‘‘মূল্যবৃদ্ধি, GST, অপশাসনৰ বিষয়বোৰ তল পেলাবলৈ এই কাম কৰিছে৷ মিঞা পৰিষদে ইয়াৰ উত্তৰ দিব লাগিব৷ মই আজিলৈকে মিঞা কোন বুজি নাপালো৷’’-নুৰুল হুদা

মিঞা মিউজিয়ামত আছে কি? অসমৰ জাতি উপ–জাতিয়ে ব্যৱহাৰ কৰা সামগ্ৰীবোৰ তাত ৰাখিছে৷ মুছলমানক ভাগ ভাগ কৰাৰ এয়া এটা ৰাজনৈতিক ষড়যন্ত্ৰ৷ এই ষড়যন্ত্ৰৰ আঁৰত BJP-AIUDF আছে৷ এই মন্তব্য কৰিছে কংগ্ৰেছী বিধায়ক নুৰুল হুদাই।

হুদাই কয়, ‘‘মূল্যবৃদ্ধি, GST, অপশাসনৰ বিষয়বোৰ তল পেলাবলৈ এই কাম কৰিছে৷ মিঞা পৰিষদে ইয়াৰ উত্তৰ দিব লাগিব৷ মই আজিলৈকে মিঞা কোন বুজি নাপালো৷ ‘মিঞা’ শব্দটো এটা সন্মানজনক শব্দ৷ ‘মিঞা’ বুলি কোনো জনগোষ্ঠী নাই, জাতি নাই৷’’

উল্লেখযোগ্য যে গোৱালপাৰাত লক্ষীপুৰত সদৌ অসম মিঞা পৰিষদে খুলিছিল মিঞা মিউজিয়াম। তাৰ পিছতে ৰাজ্যজুৰি সৃষ্টি হৈছিল তীব্ৰ বিতৰ্কৰ। আজি মুখ্যমন্ত্ৰী ড০ হিমন্ত বিশ্ব শৰ্মায়ো মিঞা মিউজিয়াম সন্দৰ্ভত প্ৰকাশ কৰিছে প্ৰতিক্ৰিয়া। মুখ্যমন্ত্ৰীয়ে কয় যে মিঞা মিউজিয়াম খোলাসকলে চৰকাৰক উত্তৰ দিব লাগিব।

ইফালে, গোৱালপাৰাৰ লক্ষীপুৰত স্থাপন কৰা মিঞা মিউজিয়াম ছীল কৰিলে গোৱালপাৰা জিলা প্ৰশাসনে। প্ৰধানমন্ত্ৰী আৱাস যোজনাৰ ঘৰত স্থাপন কৰিছিল মিঞা মিউজিয়াম। শিক্ষক এম মোহৰ আলীৰ নামত আছে ঘৰটো। মোহৰ আলী মিঞা পৰিষদৰ কেন্দ্ৰীয় সভাপতি।

অসমৰ বান, গৰাখহনীয়া সমস্যাৰ স্থায়ী সমাধানৰ বাবে কেন্দ্ৰীয় তথা ৰাজ্য চৰকাৰে যৌথ প্ৰচেষ্টাৰে আৰু ক্ষিপ্ৰতাৰে কাম কৰি আছে: সোণোৱাল

গুঁইজানৰ পৰা মাইজানলৈ খহনীয়া প্ৰতিৰোধী প্ৰকল্প ক্ষিপ্ৰতাৰে ৰূপায়ণ হৈ উঠিব

কেন্দ্ৰীয় মন্ত্ৰী সৰ্বানন্দ সোণোৱালে আজি গৃহজিলা ডিব্ৰুগড়ৰ পুখুৰীজান, বালিজান, বিন্ধাকটা বৰনামঘৰস্থলী, গেৰেকী নেপালী আদি বিভিন্ন খহনীয়া আক্ৰান্ত অঞ্চল পৰিদৰ্শন কৰে। শেহতীয়াকৈ ব্ৰহ্মপুত্ৰকে ধৰি ডিব্রু নৈৰ খহনীয়াত আক্ৰান্ত হোৱাৰ পৰিপ্ৰেক্ষিতত এই অঞ্চলসমূহত কৃষিভূমিকে ধৰি অন্যান্য ক্ষয়-ক্ষতি সাধন হৈছে। সোণোৱালে অঞ্চলসমূহত উপস্থিত হৈ স্থানীয় ৰাইজ তথা সংশ্লিষ্ট বিষয়াবৰ্গৰ সৈতে বাৰ্তালাপ কৰি খহনীয়া অৱস্থাৰ বুজ লয় আৰু লগতে ক্ষয়-ক্ষতিৰ পৰ্যালোচনা কৰে। সংশ্লিষ্ট বিভাগে অঞ্চলকেইটাত ক্ষিপ্ৰতাৰে খহনীয়া প্ৰতিৰোধী ব্যৱস্থা হাতত লৈছে বুলি সোণোৱালে উল্লেখ কৰে আৰু এইক্ষেত্ৰত ৰাইজৰ হিতৰ বাবে যাৱতীয় সকলো ব্যৱস্থা পুংখানুপুংখভাৱে ৰূপায়ণ কৰিবলৈ বিষয়াসকলক তেওঁ আহ্বান জনায়। কেন্দ্ৰীয় মন্ত্ৰীগৰাকীয়ে আজি নাৱেৰেও খহনীয়া পৰিদৰ্শন কৰে।

“অসমৰ বান, গৰাখহনীয়া সমস্যাৰ স্থায়ী সমাধানৰ বাবে কেন্দ্ৰীয় তথা ৰাজ্য চৰকাৰে যৌথ প্ৰচেষ্টাৰে, ক্ষিপ্ৰতাৰে আৰু আন্তৰিকতাৰে কাম কৰি আছে। খহনীয়া সমস্যাৰ বিজ্ঞানসন্মত সমাধানসূত্ৰ উলিয়াই ইয়াৰ স্থায়ী সমাধানত চৰকাৰে বিশেষ গুৰুত্ব আৰোপ কৰিছে। গুঁইজানৰপৰা মাইজানলৈ খহনীয়া প্ৰতিৰোধী প্ৰকল্প ক্ষিপ্ৰতাৰে ৰূপায়ণ হৈ উঠিব। ইয়াৰদ্বাৰা ডিব্ৰুগড়, তিনিচুকীয়া আদি জিলাৰ নদী কাষৰীয়া জনসাধাৰণে যথেষ্ট সকাহ লাভ কৰিব। তদুপৰি, দিনজান, পুখুৰীজান, গুঁইজান আদি অঞ্চলৰ বান, খহনীয়া অৱস্থাৰ সমাধানৰ দিশত কেন্দ্ৰীয় প্ৰতিৰক্ষা মন্ত্ৰালয়েও প্ৰায় ১১০ কোটি টকাৰ আৰ্থিক সহযোগিতা আগবঢ়াইছে।”

এই সময়ছোৱাত তেওঁৰ সৈতে উপস্থিত থাকে চাবুৱাৰ বিধায়ক পোনাকণ বৰুৱা, অসম পৰ্যটন উন্নয়ন নিগমৰ অধ্যক্ষ ঋতুপৰ্ণ বৰুৱা, অসম ৰাজ্যিক গৃহ নিৰ্মাণ পৰিষদৰ উপাধ্যক্ষ সুভাষ দত্ত, ডিব্ৰুগড় উন্নয়ন প্ৰাধিকৰণৰ অধ্যক্ষ অসীম হাজৰিকা প্ৰমুখ্যে জিলা উপায়ুক্ত, জিলা প্ৰশাসনৰ অন্যান্য বিষয়া তথা জলসম্পদ বিভাগৰ বিষয়াসকল।