পৌৰসভা নিৰ্বাচনৰ বাবে ৰাজ্যজুৰি ব্যাপক প্ৰস্তুতি গঢ়ি তোলা হৈছে। কোনো ধৰণৰ অপ্ৰীতিকৰ পৰিস্থিতিৰ যাতে সৃষ্টি নহয় তাৰ বাবে প্ৰশাসনে আগতীয়া পদক্ষেপ হাতত লৈছে। ৬ মাৰ্চত অনুষ্ঠিত হ’বলগীয়া বঙাইগাঁও পৌৰসভা নিৰ্বাচন সুকলমে অনুষ্ঠিত কৰাৰ বাবে বঙাইগাঁও জিলাৰ উপায়ুক্ত ডাঃ এম এছ লক্ষ্মী প্ৰিয়াই পৌৰসভা এলেকাত ড্ৰাই ডে’ ঘোষণা কৰিছে। সেই অনুসৰি ৪ মাৰ্চৰ বিয়লি ৪ বজাৰ পৰা ৬ মাৰ্চৰ বিয়লি ৪ বজালৈ আৰু লগতে ৯ মাৰ্চত ভোট গণনা শেষ নোহোৱাপৰ্যন্ত বঙাইগাঁও পৌৰসভা এলেকাৰ অন্তৰ্গত অনুজ্ঞা পত্ৰ থকা সকলো ধৰণৰ সুৰাৰ দোকান বন্ধ ঘোষণা কৰিছে।
অসম আবকাৰী আইনৰ নিৰ্দিষ্ট বিধি অনুসৰি এই সময়ছোৱাত অনুজ্ঞাপত্ৰ নথকা কোনো স্থানত সুৰাৰ মজুত ৰাখিলে বা বিক্ৰী কৰিলে কঠোৰ ব্যৱস্থা গ্ৰহণ কৰা হ’ব বুলি নিৰ্দেশনাটোত কোৱা হৈছে। আনহাতে, যদি কোনো এলেকাত পুনৰ ভোটগ্ৰহণ অনুষ্ঠিত কৰিবলগীয়া হয় তেনেহ’লে সেই সময়ছোৱাতো ড্ৰাই ডে’ বলৱৎ থাকিব।
দেশ তথা ৰাজ্যৰ আন আন ঠাইৰ লগতে ছয়গাঁৱ সমষ্টিৰ গৰৈমাৰী ৰাজহ চক্ৰৰ অন্তৰ্গত ঘোঁৰামাৰাস্থিত কামৰূপ জিলাৰ একমাত্ৰ ‘ দক্ষিণ কামৰূপ বধিৰ বিদ্যালয়’তো আজি দিনজোৰা কাৰ্যসূচীৰে বিশ্ব শ্ৰৱণ দিৱস উদযাপন কৰা হয় ৷ এই উপলক্ষে পূৱা বৃক্ষৰোপন, চাফাই ,পতাকা উত্তোলন আদি কাৰ্যসূচীৰ পিছতে বিশ্ব শ্ৰৱণ দিৱস উপলক্ষে বিদ্যালয়ৰ বিশেষভাৱে সক্ষম ছাত্ৰ- ছাত্ৰীসকলে উলিয়ায় এখনি সজাগতা যাত্ৰা ৷ যাত্ৰাৰ শুভ উদ্বোধন কৰে বিদ্যালয়খনৰ পৰিচালন সঞ্চালক ৰফিকুল আলমে ৷ ইফালে, এই দিৱস উপলক্ষে বিদ্যালয়খনৰ ছাত্ৰ-ছাত্ৰীসকলৰ মাজত বিভিন্ন ধৰণৰ খেল ধেমালী প্ৰতিযোগিতাও অনুষ্ঠিত হয় ৷
দুপৰীয়া বিদ্যালয় কক্ষত অনুষ্ঠিত হোৱা মুকলি সভাত সন্মানীয় অতিথি হিচাবে গৰৈমাৰী ৰাজহ চক্ৰ বিষয়া অৰূপ বিৰকামীয়াই উপস্থিত থাকি আন শিশুসকলৰ দৰে দিব্যাংগ শিশু আৰু ছাত্ৰ- ছাত্ৰীসকলকেও যাতে উপযুক্ত শিক্ষা দীক্ষাৰে আগুৱাই যাব পাৰে তাৰ বাবে সকলোৰে সহযোগিতা কামনা কৰে ৷ লগতে বধিৰ বিদ্যালয়খনৰ শিক্ষক- শিক্ষয়িত্ৰীৰ লগতে পৰিচালনা সমিতিৰ বিশেষভাৱে সক্ষম ছাত্ৰ-ছাত্ৰীৰ বাবে আগবঢ়োৱা সেৱাৰো শলাগ লয় ৷ মুকলি অনুষ্ঠানত বিদ্যালয়খনৰ উপদেষ্টা জমিৰ উদ্দিন আহমেদও মূল্যৱান বক্তব্য দাঙি ধৰে ৷ অনুষ্ঠান উপলক্ষে গৰৈমাৰী ৰাজহ চক্ৰ বিষয়া গৰাকীয়ে বিদ্যালয়খনৰ বিশেষভাৱে সক্ষম ছাত্ৰ- ছাত্ৰীসকলৰ বিভিন্ন সমস্যাৰ ওপৰতো উদ্যোক্তাসকলৰ সৈতে মত বিনিময় কৰে ৷
