আজি ঘোষিত হাইস্কুল শিক্ষান্ত পৰীক্ষাত অসমৰ ভিতৰত নৱম স্থান দখল কৰি বৃহত্তৰ অঞ্চললৈ গৌৰৱ কঢ়িয়াই আনিছে হাঁহচৰী গাঁৱৰ তাবিবুল হকে৷ তাবিবুলে অসমীয়াত ৯৫, ইংৰাজীত ৯৬, সাধাৰণ গণিতত ৯৮, সাধাৰণ বিজ্ঞানত ১০০, সমাজ বিজ্ঞানত ১০০ আৰু ঐচ্ছিক গণিতত ১০০ সৰ্বমুঠ ৫৮৯ নম্বৰ লাভ কৰিছে৷ তাবিবুল হকৰ ঘৰ অতি দুৰ্গম হাঁহচৰী গাঁৱত৷ গাঁৱত নাই কোনো উন্নতমানৰ বাট-পথ৷ যাৰ ফলত তেওঁ স্কুললৈ অহা-যোৱা কৰোতে অতি কষ্ট কৰিবলগীয়া হৈছিল৷ শিক্ষক, পিতৃ-মাতৃৰ লগতে হোষ্টেলৰ গাইডে কষ্ট নকৰিলে তেওঁ নৱম স্থান দখল কৰিব নোৱাৰিলেহেঁতেন বুলি উল্লেখ কৰি তেওঁ সম্পূৰ্ণ কৃতিত্ব শিক্ষক, পিতৃ-মাতৃৰ লগতে হোষ্টেলৰ গাইডক প্ৰদান কৰে৷ বিজ্ঞান শাখালৈ গৈ তেওঁ এগৰাকী সুদক্ষ চিকিৎসক হ’বলৈ তেওঁ ইচ্ছা প্ৰকাশ কৰে৷ মুঠ ৫৮৯ (৯৮.১৬) নম্বৰেৰে নৱম স্থান দখল কৰা তাবিবুল হক বৰভিঠা আঞ্চলিক হাইস্কুলৰ সহকাৰী প্ৰধান শিক্ষক তোফাজ্জুল হক আৰু আয়েশা খাতুনৰ পুত্ৰ৷ উল্লেখ্য যে এইবেলি কামৰূপ জিলাৰ পৰা শীৰ্ষস্থান দখল কৰা কৃতী ছাত্ৰ তবিবুল হকে শিক্ষাগ্ৰহণ কৰা গৰৈমাৰীৰ আল-আমিন ইছলামিক মডেল স্কুল কৰ্তৃপক্ষই বেণ্ডপাৰ্টী, ফটকা, আতজবাজী ফুটাই আনন্দত আত্মহাৰা হৈছে৷ বিদ্যালয় কৰ্তৃপক্ষ-অভিভাৱক-শিক্ষাৰ্থীসকলে বেণ্ডপাৰ্টীলৈ আজি নৱম স্থানপ্ৰাপ্ত তাবিবুল হকক লৈ বিদ্যালয়ৰ পৰা এখন সমদল উলিয়াই মাজৰটোপ উচ্চতৰ মাধ্যমিক বিদ্যালয়লত নি তেওঁক ৰাজহুৱাভাৱে সম্বৰ্ধনা জনোৱা হয়৷
সভাত গৰৈমাৰী ৰাজহ চক্ৰৰ চক্ৰ বিষয়া অৰূপ বিৰকমীয়া, আমছুৰ গৰৈমাৰী আঞ্চলিক সমিতিৰ হৈ সভাপতি ইমৰান হক, সদৌ অসম ছাত্ৰ সন্থাৰ কাৰ্যালয় সম্পাদক নিৰোধ কুমাৰ দাস, উপদেষ্টা উপম দাস, নূৰ ইছলাম উপদেষ্টা, গুৱাহাটী মহকুমা ছাত্র সন্থাৰ প্ৰাক্তন সভাপতি দেৱজিত গোস্বামী, ছয়গাঁও আঞ্চলিক ছাত্ৰ সন্থাৰ সভাপতি সোণমইনা শালৈ, সম্পাদক দ্বীপজ্যোতি দাস, পূৱ ছমৰীয়া ও গৰৈমাৰী শাখা ছাত্ৰ সন্থাৰ সভাপতি ৰফিকুল ইছলামৰ লগতে বিভিন্ন দল-সংগঠনৰ উপৰি বিভিন্নজন নৱম স্থানপ্ৰাপ্ত তবিবুল হকক বিপুলভাৱে সম্বৰ্ধনা জনায়৷
