বকো ২৯ ডিচেম্বৰ:: ৰাজ্যৰ গ্ৰামাঞ্চলত সক্ৰিয় হৈ উঠা নাৰীদেহ ব্যৱসায়ী আৰু নাৰী সৰবৰাহী চক্ৰ উৎখাত কৰাৰ দাবীত আজি হঠাতেই উত্তাল হৈ পৰিল গৰৈমাৰী অঞ্চল৷ উল্লেখ্য, অঞ্চলটোত সঘনাই নাৰীজনিত অপৰাধমূলক ঘটনা সংঘটিত হৈ আহিছে যদিও স্থানীয় প্ৰশাসন কিম্বা আৰক্ষীয়ে কোনোধৰণৰ ব্যৱস্থা গ্ৰহণ নকৰাৰ প্ৰতিবাদত প্ৰায় শতাধিক পুৰুষ-মহিলা আৰু স্কুলীয়া ছাত্ৰ-ছাত্ৰীয়ে উত্তাল প্ৰতিবাদেৰে গৰৈমাৰীৰ আকাশ-বতাহ কঁপাই তোলে৷ প্ৰতিবাদকাৰী সকলে অসম আৰক্ষী হায় হায়, নাৰী সুৰক্ষা নিশ্চিত কৰক, অপৰাধীক গ্ৰেপ্তাৰ কৰক আদি শ্ল’গানেৰে বৃহৎ সমদল উলিয়াই প্ৰথমতে গৰৈমাৰী আৰক্ষী চকী ঘেৰাও কৰে৷ পিচত প্ৰতিবাদকাৰী সকলে সদলবলে গৰৈমাৰী চক্ৰ বিষয়াৰ কাৰ্যালয়ত উপস্থিত হৈ চক্ৰ বিষয়াক এখন স্মাৰকপত্ৰ প্ৰদান কৰে৷ উল্লেখ্য যে, চলিত ডিচেম্বৰ মাহতে ছয়গাঁৱৰ কাণহাৰা গাঁৱৰ দুগৰাকী কিশোৰী কন্যাক একে গাঁৱৰে ৰবিউল হুছেইন নামৰ লম্পট যুৱক এজনে বিয়াৰ প্ৰলোভনেৰে পলুৱাই নি বহিঃৰাজ্যৰ ৰাজস্থানত বিক্ৰী কৰে৷ ঘটনা সন্দৰ্ভত পৰিয়ালৰ লোকে পৃথকে পৃথকে গৰৈমাৰী আৰক্ষী চকীত এজাহাৰ দাখিল কৰাৰ পিচতো আৰক্ষীয়ে কোনো ব্যৱস্থা গ্ৰহণ কৰা নাই৷ যাৰ বাবে প্ৰতিবাদকল্পে আজি গৰৈমাৰী আৰক্ষী চকী আৰু চক্ৰ বিষয়াৰ কাৰ্যালয় ঘেৰাও কৰি ৰাইজে উত্তাল প্ৰতিবাদ সাব্যস্ত কৰে৷

টিহু মহকুমাৰ মাখিবাহা জ্যেষ্ঠ নাগৰিক পৰিষদৰ সপ্তম দ্বি–বাৰ্ষিক অধিৱেশনখন বিভিন্ন কাৰ্যসূচীৰে আজি  মাখিবাহা সভাৰ খলাত সম্পন্ন হয়  ।  এই উদ্দেশ্যে পুৱা  মাখিবাহা জ্যেষ্ঠ নাগৰিক পৰিষদৰ সভাপতি উপেন্দ্ৰনাথ দত্তই জ্যেষ্ঠ নাগৰিক পৰিষদৰ পতাকা উত্তোলনেৰে কাৰ্যসূচীৰ শুভাৰম্ভ কৰাৰ পাছত স্মৃতি তৰ্পণ কৰে মাখিবাহা জ্যেষ্ঠ নাগৰিক পৰিষদৰ প্ৰাক্তন সভাপতি ভূকান্ত মজুমদাৰে । ইয়াৰ পাছতে অনুষ্ঠিত বিষয় বাছনি সভাত আৰুবেলি কাৰ্যকালৰ বাবে  উপেন্দ্ৰনাথ দত্তক সভাপতি  আৰু মোহনচন্দ্ৰ বৈশ্যক সম্পাদক হিচাপে লৈ নতুন সমিতি এখন গঠন কৰা হয় । দুপৰীয়া মাখিবাহা জ্যেষ্ঠ নাগৰিক পৰিষদৰ সভাপতি উপেন্দ্ৰ নাথ দত্তৰ সভাপতিত্বত অনুষ্ঠিত মুকলি সভা আৰু সম্বৰ্দ্ধনা অনুষ্ঠানত নলবাৰী জিলা জ্যেষ্ঠ নাগৰিক পৰিষদৰ সাধাৰণ সম্পাদক প্ৰিয়নাথ বৰ্মনে বিশিষ্ট অতিথি হিচাপে অংশ লয়  । মাখিবাহা জ্যেষ্ঠ নাগৰিক পৰিষদৰ সম্পাদক মোহনচন্দ্ৰ বৈশ্যই আঁতধৰা এই সভাখনতে ‘সময় বালিত এৰি অহা খোজ’ শীৰ্ষক মাখিবাহাৰ জ্যেষ্ঠ নাগৰিক পৰিষদৰ   সদস্যসকলৰ  সংক্ষিপ্ত জীৱনপঞ্জী গ্ৰন্থ এখন উন্মোচন কৰে বৰপেটাৰ মাধৱ চৌধুৰী মহাবিদ্যালয়ৰ অৱসৰীয়া অধ্যাপক  ড: সুৰেশচন্দ্ৰ শৰ্মাই । সভাত কেইবাজনো জ্যেষ্ঠ নাগৰিকক সম্বৰ্দ্ধনা জ্ঞাপনো কৰা হয়  । 

বোকাখাত, ২৮ ডিচেম্বৰঃএটাৰ পিছত আনটোকৈ ৰাষ্ট্ৰীয় সন্মান প্ৰাপকৰ নাম তালিকাত অন্তৰ্ভুক্ত হৈছে বোকাখাতৰ বিশিষ্ট ব্যক্তিৰ নাম। এইবাৰ ভাৰতীয় দলিত সাহিত্য একাডেমিয়ে বোকাখাতৰ প্ৰবীন নাট্যকৰ্মী মনো বৰালৈ ঘোষণা কৰিছে ‘বাবা চাহেব ড° আম্বেদকাৰ ৰাষ্ট্ৰীয় ফেল’শ্বিপ বঁটা ২০২০’।এক পত্ৰযোগে একাডেমিৰ ৰাষ্ট্ৰীয় সভাপতি ড° এচ পি শোভনাক্ষৰে এই কথা বৰাক জানিবলৈ দিছে। বৰ্তমান বৰলুইতৰ বুকুত বিলুপ্ত বোকাখাতৰ ধনশিৰিমুখ বিলতীয়া গাঁৱৰ প্ৰয়াত দিনৰাম বৰা আৰু প্ৰয়াত মাকন বৰাৰ পুত্ৰ নিষ্ঠাবান নাট্যকৰ্মী, বিশিষ্ট কাৰু-কলা শিল্পী বৰাৰ জন্ম হয় ১৯৫৪ বৰ্ষৰ ১৪ আগষ্টত। আজীৱন সাধনাৰে অসমৰ নাট্য, শৈল্পিক, সাংস্কৃতিক, কাব্যিক, সামাজিক আৰু শৈক্ষিক জগতলৈ আগবঢ়োৱা বৰঙণিৰ বাবে বৰালৈ আগবঢ়োৱা হৈছে সন্মান। ষাঠিৰ দশকৰ পৰাই অভিনয় কৰি অহা বৰাই বৰ্তমানলৈকে অবিৰতভাৱে অসমৰ বহুকেইখন জিলাৰ বিভিন্ন মঞ্চত একাংক নাট প্ৰতিযোগিতাত শতাধিক অভিনেতা, শ্ৰেষ্ঠ পৰিচালকৰ ৰাজ্যিক খিতাপৰ ওপৰিও কোচবিহাৰ, উৰিষ্যাকে আদি কৰি দেশৰ বিভিন্ন মঞ্চত ৰাষ্ট্ৰীয় পৰ্যায়ত সন্মান অৰ্জন কৰিছে। ১৯৭৯ বৰ্ষৰ পৰাই বোকাখাতৰ কৈলাখাত নাট্যমন্দিৰৰ সৌজন্যত মাজুলীৰ গড়মূৰ সত্ৰৰ আৰ্হিত ধাৰাবাহিকভাৱে ৰাসলীলাৰ পৰিচালনা কৰি আহিছে মনো বৰাই। আঁশীৰ দশকত বোকাখাতৰ কৈলাখাত নাট্যমন্দিৰৰ সৌজন্যত বৰাৰ প্ৰচেষ্টাত চাৰিখন পূৰ্ণাংগ নাটক লৈ ‘সংঘমিত্ৰা থিয়েটাৰ’ নামৰ ভ্ৰাম্যমাণ নাট্যদল গঠন কৰি ৰাজ্যৰ ১০ স্থানত নাট্য নিবেদন কৰে। আধুনিক নাটকৰ সমান্তৰালকৈ ১৯৭০ বৰ্ষৰ পৰাই অংকীয়া ভাওনাৰ অভিনয়ৰ চৰ্চাও জাৰি ৰখা বৰাই বিভিন্ন ভাওনা প্ৰতিযোগিতাত স্থানীয়ভাৱে, জিলাভিত্তিত আৰু অসম ভিত্তিত শ্ৰেষ্ঠ ভাৱৰীয়াৰ সন্মান অৰ্জন কৰিছে। ২০০৬ বৰ্ষত বৰাৰ প্ৰচেষ্টাত ‘নৱজ্যোতি’ নাট্যদল গঠন কৰি উৰিষ্যাত নাট্য নিবেদন কৰে। ২০১১ বৰ্ষত বোকাখাতৰ কৈলাখাতৰ শিল্পী সকলক লৈ পুনৰ উৰিষ্যাৰ কটকত হোৱা এক সাংস্কৃতিক প্ৰতিযোগিতাত অংশগ্ৰহন নাটক, বিহু, বৰগীত আদি কেইবাটাও শিতানৰ দলীয় আৰু একক বহুকেইটা সন্মান লাভেৰে অসমলৈ সুনাম কঢ়িয়াবলৈ সক্ষম হয়। ২০১৪ ত বোকাখাতৰ বিভিন্ন গ্ৰাম্যাঞ্চলক সামৰি ‘কপিধ্বজ ভাওনা দল’ গঠন কৰি বৰাৰ সভাপতিত্বত শিল্পী সকলৰ প্ৰশিক্ষণৰ জড়িয়তে অসমৰ ভাওনাৰ জগতখনলৈ এক উল্লেখযোগ্য বৰঙণি আগবঢ়াইছিল। বৰা ঢোল, পেঁপা, গগণা, শুতুলী, বাঁহী, টোকাৰী, খোল, নাগাৰা, বৰতাল, দোতাৰা আদি থলুৱা বাদ্যযন্ত্ৰত নিপুণ শিল্পী। শৈক্ষিক, সামাজিক দিশত উদ্যমী বৰাৰ প্ৰচেষ্টাত বোকাখাতত ক্ৰমে ১৯৭০ ত বহিখোৱা ন-আলি প্ৰাথমিক বিদ্যালয়, আঁশীৰ দশকত কৈলাখাত নাট্যমন্দিৰ আৰু ১৯৯২ ত কৈলাখাত মধ্য ইংৰাজী বিদ্যালয় প্ৰতিষ্ঠা কৰা হয়। উল্লেখ্য যে বৰাই বোকাখাত অঞ্চলৰ বহুকেইটা নামঘৰৰ লগতে যোৰহাটৰ এটি নামঘৰতো জয় বিজয়, নামসিংহ আৰু গড়ুৰৰ প্ৰতিমূৰ্তি, গায়ন বায়ন, ম’ৰা চৰাই, শৰাই, প্ৰৱেশদ্বাৰ আদিৰ লগতে কৈলাখাত মধ্য ইংৰাজী বিদ্যালয়ৰ তোৰণ নিৰ্মাণেৰে তেওঁৰ হস্তশিল্প, সুকুমাৰ কলা আৰু কাৰুশিল্পৰ দক্ষতাৰ পৰিচয় দিছে। শিল্প কৰ্মৰ সমান্তৰালকৈ বৰাৰ কবিতা, গল্প, প্ৰবন্ধ আদি লেখা মেলাও আজিকোপতি অসমৰ বিভিন্ন মুখপত্ৰ, আলোচনীত প্ৰকাশ পাই আহিছে। তেওঁৰ স্বৰচিত কাব্য সংকলন ‘অমিয়া সুৰ’ প্ৰকাশৰ পথত। পূৰ্ণাংগ দুই নাট ক্ৰমে ‘নতুন সূৰ্য’ আৰু ‘বনকন্যা’, একাংক নাট ক্ৰমে ‘উত্তৰণৰ গান’, ‘পৰুৱা’, ‘আচামীৰ বিচাৰ’ আদি মনো বৰাৰ ৰচিত নাট। তদুপৰি বৰাই ৫১ খন ভাওনাৰ নাট ৰচনা আৰু সম্পাদনা কৰিছে। বিভিন্ন অনুষ্ঠান প্ৰতিষ্ঠানৰ উদ্বোধনী গীত ৰচনা, সুৰ সংযোজন আৰু পৰিচালনাৰ লগতে দুকুৰিৰো অধিক আধুনিক, বনগীত আৰু বিহুসুৰীয়া গীত ৰচনা কৰিছে বৰাই। ‘কিদৰে পাহৰো মই’, ‘মৰম’, ‘হৃদয়ৰ জ্বলা জুই’, ‘ভাওনা’, ‘হিয়ামনি’, ‘আমি অসমীয়া’, প্ৰাগ চেনেলৰ চিনেমা শিতানত বহুল প্ৰচাৰিত ‘প্ৰেমে মাথো প্ৰেম বিচাৰে’ আদি বৰাৰ অভিনীত ভি চি ডি কথাছবি। বৰালৈ ‘বাবা চাহেব ড° আম্বেদকাৰ ৰাষ্ট্ৰীয় ফেল’শ্বিপ বঁটা ২০২০’ চলিত মাহৰ ২৪ তাৰিখে প্ৰদান কৰাৰ কথা আছিল যদিও কভিডৰ বাবে বঁটা প্ৰদান অনুষ্ঠানৰ সময় সূচী সলনি কৰা হৈছে আৰু এই সন্মান অহা ২০২১ বৰ্ষৰ ১৩ মাৰ্চ তাৰিখে দিল্লীত প্ৰদান কৰা হ’ব বুলি বৰাৰ পৰা জানিব পৰা গৈছে। সম্প্ৰতি বোকাখাতৰ সংবাদসেৱী সংগঠন কাজিৰঙা নিউজ নেটৱৰ্কৰ উদ্যোগত মনো বৰাৰ জীৱন, কৰ্ম আৰু আদৰ্শৰ খতিয়ানেৰে এখনি অভিনন্দন গ্ৰন্থৰ প্ৰকাশৰ যোঁ জা চলি আছে। আজীৱন নাট্যকৰ্ম, শিল্প সাধনা, লেখা-মেলাত ব্ৰতী জনপ্ৰিয় শিল্পী মনো বৰালৈ এই ৰাষ্ট্ৰীয় বঁটাৰ ঘোষণাই বোকাখাত অঞ্চললৈ আনন্দৰ বন্যা নমাইছে।

২৮ ডিচেম্বৰঃ নাজিৰাৰ বিশিষ্ট শিক্ষাবিদ আৰু ৰাজ্যৰ কমিউনিষ্ট আন্দোলনৰ ধাৰাত নীতিগত ভাৱে নিজকে ধৰি ৰাখি ৰাইজৰ পক্ষত সমস্যাৰ বিষয়ত সকলো সময়তে সৰৱ হৈ অহা অৱনী বৰঠাকুৰক পৰহি এক কথোপকথনৰ অনুষ্ঠানৰ মাজেদি বাসগৃহৰ সমীপত ৰাইজে বিপুল ভাৱে ওলগ আৰু অভিনন্দন জনায় । বাৰ্ত্তালাপৰ এই অনুষ্ঠানটিত কৃতী শিক্ষয়িত্ৰী তথা অৱনী বৰঠাকুৰৰ সহধৰ্মিনী অমিয়া বৰঠাকুৰৰ উপস্থিতিত অৱনী বৰঠাকুৰৰ অনুৰক্ত শিক্ষক, ছাত্ৰ-ছাত্ৰী, সমাজ সংগঠক, কৃষকে বৰ্ষীয়ান শিক্ষাবিদ জনৰ জীৱন পৰিক্ৰমাৰ বিভিন্ন দিশত প্ৰশ্ন কৰি নিজৰ জিজ্ঞাসাৰ প্ৰশমন কৰে । সম্প্ৰতি ৯২ বছৰত ভৰি দিয়া অৱনী বৰঠাকুৰক একাদিক্ৰমে বৰহাট হাইস্কুল, নাজিৰাৰ চকীমুখ হাইস্কুল আৰু পৰৱৰ্ত্তী নাজিৰা কলেজ প্ৰতিষ্ঠাৰ পৱিত্ৰ কৰ্মৰাজীৰে শিক্ষকতাৰ জীৱন মহীয়ান কৰাৰ বাবে শিক্ষানুৰাগীয়ে সম্ভ্ৰমেৰে তেওঁৰ কৰ্মৰ শলাগ লয় । আয়োজক সংগঠন জ্যোতি-বিষ্ঞু কলাঙ্গনৰ মুখ্য সম্পাদক দিলীপ ফুকনে কথোপকথনৰ আগলি পাততে অৱনী বৰঠাকুৰৰ জীৱন, শিক্ষা, সমাজ আৰু সংগ্ৰামৰ এক বৰ্ণনা দাঙি ধৰে । গড়গাঁও কলেজৰ অৱসৰপ্ৰাপ্ত অধ্যক্ষ আৰু শিৱসাগৰ জিলা সাহিত্য সভাৰ প্ৰাক্তন সভাপতি দিলীপ বুঢ়াগোহাঁই, চকীমুখ উচ্চতৰ মাধ্যমিক বিদ্যালয়ৰ প্ৰাক্তন অধ্যক্ষ দেউকণ চাংমাই, প্ৰাক্তন অধ্যক্ষ মুবিদুল ইছলাম, অৱসৰ প্ৰাপ্ত গাণণিক বিষয়া অজিত খাটনীয়াৰ আদি বিশিষ্ট ব্যক্তি সকলৰ বক্তব্যৰ আঁত উলিয়াই অতীতত ভূমুকি মাৰি কৈ গ’ল পঞ্চাশৰ দশকৰ প্ৰথম ভাগত কমিউনিষ্ট পাৰ্টীৰ সংগঠনে অসমত মূৰ দাঙি উঠাৰ কথা । ১৯৪৯ চনত চৰকাৰে কমিউনিষ্ট সংগঠনক নিষিদ্ধ ঘোষনা কৰাৰ কথা । জাজী হাইস্কুলত হোৱা কমিউনিষ্ট ছাত্ৰৰ আন্দোলনত কলেজৰ অধ্যক্ষ বাণী কাকতিৰ পৰামৰ্শ আৰু শেষত গ্ৰেপ্তাৰৰ বাবে অহা আৰক্ষীৰ ৱাৰেন্ট নাকচ হোৱাৰ কথা । প্ৰতিষ্ঠা হোৱাৰ পাচত ১৯৭০ চনত চকীমুখ হাইস্কুলে নিজ গতি লোৱাৰ পাছত সেই বিদ্যালয়ৰ শিক্ষকতাৰ পদো বাদ দি কমিউনিষ্ট আন্দোলনৰ বিকাশৰ কৰ্মত গুৱাহাটীত ব্যস্ত হৈ পৰাৰ পাছত ১৯৮১ চনত তেওঁ ৰাইজৰ প্ৰয়োজনৰ তাগিদাত নাজিৰালৈ প্ৰত্যাৱৰ্তন কৰে । নাজিৰা কলেজ প্ৰতিষ্ঠাৰ সংগ্ৰামো নেতৃত্ব দিয়াৰ লগতে বাঁহ কাঠ গোটাই কলেজ আৰম্ভণি কৰিবলৈ ৰাইজৰ গাঁথিৰ সহায় বিচাৰি কামত নামি পৰে । এই প্ৰচেষ্টা আৰু নেতৃত্বতে ঠন ধৰি উঠা নাজিৰা কলেজে ১৯৮১চনৰ ১৬ ডিচেম্বৰৰ পৰা শ্ৰেণীসমূহ আৰম্ভ কৰিব পৰা হ’ল । তেওঁ নিজেও সহযোগী হৈ থাকি ১৯৮২ চনৰ পৰা পৰিচালনা সমিতিৰ তাগিদাত কলেজৰ অধ্যক্ষৰ দায়িত্ব মূৰ পাতি লৈ আগবাঢ়ে । সমাজৰ প্ৰয়োজন পূৰ্ণ হোৱালৈকে ব্যস্ত থাকি ১৯৯৪ চনত ঘাটি মঞ্জুৰী লাভ কৰাৰ পাছতে অৱনী বৰঠাকুৰে কলেজৰ অধ্যক্ষ পদৰ পৰা ইস্তফা দিয়ে । কটন কলেজৰ পৰা আগবঢ়া উচ্চ শিক্ষাৰে শিক্ষিত হৈয়ো কোনো চৰকাৰী চাকৰিৰ প্ৰতি মোহ প্ৰদৰ্শন নোহোৱা আৰু স্নাতকোত্তৰ পৰীক্ষাত উত্তীৰ্ণ হোৱাৰ পাছতো হাঁহি মুখে কলেজৰ পদবীৰ দৰমহাৰ সুবিধাৰপৰা পৰা আঁতৰি থাকিবলৈ সক্ষম হোৱা আদি কাৰকেই সামাজিক স্তৰৰ নেতৃত্বক সুদৃঢ় কৰি ৰাখিলে । চকীমুখ হাইস্কুলত শিক্ষকতাৰ বেলিকা বিদ্যালয় ছুটিৰ পাছত ছাত্ৰৰ ক্ষতি নোহোৱাকৈ কমিউনিষ্ট দলৰ হৈ কাম কৰা, চাইকেল চলাই অনিদ্ৰা অনাহাৰে ৰাইজৰ মাজত ঘূৰি ফুৰা, আৰক্ষীৰ হাতত পৰি কাৰাৰুদ্ধ হোৱা আদি বিভিন্ন ঘটনাৰে পৰিপূৰ্ণ ঘটনা বহুল জীৱনত সাৰথি স্বৰূপ পুৰণি চাইকেলখন এদিন আত্মীয়ইহে হাতত তুলি দিছিল । ৰাইজৰ মাজত সম্প্ৰীতিৰ বিঘ্নিত হোৱা কোনো কাৰক প্ৰত্যক্ষ হ’লেই ৰাজহুৱা ভাৱে ৰাইজৰ মাজত উপস্থিত হৈ ৰাইজ-মেল আৰু দোষীক দণ্ড বিহাৰ সামাজিক ৰীতিক প্ৰাধান্য দি আহিছিল বুলি তেওঁ প্ৰকাশ কৰে । “নৱ্য উদাৰতাবাদ আৰু অন্যান্য প্ৰৱন্ধ” “ভাৱনি বিবিধা” আদি দুখনি মৌলিক গ্ৰন্থৰ ইতিমধ্যে ৰচনা কৰা বৰঠাকুৰৰ আত্মজীৱনী “অভিজ্ঞতাৰ আলোকপাত এজন কমিউনিষ্টৰ স্মৃতিকথা” গুৱাহাটীত উন্মোচন হৈছিল । বিভিন্ন কাকত আৰু আলোচনীত জাতিৰ সমস্যা আৰু প্ৰত্যাহ্বানৰ বেলিকা সৰৱ হৈ পথ প্ৰদৰ্শনৰ বাবে সদা প্ৰস্ত্তত হৈ ৰোৱা অৱনী বৰঠাকুৰে জীৱনৰ দশমটো দশকত প্ৰস্ত্তত হৈ উঠিছে মহাত্মা গান্ধীৰ বিষয়ত এখনি গ্ৰন্থ লিখি উলিওৱাৰ বাবে । কথোপকথন অনুষ্ঠানৰ আয়োজক নাজিৰাৰ জ্যোতি-বিষ্ঞু কলাঙ্গনে শতায়ু অভিমুখী দূৰন্ত তৰুণ অৱনী বৰঠাকুৰৰ এই প্ৰয়াসক শ্ৰদ্ধা জনোৱাৰ লগতে কলাঙ্গনৰ সভাপতি যোগ গগৈয়ে তেওঁৰ জীৱন আৰু কৰ্মৰ ওপৰত এখনি তথ্য চিত্ৰ নিৰ্মাণৰ বাবে শিল্পী তথা পৰিচালক প্ৰাঞ্জল চেতিয়াক আৰু ৰঞ্জিত ফুকনক শিশুৰ উপযোগীকৈ তেওঁৰ জীৱনী লিখাৰ বাবে ৰাজহুৱাভাৱে দায়িত্ব অৰ্পণ কৰে । নাজিৰা কলেজ চৌহদত দিনটোৰ তাৎপৰ্য্য ৰক্ষা কৰি নিজহাতে এটি বৃক্ষ ৰোপন কৰে বৰ্ষীয়ান চিন্তাবিদ জনে । আয়োজক সংগঠনৰ সম্পাদক ৰঞ্জিত ফুকন, অধ্যাপক ড’ জীৱন কলিতাই আঁত ধৰা অনুষ্ঠানত প্ৰতিষ্ঠাপক উপাধ্যক্ষা ৰঞ্জু বুঢ়াগোহাঁই, মীনা কুমাৰী দেৱী, কবি সমালোচক ৰাজীৱ বৰা, অৱনী বৰঠাকুৰৰ পুত্ৰ গুৱাহাটী উচ্চ ন্যায়ালয়ৰ জ্যেষ্ঠ অধিবক্তা শান্তনু বৰঠাকুৰ, কবি থানু বৰুৱা, প্ৰহ্লাদ বৰগোহাঁই, সত্যনাৰায়ণ কৰ, জাকিৰুল হুছেইন, ফৈজুদ্দিন আহমেদ আদি বিশিষ্ট লোক সকলৰ লগতে নাজিৰা কলেজৰ অধ্যাপক-অধ্যাপিকা, ছাত্ৰ-ছাত্ৰীসকলৰ উপস্থিতি আৰু সমাজৰ বিভিন্ন স্তৰৰ লোকসকলে গামোচা, কিতাপ, চেলেং চাদৰ আদি উপহাৰ যাচে । উদীয়মান শিল্পী আলোকপ্ৰাণ কছাৰী, শিশু শিল্পী কল্যাণী ৰাইদঙ্গীয়া আৰু কুকি কোঁৱৰে কলাগুৰু বিষ্ঞু ৰাভা, ৰূপকোঁৱৰ জ্যোতি প্ৰসাদ, সুধাকণ্ঠ ভূপেন হাজৰিকাৰ গীত পৰিৱেশন কৰে ।