। সৰু-সৰু গাঁৱৰ পৰা ডাঙৰ-ডাঙৰ চহৰলৈকে সকলোতে—চাহ বিক্ৰেতাৰ পৰা আৰম্ভ কৰি দোকানীলৈকে—সকলোৱে সহজেই ডিজিটেল পেমেন্ট পদ্ধতি ব্যৱহাৰ কৰিছে।
তেতিয়া তেওঁ প্ৰশ্ন কৰিছিলঃ ভাষা আৰু ভূগোলৰ বৈচিত্ৰ্যসম্পন্ন ভাৰতে কেনেকৈ এই মাত্ৰাত উপনীত হ’ল?
তেনেতে মই তেওঁক এখন ৫০০ টকীয়া নোট দেখুৱাইছিলোঁ। তাত ‘পাঁচশ টকা’ শব্দটো ১৭ টা ভাষাত লিখা আছে। এয়া এটা সহজ কথা, অথচ ভাৰতৰ বৈচিত্ৰ্যৰ এক শক্তিশালী প্ৰতীক; আৰু প্ৰধানমন্ত্ৰী শ্ৰী নৰেন্দ্ৰ মোদীৰ দূৰদৰ্শী নেতৃত্বত এই বৈচিত্ৰ্যক প্ৰযুক্তিৰ জৰিয়তে সেতুবন্ধনেৰে আমাৰ সর্ববৃহৎ শক্তিলৈ ৰূপান্তৰিত কৰিছোঁ।
এই অন্তৰ্ভুক্তিৰ মনোভাৱে আমাৰ প্ৰধানমন্ত্ৰীৰ মূল দৰ্শনক প্ৰতিফলিত কৰাৰ লগতে প্ৰযুক্তিৰ প্ৰতি আমাৰ দৃষ্টিভংগীক সংজ্ঞায়িত কৰে—যিয়ে প্ৰযুক্তিক গণতান্ত্ৰিক আৰু সকলোৰে উপযোগী কৰি তুলিছে।
দোকানৰ স্পীকাৰত বাজি উঠা পেমেন্ট এলাৰ্টৰ পৰা আৰম্ভ কৰি তৎক্ষণাত এছ.এম.এছ. নিশ্চিতকৰণলৈকে, সমগ্ৰ ব্যৱস্থাটো বাধা-মুক্ত আৰু পোনপটীয়া ভাবে ডিজাইন কৰা হৈছে। ভিমে (BHIM) ২০ টা ভাষাত, উমংগে (UMANG) ১৩ টা ভাষাত কাম কৰে—এই সকলোবোৰে অন্তৰ্ভুক্তিৰ একেই মনোভাৱক প্ৰতিফলিত কৰে।
ডিজিটেল ইণ্ডিয়া কাৰ্য্যক্ৰমৰ ১০ বছৰ সম্পূৰ্ণ হোৱাৰ সময়তে এই ৰূপান্তৰ এক গৌৰৱপূৰ্ণ উদাহৰণ হিচাপে পৰিগণিত হৈছে। আমি বহু দূৰ আগবাঢ়িলোঁ আৰু আমাৰ সুযোগ অপৰিসীম।
অন্ত্যোদয়ৰ সপোন—মৰ্য্যাদা আৰু সুযোগেৰে অন্তিম ব্যক্তিজনক স্পৰ্শৰ—এই দৰ্শনে আমাক পথ-প্ৰদৰ্শন কৰি আহিছে।
ইণ্ডিয়াষ্টেক
দহ বছৰ পূৰ্বে প্ৰধানমন্ত্ৰী মোদীৰ এক স্পষ্ট ধাৰণাৰে এই যাত্ৰা আৰম্ভ হৈছিল — ধাৰণাটো আছিল এনে এক ডিজিটেল আন্তঃগাঁথনি গঢ়ি তোলা, যি কেৱল কেইজনমানক নহয়, সকলোকেই সেৱা আগবঢ়ায়। ইয়াৰ ফলশ্ৰুতিত আজি বিশ্বই ইণ্ডিয়াষ্টেক বুলি স্বীকৃতি জনোৱা ব্যৱস্থাটোৰ সৃষ্টি হয়।
ইয়াৰ মূলতে আছে বিশ্বৰ সৰ্ববৃহৎ বায়’মেট্ৰিক পৰিচয় ব্যৱস্থা—আধাৰ। ই ১৪০ কোটি নাগৰিকক এক অনন্য (unique) ডিজিটেল পৰিচয় প্ৰদান কৰিছে। প্ৰতিদিনে নকোটিৰো অধিক আধাৰ প্ৰমাণীকৰণ সম্পন্ন হয়, ইয়াৰ ফলশ্ৰুতিত অত্যাৱশ্যকীয় সেৱাসমূহ ক্ষীপ্ৰতাৰে আৰু বিশ্বাসেৰে লাভ কৰাটো সম্ভৱ হৈ উঠিছে।
এটা ঘৰুৱা উদ্ভাৱন ইউপিআই (UPI)-এ সমগ্ৰ ভাৰততে বিত্তীয় লেনদেন ব্যৱস্থাৰ ৰূপান্তৰ ঘটাইছে। পথৰ কাষৰ ক্ষুদ্ৰ বিক্ৰেতাৰ পৰা আৰম্ভ কৰি বৃহৎ ব্যৱসায়ীলৈকে সকলোোৱে ইয়াক সহজেই ব্যৱহাৰ কৰি আছে। এতিয়া দৈনিক গড়ে ৬০ কোটিৰো অধিক ইউপিআই লেন-দেন সম্পন্ন হয়। ইয়াৰ জৰিয়তে আমাৰ দৈনন্দিন জীৱনৰে ডিজিটেল পে’মেন্টৰ সম্পৰ্কৰ গভীৰতা প্ৰতিফলিত হৈছে।
ডিজিলকাৰ (DigiLocker)-এ শাসন ব্যৱস্থা আৰু নাগৰিকৰ ইয়াত প্ৰৱেশ কাৰ্য্যক অধিক সহজ কৰি তুলিছে। ইয়াৰ জৰিয়তে মাত্ৰ এটা ক্লিকতে আপোনাৰ নথি-পত্ৰসমূহ উপলব্ধ হৈছে। ড্ৰাইভিং লাইচেন্সেই হওঁক, শৈক্ষিক প্ৰমাণপত্ৰেই হওঁক বা আন-আন অত্যাৱশ্যকীয় ৰেকৰ্ডেই হওঁক—লাখ-লাখ লোক এতিয়া এইসমূহ নিৰাপদে আৰু সুবিধাজনকভাৱে লগত লৈ ফুৰিবলৈ সক্ষম হৈছে।
ম’বাইল ফোনৰ ব্যাপক ব্যৱহাৰ অবিহনে এয়া সম্ভৱ হৈ নুঠিল হেঁতেন।
আজিৰ ভাৰতৰ প্ৰায় ৯০% লোকে ম’বাইল ডিভাইচ ব্যৱহাৰ কৰে। ই পোনপটীয়াকৈ হাতৰ মুঠিতেই প্ৰযুক্তিৰ শক্তি উপলব্ধ কৰি তোলে।
ইণ্ডিয়াষ্টেক এখন বিশ্ব আৰ্হি হিচাপে পৰিগণিত হৈছে। জি-২০ ত ভাৰতৰ ডিজিটেল পাব্লিক ইনফ্ৰাষ্ট্ৰাকচাৰ (DPI) এজেণ্ডাৰ পোষকতাৰে গ্ল’বেল DPI ভাণ্ডাৰৰ প্ৰস্তাৱ আগবঢ়ায়। ইতিমধ্যে ৭খন দেশত ইউপিআই কাৰ্যক্ষম হৈ আছে তথা একাধিক ৰাষ্ট্ৰই ইয়াৰ অভিযোজন কৰিব খুজিছে। প্ৰতিগৰাকী ভাৰতীয়ক সবলীকৰণৰ অভিযান হিচাপে আৰম্ভ কৰা এই কামে এতিয়া বিশ্বখনক অনুপ্ৰাণিত কৰিছে।
সৰ্বাংগীন বিকাশ
৫৫ কোটিৰো অধিক জনধন একাউন্ট খোলা হৈছে আৰু প্ৰত্যক্ষ লাভ হস্তান্তৰৰ জৰিয়তে ৪৪ লাখ কোটি টকা প্ৰদান কৰা হৈছে। ১০ কোটিৰো অধিক এলপিজি সংযোগ আৰু পোনপটীয়া ভাবে স্বাস্থ্য সুবিধা প্ৰদান কৰা হৈছে। ডিজিটেল ইণ্ডিয়াৰ জনধন-আধাৰ-ম’বাইল (JAM) ত্ৰিনিটিৰ বাবে সকলো কথা সম্ভৱ হৈছে।
আজিৰ বাৰাণসীৰ অট’ চালক বা মুম্বাইৰ হকাৰ এজনেও ডিজিটেল পেমেন্ট গ্ৰহণ কৰিব পাৰে। কল্যাণমূলক আঁচনি সমূহৰ লিকেজ হ্ৰাস পাইছে। শাসনব্যৱস্থা স্বচ্ছ আৰু বাস্তৱ-সময়ৰ হৈ পৰিছে।
শাসন ব্যৱস্থাত মানৱীয় স্পৰ্শ
মাইগভ (MyGov) আৰু উমংগ-ৰ দৰে ডিজিটেল প্লেটফৰ্মে নাগৰিকক পোনপটীয়াভাৱে ২,০০০ ৰো অধিক চৰকাৰী সেৱাৰ সৈতে সংযুক্ত কৰিছে। ভাৰতৰ ৰাষ্ট্ৰীয় টেলিমেডিচিন প্লেটফৰ্ম ই-সঞ্জীৱনীয়ে ৩৮ কোটি চিকিৎসকৰ পৰামৰ্শৰ সুবিধা প্ৰদান কৰিছে।
আয়ুষ্মান ভাৰত ডিজিটেল মিছন (ABDM)ৰ লক্ষ্য হৈছে প্ৰতিগৰাকী নাগৰিকৰ বাবে এক অনন্য ডিজিটেল হেল্থ আইডি সৃষ্টি কৰা। ৭৯ কোটিৰো অধিক হেল্থ আইডি, ৬ লাখ স্বাস্থ্য সেৱা প্ৰেছাদাৰী আৰু ৬০ কোটি হেল্থ ৰেকৰ্ডক এতিয়া সংহত কৰা হৈছে।
বিহাৰৰ এখন প্রত্যন্ত গাঁৱৰ মহিলা শ্ৰীমতী কান্তি দেৱীয়ে ঘৰৰ পৰা অনলাইন যোৱাকৈয়ে শ-শ কিলোমিটাৰ দূৰত থকা লক্ষ্ণৌৰ এজন বিশেষজ্ঞৰ পৰামৰ্শ লাভ কৰিবলৈ সক্ষম হৈছে। এয়াই হৈছে ডিজিটেল ইণ্ডিয়াৰ শক্তি— যিয়ে স্বাস্থ্য সেৱাৰ দ্বাৰে অত্যাৱশ্যকীয় সেৱাসমূহক সাধাৰণ নাগৰিকৰ দুৱাৰ দলিতে উপলব্ধ কৰি তুলিছে।
যুৱ প্ৰজন্ম আৰু কৃষক
দীক্ষা (DIKSHA), স্বয়ম (SWAYAM) আৰু PM ই-বিদ্যা (PM eVidya)-ৰ দৰে ডিজিটেল শিক্ষামঞ্চই এতিয়া লাখ-লাখ ছাত্ৰ-ছাত্ৰীক তেওঁলোকৰ স্থানীয় ভাষাত স্পৰ্শ কৰিছে।
স্কিল ইণ্ডিয়া ডিজিটেল হাব (SIDH) আৰু ফিউচাৰ স্কিলছ প্ৰাইম এ আমাৰ যুৱক-যুৱতীসকলক এআই, চাইবাৰ সুৰক্ষা আৰু ব্লকচেইনৰ দক্ষতাৰে সমৃদ্ধ কৰিছে।
কৃষকসকলে ডিজিটেলভাৱে বতৰৰ আগলি-বতৰা, মাটিৰ হেল্থ কাৰ্ড আৰু বজাৰ মূল্য সম্পৰ্কে তথ্য লাভ কৰিছে। ১১ কোটিৰো অধিক কৃষকে এতিয়া পিএম-কিষাণৰ জৰিয়তে প্ৰত্যক্ষ আয় সমৰ্থন লাভ কৰিছে।
এই উদাহৰণসমূহে মাত্ৰা আৰু অন্তৰ্ভুক্তিত গুৰুত্ব আৰোপেৰে উদ্ভাৱন কৰা প্ৰযুক্তিয়ে জনসাধাৰণৰ জীৱনত স্থায়ী পৰিৱর্তন সাধন কাৰ্য্যক প্ৰতিফলিত কৰিছে— আৰু এয়াই হৈছে অন্ত্যোদয়ৰ দৃষ্টিভংগী।
বিশ্বাসৰ ভেটি
ভাৰতৰ ক্রম-বৰ্ধমান ডিজিটাইজেচনৰ লগে লগেই ইয়াৰ চাইবাৰ সুৰক্ষা কাঠামোকে সুদৃঢ় কৰি তোলা হৈছে। CERT-In ৰ দৰে প্ৰতিষ্ঠান, চাইবাৰ অপৰাধ হেল্পলাইন-১৯৩০ আৰু ডিজিটেল ব্যক্তিগত তথ্য সুৰক্ষা আইন, ২০২৩-ৰ দৰে ব্যৱস্থাই ব্যৱহাৰকাৰীৰ গোপনীয়তা আৰু তথ্য সুৰক্ষাৰ প্ৰতিভাৰতৰ দায়বদ্ধতাকে প্ৰতিফলিত কৰে। এই ব্যৱস্থাই ডিজিটেল সেৱা ব্যৱহাৰৰ ক্ষেত্ৰত নাগৰিকৰ আস্থা আৰু বিশ্বাস অৰ্জন কৰিছে।
অপাৰেচন সিন্দূৰৰ সময়তো ইয়াৰ এক শক্তিশালী উদাহৰণ প্রত্যক্ষ হয়। আমাৰ সংস্থাসমূহে আমাৰ আন্তঃগাঁথনিৰ ওপৰত সংঘটিত একাধিক সমন্বিত চাইবাৰ আক্ৰমণক সফলতাৰে প্ৰতিহত কৰিছিল।
উদ্ভাৱন আৰু ষ্টাৰ্টআপ
১.৮ লাখৰো অধিক ষ্টাৰ্টআপ আৰু ১০০+ ইউনিকৰ্ণেৰে ভাৰত আজি বিশ্বৰ তৃতীয়-সৰ্ববৃহৎ ষ্টাৰ্টআপ ব্যৱস্থাৰ দেশ হৈ পৰিছে। এই ষ্টাৰ্টআপসমূহৰ একাধিকৰেই আধাৰ হৈছে ডিজিটেল ইণ্ডিয়াৰ ৰাজহুৱা ডিজিটেল আন্তঃগাঁথনি।
ভাৰত এতিয়া ডিজিটেল পাব্লিক গুডছ ৰপ্তানি কৰি আছে। সমগ্ৰ আফ্ৰিকা, লেটিন আমেৰিকা আৰু দক্ষিণ-পূব এছিয়া ৰ দেশসমূহে ইণ্ডিয়াষ্টেক মডেলৰ অভিযোজন কৰিছে।
আমাৰ এআই মিছন এ ষ্টাৰ্টআপ, গৱেষক আৰু ছাত্ৰ-ছাত্ৰীৰ বাবে হাই-এণ্ড কম্পিউটিংকো সুলভ কৰি তুলিছে। ৩৪,০০০ ৰো অধিক জিপিইউ এতিয়া উপলব্ধ আৰু ৬০০০ পাইপলাইনত আছে।
টেলিকমৰ পৰা ছেমিকণ্ডাক্টৰলৈঃপ্ৰধানমন্ত্ৰী মোদীৰ “Make in India, Make for India, Make for the World”-ত গুৰুত্ব আৰোপৰ ফলশ্ৰুতিত ইলেক্ট্ৰনিকছ আৰু ম’বাইল উৎপাদনৰ ব্যাপক উত্থান ঘটিছে। আমাৰ ইলেক্ট্ৰনিকছ উৎপাদনে ১২ লাখ কোটি টকা অতিক্ৰম কৰিছে। আজি ভাৰত ম’বাইল ফোনৰ নেট ৰপ্তানিকাৰী দেশো।
টেলিকম আন্তঃগাঁথনিৰ ব্যাপক সম্প্ৰসাৰণে এই বৃদ্ধি একেদৰে সমৰ্থন কৰিছে। ভালেমান বছৰৰ পাছত বিএছএনএল (BSNL) এ পুনৰ লাভ অৰ্জন কৰিছে, এই কাৰ্য্যই ৰাজহুৱা টেলিকম খণ্ডটোৰ এক উল্লেখযোগ্য প্রত্যাৱর্তনক সূচিত কৰিছে। ভাৰতে নিজাকৈ থলুৱা টেলিকম ষ্টেক গঢ়ি তুলিছে।
গোৱালপাৰাৰ বিহু ফিল্ডত অনুষ্ঠিত এখন (Pankaj Pathak) শিবিৰৰ সময়ছোৱাত আচাৰ্য পংকজ পাঠক বিতৰ্কৰ কেন্দ্ৰবিন্দু হৈ পৰিছে। শিবিৰত অংশগ্ৰহণ কৰা সময়তে আচাৰ্য পাঠকৰ বিৰুদ্ধে এগৰাকী মহিলাৰ সৈতে অশালীন ব্যৱহাৰৰ অভিযোগ উত্থাপন হৈছিল।
ঘটনাটোৰ প্ৰতিবাদ জনাই গোৱালপাৰা বিহু সন্মিলনীৰ সম্পাদক তপন চক্ৰৱৰ্তীয়ে যেতিয়া প্ৰতিক্ৰিয়া প্ৰকাশ কৰে, তেতিয়া আচাৰ্য পাঠকে তেখেতক শাৰীৰিকভাৱে আক্ৰমণ কৰে বুলি অভিযোগ। স্থানীয় ৰাইজৰ মতে, এই আক্ৰমণত আচাৰ্য পাঠকৰ সহযোগীসকলো জড়িত আছিল।
ঘটনাৰ পাছত শিৱিৰত উপস্থিত ৰাইজৰ মাজত তীব্ৰ ক্ষোভৰ সৃষ্টি হয়। ৰাইজে আচাৰ্য পংকজ পাঠকক ঘটনাস্থলীতেই আবদ্ধ কৰি ৰাখে আৰু তেওঁৰ পৰা কাণত ধৰি আঁঠু কাঢ়ি ক্ষমা খুজিবলৈ বাধ্য কৰে।
পংকজ পাঠকে আঁঠু কাঢ়ি ক্ষমা খুজাৰ পিছতে সচেতন মহলে প্ৰতিক্ৰিয়া সৃষ্টি কৰিছে। বিভিন্ন জনে তেওঁক কৰা এনে অপমানৰ বিৰুদ্ধে ক্ষোভ উজাৰিছে।
আনহাতে পংকজ পাঠকে ফেচবুক লাইভৰ জৰিয়তে সমগ্ৰ ঘটনা বিৱৰণ দিলে।
পংকজ পাঠকে জনাই যে তেওঁৰ সৈতে পশ্চিম বংগৰ মুখ্যমন্ত্ৰীয়ে ফোনযোগে কথা পাতিছে। তেওঁক পশ্চিমবংগলৈ আমন্ত্ৰণো জনাইছে মমতা বেনাৰ্জীয়ে আৰু পশ্চিম বংগত সুৰক্ষা দিয়াৰ প্ৰতিশ্ৰুতি দিছে।
কচুগাঁও: Mid Day Meal কচুগাঁও ছোৱালী এম ই স্কুলত অসম ৰাজ্যিক বিদ্যালয় মধ্যাহ্ন ভোজন কৰ্মচাৰী সন্থাৰ কচুগাঁও ব্লক সমিতিৰ এক গুৰুত্বপূর্ণ সাধাৰণ সভা অনুষ্ঠিত হয়। কোকৰাঝাৰ জিলা সমিতিৰ উদ্যোগত আয়োজিত এই সভাখন সন্থাৰ সভাপতি দলসিং কোচৰ সভাপতিত্বত অনুষ্ঠিত হয়। সভাত কচুগাঁও শিক্ষাখণ্ডৰ অন্তৰ্গত সকলো বিদ্যালয়ৰ ৰন্ধন কৰ্মীসকল উপস্থিত থাকে।
সভাত ৰন্ধন কৰ্মীসকলে চৰকাৰৰ প্ৰতিশ্ৰুতি ভংগ আৰু উপেক্ষাৰ প্ৰতি তীব্ৰ ক্ষোভ ব্যক্ত কৰে। তেওঁলোকৰ অভিযোগ, ৰাজ্যৰ শিক্ষামন্ত্ৰী ৰণোজ পেগুৱে মাননী বৃদ্ধি কৰাৰ আশ্বাস দিয়াৰ পিছতো এতিয়ালৈকে কোনো ব্যৱস্থা গ্ৰহণ কৰা হোৱা নাই। ৰন্ধন কৰ্মীসকলে কয় যে, “দুটা দশক ধৰি আমি নামমাত্ৰ মাননীৰ বিনিময়ত কাম কৰি আহিছো। চৰকাৰে ভাল দিনৰ আশা দেখুৱাইছিল, কিন্তু বৰ্তমানে আমাৰ বাবে কোনো চিন্তা কৰা হোৱা নাই।”
বৰ্তমান কেন্দ্ৰীয় চৰকাৰৰ পৰা ১০০০ টকা আৰু ৰাজ্য চৰকাৰৰ পৰা ৫০০ টকা হাৰত মাননী লাভ কৰি আছে ৰন্ধন কৰ্মীসকল। যদিও চৰকাৰে মাননী ৬০০০ টকা কৰাৰ কথা কৈছিল, তাৰ বিপৰীতে কেৱল ৫০০ টকা বৃদ্ধি কৰে। এই সামান্য মাননীৰ বিপৰীতে ৰন্ধন কৰ্মীসকলে প্ৰতিদিনে ৫-৬ ঘণ্টা সময় দিছে। তাৰোপৰি, এতিয়া তেওঁলোকক মধ্যাহ্ন ভোজন বিলোৱাৰ দায়িত্বও দিয়াৰ কথা উঠিছে।
সভাত এই কথা উত্থাপন কৰি, বহিঃৰাজ্যৰ কোনো কোম্পানীক মধ্যাহ্ন ভোজন আঁচনিৰ দায়িত্ব দিয়াৰ সম্ভাৱনাত ৰন্ধন কৰ্মীসকলে গভীৰ চিন্তা আৰু প্ৰতিবাদ প্ৰকাশ কৰে।
সভাৰ অন্তত সন্থাৰ সভাপতি দলসিং কোচে ৰাজ্য চৰকাৰক ৰন্ধন কৰ্মীসকলৰ ন্যায্য দাবীসমূহ মানি ল’বলৈ অনুৰোধ জনায়। তেওঁ সতর্ক কৰে, যদি চৰকাৰে পদক্ষেপ নহয়, তেন্তে ৰন্ধন কৰ্মীসকলে পুনৰ আন্দোলনৰ পথ বাছি ল’বলৈ বাধ্য হ’ব।
নাজিৰা: Nazira নাজিৰাৰ অন্যতম বেচৰকাৰী সংগঠন “নাৰী উন্নতি”ৰ উদ্যোগত আৰু অ’এন জি চি (ONGC)ৰ CSR শাখাৰ সহযোগত আজি পৰা আৰম্ভ হৈছে “স্বচ্ছতা পষেক” শীৰ্ষক এলানি কাৰ্যসূচী।
এই কাৰ্যসূচীৰ অংশস্বৰূপে আজিৰ দিনটোত প্ৰথম কাৰ্যসূচী ৰূপে ONGCৰ আবাসিক এলেকাস্থিত ডঃ বি. আৰ. আম্বেদকাৰ প্ৰেক্ষাগৃহত অনুষ্ঠিত হয় এক শৈক্ষিক আলোচনা চক্ৰ। উক্ত আলোচনাত নাজিৰাৰ বিভিন্ন আগশাৰীৰ শিক্ষানুষ্ঠানৰ ছাত্ৰ-ছাত্ৰীয়ে অংশগ্ৰহণ কৰি পৰিবেশ সজাগতা, স্বচ্ছতা আৰু সামাজিক দায়িত্ব সম্পৰ্কে বক্তৃতা প্ৰদান কৰে।
অনুষ্ঠানখনত উপস্থিত থাকে ONGCৰ বিষয়ববীয়া, অঞ্চলটোৰ শিক্ষক-শিক্ষয়িত্ৰী, “নাৰী উন্নতি”ৰ সদস্যসকলৰ লগতে বিভিন্ন বিশিষ্ট ব্যক্তি আৰু স্থানীয় ছাত্ৰ-ছাত্ৰী।
“স্বচ্ছতা পষেক” কাৰ্যসূচীৰ জৰিয়তে অঞ্চলটোৰ মাজত পৰিস্কাৰ-পৰিচ্ছন্নতাৰ প্ৰতি জনসচেতনতা বৃদ্ধি কৰা হৈছে মূল উদ্দেশ্য। আগন্তুক দিনবোৰতো এই কাৰ্যসূচীৰ অধীনত বিভিন্ন সচেতনতামূলক আৰু প্ৰৰোচনামূলক অনুষ্ঠান অনুষ্ঠিত হ’ব বুলি আয়োজনকাৰী সকলে জানিবলৈ দিয়ে।
দৰং: Raijor Dal গৰুখুটিৰ পৰা উচ্ছেদিত লোকসকলৰ পুনঃসংস্থাপনৰ বিষয়ত চৰকাৰে উপযুক্ত ব্যৱস্থা গ্ৰহণ নকৰাৰ অভিযোগ উত্থাপন কৰি দৰং জিলা ৰাইজৰ দলে বুধবাৰে মঙলদৈ প্ৰেছ ক্লাবত এক সংবাদমেল আয়োজন কৰে।
সংবাদমেলত দলটোৱে অভিযোগ কৰে যে গৰুখুটি, আতাকাটা, কাচিচৰ আৰু মাগুৰমাৰী অঞ্চলৰ উচ্ছেদিত লোকসকলে বৰ্তমান সময়ত অতি কষ্টকৰ পৰিস্থিতিত জীৱন নিৰ্বাহ কৰি আছে। মৌলিক অধিকাৰ আৰু জীৱন যাপন কৰাৰ বাবে প্রয়োজনীয় সুবিধাসমূহৰ পৰা বঞ্চিত হৈ হাহাকাৰ কৰিছে এইসকল পৰিয়ালে।
সংবাদমেলত জানিব পৰা মতে, উচ্ছেদিত লোকসকলৰ একাংশে পুনঃসংস্থাপনৰ বাবে দালালৰ হাতত ধন দিবলগীয়া হৈছে। এই বিষয়ে ৰাইজৰ দলে গভীৰ উদ্বেগ প্ৰকাশ কৰে।
এই সন্দৰ্ভত দৰং জিলা আয়ুক্তৰ জৰিয়তে ৰাজ্যৰ মুখ্যমন্ত্ৰীৰ ওচৰলৈ এখন স্মাৰকপত্ৰো প্ৰেৰণ কৰিছে দলটোৱে। স্মাৰকপত্ৰত চৰকাৰে পূৰ্বে দিয়া প্ৰতিশ্ৰুতি অনুসৰি, প্ৰতিটো উচ্ছেদিত পৰিয়ালক এবিঘা ভূমি প্ৰদান কৰাৰ দাবী উত্থাপন কৰে।
দলটোৱে চৰকাৰক আহ্বান জনায় যাতে সংবিধানত সুনিৰ্দিষ্ট মৌলিক অধিকাৰসমূহৰ আলোকে উচ্ছেদিত লোকসকলক মৰ্যাদাপূৰ্ণ জীৱন যাপন কৰাৰ সুবিধা নিশ্চিত কৰা হয়।
সংবাদমেলত ৰাইজৰ দলৰ দৰং জিলা সমিতিৰ সভাপতি ঘনশ্যাম ৰাজবংশী, লগতে আন জিলা বিষয়ববিয়াসকলো উপস্থিত থাকে।
ডিজিটেল ডেস্ক: Narendra Modi ৫ দেশৰ ঐতিহাসিক ভ্ৰমণত নৰেন্দ্ৰ মোদীপ্ৰধানমন্ত্ৰী নৰেন্দ্ৰ মোদীয়ে আজিৰে পৰা বিদেশ ভ্ৰমণ আৰম্ভ কৰিছে। বুধবাৰে তেওঁ প্ৰথম গন্তব্যস্বৰূপে ঘানালৈ ৰাওনা হৈছে। ভ্ৰমণকালত তেওঁ মুঠ পাঁচখন দেশ — ঘানা, ট্ৰিনিদাদ এণ্ড ট’বাগো, আৰ্জেণ্টিনা, ব্ৰাজিল আৰু নামিবিয়া — পৰিদৰ্শন কৰিব।
আগন্তুক ৬ আৰু ৭ জুলাইত ব্ৰাজিলৰ ৰিঅ’ ডি জেনেইৰ’ত অনুষ্ঠিত হ’বলগীয়া ব্ৰিকছ (BRICS) সন্মিলনত অংশগ্ৰহণ কৰিব প্ৰধানমন্ত্ৰী মোদীয়ে। যদিও ভ্ৰমণৰ সম্পূৰ্ণ কাৰ্যসূচী এতিয়াও চৰকাৰৰ ফালেৰে ঘোষিত হোৱা নাই, তথাপিও বিভিন্ন দ্বিপাক্ষিক, বহুপাক্ষিক আৰু আন আন্তঃৰাষ্ট্ৰীয় কাৰ্যসূচীত অংশগ্ৰহণ কৰাৰ কথা জানিবলৈ পোৱা গৈছে।
প্ৰধানমন্ত্ৰী মোদীয়ে কয়, “অহা কেইদিনমানৰ ভিতৰত ঘানা, ট্ৰিনিদাদ এণ্ড ট’বাগো, আৰ্জেণ্টিনা, ব্ৰাজিল, নামিবিয়াত বিভিন্ন কাৰ্যসূচীত অংশগ্ৰহণ কৰিম। বিশ্বৰ নেতাসকলৰ সৈতে মত বিনিময় আৰু সম্পৰ্ক উন্নয়নৰ উপায়ৰ বিষয়ে আলোচনা কৰিম।”
শেহতীয়াকৈ পহলগামৰ ঘটনাৰ পাছত ভাৰতে সন্ত্ৰাসবাদৰ বিৰুদ্ধে নিজৰ কঠোৰ স্থিতি বিভিন্ন মঞ্চত প্ৰকাশ কৰিছে। খবৰ অনুসৰি, ব্ৰিকছ সন্মিলনতো ভাৰতই সন্ত্ৰাসবাদৰ বিৰুদ্ধে সন্মিলিত পদক্ষেপৰ প্ৰয়োজনীয়তাৰ বিষয়টো উত্থাপন কৰিব।
বৈদেশিক পৰিক্ৰমা মন্ত্ৰালয়ৰ সচিব (Economic Relations) দম্মু ৰবিয়ে উল্লেখ কৰে যে, ব্ৰাজিলৰ অধ্যক্ষতাত অনুষ্ঠিত হ’বলগীয়া ব্ৰিকছ সন্মিলনত সন্ত্ৰাসবাদৰ বিৰুদ্ধে আগন্তুক যৌথ পদক্ষেপৰ ওপৰত গুৰুত্ব আৰোপ কৰা হ’ব বুলি নতুন দিল্লী আশাবাদী।
ইফালে, নামিবিয়া, আৰ্জেণ্টিনা আৰু ব্ৰাজিলৰ ৰাষ্ট্ৰপতিসকলৰ সৈতে বৈঠকৰ সময়ত খনিজ সম্পদৰ যোগান নিশ্চিত কৰা, লগতে ব্ৰাজিলৰ সৈতে প্ৰতিৰক্ষা গৱেষণাৰ ক্ষেত্ৰত সহযোগিতা বঢ়োৱাৰ দিশতো আলোচনা হ’ব বুলি ধাৰণা কৰা হৈছে।
বিশেষভাৱে উল্লেখযোগ্য যে, প্ৰায় ৩০ বছৰৰ পাছত এজন ভাৰতীয় প্ৰধানমন্ত্ৰীয়ে ঘানালৈ ভ্ৰমণ কৰিছে। সোণ আমদানিৰ ক্ষেত্ৰত ভাৰতৰ বাবে গুৰুত্বপূর্ণ অংশীদাৰ দেশ হিচাপে বিবেচিত ঘানালৈ এই ভ্ৰমণ ভাৰত-আফ্ৰিকা সম্পৰ্ক উন্নয়নৰ ক্ষেত্ৰত এক মাইলৰ খুঁটি হিচাপে বিবেচিত হ’ব।
