অসম হকী সন্থা  আৰু অসম অলিম্পিক এচো’চিয়েচন উদ্যোগত আৰু ৰহা জাতীয় মহিলা ক্ৰীড়া সমিতি আৰু প্ৰাঞ্জল মেমৰিয়েল একাডেমীৰ  সহযোগত  আজিৰে পৰা ৰহাত এক ১৫ দিনীয়া প্ৰশিক্ষণ শিবিৰ আৰম্ভ হৈছে  । ৰহাৰ ‘ সুকল্প মেমৰিয়েল চিনিয়ৰ চেক্ৰেণ্ডৰী স্কুলৰ খেলপথাৰত  আজি বিয়লি আৰম্ভ হোৱা প্ৰশিক্ষণ শিবিৰটো উদ্বোধন  কৰে বিশিষ্ট সমাজকৰ্মী তথা অগপৰ নেতা বিষ্ণু দাসে ।

ক্ৰীড়া সংগঠক প্ৰভাত চন্দ্ৰ বৰাই আঁত ধৰা উদ্বোধনী অনুষ্ঠানত অসম অলিম্পিকৰ কোষাধ্যক্ষ তথা হকী ইণ্ডিয়াৰ কোষাধ্যক্ষ তপন দাস , বিশিষ্ট ক্ৰীড়া সংগঠক তথা প্ৰাঞ্জল মেমৰিয়েল একাডেমীৰ স্বত্বাধিকাৰী প্ৰভাত ভূঞা , বিশিষ্ট সমাজকৰ্মী সত্যজিৎ বৰা , নগাঁও ক্ৰীড়া সন্থাৰ সহ সম্পাদক তথা সাংবাদিক সমীৰ হাজৰিকা , অৱসৰপ্ৰাপ্ত অধ্যাপক যতীন্দ্ৰ কুমাৰ পাৰৈ ,ৰহাৰ সাংবাদিক বুলন চন্দ্ৰ নাথ , আন্তঃৰাষ্ট্ৰীয় হাৰিয়ানাৰ হকী খেলুৱৈ চক্সী পাৰৱান( SAKSHI PARWAR ) , প্ৰাক্তন খেলুৱৈ সঞ্জয় কাকতি  আদিয়ে অংশগ্ৰহণ কৰে । প্ৰশিক্ষণত আন্তঃৰাষ্ট্ৰীয় হকী খেলুৱৈ চক্সী পাৰৱাৰে ৩০ গৰাকী কিশোৰীক হকীৰ প্ৰশিক্ষণ দিব ।

হাইস্কুল শিক্ষান্ত পৰীক্ষাৰ ফলাফল মে’ মাহত প্ৰকাশ পাব। গহপুৰত উপস্থিত হৈ এই মন্তব্য প্ৰকাশ কৰে ছেবাৰ পৰীক্ষা নিয়ন্ত্ৰক নয়নজ্যোতি শৰ্মাই। যোৱা ১৫ মাৰ্চৰ পৰা ৩১ মাৰ্চলৈকে অনুষ্ঠিত হৈ যোৱা হাইস্কুল শিক্ষান্ত পৰীক্ষাৰ ফলাফল অহা মে’ মাহৰ ভিতৰতে ঘোষণা কৰাৰ কথা সদৰী কৰি আজি সাংবাদিকৰ আগত শৰ্মাই কয় যে সকলো ঠিকে থাকে থাকিলে অহা মে’ মাহৰ ভিতৰতে মেট্ৰিক পৰীক্ষাৰ ফলাফল ঘোষণা কৰা হ’ব।

তেওঁ অসমৰ বিভিন্ন ঠাইৰ মেট্ৰিক পৰীক্ষাৰ বহী মূল্যায়ন কেন্দ্ৰ পৰিদৰ্শন কৰি গহপুুুৰত উপস্থিত হয়। তেওঁ প্ৰথমে গুৱাহাটীৰ মেট্ৰিক পৰীক্ষা বহী মূল্যায়ন কেন্দ্ৰ পৰিদৰ্শন কৰি ক্ৰমে দৰং, ওদালগুৰি, তেজপুৰ, বিশ্বনাথ, গহপুুুৰ আদি অঞ্চলৰ পৰীক্ষা বহী মূল্যায়ন কেন্দ্ৰ পৰিদৰ্শন কৰে।

নলবাৰী জিলাৰ ঘগ্ৰাপাৰ ৰাজহ চক্ৰ ৰ অন্তৰ্গত দক্ষিণ গাঁওস্থিত নিৰ্মীয়মাণ নলবাৰী মেডিকেল কলেজত আজি আবেলি ৰাজ্যৰ স্বাস্থ্য মন্ত্ৰী কেশৱ মহন্ত  উপস্থিত হৈ চিকিৎসালয়খন পৰিদৰ্শন কৰে। উল্লেখ্য যে মুখ্যমন্ত্ৰী ডঃ হিমন্ত বিশ্ব শৰ্মা নেতৃত্বাধীন চৰকাৰ খনে ৰাজ্যখনৰ কেঞ্চাৰ ৰোগী সকলৰ চিকিৎসাৰ সুবিধাৰ বাবে টাটা ট্ৰাষ্টৰ সৈতে যৌথ ভাবে ৰাজ্যৰ বিভিন্ন প্ৰান্তত ১৭ খন অতি উন্নত মানৰ কেঞ্চাৰ চিকিৎসালয় স্হাপনৰ ব্যৱস্থা গ্ৰহণ কৰিছে। ইয়াৰ অংগ স্বৰূপে ঘগ্ৰাপাৰৰ সমীপৰ দক্ষিণগাওঁৰ ১২০ বিঘা মাটিত নিৰ্মাণ কৰি থকা চিকিৎসা মহাবিদ্যালয়ৰ হাস্পাতাল চৌহদৰ ৮ বিঘা ভূমিত এখন কেঞ্চাৰ হস্পিটেলত স্হাপন কৰা হব বুলি নলবাৰীৰ বিধায়ক তথা মুখ্যমন্ত্ৰীৰাজনৈতিক সচিব জয়ন্ত মল্ল বৰুৱাই সদৰী কৰে। আজি আবেলি স্বাস্থ্যমন্ত্ৰী কেশৱ মহন্তই নলবাৰীৰ বিধায়ক তথা মুখ্যমন্ত্ৰীৰ ৰাজনৈতিক সচিব জয়ন্ত মল্ল বৰুৱাক লগত লৈ চিকিৎসা মহাবিদ্যালয় খন পৰিদৰ্শন কৰি নিৰ্মাণকাৰী গৌতম কনষ্ট্ৰাকচন কোম্পানীৰ এম ডি চি আৰ বদ্য, নলবাৰীৰ উপায়ুক্ত গীতিমনি ফুকনৰ লগত বিভিন্ন দিশৰ ওপৰত আলোচনা কৰে।

আনহাতে মন্ত্ৰী গৰাকীয়ে শীঘ্ৰেই চিকিৎসালয় খনৰ নিৰ্মাণ কাৰ্য সম্পূৰ্ণ কৰিবলৈ গৌতম কনষ্ট্ৰাকচনক নিৰ্দেশ দিয়ে।  উল্লেখ্য যে- অহা ২৮ এপ্ৰিলত প্ৰধানমন্ত্ৰী নৰেন্দ্ৰ মোডীয়ে ভাৰ্চুৱেলী উক্ত কেঞ্চাৰ চিকিৎসালয় খনৰ আধাৰশিলা স্হাপন কৰিব। আনহাতে উক্ত কেঞ্চাৰ চিকিৎসালয় খন স্হাপন হলে নলবাৰী জিলাৰ উপৰিও ওচৰৰ কেইবাখনো জিলাৰ কেঞ্চাৰ ৰোগী সকল বাৰুকৈয়ে উপকৃত হব বুলি মন্ত্ৰী গৰাকীয়ে আশা প্ৰকাশ কৰে। আজি মন্ত্ৰী গৰাকীক সংগ দিয়ে নলবাৰীৰ অতিৰিক্ত উপায়ুক্ত ফিৰদৌচ আলম শ্বৈখ, চক্ৰ বিষয়া মনিষা কলিতা, নলবাৰীৰ যুটীয়া স্বাস্থ্য সেৱা সঞ্চালক ডাঃ উমেশ ফাংচু,নলবাৰী লোক নিৰ্মাণ (গৃহ) কাৰ্যবাহী অভিযন্তা প্ৰাঞ্জল শৰ্মা, সহকাৰী কাৰ্যবাহী অভিযন্তা ধ্বজেন নাথ, নলবাৰী জিলা বিজেপিৰ সভাপতি ডাঃ মৃগাংক তালুকদাৰ, অগপৰ কেন্দ্ৰীয় নেতা দিলীপ কুমাৰ দাস, ডঃ ৰবীন দাস, বড়িগোগ বনভাগ মণ্ডল সভাপতি ডিম্বেশ্বৰ বেজবৰুৱা, বিজেপি নেতা ভ্ৰমৰ মজুমদাৰ আদি।

বঙাইগাঁও চহৰৰ বৰপাৰা ৰাজহুৱা  খেলপথাৰত কেন্দ্রীয় বিষুৱা উৎসৱ উদযাপন সমিতি আৰু সদৌ কোচ ৰাজবংশী ছাত্ৰ সন্থাৰ যৌথ উদ্যোগত তিনিদিনীয়া কাৰ্যসূচীৰে উদযাপন কৰিবলগীয়া কেন্দ্রীয় বিষুৱা উৎসৱৰ বৃহস্পতিবাৰে লাইখুটা স্থাপন কৰা হয় ৷ এই উপলক্ষে পুৱাৰ ভাগত বৰপাৰা ৰাজহুৱা খেল পথাৰত কেন্দ্ৰীয় বিহুৱা উৎসৱ উদযাপন সমিতিৰ সভাপতি প্ৰভাৱত বৈষ্ণৱ,  সাধাৰণ সম্পাদক সঞ্জীৱ কুমাৰ ৰায় ( কোচ), অন্যান্য বিষয়ববীয়াসকলৰ লগতে আক্ৰাছুৰ সভাপতি ক্ষীতিশ বৰ্মন, যুটীয়া সম্পাদক কপিলদেৱ সিংহ, কে এ চিৰ কাৰ্যবাহী পাৰিষদ পূৰৱী সৰকাৰ তথা ৰাইজৰ উপস্থিতিত মাংগলিৰ পৰম্পৰাৰ মাজেৰে বিষুৱা উৎসৱৰ লাইখুটা স্থাপন কৰা হয় ৷

অনুষ্ঠানত বিষুৱা উৎসৱ উদযাপন সমিতিৰ সৈতে জড়িত বিষয়ববীয়া সকলে আগন্তুক বিষুৱা উৎসৱটি সুকলমে অনুষ্ঠিত কৰাৰ ক্ষেত্ৰত জাতি – ধৰ্ম,ভাষা- বৰ্ণ নিৰ্বিশেষে সকলো ৰাইজৰ সহায় সহযোগিতা কামনা কৰে ৷ ইপিনে বিষুৱা উৎসৱ উদযাপন সমিতিৰ সভাপতি প্ৰভাৱ বৈষ্ণৱে জানিবলৈ দিয়া মতে অহা ১৪ , ২০ আৰু ২১ এপ্ৰিলত তিনিদিনীয়া কাৰ্যসূচীৰে এই বিষুৱা উৎসৱটি উদযাপন কৰিব ৷ ইতিমধ্যে যাৱতীয় প্ৰস্তুতি চলি থকা বুলিও প্ৰকাশ কৰে ৷ 

পৃথিৱীৰ বৃহৎতম নদীদ্বীপ মাজুলি । কিন্তু এইখন অসমৰে দ্বিতীয় বৃহৎ নদী দ্বীপ কি, সেইকথা আপুনি জানেনে? শোণিতপুৰ জিলাৰ চতিয়া সমষ্টিৰ অন্তৰ্গত জামুগুৰিহাটৰ নিকটৱৰ্ত্তী অঞ্চলতে আছে অসমৰ দ্বিতীয়টো বৃহৎতম নদী দ্বীপ চিকম। ব্ৰহ্মপুত্ৰৰ উপ-নৈ জীয়া ভৰলী আৰু বৰদিকৰাই নদীৰ মাজত অৱস্থিত এই বৃহৎ নদী দ্বীপটোত মূলতে বসবাস কৰে মিচিং জনগোষ্ঠীয় লোকসকলে । জামুগুৰিহাটৰ পৰা নাওঁৰে যাতায়তৰ সুবিধা থকা তথা চিকম নামেৰে জনাজাত এই নদী দ্বীপ বিখ্যাত সুস্বাদু কচু খেতিৰ বাবে । প্ৰায় ২০০ ঘৰ লোকে বসবাস কৰে এই বৃহৎতম নদী দ্বিপ চিকমত ।

ইয়াত পুৰুষৰ সমান্তৰালকৈ মহিলাসকলেও সকলো কাম কৰা দেখা যায় । গৰু, ছাগলী, ভেড়া, মুৰ্গী, গাহৰি পালন কৰিও স্বাবলম্বীতাৰ পথ দেখুৱাবলৈ সক্ষম হৈছে । এই অঞ্চলৰ লোকসকলৰ প্ৰত্যেকখন ঘৰত চলাৰৰ জৰিয়তে বিদ্যুৎ লাভ কৰিছে । অসম চৰকাৰৰ সুদৃষ্টি পৰিলে হয়তু অসমৰ পয্যটনৰ ক্ষেত্ৰত জিলিকি উঠিব জীয়া ভৰলী আৰু বৰদিকৰাই নদীৰ মাজত অৱস্থিত এই নদী দ্বীপটো।