বোকাখাত, ২৫ জুন — । CRPF
মঙলবাৰে সন্ধিয়া বোকাখাতৰ পাণবাৰীস্থিত সাপজুৰি এলেকাৰ CRPF কেম্পত সংঘটিত এটা সন্দেহজনক গ্ৰেনেড বিস্ফোৰণত তিনিজন অসম আৰক্ষী জোৱান গুৰুতৰভাৱে আহত হয়। আহত জোৱানসকলক ইতিমধ্যে বোকাখাত মহকুমা চিকিৎসালয়ত ভৰ্তি কৰা হৈছে।
আহত আৰক্ষী জোৱানকেইজন হ’ল – সিদ্ধাৰ্থ বৰবৰা, সুশীল ভূমিজ আৰু মিন্টু হাজৰিকা। চিকিৎসালয়ত তেওঁলোকৰ অৱস্থা গুৰুতৰ বুলি জানিব পৰা গৈছে।
প্ৰাৰম্ভিক তথ্য অনুসৰি, বাইক আৰোহী এখন মটৰ চাইকেলত অহা অচিনাকি দুষ্কৃতিকাৰীয়ে কেম্পটো লক্ষ্য কৰি গ্ৰেনেড নিক্ষেপ কৰে বুলি সন্দেহ প্ৰকাশ কৰা হৈছে। আক্ৰমণটো পৰিকল্পিত আৰু লক্ষ্য নিৰ্ধাৰিত বুলি অনুমান কৰা হৈছে। বিস্ফোৰণৰ ফলত অঞ্চলটোত ব্যাপক আতংকৰ সৃষ্টি হয়।
বোকাখাত মহকুমা আৰক্ষী বিষয়া ঘটনাৰ পিছতেই ঘটনাস্থলীত উপস্থিত হৈ তদন্ত আৰম্ভ কৰে। বিস্ফোৰণৰ পাছতে সতৰ্কতা অৱলম্বন কৰি সমগ্ৰ বোকাখাত আৰু দাঁতিকাষৰীয়া অঞ্চলত হাই এলাৰ্ট জাৰি কৰা হৈছে।
সন্ধানকাৰী দল আৰু নিৰাপত্তা বাহিনীয়ে সমগ্ৰ এলেকাত দোষীক বিচাৰি অভিযান আৰম্ভ কৰিছে যদিও এই মুহূৰ্তলৈ আক্ৰমণকাৰীক ধৰিবলৈ সক্ষম হোৱা নাই। আক্ৰমণৰ উদ্দেশ্যো এতিয়ালৈ স্পষ্ট হোৱা নাই।
স্থানীয় ৰাইজৰ মতে, আক্ৰমণকাৰী দুজনৰ পৰা তিনিজন দুষ্কৃতিকাৰী মটৰ চাইকেলত আহি গ্ৰেনেড দলিয়াই পলাই যায়। আৰক্ষী বিভাগে চিসিটিভি ফুটেজ, স্থানীয় প্ৰত্যক্ষদৰ্শীৰ বৰ্ণনা আদি বিচাৰি তদন্ত জাৰি ৰাখিছে।
ঘটনাস্থলীত উপস্থিত হৈ আহত জোৱানসকলৰ স্বাস্থ্যৰ খবৰ লয় অসম চৰকাৰৰ মন্ত্ৰী অতুল বৰুৱাই। তেওঁ কয়,
“এই ঘটনা অত্যন্ত দুৰ্ভাগ্যজনক। আগতে এনে ঘটনা বোকাখাতত কেতিয়াও হোৱা নাই। তদন্ত দ্ৰুতগতিত চলি আছে আৰু দোষীক বিচাৰি কড়া ব্যৱস্থা গ্ৰহণ কৰা হ’ব।”
উল্লেখযোগ্য যে, বিস্ফোৰণটো য’ত সংঘটিত হৈছে, সেই ঘৰটো পূৰ্বে CRPF কেম্প হিচাপে ব্যৱহৃত হৈছিল, যদিও বৰ্তমান তাত অসম আৰক্ষীৰ জোৱানসকলেই অৱস্থান কৰি আছে। এই পটভূমিত আক্ৰমণটোক লৈ বহু ধৰণৰ সন্দেহ আৰু প্ৰশ্ন উত্থান হৈছে।
বৰ্তমানলৈ ঘটনাটো ৰহস্যেৰে আৱৰি থকাৰ লগতে অসম আৰক্ষীয়ে পৰিস্থিতিৰ ওপৰত গভীৰ নজৰ ৰাখি তদন্ত অব্যাহত ৰাখিছে। অচিৰেই অধিক তথ্য পোৱাৰ আশা প্ৰকাশ কৰিছে আৰক্ষী সূত্ৰই।
ইৰাণৰ বৃহৎ লোকচান
