হেপাঁহৰ বহাগ বিহুলৈ হাতত মাথো আৰু দুটা দিন বাকী থকা অৱস্থাত জামুগুৰিহাটত সোমবাৰে মহিলাৰ দ্বাৰা অনুষ্ঠিত হৈছে এখন বজাৰ । যত উপলব্ধ  হৈছে চিৰা , পিঠা, দৈ, ক্ৰীমকে ধৰি বিহুৰ সকলোবোৰ সামগ্ৰী । অসম ৰাজিক গ্ৰামীণ জীৱিকা অভিযান নদুৱাৰ খণ্ড অভিযান পৰিচালনা শাখাৰ উদোগত অনুষ্ঠিত হোৱা এই অসমী বহাগী মেলাত নদুৱাৰ উন্নয়ন খণ্ডৰ অন্তৰ্গত দহটা গাঁও পঞ্চায়তৰ মহিলা আত্মসহায়ক গোটৰ সদস্য সকলে তৈয়াৰ কৰা বিহুৰ জা- জলপান সমূহ বিক্ৰী কৰা হয় ।

মহিলাৰ দ্বাৰা অনুষ্ঠিত হোৱা এই বজাৰ খনত যথেষ্ট ক্ৰেতাৰ ভীৰ পৰিলক্ষিত হয় ।দুদিন ধৰি অনুষ্ঠিত  হ’ব লগা এই মেলাখন আজি ৰঙা ফিটা কাটি শুভ উদ্বোধন কৰে স্থানীয় বিধায়ক পদ্ম হাজৰিকাই ।

দ’ল বাগাৰা ৰাজনীতিৰ ফলত পুনৰ অসম প্ৰদেশ কংগ্ৰেছ দল মোক্ষম আঘাটত জড়জৰিত হ’ল।পুনৰ কংগ্ৰেছ দল ত্যাগ কৰিলে এগৰাকী কংগ্ৰেছী তথা দলৰে প্ৰাক্তন বিধায়কে। উল্লেখ্য যে ; জলেশ্বৰ বিধানসভা সমষ্টিৰ প্ৰাক্তন বিধায়ক মইন উদ্দিন আহমেদে যোৱা ৮ এপ্ৰিল তাৰিখে ভাৰতীয় জনতা পাৰ্টীত যোগদান কৰে। ভাৰতীয় জনতা পাৰ্টীত যোগদান কৰি মইন উদ্দিনে প্ৰকাশ কৰে যে ; ভাৰতীয় জনতা পাৰ্টীৰ নীতি আদৰ্শৰ প্ৰতি আকৃষ্ট হৈ সৰ্বাংগীন উন্নতিৰ স্বাৰ্থত তেওঁ বি জে পিত যোগদান কৰে।

ইফালে মইন উদ্দিন আহমেদে জনোৱা মতে কংগ্ৰেছে সংকীৰ্ণ ৰাজনীতিৰে বিভেদ সৃষ্টি কৰে। আজি ভাৰতীয় জনতা পাৰ্টীৰ অসম প্ৰদেশৰ মুখ্য কাৰ্যালয়ত দলটোৰ ৰাজ্যিক সভাপতি ভবেশ কলিতা ; সম্পাদক খনীন্দ্ৰ নাথ শৰ্মা আৰু জি এম ডিৰ অধ্যক্ষ নাৰায়ণ ডেকাৰ উপস্থিতিত যোগদান কাৰ্য্যসূচী সম্পন্ন কৰে।

মিচিং সমাজৰ সৰ্ববৃহৎ গোত্ৰ তাকাম পেগু অপৃন ( সদৌ পেগু মহাসভা) ৰ তৃতীয় ত্ৰি-বাৰ্ষিক অধিৱেশনখন গোলাঘাট জিলাৰ মেৰাপানীৰ গমাৰিগুৰিত কালি সফল সামৰণি পৰিছে ৷ গমাৰীগুৰিৰ পুলি বাগানস্হিত তাকাম দৈয়াং মৃৰং উকুম লত্তাত ৮,৯ আৰু ১০ এপ্ৰিলত তিনিদিনীয়া বৰ্ণাঢ্য কাৰ্যসূচীৰে অনুষ্ঠিত হোৱা অধিৱেশনখনৰ তিনিওটা দিনেই গুমৰাগ নত্যৰ ছন্দোবদ্ধ গতিত মুখৰিত হৈ পৰে তাকাম দৈয়াং মৃৰং উকুম লত্তাৰ চৌদিশ ৷ কাৰ্যসূচী অনুযায়ী অধিৱেশনখনৰ প্ৰথম দিনা পুৱা সামূহিক চাফাই অভিযান শুভাৰম্ভ কৰে তাকাম পেগু অপৃন মহাসভাৰ তৃতীয় ত্ৰি-বাৰ্ষিক অধিৱেশনৰ অভ্যৰ্থনা সমিতিৰ সম্পাদক ৰাজু পেগুৱে ৷ ৮ বজাত গছপুলি ৰোপন কাৰ্যসূচী শুভাৰম্ভ কৰে বন বিষয়া সিন্দুমণি পেগু আৰু শিক্ষক বিজু কুমাৰ পেগুৱে ৷ ৯ বজাত পৰম্পৰাগত খাদ্য মেলাৰ দ্বাৰ মুকলি কৰে সমবায় বিভাগৰ অৱসৰপ্ৰাপ্ত পৰিদৰ্শক বিনোদ পেগুৱে ৷ ১০ বজাত চিত্ৰাংকন,আকস্মিক বক্তৃতা আৰু কবিতা আবৃত্তি প্ৰতিযোগিতা উদ্বোধন কৰে নাজমিন পেগুৱে ৷ নিশা সাংস্কৃতিক সন্ধিয়া উদ্বোধন কৰে গোলাঘাট জিলাৰ আই টি ডি পিৰ অধ্যক্ষ বিশ্ব পেগুৱে ৷ অধিৱেশনৰ দ্বিতীয় দিনা পুৱা ৭ বজাত চাফাই অভিযান শুভাৰম্ভ কৰে অভ্যৰ্থনা সমিতিৰ যুটীয়া সম্পাদক মিলন সিং পেগুৱে ৷ ৮ বজাত শ্ৰদ্ধাঞ্জলী অনুষ্ঠান আৰম্ভ কৰা হয় ৷ আঁত ধৰে অনন্ত পেগুৱে ৷

পুৱা ১১ বজাত দূৰদূৰণিৰ অতিথি সকলক আদৰণি জনোৱা হয় ৷ নেতৃত্ব দিয়ে শেখৰ পেগুৱে ৷ বিয়লি ১ বজাত প্ৰতিনিধি পঞ্জীয়ন, ৩ বজাত তাকাম পেগু অপৃন মহাসভাৰ কেন্দ্ৰীয় কাৰ্যনিৰ্বাহক সমিতিৰ অন্তিম কাৰ্যনিৰ্বাহক বৈঠক অনুষ্ঠিত হয় ৷ ৪ বজাত প্ৰতিনিধি সভা মুকলি কৰে অভ্যৰ্থনা সমিতিৰ সভাপতি দিনেশ পেগুৱে ৷ নিশালৈ শিল্পী অই আপ্পুন গণেশ পেগু সোঁৱৰণি সাংস্কৃতিক কাৰ্যসূচী অনুষ্ঠিত কৰে ৷ উদ্বোধন কৰে অভ্যৰ্থনা সমিতিৰ সাংস্কৃতিক সম্পাদক হিৰণ্য পেগুৱে ৷ অধিৱেশনৰ অন্তিম দিনা পুৱা ৬ বজাত চাফাই অভিযান শুভাৰম্ভ কৰে কতন পেগুৱে ৷ ৮ বজাত পতাকা উত্তোলন কৰে তাকাম পেগু অপৃন মহাসভাৰ সভাপতি দেবিৰাম পেগুৱে ৷ ৯ বজাত স্মৃতিচাৰণ অনুষ্ঠান শুভাৰম্ভ কৰে অজিত পেগুৱে ৷ ৯-৩০ বজাত সাংস্কৃতিক শোভাযাত্ৰা উলিওৱা হয় ৷ সাংস্কৃতিক শোভাযাত্ৰা উদ্বোধন কৰে অভ্যৰ্থনা সমিতিৰ কাৰ্যকৰী সভাপতি জয়দেৱ পেগু আৰু তেওঁক সহযোগ কৰে কাৰ্যকৰী সদস্য এন্টনি পেগুৱে ৷ দুপৰীয়া ১২ বজাত মুকলি সভা অনুষ্ঠিত কৰা হয় ৷ সভিপতিত্ব কৰে তাকাম পেগু অপৃন মহাসভাৰ কেন্দ্ৰীয় সভাপতি দেবিৰাম পেগুৱে ৷ ইয়াৰ পূৰ্বে শিল্পী হিৰণ্য পেগুৰ নেতৃত্বত আৰম্ভণি গীত পৰিৱেশন কৰা হয় ৷ ইয়াৰ পিছতে মুকলি সভা অনুষ্ঠিত হয় ৷ মুকলি সভাত বহু স্বনামধন্য ব্যক্তি, গৱেষক আৰু লেখক উপস্থিত থাকে ৷

পেগু অপৃন মহাসভাৰ অধিৱেশন উপলক্ষে প্ৰকাশিত ‘পেঃগু’ স্মৃতগ্ৰন্হ উন্মোচন কৰে অৱসৰপ্ৰাপ্ত চিকিৎসক তথা চলচিত্ৰ নিৰ্মাতা ডাঃ কৃপানাথ পেগুৱে ৷ আটকধুনীয়া গ্ৰন্থখন সম্পাদনা কৰিছে মুখ্য সম্পাদক অনন্ত পেগু আৰু সম্পাদক অজিত কুমাৰ পেগুৱে ৷ প্ৰকাশক হৈছে অসম চৰকাৰৰ ভৈয়াম জনজাতি উন্নয়ন পৰিষদৰ অৱসৰপ্ৰাপ্ত জেষ্ঠ প্ৰৱন্ধক দিনেশ পেগুৱে ৷ নিশালৈ বিশিষ্ট লেখিকা তথা চলচিত্ৰ নিৰ্মাতা, বিদ্যালয় সমূহৰ পৰিদৰ্শক নিৰদা দলে পেগুৰ সোঁৱৰণি সাংস্কৃতিক কাৰ্যসূচী অনুষ্ঠিত হয় ৷ সাংস্কৃতিক নিশাৰ কাৰ্যসূচী উদ্বোধন কৰে অসম চৰকাৰৰ অৱসৰপ্ৰাপ্ত সাংস্কৃতিক সঞ্চালক, গৱেষক ড° পবিত্ৰ কুমাৰ পেগুৱে ৷ সাংস্কৃতিক অনুষ্ঠানত কুকিলকণ্ঠী গায়িকা দিপ্তিৰাণী পেগুৰ লগতে নৱপ্ৰজন্মৰ বহু গায়ক-গায়িকাই গীত পৰিৱেশন কৰে ৷ ইপিনে প্ৰতিনিধি সভাৰ তীব্ৰ বাক-বিতাণ্ডা, চিঞৰ-বাখৰৰ অন্তত পেগু অপৃন মহাসভাৰ নতুন কেন্দ্ৰীয় সমিতিখন গঠন কৰা হয় ৷ এইমতে দিনেশ পেগুক সভাপতি, হেমন্ত পেগু, তুলেশ্বৰী পেগুক উপসভাপতি, দিলীপ পেগুক সাধাৰণ সম্পাদক, ভগীৰথ পেগু, অনিল পেগুক সহকাৰী সম্পাদক, ডাঃ পদ্মেশ্বৰ পেগুক কোষধ্যক্ষ, দীপ কুমাৰ পেগুক সাংস্কৃতিক সম্পাদক, ফুলেশ্বৰ পেগুক সহকাৰী সংস্কৃতিক সম্পাদক, দিনবৰ পেগু, উমানন্দ পেগু, তৰুণ পেগু, অনিমা পেগুক সাংগঠনিক সম্পাদক আৰু নীলেশ্ব পেগুক আলোচনী সম্পাদক হিচাপে মনোনীত কৰা হয় ৷ আনপিনে সমিতিখন পিছত আৰু অধিক পদবী অন্তৰ্ভুক্ত কৰাৰ সম্ভাৱনা আছে ৷