ঢকুৱাখনা ২৬ মাৰ্চ, ২০২৫ :srimanta sankaradeva । শ্ৰীমন্ত শংকৰদেৱ সঙ্ঘ ঢকুৱাখনা জিলা শাখাৰ সোৱণশিৰি শঙ্কৰ-মাধৱ আঞ্চলিক শাখাৰ অন্তৰ্গত মৰনৈ চাপৰি প্ৰাথমিক শাখাৰ ৰূপালী জয়ন্তী মহোৎসৱ উদযাপনৰ বাবে পূৰ্ণগতিত প্ৰস্তুতি চলাইছে উদযাপন সমিতিয়ে। সভাপতি সদা ভৰালী, কাৰ্যকৰী সভাপতি দিগেন চুতীয়া আৰু সম্পাদক প্ৰহ্লাদ চুতীয়াক লৈ এখন শক্তিশালী উদযাপন সমিতি গঠনেৰে ৮ খনকৈ উপসমিতি গঠন কৰি যাৱতীয় কাম কাজ চলাই নিছে। ১৯৯৩ চনতে প্ৰতিষ্ঠা লাভ কৰা প্ৰাথমিক শাখাখনিৰ স্মৃতি ৰোমন্থন, ইতিহাস সংৰক্ষণ আৰু ভৱিষ্যত প্ৰজন্মৰ বাবে এক আদৰ্শ হিচাবে চিনাকি দিয়াৰ লক্ষ্যৰে অহা ইংৰাজী ২৯ আৰু ৩০ মাৰ্চ তাৰিখে শনি আৰু দেওবাৰে দুদিনীয়াকৈ অনুষ্ঠিত কৰা হৈছে ৰূপালী জয়ন্তী মহোৎসৱ।কাৰ্যসূচী অনুসৰি প্ৰথমদিনা পুৱা উষা কীৰ্ত্তন, পৰিৱেশ নিকাকৰণ,শাখাৰ প্ৰাক্তন সভাপতি যোগেন চুতীয়া আৰু লীলাৰাম খনিকৰে গছপুলি ৰোপণ,তোৰণ উন্মোচন, শৰাই প্ৰতিষ্ঠা, নাম প্ৰসংগ, ভাগৱত পাঠৰ পিছতে মঞ্চ উন্মোচন কৰিব সহকাৰী শিক্ষক ৰঞ্জন কৃষ্ণ খনিকৰে।শাখাৰ সভাপতি নিকুঞ্জ মোহন ভৰালীৰ সভাপতিত্বত প্ৰাক্তন সভাপতি-সম্পাদকৰ সন্মিলন, যুৱ সমাৰোহৰ পিছতে আই মাতৃ সমাৰোহ আৰম্ভ হ’ব।নমিতা খনিকৰৰ সঞ্চালনাত উদ্ধোধন কৰিব ঢকুৱাখনা জিলা শাখাৰ সদস্যা বুলুমাই খনিকৰে।বিয়লিলৈ সাহিত্য শাখা উদ্ধোধন কৰিব অৱসৰপ্ৰাপ্ত প্ৰধান শিক্ষক জ্যোতিপ্ৰসাদ পেগুৱে।

সন্ধা বন্তি প্ৰজ্বলন কৰিব সঙ্গী ৰত্ন চুতীয়াই।শৰাই প্ৰতিষ্ঠা, নাম প্ৰসঙ্গৰ পিছতে গধূলিলৈ সাংস্কৃতিক সমাৰোহ অনুষ্ঠিত হ’ব। উপদেষ্টা গুণাধৰ খনিকৰে সঞ্চালনা কৰা অনুষ্ঠানটি উদ্ধোধন কৰিব ঢকুৱাখনা জিলা শাখাৰ সংস্কৃতি শাখাৰ সভাপতি কনক কোঁৱৰে। ইফালে দ্বিতীয় দিনা পুৱা পৰিৱেশ নিকাকৰণ, শৰাই প্ৰতিষ্ঠা, নাম প্ৰসংগৰ পিছতে ধৰ্মধ্বজা উত্তোলন কৰিব শাখাৰ সভাপতি নিকুঞ্জ মোহন ভৰালীয়ে।সঞ্চালক বিটু চুতীয়াৰ সভাপতিত্বত “ৰূপতীৰ্থ” স্মৃতিগ্ৰন্থ উন্মোচনী সভাখনি উদ্ধোধন কৰিব প্ৰাক্তন সংস্কৃতি শাখাৰ সম্পাদক উৎপল চুতীয়াই। দুপৰীয়া অনুষ্ঠিত হ’ব মুকলি সভা। শাখাৰ সভাপতি নিকুঞ্জ মোহন ভৰালীৰ সভাপতিত্বত অনুষ্ঠিত সভাখনি উদ্ধোধন কৰিব মৰনৈ চাপৰি প্ৰাথমিক শাখাৰ প্ৰতিষ্ঠাপক সম্পাদক মূলাৰাম খনিকৰে।ঢকুৱাখনা জিলা শাখাৰ সভাপতি পূৰ্ণানন্দ গগৈয়ে মুখ্য অতিথি, বিধায়ক নৱকুমাৰ দলেৰ সন্মানীয় অতিথি আৰু নিদিষ্ট বক্তা হিচাবে বিশিষ্ট সাহিত্যিক আৰু শ্ৰীমন্ত শঙ্কৰদেৱ সঙ্ঘৰ প্ৰচাৰক ড° হেমন্ত কুমাৰ দাসে ।ইফালে বিশিষ্ট অতিথি হিচাপে শৰণ সদস্য থানেশ্বৰ বড়া,শ্ৰীমন্ত শঙ্কৰদেৱ সঙ্ঘৰ মূলৰ সদস্য দেৱকুমাৰ গগৈ, বগেন কোচ,ঢকুৱাখনা জিলা শাখাৰ সম্পাদক হেমন্ত ভৰালী, সোৱণশিৰি শঙ্কৰ-মাধৱ আঞ্চলিক শাখাৰ সভাপতি জীৱন চুতীয়া, সম্পাদক হিৰণ্য দত্ত, সমজিলাৰ আয়ুক্ত কাৰ্তিক কলিতা, খণ্ড উন্নয়ন বিষয়া জিম্পী শইকীয়াই। ইফালে কেইবাগৰাকী বিশিষ্ট ব্যক্তিয়ে আমন্ত্ৰিত অতিথি হিচাপে উপস্থিত থাকিব।সন্ধা ধৰ্মধ্বজা অৱতৰণ,বন্তি প্ৰজ্বলন আৰু শৰাই প্ৰতিষ্ঠা, নাম প্ৰসঙ্গ আৰু নিশালৈ বিপ্ৰ দামোদৰ আখ্যান, দন্তবক্ৰৰ মুক্তি লাভ ভাওনাখনি প্ৰদৰ্শন কৰিব।ভাওনাখনি সেৱকী হিচাবে আগবঢ়াইছে উত্তম চুতীয়া আৰু পৰিয়ালবৰ্গই। সেয়েহে ৰূপালী জয়ন্তী মহোৎসৱ ভাগি সফল ৰূপায়ণৰ বাবে সকলো ভক্ত প্ৰাণ ৰাইজ,আই -বাপ,যুৱক-যুৱতীৰ উপস্থিতি কামনা কৰিছে সম্পাদক প্ৰহ্লাদ চুতীয়াই।

দৈনন্দিন বাৰ্তাৰ সেৱা, গোগামুখ, ২৬ মাৰ্চঃ khagen gogoi । খ্যাতনামা শিল্পী বিহু সম্ৰাট খগেন গগৈক এইবাৰ গোগামুখ আঞ্চলিক ছাত্ৰ সন্হাই প্ৰদান কৰিব শিল্পী অই আপ্পুন গণেশ পেগু বঁটা ৷ আগন্তুক ১০-১১ মে’ত ধেমাজি জিলাৰ গোগামুখ নগৰ উচ্চ মাধ্যমিক বিদ্যালয়ৰ প্ৰাংগনত গোগামুখ আঞ্চলিক ছাত্ৰ সন্হাৰ উদ্যোগত  দুদিনীয়া বৰ্ণিল কাৰ্যসূচীৰে  অনুষ্ঠিত হ“বলগা বৃহত্তৰ গোগামুখ ব’হাগী বিদায় উৎসৱ এই বঁটা প্ৰদান কৰিব  গোগামুখ আঞ্চলিক ছাত্ৰ সন্হাই ৷ খগেন গগৈ হৈছে অসমৰ লোকসংস্কৃতিক ৰাষ্ট্ৰীয় আৰু আন্তৰাষ্ট্ৰীয় পৰ্যায়ত নিভাঁজভাৱে তুলি ধৰা এগৰাকী খ্যাতনামা শিল্পী ৷ বিশেষকৈ টোকাৰী গীত, বিহু নামৰ বহুকেইটা শ্ৰব্যসঁফুৰাত গীত পৰিৱেশন কৰি অসমৰ স্বকীয় লোকসংস্কৃতিক চহকী কৰি ৰাখিছে ৷ তেওঁ অসমৰ বিভিন্ন স্থানৰ মঞ্চৰ লগতে গুৱাহাটী অনাতাঁৰ কেন্দ্ৰ আৰু দূৰদৰ্শন কেন্দ্ৰৰ জৰিয়তে টোকাৰী গীত আৰু বিহু নাম পৰিৱেশন কৰিছে ৷

১৯৮৬ চনত কেন্দ্ৰীয় চৰকাৰৰ সাংস্কৃতিক মন্ত্ৰণালয়ে হিমাচল প্ৰদেশৰ চিমলাত  আয়োজন কৰা সৰ্বভাৰতীয় লোকসংগীত সমাৰোহত বিহুনাম আৰু টোকাৰী গীত পৰিৱেশন কৰি সাংস্কৃতিপ্ৰেমী ৰাইজক তেওঁ আপ্লুুত কৰিছিল ৷ ১৯৮৭ চনত  নতুন দিল্লীত অনুষ্ঠিত হোৱা গণৰাজ্য দিৱসতো তেওঁ অসমৰ প্ৰতীকপটৰ লগত  বিহু নৃত্যৰ দলৰ দলপতি হিচাপে যোগদান কৰিছিল ৷ নাগালেণ্ডৰ ডিমাপুৰত ১৯৮৯ চনত  অনুষ্ঠিত হোৱা উত্তৰ-পূব মাণ্ডলিক লোকসংগীত সমাৰোহত শিল্পী খগেন গগৈয়ে টোকাৰী গীতৰ শিল্পী হিচাপে অসমক প্ৰতিনিধিত্ব কৰিছিল ৷ ১৯৯০ চনত তেওঁ দিল্লীত অনুষ্ঠিত হোৱা আন্তৰ্জাতিক বাণিজ্য মেলাত টোকাৰী গীত পৰিৱেশন কৰি সুনাম অৰ্জন কৰিছে ৷ মুম্বাই অসম সন্হাই ১৯৯৩ চনত মুম্বাইত অনুষ্ঠিত হোৱা সাংস্কৃতিক অনুষ্ঠানটো টোকাৰী গীত পৰিৱেশন দৰ্শক ৰাইজৰ মন জয় কৰাৰ লগতে ১৯৯৪ চনত একেৰাহে নতুন দিল্লী, কলকাতা, ভূবনেশ্বৰ, আৰু আন্দামান নিকোবৰ দ্বীপপূঞ্জত  অনুষ্ঠিত দ্বীপ মহোৎসৱ আৰু পৰ্যটন দিৱসত তেওঁ বিহু নৃত্য আৰু গীত পৰিৱেশন কৰিছিল।  ১৯৯৬ চনত গোৱাত অনুষ্ঠিত হোৱা আন্তৰাজ্যিক সাংস্কৃতিক বিনিময় কাৰ্যসূচীত বিহু গীত আৰু নৃত্য পৰিৱেশন কৰিছিল ৷ লোকশিল্পী খগেন গগৈয়ে অসমৰ অসমীয়া বোলছবি জগতলৈও অন্যন্য অৱদান আগবঢ়াইছে ৷ তাৰে বিদ্যুৎ চক্ৰৱৰ্তী পৰিচালিত ছবি নিষিদ্ধ নদী, চন্দ্ৰ মুদৈ পৰিচালিত ছবি মাঘত মামনিৰ বিয়া, পুলক গগৈ পৰিচালিত ছবি পত্নী, জুবিন গাৰ্গ পৰিচালিত ছবি অগ্নিসাক্ষীত নেপথ্য গায়ক হিচাপে টোকাৰী গীত আৰু বিহুনাম পৰিৱেশন কৰিছে ৷ আন্তৰাষ্ট্ৰীয় পৰ্যায়তো লোকশিল্পী গগৈয়ে সুনাম কঢ়িয়াবলৈ সক্ষম হৈছে ৷  তেওঁ ভাৰত চৰকাৰৰ বৈদেশিক পৰিক্ৰমা অধীনস্থ ভাৰতীয়  সাংস্কৃতিক সম্বন্ধ পৰিষদৰ জৰিয়তে   ১৯৯৭ চনত কাজাখাস্তান আৰু তুৰ্কীস্থান, ২০০১ চনত মৰিচাচ, ২০০২ চনত  লণ্ডন, শ্ল’ভেকীয়া, ২০০৯ চনত কম্বুদীয়া, ইণ্ডোনেছীয়াত  বিহুনাম আৰু টোকাৰী গীত পৰিৱেশন কৰি অসম আৰু অসমীয়াৰ স্বাভিমানক বিশ্বদৰবাৰত গৌৰবান্বিত কৰিলে ৷ ২০১১ চনত মুম্বাইৰ এম টি ভিৰ ক’ক ষ্টুডিঅ’ত বিখ্যাত সংগীত পৰিচালক লেজলি লুইছে পৰিচালনা কৰা বিহু আৰু মহাৰাষ্ট্ৰৰ লোকসংগীতক লৈ সংমিশ্ৰণ কৰা গীতত শংকৰ মহাদেৱনৰ সৈতে গীত পৰিৱেশন কৰিছিল ৷ প্ৰখ্যাত ছবি পৰিচালক মণিৰত্নমৰ দিল সে’ত শ্বাহৰুখ খানৰ লগতো ক্ষন্তেক সময় একেলগে অভিনয় কৰিছে ৷ এই গৰাকী প্ৰখ্যাত লোকশিল্পী খগেন গগৈৰ জন্ম হৈছে বৰ্তমানৰ  চৰাইদেউ জিলাৰ লংপটীয়া গাঁৱত ৷ বৰ্তমান তেওঁ গুৱাহাটীৰ স্থায়ী বাসীন্দা ৷ গোগামুখ আঞ্চলিক ছাত্ৰ সন্হাৰ ব’হাগী বিদায় উৎসৱৰ অভ্যৰ্থনা সমিতিৰ সভাপতি জিতু বৰা,  কাৰ্যকৰী সভাপতি দীপক বৰগোঁহাই, সম্পাদক ঋতুপৰ্ণ কোঁচে জনোৱা মতে  খগেন গগৈৰ দৰে এগৰাকী খ্যাতনামা লোকশিল্পীক অই আপ্পুন গণেশ পেগু বঁটা প্ৰদান কৰিবলৈ পাই তেওঁলোক নথৈ আনন্দিত ৷ এই বঁটাই লোকশিল্পী খগেন গগৈ আৰু আন এগৰাকী লোকশিল্পী প্ৰয়াত অই আপ্পুন গণেশ পেগুক শাৰীৰিকভাৱে নহ’লেও সাংস্কৃতিকভাৱে যুগলবন্দী কৰিব ৷ এই বঁটাত থাকিব নগদ ধন, ফুলাম গামোচা, ফুলাম জাপি, মানপত্ৰ, চেলেং চাদৰ, মিচিং জনগোষ্ঠীয় সাজ-পাৰ ৷ তেওঁলোকে লগতে জনোৱা মতে ব’হাগী বিদায় উৎসৱ উপলক্ষে জেতুকা নামৰ বাৰ্ষিক স্মৃতিগ্ৰন্থখনো প্ৰকাশ পাব বুলি জনাইছে ৷