যুদ্ধ বিধ্বস্ত ইউক্ৰেইন সন্দৰ্ভত নিজস্ব স্থিতি স্পষ্ট কৰি জাপান আৰু ভাৰতে ঐক্যবদ্ধ পদক্ষেপ গ্ৰহণৰ সিদ্ধান্ত লৈছে। নতুন দিল্লীত শনিবাৰে ভাৰত ভ্ৰমণৰত জাপানৰ প্ৰধানমন্ত্ৰী ফুমিও কিছিডাৰ সৈতে এক বৈঠকত মিলিত হৈ প্ৰধানমন্ত্ৰী নৰেন্দ্ৰ মোদীয়ে এই কথা ঘোষণা কৰে। বৈঠকত বিভিন্ন বিষয় লৈ দুয়োজন ৰাষ্ট্ৰনেতাই মত বিনিময় কৰে। ইউক্ৰেইন সন্দৰ্ভত তেওঁলোকে আন্তৰাষ্ট্ৰীয় একতাৰ ওপৰত গুৰুত্ব আৰোপ কৰে। উল্লেখ্য যে ৰাছিয়াই ইউক্ৰেইন আক্ৰমণ কৰাৰ পিছতে আন কেইবাখনো দেশৰ লগতে জাপানেও ৰাছিয়াৰ বিৰুদ্ধে বিভিন্ন ক্ষেত্ৰত অৱৰোধ ঘোষণা কৰিছে।

আনহাতে ভাৰতৰ সৈতে দ্বিপাক্ষিক সম্পৰ্ক উন্নত কৰাৰ ওপৰত গুৰুত্ব আৰোপ কৰি প্ৰধানমন্ত্ৰী কিছিডাই নিৰাপত্তা আৰু অৰ্থনৈতিক ক্ষেত্ৰত ভাৰতক সহযোগ কৰাৰ আশ্বাস দিয়ে। অহা ৫ বছৰৰ ভিতৰত জাপানে ভাৰতত ৩.২ লাখ কোটি টকা বিনিয়োগ কৰিব বুলি প্ৰকাশ কৰে জাপানৰ প্ৰধানমন্ত্ৰীয়ে। শেহতীয়াকৈ জাপানৰ সৈতে অৰ্থনৈতিক সম্পৰ্ক যথেষ্ট উন্নত হোৱা বুলি উল্লেখ কৰি জাপানৰ প্ৰধানমন্ত্ৰীয়ে পৰৱৰ্তী সময়ত ভাৰতত বিনিয়োগৰ মাত্ৰা বৃদ্ধি কৰাৰ কথা ঘোষণা কৰে। দুয়োখন দেশৰ মাজত শীঘ্ৰে বিশেষ বৈঠক অনুষ্ঠিত কৰিবলৈ সন্মতি প্ৰকাশ কৰে জাপানৰ প্ৰধানমন্ত্ৰী কিছিডাই। তেওঁ টকিঅ’ত অনুষ্ঠিত হ’বলগীয়া QUAD শীৰ্ষ সন্মিলত অংশগ্ৰহণৰ বাবে প্ৰধানমন্ত্ৰী মোদীক আমন্ত্ৰণ জনায়। দুয়োজন প্ৰধানমন্ত্ৰীৰ বৈঠকৰ পিছতে ভাৰত আৰু জাপানৰ মাজত ৬খনকৈ চুক্তি স্বাক্ষৰিত হয়।

ভাৰতলৈ ৰাছিয়াৰ উপহাৰ। কম মূল্যত ভাৰতীয় তেল কোম্পানীলৈ ৰাছিয়াই যোগান ধৰিব খাৰুৱা তেল। আন্তঃৰাষ্ট্ৰীয় বজাৰৰ খাৰুৱা তেলৰ মূল্যতকৈ বহু কম দামত ভাৰতক খাৰুৱা তেল যোগান ধৰিবলৈ আগবাঢ়িছে ৰাছিয়া। ইয়াৰ বাবে শীঘ্ৰেই সম্পাদিত কৰা হ’ব চুক্তি। ইউক্ৰেইনৰ ওপৰত ৰাছিয়াই আক্ৰমণ কৰাৰ পিছতে ৰাছিয়াৰ ওপৰত অৰ্থনৈতিক অৱৰোধ আৰোপ কৰা হৈছে। পশ্চিমীয়া দেশ সমূহে ৰাছিয়াৰ লগত সকলো সম্পৰ্ক শেষ কৰিছে। ৰাছিযাৰ ওপৰত আমেৰিকাই তেল আমদানি নিষেধাজ্ঞা কে ধৰি বিভিন্ন নিষেধাজ্ঞা আৰোপ কৰিছে।

কিন্তু ইয়াৰ বিপৰীতে ভাৰতীয় তেল কোম্পানীয়ে ৰাছিয়াৰ তেল কোম্পানীৰ পৰা তেল ক্ৰয় কৰাত কোনো বাধা লাভ কৰা নাই। ভাৰতীয় তেল কোম্পানীৰ ওপৰত নাই কোনো নিষেধাজ্ঞা। ইফালে আমেৰিকাকে ধৰি অন্যান্য পশ্চিমীয়া ৰাষ্ট্ৰসমূহে ৰাছিয়াৰ পৰা তেল ক্ৰয় কৰাত নিষেধাজ্ঞা আৰোপক কৰাৰ পিছতে ভাৰত তথা ৰাছিয়াৰ সৈতে সু সম্পৰ্ক বজাই ৰখা দেশসমূহৰ তেল কোম্পানীক কম মূল্যত তেল যোগান ধৰিবলৈ সকলো প্ৰস্তুতি সম্পূৰ্ণ কৰিছে ৰাছিয়াই। এই সন্দৰ্ভত ভাৰতীয় তেল কোম্পানীৰ সৈতে এক চুক্তিও স্বাক্ষৰ কৰিবলৈ আগবাঢ়িছে। ইণ্ডিয়ান অইল কৰ্পোৰেচন লিমিটেডে ৰাছিয়াৰ এটা তেল কোম্পানীৰ সৈতে ৩ নিযুত বেৰল খাৰুৱা তেল আমদানি কৰাৰ চুক্তি কৰিছে। ইয়াৰ বাবে দুয়োটা কোম্পানীৰ মাজত পোনপটীয়া আলোচনা হৈছে। এই চুক্তি চূড়ান্ত পৰ্যায়ত উপনীত হৈছে।

এই মুহূৰ্তত, অধিক ভাৰতীয় তেল কোম্পানীয়ে খাৰুৱা তেল আমদানি কৰিবলৈ ৰাছিয়াৰ তেল কোম্পানীবোৰৰ সৈতে চুক্তি স্বাক্ষৰ কৰাৰ বাবে প্ৰস্তুত হৈছে। উল্লেখ্য যে ৰাছিয়া আৰু ইউক্ৰেইনৰ যুদ্ধ আৰম্ভ হোৱাৰ লগে লগে আন্তঃৰাষ্ট্ৰীয় বজাৰত খাৰুৱা তেলৰ মূল্য যথেষ্ট বৃদ্ধি পাইছিল। প্ৰতিবেৰল খাৰুৱা তেলৰ মূল্যই ১৩০ ডলাৰৰো অধিক মূল্য স্পৰ্শ কৰিছিল। এতিয়াও এই মূল্য ১০০ ডলাৰৰ ওপৰতেই আছে। এনে পৰিস্থিতিত ৰাছিয়াই ভাৰতীয় তেল কোম্পানীক বহু কম মূল্যত তেল যোগান ধৰাৰ বাবে লোৱা পদক্ষেপে ভাৰতক উপকৃত কৰিব বুলি আশা কৰা হৈছে।