পৃথিৱীৰ বৃহৎতম নদীদ্বীপ মাজুলি । কিন্তু এইখন অসমৰে দ্বিতীয় বৃহৎ নদী দ্বীপ কি, সেইকথা আপুনি জানেনে? শোণিতপুৰ জিলাৰ চতিয়া সমষ্টিৰ অন্তৰ্গত জামুগুৰিহাটৰ নিকটৱৰ্ত্তী অঞ্চলতে আছে অসমৰ দ্বিতীয়টো বৃহৎতম নদী দ্বীপ চিকম। ব্ৰহ্মপুত্ৰৰ উপ-নৈ জীয়া ভৰলী আৰু বৰদিকৰাই নদীৰ মাজত অৱস্থিত এই বৃহৎ নদী দ্বীপটোত মূলতে বসবাস কৰে মিচিং জনগোষ্ঠীয় লোকসকলে । জামুগুৰিহাটৰ পৰা নাওঁৰে যাতায়তৰ সুবিধা থকা তথা চিকম নামেৰে জনাজাত এই নদী দ্বীপ বিখ্যাত সুস্বাদু কচু খেতিৰ বাবে । প্ৰায় ২০০ ঘৰ লোকে বসবাস কৰে এই বৃহৎতম নদী দ্বিপ চিকমত ।

ইয়াত পুৰুষৰ সমান্তৰালকৈ মহিলাসকলেও সকলো কাম কৰা দেখা যায় । গৰু, ছাগলী, ভেড়া, মুৰ্গী, গাহৰি পালন কৰিও স্বাবলম্বীতাৰ পথ দেখুৱাবলৈ সক্ষম হৈছে । এই অঞ্চলৰ লোকসকলৰ প্ৰত্যেকখন ঘৰত চলাৰৰ জৰিয়তে বিদ্যুৎ লাভ কৰিছে । অসম চৰকাৰৰ সুদৃষ্টি পৰিলে হয়তু অসমৰ পয্যটনৰ ক্ষেত্ৰত জিলিকি উঠিব জীয়া ভৰলী আৰু বৰদিকৰাই নদীৰ মাজত অৱস্থিত এই নদী দ্বীপটো।

গোলাঘাটৰ দেৰগাঁও কমল দুৱৰা মহাবিদ্যালয়ত ৩ এপ্ৰিল পৰা ৬ এপ্ৰিললৈকে অনুষ্ঠিত ডিব্ৰুগড় বিশ্ববিদ্যালয়ৰ আন্ত:মহাবিদ্যালয় যুৱ মহোৎসৱ-২০২২ত শিৱসাগৰ জিলাৰ গড়গাঁও মহাবিদ্যালয় দলটিয়ে অতি সুন্দৰ প্ৰদৰ্শনেৰে চমকপ্ৰদ কৃতিত্ব অৰ্জন কৰে।  মুঠ ১৫ টা শিতানত পুৰস্কৃত হৈ গড়গাঁও মহাবিদ্যালয়ে একেৰাহে দ্বিতীয়বাৰৰ বাবে দ্বিতীয় শ্ৰেষ্ঠ দলৰ সন্মান লাভ কৰিবলৈ সক্ষম হয়। তদুপৰি মহাবিদ্যালয়ৰ ছাত্ৰী অনন্যা গগৈয়ে সংগীতৰ ৮ টা শিতানত পুৰস্কৃত হৈ একেৰাহে দ্বিতীয়বাৰৰ বাবে শ্ৰেষ্ঠ কণ্ঠশিল্পীৰ সন্মান লাভ কৰাত মহাবিদ্যালয় পৰিয়াল অতিকে উৎফুল্লিত হৈ পৰিছে। অনন্যা গগৈয়ে জ্যোতি সংগীত, বিষ্ণু ৰাভা সংগীত, জয়ন্ত সংগীত আৰু আধুনিক গীতত প্ৰথম স্থান, গজল প্ৰতিযোগিতাত দ্বিতীয় স্থান, একক লোকগীত, ভজন, আৰু পাৰ্বতী প্ৰসাদ বৰুৱা সংগীত প্ৰতিযোগিতাত তৃতীয় স্থান লাভ কৰে। তেনেদৰে  শোভন জ্যোতি দুৱৰা, অন্নপ্ৰসন্ন কাশ্যপ, ৰাহুল বৰুৱা আৰু দেৱপ্ৰতীম বৰগোহাঁইৰ দলটিয়ে লোকগীত প্ৰতিযোগিতাত প্ৰথম স্থান আৰু অনন্যা গগৈ, প্ৰস্তুতি ফুকন, কৌশিক ডেকা, পাৰ্থ প্ৰতীম শইকীয়া, বিকি গগৈ আৰু অন্নপ্ৰসন্ন কাশ্যপৰ দলটিয়ে সমবেত সংগীত প্ৰতিযোগিতাত প্ৰথম স্থান লাভ কৰে।

ঢোল বাদনত অন্নপ্ৰসন্ন কাশ্যপে প্ৰথম স্থান, ফটোগ্রাফি প্ৰতিযোগিতাত শুভ্ৰজ্যোতি গগৈয়ে তৃতীয় স্থান, ইনষ্টলেশ্যন আৰু ক্লে’ মডেলিং প্ৰতিযোগিতাত ত্ৰিবেণী বৰুৱাই তৃতীয় স্থান, একাংকিকা নাট প্ৰতিযোগিতাত তৃতীয় স্থান লাভ কৰিবলৈ সক্ষম হয়। মহাবিদ্যালয়ৰ দলটিৰ সফলতাত সন্তুোষ  প্ৰকাশ কৰি অধ্যক্ষ ড° সব্যসাচী মহন্তই দলটিৰ প্ৰতিগৰাকী সদস্যৰ লগতে শিক্ষক-তত্ত্বাৱধায়ক প্ৰণৱ দুৱৰা, ড° অঞ্জন কোঁৱৰ, ড° ৰিমঝিম বৰা, ড° বলোৰাম দাসকে প্ৰমুখ্য কৰি কৃতিত্বৰ আঁৰৰ সকলো ব্যক্তিক অভিনন্দন তথা কৃতজ্ঞতা জনায়। লগতে পৰৱৰ্তী সময়তো এনেধৰণৰ উৎকৃষ্ট প্ৰদৰ্শনৰ ধাৰাবাহিকতা বৰ্তাই ৰাখিবলৈ মহাবিদ্যালয় পৰিয়ালৰ প্ৰয়াস অব্যাহত থাকিব বুলি অভিমত প্ৰকাশ কৰে।

 ডিব্ৰুগড় সাহিত্য সভা, ডিব্ৰুগড়ৰ কানৈ মহাবিদ্যালয়ৰ অসমীয়া বিভাগ আৰু অভ্যন্তৰীণ মান নিৰ্ণায়ক কোষৰ উদ্যোগত আজি ‘অসমৰ ভাষা-সাহিত্য সংস্কৃতি : সংকট, প্ৰত্যাহ্বান আৰু আমাৰ কৰ্তব্য’  শীৰ্ষক মনোজ্ঞ বক্তৃতানুষ্ঠান কানৈ মহাবিদ্যালয়ত শ্ৰীমন্ত শংকৰদেৱ সভাকক্ষত অনুষ্ঠিত হয়৷ অসম সাহিত্য সভাৰ প্ৰাক্তন সম্পাদক তথা কটন বিশ্ববিদ্যালয়ৰ অৱসৰপ্ৰাপ্ত অধ্যাপক, শ্ৰীমন্ত শংকৰদেৱ বিশ্ববিদ্যালয়ৰ পৰিৱেশ্য কলা অধ্যয়ন বিভাগৰ অধ্যাপক, বিশিষ্ট লেখক ড৹ জগদীশ পাটগিৰিয়ে উক্ত বিষয়ত এক মনোগ্ৰাহী বক্তৃতা প্ৰদান কৰে৷ বৰ্তমান সময়ত অসমীয়া ভাষা-সাহিত্য-সংস্কৃতিৰ প্ৰতি আহি পৰা বিভিন্ন প্ৰত্যাহ্বানসমূহৰ বিষয়ে তথ্যসমৃদ্ধভাৱে উল্লেখ কৰি এইবোৰ কিদৰে নোহোৱা কৰি এক নতুনত্ব মাত্ৰা প্ৰদান কৰিব পাৰি সেই সন্দৰ্ভত ড৹ পাটগিৰিয়ে খুব সুন্দৰকৈ ব্যক্ত কৰি উপস্থিত সকলোকে চিন্তাৰ খোৰাক যোগায়৷

বক্তৃতানুষ্ঠানৰ আৰম্ভণিতে ডিব্ৰুগড় জিলা সাহিত্য সভাৰ সভাপতি ইন্দ্ৰ গগৈয়ে সাহিত্য সভাৰ তৰফৰ পৰা আদৰণি জনায়৷ কানৈ মহাবিদ্যালয়ৰ তৰফৰ পৰা অধ্যক্ষ ড৹ শশীকান্ত শইকীয়াই উপস্থিত সকলোকে সাদৰ সম্ভাষণ কৰা অনুষ্ঠানটোত ডিব্ৰুগড় জিলা সাহিত্য সভাৰ সম্পাদক পৰমেশ্বৰ নলবৰীয়াই শুভেচ্ছামূলক দুআষাৰ বক্তব্য আগবঢ়ায়৷ এই অনুষ্ঠানতে কানৈ মহাবিদ্যালয়ৰ গ্ৰীণ ক্লাবৰ পৰা প্ৰকাশিত আৰু অধ্যাপক এল ডুংগেলৰ সম্পাদনাত প্ৰকাশিত এখন মুখপত্ৰ উন্মোচন কৰে ড৹ জগদীশ পাটগিৰি আৰু উপস্থিত বিশিষ্ট ব্যক্তিসকলে৷ ‘অসমৰ ভাষা-সাহিত্য সংস্কৃতি : সংকট, প্ৰত্যাহ্বান আৰু আমাৰ কৰ্তব্য’ শীৰ্ষক বক্তৃতানুষ্ঠানটোত অসমীয়া বিভাগৰ মুৰব্বী অধ্যাপিকা অঞ্জুমণি ফুকন, ডিব্ৰুগড় সাহিত্য সভাৰ সম্পাদক ৰাতুল বুঢ়াগোহাঁই, বিশিষ্ট লেখক, দৈনিক অগ্ৰদূত কাকতৰ সহকাৰী সম্পাদক হেমন্ত ভৰালী, উপাধ্যক্ষ ড৹ প্ৰিয়দেৱ গোস্বামী, অভ্যন্তৰীণ মান নিৰ্ণায়ক কোষৰ ড৹ মৃদুল শৰ্মাকে ধৰি বহুকেইগৰাকী গণ্য-মান্য ব্যক্তিয়ে এই অনুষ্ঠানটোত উপস্থিত থাকে৷ কানৈ মহাবিদ্যালয়ৰ শিক্ষক-শিক্ষয়িত্ৰী, ছাত্ৰ-ছাত্ৰীসকলৰ লগতে ডিব্ৰু মহাবিদ্যালয়, মনোহাৰী দেৱী কানৈ মহাবিদ্যালয়ৰ শিক্ষক-শিক্ষয়িত্ৰী আৰু শিক্ষাৰ্থীসকল উপস্থিত থকা অনুষ্ঠানটোৰ আঁত ধৰে অসমীয়া বিভাগৰ সহকাৰী অধ্যাপিকা মুনমী বৰুৱাই৷

অসম চাহ মজদুৰ সংঘ তেজপুৰ শাখাৰ প্ৰাক্তন সম্পাদক চন্দ্ৰ কান্ত প্ৰজাইৰ আত্মাৰ চিৰশান্তিৰ বাবে আজি অসম চাহ মজদুৰ সংঘ  তেজপুৰ শাখাৰ  লগতে শাখা সংঘৰ অন্তৰ্গত সমূহ চাহ বাগিচাত শাখা সংঘৰ নিৰ্দেশমৰ্মে  শ্ৰদ্ধাঞ্জলি ও শোকসভা অনুষ্ঠিত কৰে । আজি ৰঙাপৰা স্থিত সংঘৰ কাৰ্যালয়ত সংঘৰ তেজপুৰ শাখাৰ ভাৰপ্ৰাপ্ত সম্পাদক সুনিল টুটী, গাননীক গজেন শইকীয়া ,কাৰ্যালয় সম্পাদক অমিয় বৰঠাকুৰ,সংগঠক অনিল কন্দৰ লগতে বহু লোকে প্ৰয়াত চন্দ্ৰ কান্ত প্ৰজাইৰ প্ৰতিচ্ছবিত মাল্যাৰ্পন কৰি শ্ৰদ্ধাঞ্জলি জ্ঞাপন কৰে।উল্লেখ্যযে যোৱা ২৬ মাৰ্চ তাৰিখত অসম চাহ মজদুৰ সংঘ তেজপুৰ শাখাৰ প্ৰাক্তন সম্পাদক ও শাখা সংঘৰ উপদেষ্টা চন্দ্ৰ কান্ত প্ৰজাৰ(৭৭)বছৰ বয়সত বিন্দুকুৰিৰ নিজা বাসগৃহত বাৰ্ধক্যজনিত কাৰনত মৃত্যু হৈছিল।

১৯৪৫ চনত ৰূপাজুলি চাহ বাগিচাত জন্ম গ্রহণ কৰা প্রজাই বাগিচাত প্রাথমিক শিক্ষা লয় আৰু বিন্দুকুৰি হাইস্কুলৰ পৰা হাইস্কুল শেষান্ত পৰীক্ষাত উৰ্ওীন হৈ দৰং মহাবিদ্যালয়ৰ পৰা স্নাতক ডিগ্রি লাভ কৰি আইনৰ পাঠ্যক্ৰমত নাম লগায়। পৰৱৰ্তী সময়ত তেখেতে অসম চাহ মজদুৰ সংঘৰ তেজপুৰ শাখাৰ কাৰ্য্যালয় সম্পাদক, সহকাৰী সম্পাদক, সম্পাদক, উপদেষ্টা পদত বিগত ৩০ বছৰে সেৱা আগবঢ়াইছিল। তাৰোপৰি তেখেতে ৰঙাপৰা ব্লক কংগ্রেছৰ সভাপতি পদত দায়িত্ব ভাৰ লাভ কৰিছিল। তেখেতে বাগিচাৰ শ্রমিক আৰু কৰ্মচাৰী সকলৰ বিভিন্ন ধৰনৰ সমস্যা সমুহৰ হকে মাত মাতি আহিছিল।আজি সন্ধিয়া শাখা সংঘৰ অন্তৰ্গত সমূহ চাহ বাগিচাৰ শ্ৰমিক ৰাইজৰ ঘৰত এগচি চাকি জ্বলাই প্ৰয়াত চন্দ্ৰ কান্ত প্ৰজাইৰ আত্মাৰ চিৰশান্তিৰ বাবে প্ৰাৰ্থনা কৰিব বুলি সংঘৰ তেজপুৰ শাখাৰ ভাৰপ্ৰাপ্ত সম্পাদক সুনিল টুটীয়ে সংবাদ মাধ্যমক অৱগত কৰে।

সচাকৈয়ে বেদনাভৰা,যন্ত্ৰণাদায়ক এক কালধুমুহাই ছানি ধৰিছিলে দুৰ্ভগীয়া পৰিয়ালবৰ্গক । ঐতিহাসিক কমলাবাৰী সত্ৰৰ ভুমি উদ্ধাৰৰ বাবে অবৈধ বাংলাদেশীৰ হাতত ১৯৮৩ চনতে  শ্বহীদ হল প্ৰয়াত সোমেশ্বৰ হাজৰিকা। কাটি দুচেও কৰিছিল হাজৰিকাক ৷ কিন্ত আজিও ন্যায় নাপালে দুৰ্ভগীয়া পৰিয়ালটিয়ে ৷ হত্যাকাৰী চিনাক্ত হোৱাৰ পাছতো কৰায়ক্ত কৰিব নোৱাৰিলে আৰক্ষী প্ৰশাসন ৷ অৱশেষত সুৰক্ষিত স্থান  বিচাৰি বিশ্বনাথ জিলাৰ  অসম অৰুণাচল সীমান্তৱৰ্তীৰ মহজুলিবস্তিত বসবাস কৰিব লয়  দুৰ্ভগীয়া পৰিয়ালটি ৷ নানান দুখ কষ্ট দৰিদ্ৰতাৰ মাজত দিন কটোৱা পৰিয়ালটি সেই ঐতিহাসিক ঘটনাৰ সাক্ষী হৈ ৰল ৷ ১৬৭৩ চনত স্থাপন হোৱা মাজুলীৰ কমলাবাৰী সত্ৰ ৷ ব্ৰক্ষ্মপুত্ৰ নদীৰ সংহাৰী বানে কমলাবাৰী সত্ৰৰ যথেষ্ট ক্ষতিসাধন কৰিছিল।অৱশেষত ৰাইজ তথা সত্ৰাধিকাৰৰ আবেদন মৰ্মে সত্ৰ স্থানান্তৰিত কৰাৰ সিদ্ধান্ত গ্ৰহন কৰিছিল তদানীন্তন মুখ্যমন্ত্ৰী বিমলা প্ৰসাদ চলিহাৰ কাৰ্যকালত ৷ চৰকাৰে চৰজমিন্ ভিক্তিত লক্ষীমপুৰ জিলা স্থিত এলেঙী সত্ৰৰ সমীপত কমলাবাৰী সত্ৰ প্ৰতিষ্ঠাৰ নামত প্ৰায় ৩৫০ বিঘা ভুমি প্ৰদান কৰে ৷ স্থানীয় ৰাইজ তথা সত্ৰৰ কাৰ্যকৰ্তা সকলেও পুৰ্ণ উদ্যমে সত্ৰ  প্ৰতিষ্ঠাৰ বাবে কামকাজ অব্যাহত ৰাখে। সময় বাগৰাৰ লগে লগে অবৈধ বাংলাদেশীয়ে  সুযোগ বুজি খেতি কৰাৰ চলেৰে উক্তভুমি দখল কৰিবলৈ আৰম্ভ কৰে ৷ এঘৰ দুঘৰকৈ বসতি আৰম্ভ কৰা অবৈধ বাংলাদেশীয়ে প্ৰায় ৩০০ বিঘাতকৈ অধিক ভুমি সম্পুৰ্ণ ৰূপে দখল কৰিবলৈ সক্ষম হয় ৷

এই ভুমি উদ্ধাৰৰ বাবে স্থানীয় ৰাইজৰ সৈতে বেদখলকাৰীৰ মাজত সংঘাতৰ সৃষ্টি হৈছিল ৷ আনকি ১৯৮০ ৰ দশকতে এই বৃহৎ ভুমিভাগ বেদখল মুক্ত কৰিবৰ বাবে বিভিন্ন দল সংগঠনে প্ৰকাৰান্তৰে চৰকাৰক হেচা প্ৰয়োগ কৰিছিল ৷ যদিও সত্ৰৰ ভুমি উদ্ধাৰ নহল ৷ বৰঞ্চ দিনক দিনে বেদখলীৰ গ্ৰাসত পৰা ভুমিভাগ এতিয়া অবৈধ বেদখলকাৰী বাংলাদেশীৰ ভুমি ৷ বাংলাদেশী নকমিল বৰঞ্চ অবৈধ বাংলাদেশীৰ অঞ্চলটোলৈ আগমনহে ঘটিল ৷ শেষত কমলাবাৰী সত্ৰই ৺সোমেশ্বৰ হাজৰিকাক মুক্তিয়াৰৰ পদত নিযুক্তি দি ভূমি উদ্ধাৰৰ বাবে কৰ্তৃত্ব প্ৰদান কৰে ৷ সত্ৰৰ দায়িত্ব শিৰত লৈ হাজৰিকাই ভুমি উদ্ধাৰৰ বাবে মহামান্য উচ্চতম ন্যায়ালয়ত দ্বাৰস্ত হয় ৷ অৱশেষত গোচৰৰ ভিক্তিত অবৈধ ভুমি বেদখল মুক্তৰ ৰায় আহিল ৷ আনকি মহামান্য ন্যায়ালয়ে ভুমি বেদখল মুক্ত কৰিবৰ বাবে চৰকাৰলৈ এক জৰুৰী নিৰ্দেশনাও জাৰী কৰিলে ৷ ন্যায়ালয়ৰ নিৰ্দেশনুযায়ী চৰকাৰে সত্ৰৰ জমি বেদখল মুক্ত কৰিবৰ বাবে উচ্ছেদ অভিযান চলাব গৈ আৰক্ষীৰ আৰু  বেদখলকাৰীৰ মাজত গুলিয়াগুলি পৰ্যন্ত হয়।শেষ মুহুৰ্তত  ভুমি উদ্ধাৰত চৰকাৰ বিফল হয়। উল্লেখ্য যে ভুমি উদ্ধাৰৰ বাবে  ন্যায়ালয়ত দ্বাৰস্ত হোৱা ৺সোমেশ্বৰ হাজৰিকাক একাধিকবাৰ হত্যা কৰাৰ প্ৰচেষ্টা চলাইছিল একাংশ দুস্কৃতিকাৰী সকলে ৷শেষত সুৰক্ষা প্ৰদান কৰাৰ বাবে চৰকাৰে সেনা মকৰল কৰিছিল ৷ যদিও দুস্কৃতিকাৰীয়ে  সুযোগ বুজি চোকা দাৰে কাটি অতি নিৰ্মমভাবে হত্যা কৰিছিল হাজৰিকাক ৷ ৮৩ ৰ আন্দোলনৰ সময়ছোৱাত সোমেশ্বৰ হাজৰিকা জাতি,মাটি,ভেটিৰ বাবে শ্বহীদ হল ৷  ভুমি উদ্ধাৰ কৰিবলৈ সক্ষম নহল চৰকাৰখনে ৷ সম্প্ৰতি বিজেপিৰ মিত্ৰজোঁটৰ চৰকাৰে অবৈধভাৱে সত্ৰৰ ভুমি দখল কৰা লোকক উচ্ছেদ কৰিব লোৱা চৰকাৰ সিদ্ধান্তক আদৰণি জনাইছে শ্বহীদ সোমেশ্বৰ হাজৰিকাৰ সহধৰ্মিনী পুণেশ্বৰী হাজৰিকাই ৷ চৰকাৰৰ এই সিদ্ধান্ত ঐতিহাসিক বুলি মতপোষণ কৰা পুণেশ্বৰী হাজৰিকাই কয় যে  ৮৩ ৰ আন্দোলনৰ লগতে ভুমি বেদখল মুক্ত কৰিবৰ বাবে মোৰ স্বামীয়ে প্ৰাণ আহুতি দিছিল ৷ চৰকাৰৰ এই ঐতিহাসিক সিদ্ধান্ত কাৰ্যকৰী কৰিলে অন্তত মোৰ স্বামীৰ আত্মাই শান্তি পাব ৷ লগতে সত্ৰৰ ভুমি উদ্ধাৰ হোৱাৰ লগতে মাটি ভেটিক সুৰক্ষা প্ৰদান কৰা হব বুলি এই প্ৰতিবেদকক জানিব দিয়ে ৷ চৰকাৰৰ এই সিদ্ধান্তক আদৰণি জনাই অসম চৰকাৰলৈ ধন্যবাদ জ্ঞাপন কৰিছে প্ৰয়াত সোমেশ্বৰ হাজৰিকাৰ সহধৰ্মিনী পুণেশ্বৰী হাজৰিকা  আৰু পুত্ৰ নিৰঞ্জন হাজৰিকাই।