ওদালগুৰি শংকৰদেৱ মিচন মাধ্যমিক বিদ্যালয়ৰ সোনালী জয়ন্তী উৎসৱৰ শুভাৰম্ভণি অনুষ্ঠানৰ কাৰ্যসূচী ৩১জানুৱাৰীত বিদ্যালয় প্ৰাঙ্গণত বন্তি প্ৰজ্বলন আৰু পতাকা উত্তোলনেৰে অনুষ্ঠিত হৈ যায়। এই উপলক্ষে পুৱা ১০ বজাত আড়ম্বৰপূৰ্ণভাৱে এক গাম্ভীৰ্যপূৰ্ণ পৰিবেশত পতাকা উত্তোলন আৰু বন্তি প্ৰজ্বলন কৰে বিদ্যালয় খনৰ অৱসৰপ্ৰাপ্ত প্ৰধান শিক্ষক তথা প্ৰতিষ্ঠা কালৰ পৰিচালনা সমিতিৰ সদস্য কৃষ্ণকান্ত দাসে। 

বিদ্যালয় খনৰ শিক্ষক নৰহৰি পাঠকে আতঁধৰা অনুষ্ঠানত পতাকা উত্তোলক কৃষ্ণকান্ত দাসে বিদ্যালয় খনৰ স্মৃতি ৰোমন্হন কৰি কয়- শিক্ষা জীৱনৰ আদিপাঠ।এই শিক্ষানুষ্ঠান গঢ়ি তোলাৰ বাবে গৌৰৱান্বিত।সেয়ে আজি মই আনন্দিত হৈ পৰিছো।বিদ্যালয়খনৰ প্ৰতিষ্ঠা কালৰ ইতিহাস স্মৃতি ৰোমন্হন কৰি আবেগিক হৈ পৰে।তেওঁ বিদ্যালয় খনৰ সোনালী জয়ন্তী উৎসৱৰ সফল ৰূপায়নৰ কামনা কৰি সকলোৰে সহযোগিতা কামনা কৰে।

উক্ত অনুষ্ঠানত ওদালগুৰিৰ বিধায়ক তথা বিবিচিৰ উপমুখ্য কাৰ্যবাহী গোবিন্দ চন্দ্ৰ বসুমতাৰী উপস্হিত থাকি বিদ্যালয়খনৰ সোনালী জয়ন্তী উৎসৱৰ সফলতা কামনা কৰাৰ লগতে  সকলোৰে সহযোগিতা কামনা কৰে আৰু তেওঁ সকলো ধৰণৰ সহযোগ কৰাৰ আশ্বাস প্ৰদান কৰি বৌদ্ধিক উত্তৰণৰত  বিদ্যালয় খনৰ অৱদানৰ কথা শ্ৰৰ্দ্ধাৰে সোঁৱৰণী কৰে  ।৩১জানুৱাৰীৰ এই মাঙ্গলিক কাৰ্যসূচীত অঞ্চলটোৰ বিশিষ্ট নাগৰিক সকল, প্ৰাক্তন ছাত্ৰ ছাত্ৰী সকল, বিদ্যালয় খনৰ শিক্ষক শিক্ষয়িত্ৰী সকল, অৱসৰপ্ৰাপ্ত শিক্ষক শিক্ষয়িত্ৰী সকলৰ লগতে বিদ্যালয় খনৰ ছাত্ৰ ছাত্ৰী সকল উপস্থিত থাকে।

মৰিগাঁও জিলা ক্ষীৰুদ বৰুৱা ষ্টেডিয়াম প্ৰেক্ষাগৃহত মৰিগাঁও জিলা যোগ সন্থাৰ এখন গুৰুত্বপূৰ্ণ সাধাৰণ সভা অনুষ্ঠিত হয় ৷ জিলা যোগ সন্থাৰ সভাপতি ধনঞ্জয় তালুকদাৰ আৰু সম্পাদক মানস নাথে এক প্ৰেছ বিজ্ঞপ্তি যোগে সংবাদ মাধ্যমক জনোৱা মতে জিলা যোগ সন্থাৰ সভাপতি ধনঞ্জয় তালুকদাৰৰ সভাপতিত্বত অনুষ্ঠিত হোৱা সাধাৰণ   সভা খনৰ জৰিয়তে জিলাখনৰ সাংগঠনিক দিশত বিভিন্ন আলোচনা কৰাৰ লগতে মৰিগাঁও জিলা যোগ সন্থাই প্ৰতিষ্ঠা কালৰে পৰা অৰ্থত ২০২০ চনৰ পৰা অসম যোগ সন্থাৰ লগত থাকি কাম কৰি গৈছিল যদিও শেহতিয়াকৈ অসম যোগ সন্থাৰ সাধাৰণ সম্পাদক প্ৰভাত বৰাৰ একনায়কত্ববাদ আৰু মইমতালিৰে ৰাজ্যিক যোগ সন্থাটো পৰিচালনা কৰাত ক্ষুন্ন হৈ পৰিছে মৰিগাঁও জিলা যোগ সন্থা ৷

ৰাজ্যিক সম্পাদক গৰাকীয়ে বিশেষকৈ ৰাজ্যিক যোগাসন প্ৰতিযোগিতাত মৰিগাঁও জিলাৰ ছাত্ৰছাত্ৰীক অংশগ্ৰহণত বাধা প্ৰদান কৰা , পক্ষপাত মূলক আচৰণ কৰা , ৰাজ্যিক যোগাসন প্ৰতিযোগিতাত স্থানপ্ৰাপ্ত ছাত্ৰছাত্ৰীক বিগত  ৪৫ দিনে মানপত্ৰ প্ৰদান নকৰা ইত্যাদি বিষয়ত ৰাজ্যিক বিষয়ববীয়াৰ প্ৰতি ক্ষুন্ন হৈ আজি সাধাৰণ সভাৰ জৰিয়তে আজিৰ তাৰিখৰ পৰা কাৰ্যকৰী হোৱাকৈ  অসম যোগ সন্থাৰ লগত কোনো ধৰণৰ সম্পৰ্ক আৰু যোগাযোগ নকৰাৰ সিদ্ধান্ত গ্ৰহণ কৰে ৷ আনহাতে মৰিগাঁও জিলাই নিজাববীয়াকৈ কামকৰি যাব বুলিও সিদ্ধান্ত গ্ৰহণ কৰে ৷ উল্লেখ্য যে এই সভাতে যোৱা ৯ ডিচেম্বৰৰ পৰা ১১ ডিচেম্বৰলৈ গুৱাহাটীত অনুষ্ঠিত হোৱা ৰাজ্যিক যোগাসন প্ৰতিযোগিতাত স্থানপ্ৰাপ্ত ক্ৰমে কমল চন্দ্ৰ নাথ , শ্বৰ্ণলতা দেৱী , অভিজ্ঞান নাথ , স্তুতি দেৱীক জিলা যোগ সন্থাৰ তৰফৰ পৰা একোখনকৈ গামোচা আৰু পদকেৰে সম্বৰ্ধনা জনোৱা হয় ৷ লগতে জিলা আৰু ৰাজ্যিক পৰ্যায়ত অংশগ্ৰহণ কৰা প্ৰতিযোগিতা ছাত্ৰছাত্ৰী সকলক মানপত্ৰ প্ৰদান কৰা হয় ৷

বাক্সা জিলাৰ শালবাৰী মহকুমাৰ অন্তৰ্গত বাহঁবাৰী আৰক্ষীয়ে শুকুৰবাৰে নিশা অভিযান চলাই গ্ৰেপ্তাৰ কৰে এগৰাকী তীৰৰ জুৱাৰী । তীৰৰ জুৱাৰীটোৰ নাম চমেৰ আলী । বাঁ‌হবাৰী পহৰা চকীৰ ভাৰপ্ৰাপ্ত বিষয়া জয়ন্ত দাসৰ নেতৃত্বত এটা আৰক্ষীৰ দলে আটকাধীন চমেৰৰ পৰা নগদ চাৰি হাজাৰ টকা আৰু তীৰ খেলৰ বুকি,মোবাইল ফোন জব্দ কৰে ।

সম্প্ৰতি আৰক্ষীয়ে অধিক তথ্যৰ বাবে জুৱাৰী চাহেৰক জেৰা অব্যাহত ৰাখিছে । উল্লেখ্য যে দীৰ্ঘদিন ধৰি বাহবাৰী অঞ্চলত তীৰ খেলৰ বৃহৎ ঘাটি গঢ়ি তুলিছিল ধৃত চামেৰ আলীয়ে ।

সাংবাদিকসকলৰ দেশৰ বৃহত্তম সংগঠন ইণ্ডিয়ান জাৰ্ণেলিষ্ট ইউনিয়নৰ ৰাষ্ট্ৰীয় কাৰ্যনিৰ্বাহক প্ৰথম বাৰৰ বাবে অসমত অনুষ্ঠিত হৈছে। গুৱাহাটী মহানগৰীৰ লাষ্টগেটস্থিত পি ডব্লিউ ডি কনভেনছল হ’লত আয়োজিত অনুষ্ঠানত আজি প্ৰদান কৰা হয় ‘ব্ৰহ্মপুত্ৰ উপত্যকা সাংবাদিকতা’ বঁটা।  ২৫ বছৰীয়া সাংবাদিকতাৰ স্বীকৃতি স্বৰূপে জ্যেষ্ঠ সাংবাদিক দুলাল মিশ্ৰক এই বঁটা প্ৰদান কৰে অসমৰ তথ্য আৰু জনসংযোগ দপ্তৰৰ মন্ত্ৰী পিযুষ হাজৰিকাই।

অসম আৰক্ষীৰ বিষয়া প্ৰসেনজিৎ দাসক আগবঢ়োৱা হয় সাহসিকতাৰ বঁটা।এই অনুষ্ঠানত অসম বিধানসভাৰ প্ৰধান সচিব হেমেন দাস(IAS), লাহৰীঘাট সমষ্টিৰ বিধায়ক ডঃ আছিফ মহম্মদ নজৰ , সাংবাদিক এনাক্ষী শইকীয়া বৰুৱাক সম্বৰ্ধনা জনোৱা হয়।   অনুষ্ঠানত  ইণ্ডিয়ান জাৰ্ণেলিষ্ট ইউনিয়নৰ সভাপতি বি.আৰ. প্রজাপতি ,অসম ৰাজ্যিক সাংবাদিক সন্থাৰ সভাপতি জিতু শৰ্মা ৰাজখোৱা,অসম ৰাজ্যিক সাংবাদিক সন্থাৰ সহকাৰী সাধাৰণ সম্পাদক প্ৰদীপ চন্দ্ৰ ডেকা,ৰাজ্যিক সাংবাদিক সন্থাৰ সাধাৰণ সম্পাদক ৰাতুল বৰা প্ৰমুখ্যে আন আন বিষয়ববীয়া সকলৰ লগতে অসম সংখ্যালঘু উন্নয়ন বোর্ডৰ অধ্যক্ষ হবিব মহম্মদ চৌধুৰী , শ্ৰীমন্ত শংকৰদেৱ সংঘৰ প্ৰধান সচিব বাবুল বৰা  আদি উপস্থিত থাকে।

ডিব্ৰুগড় জিলাৰ নাহৰকটীয়াত “ফ্ল’চম মেগা এন্টাৰটেইণ্টমেন্ট” ৰ বেনাৰত আৰু পংকজ শইকীয়াৰ উদ্যোগত “মিষ্টাৰ এণ্ড মিছ দিহিংপৰীয়া ২০২১” অনুষ্ঠিত হৈ যায়।  সত্যজিত গগৈয়ে আঁত ধৰা প্ৰতিযোগীতাখনৰ শুভ উদ্বোধন কৰে নাহৰকটীয়া জেষ্ঠ নাগৰিক মঞ্চৰ সভাপতি শ্ৰী যুত চিত্ৰ বৰুৱায়ে। জাতীয় সংগীতেৰে আৰম্ভ হোৱা প্ৰতিযোগিতাখনিত অসম আৰু মেঘালয়ৰ প্ৰায় ১০০ গৰাকীতকৈও অধিক প্ৰতিযোগীয়ে অংশগ্ৰহণ কৰিছিল।তিনিটা শাখাত অনুষ্ঠিত হোৱা প্ৰতিযোগিতাখনিত ‘কিডচ্ এ গ্ৰুপ’ত শ্ৰেষ্ঠ প্ৰতিযোগীৰ খিতাপ অৰ্জন কৰে ডিব্ৰুগড়ৰ শিৱাংগী বৰবৰাই।’ফাৰ্ষ্ট ৰাণাৰ আপ’ ৰ খিতাপ অৰ্জন কৰে নাহৰকটীয়াৰ জিনাশ্ৰুতি তালুকদাৰে আৰু ‘চেকেণ্ড ৰাণাৰ আপ’ৰ খিতাপ অৰ্জন কৰে ডিব্ৰুগড়ৰ তনুশ্ৰী কাশ্যপে।

‘কিডচ্ বি গ্ৰুপ’ৰ শ্ৰেষ্ঠ প্ৰতিযোগীৰ খিতাৰ অৰ্জন কৰে নাহৰকটীয়াৰ কৃতিকা চেত্ৰীয়ে।ফাৰ্ষ্ট ৰাণাৰ আপ ৰ খিতাপ অৰ্জন কৰে নামৰূপৰ প্ৰিয়দৰ্শিনী শইকীয়াই আৰু চেকেণ্ড ৰাণাৰ আপ ৰ খিতাপ অৰ্জন কৰে বৰডুবিৰ জাগৃতি শইকীয়াই।অন্যহাতে “মিষ্টাৰ দিহিংপৰীয়া-২০২১”ৰ শ্ৰেষ্ঠ খিতাপ অৰ্জন কৰে নাহৰকটীয়াৰ সময় গগৈয়ে।ফাৰ্ষ্ট আৰু চেকেণ্ড ৰাণাৰ আপ ৰ খিতাপ অৰ্জন কৰে ক্ৰমে নাহৰকটীয়াৰ অনুৰাগ বৰগোঁহাই আৰু ৰাজগড় ৰ ভাষ্কৰ জ্যোতি গগৈয়ে।ঠিক তেনেকৈয়ে “মিচ্ দিহিংপৰীয়া-২০২১”ৰ শ্ৰেষ্ঠ খিতাপ অৰ্জন কৰে ভাদৈ পাঁচআলিৰ গাৰ্গী গগৈয়ে।ফাৰ্ষ্ট আৰু চেকেণ্ড ৰাণাৰ আপ ৰ খিতাপ অৰ্জন কৰে ক্ৰমে নাহৰকটীয়াৰ ডেইজী গগৈ আৰু মৰাণৰ চিন্ময়ী খনিকৰে।

প্ৰায় ১০০ তকৈও অধিক প্ৰতিযোগীৰ মাজৰ পৰা ১২ গৰাকী প্ৰতিযোগীক নিৰ্বাচন কৰি বিচাৰকৰ আসন শুৱনি কৰিছিল চাচনি কনিষ্ঠ মহাবিদ্যালয়ৰ অসমীয়া বিভাগৰ সহকাৰী অধ্যাপক ৰাজলক্ষী গোস্বামী আৰু মডেল নয়ন চাংকাকতিয়ে।”কিডচ্ এ আৰু বি গ্ৰুপ”ৰ গ্ৰ’মাৰ আছিল  মডেল চিৰঞ্জীৱ বৰা।”মিষ্টাৰ দিহিংপৰীয়া-২০২১”ৰ গ্ৰ’মাৰ আছিল মডেল গহিন শইকীয়া আৰু নিতীশ দাস আৰু “মিচ্ দিহিংপৰীয়া-২০২১”ৰ গ্ৰ’মাৰ আছিল মডেল ৰিচা চেত্ৰী।পুৱা ৯ বজাৰ পৰা আৰম্ভ হোৱা অনুষ্ঠানটো সন্ধিয়া ৭ বজাত সফল সমাপ্তি হয়।

অসম সাহিত্য সভাৰ শ্ৰেষ্ঠ শাখা সভাৰ সন্মানেৰে স্বীকৃত নুমলীগড় শোধনাগাৰ শাখা সাহিত্য সভাৰ পৰিকল্পনা আৰু উদ্যোগত, নুমলীগড় শোধনাগাৰৰ পৃষ্ঠপোষকতাত নিৰ্মিত ১০ ফুট ৩ ইঞ্চি উচ্চতাৰ ভাৰতৰত্ন ড° ভূপেন হাজৰিকাৰ আবক্ষমূৰ্তি যোৱা ২৬ জানুৱাৰী, ২০২২ তাৰিখে ডবা, কাহ, শংখ আৰু উৰুলি মঙ্গল ধ্বনিৰ মাজত শোধনাগাৰৰ পৰিচালন সঞ্চালক সৌমেন্দ্ৰ কুমাৰ বৰুৱাই আনুষ্ঠানিক ভাৱে উন্মোচন কৰে। শোধনাগাৰৰ কাৰিকৰী সঞ্চালক ভাস্কৰজ্যোতি ফুকন আৰু বিত্ত সঞ্চালক ইন্দ্ৰনীল মিত্ৰই সুধাকণ্ঠ গৰাকীৰ জীৱনী সম্বলিত ফলক উন্মোচন কৰে।

নুমলীগড় শোধনাগাৰ শাখা সাহিত্য সভাৰ সভাপতি হেমন্ত কুমাৰ নাথে আদৰণি ভাষণ আগবঢ়োৱা উক্ত অনুষ্ঠানত  ড° ভূপেন হাজৰিকাৰ ভাতৃ সমৰ হাজৰিকা পৰিয়ালসহ উপস্থিত থাকে।অসমৰ এগৰাকী বিশিষ্ট কলানিৰ্দেশক, ভাস্কৰ্য্যশিল্পী নুৰুদ্দিন আহমেদে নিৰ্মাণ কৰি উলিওৱা এই মূৰ্তিভাগি নিৰ্মাণত ২৩০০ কিলোগ্ৰাম ব্ৰঞ্জ, ৩০০ কিলোগ্ৰাম তাম, ৮০ কিলোগ্ৰাম পিতলৰ ওৱেলডিং ৰড, ৫৫০ কিলোগ্ৰাম ম’ম, ৩০০০ কিলোগ্ৰাম কয়লা, ৬৩ টন কাঠখৰি, ৭৫০০ কিলোগ্ৰাম প্লাষ্টাৰ অৱ পেৰিছ, ৭৫০০ কিলোগ্ৰাম ইটাৰ গুৰি, ২৫০ কিলোগ্ৰাম ফাইবাৰ ব্যৱহৃত হয়। উক্ত অনুষ্ঠানত ভাস্কৰ্য্যশিল্পী গৰাকীক সম্বৰ্ধনা জনোৱা হয়।

অসম পশুধন নিগমৰ নব নিযুক্ত উপাধ্যক্ষ তথা চতিয়াৰ সুসন্তান পৰেশ বৰকাকতিক আজি চতিয়াত সম্বৰ্ধনা জনোৱা হয়৷ আজি পুৱা ১০:৩০ বজাত ৩নং চতিয়া গাওঁ পঞ্চায়তৰ কাৰ্যালয়ত অনুষ্ঠিত হোৱা সম্বৰ্ধনা অনুষ্ঠান ভাগৰ সঞ্চালনা কৰে ত্ৰিনয়ন বৰাই৷ ৩নং পঞ্চায়তৰ সভাপতি উদয় শংকৰ শইকীয়াই আঁত ধৰা অনুষ্ঠান ভাগত চতিয়া সমষ্টিৰ বিধায়ক পদ্ম হাজৰিকা উপস্থিত থাকি কয় যে “১৯৮৪ চনৰ পৰাই বিজেপিৰ সৈতে জড়িত হৈ পৰা পৰেশ বৰকাকতি মোৰ বাল্যবন্ধু৷ যি সময়ত অসমত বিজেপিৰ স্হিতি দুৰ্বল আছিল সেই সময়ত পৰেশে দলটোক আগুৱাই নিয়াৰ ক্ষেত্ৰত যথেষ্ট কষ্ট স্বীকাৰ কৰিছিল৷আজি চৰকাৰ খনে তেখেতক অসম পশুধন নিগমৰ উপাধ্যক্ষ নিয়োগ কৰাত আতিশয় আনন্দিত হৈছে৷আশা কৰো তেওঁ নিজৰ দক্ষতাৰ নিগম খনক আগুৱাই নিব৷“ ইয়াৰ পিচতেই অসম পশুধন নিগমৰ নব নিযুক্ত উপাধ্যক্ষ পৰেশ বৰকাকতিয়ে কয় চতিয়াবাসী আজি মোক যি মৰম আৰু আশীৰ্বাদ যাচিলে তাৰ বাবে মই চিৰকৃতজ্ঞ৷ মোক আপোনাসবি আশীৰ্বাদ দিব যাতে মই মোৰ কাম সুচাৰু ৰূপে পালন কৰিব পাৰো৷

বৃহত্তৰ চতিয়া নাগৰিক সভাৰ উদ্যোগত আৰু বিভিন্ন দল সংগঠনৰ সহযোগত অনুষ্ঠিত হোৱা আজিৰ এই অনুষ্ঠানত পৰেশ বৰকাকতিক বৃহত্তৰ চতিয়া নাগৰিক সভা,চতিয়া জ্যেষ্ঠ নাগৰিক সন্মিলন,চতিয়া নাট্য সমাজ,চতিয়া আঞ্চলিক ছাত্ৰ সন্হা,চতিয়া প্ৰেছ ক্লাৱ,ইষ্টান্তিক,চতিয়া ক্ৰীড়া সন্হা,চতিয়া আঞ্চলিক পঞ্চায়ত,যুব মৰ্চা নাগশংকৰ মণ্ডল,মহিলা মৰ্চা নাগশংকৰ মণ্ডল,কৃষান মৰ্চা,কৰ্মজীৱি আত্ম সহায়ক গোট,নাগশংকৰ জিলা পৰিষদৰ সদস্য,চতিয়া জিলা পৰিষদৰ সদস্য,বনিক সন্হা,৩নং গাওঁ পঞ্চায়ত,চতিয়া শাখা সাহিত্য সভা,সাৰ্ব্বজনিন শ্ৰীমন্ত শংকৰজ্যোতি সমাজ,চতিয়া,নাগশংকৰ মণ্ডল বিজেপি,২নং সমবায় সমিতি,পূৰ্বাঞ্চল তাই সাহিত্য সভা,মালৰ গাওঁ উন্নয়ন সমিতিকে ধৰি বিভিন্ন দল সংগঠনে তেখেতক সম্বৰ্ধনা জনায়৷ নাগৰিক সভাৰ উদ্যোগত বিভিন্ন দল সংগঠনে ৰাজহুৱা ভাবে তেওঁক এখন শৰাই আৰু সম্বৰ্ধনা পত্ৰ প্ৰদান কৰে ৷ পত্ৰ খন পাঠ কৰে নাগৰিক সভাৰ যুটীয়া সম্পাদকৰ অন্যতম বিষ্ণু বৰুৱাই৷ উল্লেখ যে পৰেশ বৰকাকতি ১৯৭২ চনৰ মাধ্যম আন্দোলনৰ সময়ৰ পৰাই সামাজিক ক্ষেত্ৰত জড়িত হৈ পৰিছিল৷১৯৭৭ চনত তেখেত চতিয়া আঞ্চলিক ছাত্ৰ সন্হাৰ সহকাৰী সাধাৰণ সম্পাদক আৰু কাৰ্যালয় সম্পাদক হিচাপে দায়িত্ব বহন কৰিছিল৷

১৯৮১ চনত তেওঁ উচ্চ শিক্ষাৰ বাবে মাদ্ৰাছ যায়৷ ১৯৮৩ চনত অসমৰ নেলী আৰু গহপুৰত সংঘটিত ঘটনাৰ বাবে জনগনৰ প্ৰতি সহমৰ্মিতা প্ৰদৰ্শন কৰি অসমীয়া ছাত্ৰ সন্হা,মাদ্ৰাছ নামেৰে সংগঠন কৰি মাদ্ৰাছত থকা অসমৰ ১৫০০- ২০০০ ছাত্ৰক নেতৃত্ব প্ৰদান কৰি সমদল,প্ৰতিবাদী কাৰ্যসূচী গ্ৰহণ কৰিছিল৷এই সংগঠনটোৰ তেওঁ প্ৰতিষ্ঠাপক সম্পাদক আছিল৷১৯৮৪ চনত তেওঁ আৰ এছ এছৰ প্ৰতি আকৰ্ষিত হয় আৰু পৰবৰ্তী সময়ত বিজেপিত যোগদান কৰি ইয়াৰ সভা সমিতিবোৰত উপস্থিত থাকে৷বিশেষকৈ জনকৃষ্ণ মূৰ্তি আৰু গোবিন্দচাৰ্যৰ প্ৰতি আকৰ্ষিত হৈ তেওঁ বিজেপিত যোগদান কৰে৷ তেতিয়াৰ পৰা আজি লৈকে তেওঁ বিজেপিৰ এজন নিষ্ঠাবানকৰ্মী ৰূপে কাম কৰি আহিছে৷ স্পষ্টবাদী,নিৰ্ভীক পৰেশ বৰকাকতিক অসম চৰকাৰে পশুধন নিগমৰ উপাধ্যক্ষ হিচাপে নিয়োগ কৰাত সন্তুষ্টি প্ৰকাশ কৰিছে চতিয়াবাসীয়ে৷

কামৰূপ জিলাৰ বকো সমষ্টিৰ নগৰবেৰা নদী সংৰক্ষিত বনাঞ্চলিক বিষয়াৰ কাৰ্যালয়ৰ অন্তৰ্গত জোৰশিমলী বজাৰত আজি অভিযান চলাই নগৰবেৰা নদী সংৰক্ষিত বনাঞ্চলিক বিষয়াৰ কাৰ্যালয়ৰ এদল বন কৰ্মীয়ে বৃহৎ পৰিমাণৰ চোৰাং কাঠ জব্দ কৰিবলৈ সক্ষম হয়।

জোৰশিমলী বজাৰত এচাম চোৰাং বেপাৰীয়ে মুক্ত ভাৱে অৱৈধ চোৰাং ফলা কাঠ বিক্ৰী কৰি থকাৰ খৱৰ পাই নগৰবেৰা নদী সংৰক্ষিত বনাঞ্চলিক বিষয়াৰ বন কৰ্মীৰ দলে সংশ্লিষ্ট বজাৰত উপস্থিত হৈ বৃহৎ পৰিমাণৰ চোৰাং ফলা কাঠ জব্দ কৰিবলৈ সক্ষম হয়। জব্দকৃত চোৰাং কাঠ খিনি পিছত নগৰবেৰা নদী সংৰক্ষিত বনাঞ্চলিক বিষয়াৰ কাৰ্যালয়ত আনে অভিযানকাৰীৰ দলটোৱে।

বন বিভাগৰ দলটোক দেখি চোৰাং বেপাৰী পলাই যাবলৈ সক্ষম হয়। উল্লেখ্য যে, জব্দকৃত চোৰাং ফলা কাঠ খিনিৰ আনুমানিক বজাৰ মূল্য প্ৰায় ৭০ হাজাৰ টকা হব বুলি জানিব পৰা গৈছে।