দৈনন্দিন বাৰ্তাৰ সেৱা, ইটাখোলা, ১১ নৱেম্বৰঃ অসমত পাকিস্থান জিন্দাৱাদ নচলিব, ইয়াত বন্দে মা তৰম আৰু জয় আই অসমহে চলিব – এই মন্তৱ্য চতিয়া সমষ্টিৰ বিধায়ক পদ্ম হাজৰিকাৰ৷ আজি সমষ্টিটোৰ অন্তৰ্গত জামুগুৰি ব্যৱসায়িক কেন্দ্ৰত অখিল ভাৰতীয় বিদ্যাৰ্থী পৰিষদ জামুগুৰিহাট শাখাৰ এটি স্থায়ী কাৰ্য্যালয়ৰ দ্বাৰ উন্মোচন কৰি  বিধায়ক পদ্ম হাজৰিকাই আৰু কয়-অসমৰ বায়ু পানী খাই পাকিস্থান বাংলাদেশৰ চিন্তাত থকা সকল আমাৰ ঘোৰ শত্ৰু৷ আমাৰ মাটি, আমাৰ সংস্কৃতিলৈ ভাবুকি কঢ়িয়াই অনা সকল  জাতিৰ শত্ৰু৷

এনে শত্ৰুক অসমৰ পৰা পুলিয়ে-পোখালিয়ে আতৰাই পঠিয়াব লাগিব বুলি মন্তব্য কৰে বিধায়ক গৰাকীয়ে৷ অখিল ভাৰতীয় বিদ্যাৰ্থী পৰিষদৰ জামুগুৰিহাট শাখাৰ সম্পাদক বিষ্ণু দাসে আত ধৰা অনুষ্ঠানটিত অখিল ভাৰতীয় বিদ্যাৰ্থী পৰিষদৰ  ৰাজ্যিক যুটীয়া সম্পাদক পলয় কুমাৰ বড়ো, জামুগুৰি শাখাৰ সভাপতি ড°তিলক শৰ্মা, সহকাৰী সম্পাদক ওম প্ৰকাশ দাস,বিবেক পাল, বৰুণ নাথে অখিল ভাৰতীয় বিদ্যাৰ্থী পৰিষদৰ দৰ্শন,লক্ষ্য উদ্দেশ্যৰ ওপৰত  বক্তৱ্য আগবঢ়ায়৷ সভাত এবিভিপিৰ শোণিতপুৰ জিলাৰ সমন্বয়ক দ্বিপজ্যোতি দাস প্ৰমুক্ষে কৰি বহু কেইগৰাকী বিষয়ববীয়া উপস্থিত থাকে।

দৈনন্দিন বাৰ্তাৰ সেৱা, মেছাগড়, ১১ নৱেম্বৰঃ শিৱসাগৰ জিলাৰ জিলা দণ্ডাধীশ লক্ষীনন্দন গগৈয়ে কৰা এক আদেশমৰ্মে জনসাধাৰণৰ স্বাস্থ্য, নিৰাপত্তা আৰু ক’ভিড-১৯ ৰোগৰ সংক্ৰমণ ৰোধৰ স্বাৰ্থত আগন্তুক দীপাৱলী উৎসৱৰ সময়ত অহা ১৩ নৱেম্বৰৰ পৰা ১৫ নৱেম্বৰলৈ সমগ্র শিৱসাগৰ জিলাতে তাৎক্ষণিকভাৱে কাৰ্যকৰী হোৱাকৈ ফৌজদাৰী কাৰ্যবিধি আইনৰ ১৪৪ ধাৰাৰ অধীনত মেলা, লটাৰী খেল, জুৱা খেল তীৰ খেল তথা মুকলি চিনেমা প্ৰদৰ্শন আদি সম্পূৰ্ণৰূপে নিষিদ্ধ কৰিছে। এই আদেশ উলংঘা কৰিলে ভাৰতীয় দণ্ডবিধি আইনৰ ১৮৮ ধাৰাৰ অধীনত শাস্তিমূলক ব্যৱস্থা গ্ৰহণ কৰা হ’ব।

উল্লেখ্য যে, বিগত সময়ত শিৱসাগৰ জিলাৰ বিভিন্ন স্থানত দীপাৱলী উৎসৱৰ লগত সংগতি ৰাখি মেলা, লটাৰী খেল, জুৱা খেল, তীৰ খেল আদি অনুষ্ঠিত হোৱাৰ লগতে চাহ বাগিচা সমূহত মুকলি চিনেমা প্ৰদৰ্শন হৈ আহিছে, য’ত একেলগে বহুলোকৰ সমাগম হোৱা  পৰিলক্ষিত হয়। তদুপৰি, বিশ্বৰ বিভিন্ন দেশৰ লগতে ভাৰতৰ বিভিন্ন ৰাজ্যত পুনৰ ক’ভিড-১৯ ৰোগৰ সংক্ৰমণ আৰম্ভ হোৱাৰ বিষয়ে বিভিন্ন প্ৰচাৰ মাধ্যমত প্ৰকাশিত হৈ আহিছে। উক্ত বিষয় বোৰ বিবেচনা কৰাৰ লগতে জনসাধাৰণৰ স্বাস্থ্য আৰু নিৰাপত্তা সুনিশ্চিত কৰাৰ লগতে ৰাজহুৱা বা ব্যক্তিগত স্থানত জনসমাগম ৰোধৰ স্বাৰ্থত এই নিষেধাজ্ঞা আৰোপ কৰা হৈছে।

দৈনন্দিন বাৰ্তাৰ সেৱা, মাহমৰা, ১১ নৱেম্বৰঃ উজনি অসমৰ ঐতিহ্যমণ্ডিত চৰাইদেউ জিলাৰ গড়কাপ্টানী বিভাগৰ অতি গুৰুত্বপূৰ্ণ জিলাখনৰ ভজো-কাকতীবাৰী-ৰাজগড় সংযোগী গড়কাপ্টানী পথছোৱাত শেহতীয়াকৈ নিতৌ বুজন পৰিমাণৰ শিল আৰু বালি কঢ়িওৱা গাড়ীয়ে বিধ্বস্ত কৰি পেলাইছে। ইয়াৰ পৰিপ্ৰেক্ষিতত যোৱা ৯ নৱেম্বৰত সদৌ অসম ছাত্ৰ সন্থাৰ মাহমৰা আঞ্চলিক সমিতিয়ে চৰাইদেউ জিলা উপায়ুক্তক এখন স্মাৰকপত্ৰ প্ৰদান কৰিছিল। ‘আছু’ৰ আঞ্চলিক সমিতিখনৰ সভাপতি ৰিংকু বড়া আৰু সাধাৰণ সম্পাদক চিৰঞ্জীৱ বৰগোঁহাইৰ স্বাক্ষৰিত স্মাৰকপত্ৰখনত উল্লেখ কৰা অনুসৰি, জিলাখনৰ অতি গুৰুত্বপূৰ্ণ ভজো-কাকতীবাৰী-ৰাজগড় সংযোগী গড়কাপ্টানী পথছোৱাৰ মাজেৰে দৈনিক এশৰো অধিক বুজন পৰিমাণৰ শিল আৰু বালি কঢ়িওৱা ডাম্পাৰ অহা-যোৱা কৰাত সম্প্ৰতি পথছোৱা বিধ্বস্ত হৈ পৰাৰ লগতে পথৰ মাজত পুখুৰীসদৃশ গাঁতৰ সৃষ্টি হৈছে।

যাৰ ফলত সাধাৰণ জনসাধাৰণ দৈনিক অহা-যোৱা কৰাৰ লগতে বিদ্যালয়ত অধ্যয়নত ছাত্ৰ-ছাত্ৰী জীয়াতু ভুগিবলগীয়া পৰিস্থিতি সৃষ্টি হৈছে। এই বিষয়ত বিগত সময়ত বিভাগীয় কৰ্তৃপক্ষৰ লগতে জিলা উপায়ুক্ত বাৰম্বাৰ দাবী জনাই অহাৰ পিছতো কোনোধৰণৰ গুৰুত্ব প্ৰদান নকৰাটো অতিকে আশ্চৰ্যজনক বিষয় হিচাপে বিবেচিত হৈছে। সেয়েহে  আজিৰে পৰা মাহমৰা আঞ্চলিক ছাত্ৰ সন্থাই উক্ত পথছোৱা মাজেৰে অত্যাধিক বুজন কঢ়িওৱা ডাম্পাৰসমূহ অহা-যোৱা কৰাত সম্পূৰ্ণৰূপে বাঁহ বান্ধি অনিৰ্দিষ্টকালৰ বাবে বন্ধ কৰিছে। এইক্ষেত্ৰত জিলা উপায়ুক্তই অতিশীঘ্ৰে ব্যৱস্থা গ্ৰহণ কৰিবলৈ ‘আছু’ৰ মাহমৰা আঞ্চলিক সমিতিয়ে দাবী জনাইছে।

দৈনন্দিন বাৰ্তাৰ সেৱা, গুৱাহাটী, ১১ নৱেম্বৰঃ আত্মহত্যাৰ বাবে প্ৰৰোচিত কৰাৰ অভিযোগত গ্ৰেপ্তাৰ হোৱা ৰিপাব্লিক টিভিৰ মুখ্য সম্পাদক অৰ্ণৱ গোস্বামীৰ জীৱনলৈ সংশয় আহিছে। জীৱনলৈ সংশয় অহাৰ কথা অৰ্ণৱে নিজেই প্ৰকাশ কৰিছিল। আজি অসমৰ মুখ্য মন্ত্ৰী সৰ্বানন্দ সোণোৱালে গোস্বামীৰ নিৰাপত্তা নিশ্চিত কৰাৰ বাবে মহাৰাষ্ট্ৰৰ মুখ্যমন্ত্ৰী উদ্ধৱ থাকৰেক অনুৰোধ জনাইছে। অসমৰ মুখ্যমন্ত্ৰী গৰাকীয়ে আজি নিজৰ টুইটাৰত প্ৰকাশ কৰিছে এই কথা। সোণোৱালে গোস্বামীৰ পৰিয়ালৰ অনুৰোধ মৰ্মে মহাৰাষ্ট্ৰৰ মুখ্যমন্ত্ৰী থাকৰেক এই অনুৰোধ জনাইছে।

মনকৰিবলগীয়া, সাংবাদিক গোস্বামীৰ মোমায়েক অৰ্থাৎ অসম চৰকাৰৰ মন্ত্ৰী সিদ্ধাৰ্থ ভট্টাচাৰ্যৰ অনুৰোধত মুখ্যমন্ত্ৰী সোণোৱালে উদ্ধৱ থাকৰেৰ সৈতে এই বিষয়ত আলোচনা কৰা বুলিও চৰ্চা লাভ কৰিছে। অৰ্ণৱ গোস্বামীক আৰক্ষীয়ে নিজৰ জিম্মাত বিচাৰি আদালতত আবেদন জনাইছিল যদিও আলিবাগ সত্ৰ আদালতে অৰ্ণৱ গোস্বামীক ১৪ দিনৰ ন্যায়িক জিম্মালৈহে প্ৰেৰণ কৰে। আৰক্ষীয়ে নিজৰ জিম্মাত নোপোৱাৰ বাবেই আৰক্ষীয়ে তেওঁৰ ওপৰত অত্যাচাৰ চলোৱা বুলি অভিযোগ উত্থাপন কৰিছিল সাংবাদিক গৰাকীয়ে।

“মই ভাৰতৰ জনতাক জনাব খুজিছো যে মোৰ জীৱনলৈ ভাবুকি আহিছে। তেওঁলোকে কয় যে অধিবক্তাৰ সৈতে কথা পাতিব নোৱাৰিব। মোক অত্যাচাৰ কৰা হৈছে। মোৰ আৰক্ষী জিম্মাৰ আবেদন আদালতে খাৰিজ কৰিলে। তেওঁলোকে মোক মুকলি হৈ অহাটো বিচৰা নাই। আজি পুৱাও মোক চোচৰাই আনিছে।” ৰিপাব্লিক টিভিয়ে সম্প্ৰচাৰ কৰা বাতৰিত অৰ্ণৱ গোস্বামীয়ে এইদৰে কোৱা দেখা গৈছে।

বুধবাৰে আলিবাগ সত্ৰ আদালতে অৰ্ণৱ গোস্বামীৰ জামিন আবেদন নাকচ কৰি ১৪ দিনৰ ন্যায়িক জিম্মালৈ প্ৰেৰণ কৰিছিল। আনহাতে অৰ্ণৱ গোস্বামী দেওবাৰে তাল’জা কাৰাগাৰলৈ স্থানান্তৰ কৰা হৈছে। এখন আৰক্ষীৰ বাহনত তাল’জা কাৰাগাৰলৈ নি থকাৰ সময়তে খিৰিকীৰেদি অৰ্ণৱ গোস্বামীয়ে চিঞৰি এইদৰে কোৱা দেখা গৈছিল।