Bihar day । অসমত বিহাৰ দিৱস উদযাপনৰ পরিকল্পনা বিৰোধিতাৰ মাজতে বাতিল কৰা হৈছে। বিহাৰ স্থাপনৰ ১১৩ বছৰ পূর্তি উপলক্ষে অহা ২২ মাৰ্চত ৰাজ্যৰ বিভিন্ন ঠাইত একাংশ বিহাৰী সম্প্ৰদায়ৰ লোকে বিহাৰ দিৱস উদযাপন কৰিবলৈ সাজু হৈছিল। বিশেষকৈ, বিহাৰ ফাউণ্ডেশ্যনৰ গুৱাহাটী চেপ্টাৰে জি এম চি প্ৰেক্ষাগৃহত এক অনুষ্ঠান আয়োজন কৰিছিল, য’ত ৰাজ্যপালসহ বিভিন্ন গণ্যমান্য ব্যক্তি উপস্থিত থাকিব বুলি আশা কৰা হৈছিল।

যি কি নহওক, অসমত বিহাৰ দিৱস উদযাপন কৰা কোনো যুক্তি নাই বুলি সদৌ অসম ছাত্ৰ সন্থা (আছু), আটাছু, জাতীয় সংগ্ৰামী সেনা অসম, অসমীয়া যুৱ মঞ্চ, অনুসূচিত জাতি ছাত্ৰ সন্থাকে ধৰি বহুতো দল-সংগঠনে ইয়াৰ বিৰোধিতা কৰে। তেওঁলোকে কাৰ্যসূচী বাতিল কৰাৰ দাবী তোলে আৰু উদ্যোক্তাসকলক ক্ষমা খুজিবলৈ আহ্বান জনায়।

এনে পৰিস্থিতিৰ মাজতে নিষিদ্ধ সংগঠন আলফা (স্বা)য়ে এই কাৰ্যসূচীৰ কঠোৰ বিৰোধিতা কৰি এক বিবৃতি প্ৰকাশ কৰে। সংগঠনটোৱে কয় যে অসমত থলগিৰিৰ ভূমিত বিহাৰ দিৱস উদযাপন কোনো মতে গ্ৰহণযোগ্য নহ’ব। সংগঠনটোৱে উদ্যোক্তাসকলক অনুষ্ঠান বাতিল কৰিবলৈ নিৰ্দেশনা দিয়ে আৰু যদি এই নির্দেশনা উপেক্ষা কৰি কাৰ্যসূচী অনুষ্ঠিত কৰা হয়, তেন্তে তাৰ গম্ভীৰ পৰিণতি ভুগিব লাগিব বুলি সতৰ্কবাণী দিয়ে।

আছুৰ সভাপতি উৎপল শৰ্মাই মন্তব্য কৰে যে, ৰাজ্যপালৰ উদ্যোগত বিহাৰ দিৱস বা অন্যান্য ৰাজ্যিক দিৱস উদযাপন আগতে হোৱা আছে, কিন্তু কোনো ৰাজনৈতিক দলৰ উদ্যোগত জিলাই জিলাই এনে অনুষ্ঠান আয়োজন কৰা গ্ৰহণযোগ্য নহয়। তেওঁ অভিযোগ উত্থাপন কৰে যে, তিনিচুকীয়াত বিহাৰী জনসংখ্যা অধিক থকা বাবে বিজেপিয়ে বিহাৰ দিৱস উদযাপন কৰিবলৈ চেষ্টা কৰিছে।

এই বিষয়ে মুখ্যমন্ত্রী হিমন্ত বিশ্ব শৰ্মাই এক ভিন্ন মত প্ৰকাশ কৰে। তেওঁ মন্তব্য কৰে যে, অসমত বিহাৰ দিৱস উদযাপন নকৰাৰ কোনো যুক্তি নাই। শৰ্মাই কয়, “দেশৰ বিভিন্ন প্ৰান্তত অসম দিৱস পালন কৰা হয়, গতিকে অসমত বিহাৰ দিৱস পালন কৰাত কোনো আপত্তি নহ’ব লাগিব। যদি অসম দিৱস বিহাৰ বা উত্তৰ প্ৰদেশত পালন কৰা হয়, তেন্তে অসমতো বিহাৰ দিৱস পালন হ’ব পাৰে।”

যদিও মুখ্যমন্ত্ৰীগৰাকীয়ে কাৰ্যসূচী সমৰ্থন কৰিছিল, বহুতো দল-সংগঠনৰ চাপৰ ফলত বিজেপিয়ে অবশেষত বিহাৰ দিৱস উদযাপন বাতিল ঘোষণা কৰে। এই সিদ্ধান্তৰ পাছত অসমত এই বিষয়ে চর্চা অব্যাহত আছে।

Rupjyoti Kurmi: অসম বিধানসভাৰ দ্বাদশ দিনটোত সদনত উত্তপ্ত পৰিস্থিতিৰ সৃষ্টি হয়। পবিত্ৰ সদনৰ মজিয়াত বিধায়কৰ মাজত সৃষ্টি হয় কাজিয়া। বিধায়ক শ্বেৰমান আলীলৈ চোঁচা ল’লে ৰূপজ্যোতি কুৰ্মীয়ে। ভাষণৰ মাজতে শ্বেৰমানলৈ চোঁচা ল’লে ৰূপজ্যোতিয়ে। ৰূপজ্যোতিৰ বিৰুদ্ধে ব্যৱস্থা গ্ৰহণৰ দাবী অখিল গগৈৰ। বিৰোধী দলপতিও সৰৱ হৈ পৰিল ৰূপজ্যোতিৰ বিৰুদ্ধে। ৰূপজ্যোতিক বুজনি দিয়াৰ চেষ্টা কৰে উপাধ্যক্ষ ডাঃ নোমল মমিনে। হুলস্থূলীয়া পৰিৱেশৰ পিছতে সদনত ক্ষমা খুজিলে ৰূপজ্যোতি কুৰ্মীয়ে। ৰূপজ্যোতি কুৰ্মীয়ে কয়, “মই কোনো বেয়া কথা কোৱা নাছিলো। মই উঠি যাব নালাগিছিল। মই ক্ষমা বিচাৰিছোঁ।”

এই উত্তপ্ত পৰিস্থিতিৰ পিছতে ঘটনা সন্দৰ্ভত প্ৰতিক্ৰিয়া প্ৰকাশ কৰি বিধায়ক শ্বেৰমান আলীয়ে কয়, “অসম বিধানসভাত এয়া নজিৰবিহীন ঘটনা হ’ল। আজিলৈ এনে ঘটনা হোৱা নাই। অধ্যক্ষই যি শাস্তি দিব লাগিছিল নিদিলে। একেবাৰে লঘু শাস্তি দিলে। ৰূপজ্যোতি কুৰ্মীক গোটেই বছৰৰ বাবে নিলম্বন কৰিব লাগে।”

ঘটনা সন্দৰ্ভত প্ৰতিক্ৰিয়া প্ৰকাশ কৰি বিৰোধী দলপতি দেবব্ৰত শইকীয়াই কয়, “অসম বিধানসভাত আজি কোনোদিন নঘটা নজিৰবিহীন ঘটনা ঘটিল। বিৰোধী বিধায়কক মাৰিবলৈ চকীৰ ফালে চোঁচা লৈ যোৱাটো নিন্দনীয় ঘটনা। এনে ঘটনা আগতে হোৱা নাই কেতিয়াও। ধোদৰ আলীক লৈ ৰাজনীতি হৈ আছে, এই বিষয়টোক লৈ আমি আলোচনা কৰি আছিলো। চৰাইদেউ জিলালৈ যোৱা আটাইকেইটা ৰাস্তা বেয়া হৈ আছে। বিধানসভাত এইবোৰ বিষয়ত আলোচনা হ’ব লাগে কিন্তু ঘুচিয়া-ঘূচি হ’ব নালাগে। বিৰোধী বিধায়কক সমালোচনা কৰাৰ বাবে শাৰীৰিক আক্ৰমণ কৰিবলৈ আগুৱাই গৈছে ৰূপজ্যোতি কুৰ্মীয়ে। এই ঘটনাক নিন্দা কৰি আমি আজি সদন ত্যাগ কৰিছো।”

ঘটনা সন্দৰ্ভত প্ৰতিক্ৰিয়া প্ৰকাশ কৰি মনোৰঞ্জন তালুকদাৰে কয়, “মই প্ৰথমবাৰৰ বিধায়ক। এনেকৈ খেদি অহাত আচৰিত হৈছোঁ। আজি আন বিধায়কে বাধা নিদিয়া হ’লে শাৰীৰিকভাৱে আক্ৰমণ কৰি দিলেহেতেন। কিন্তু আচৰিতভাৱে সাধাৰণ ৱাৰ্নিং এটা দি দায় সাৰিলে।”

সমগ্ৰ ঘটনা সন্দৰ্ভত নিজৰ ভুল স্বীকাৰ কৰি ক্ষমা বিচৰাৰ লগতে প্ৰতিক্ৰিয়া ব্যক্ত কৰি বিধায়ক ৰূপজ্যোতি কুৰ্মীয়ে কয়, “মোৰ বিধানসভাত ২০ বছৰীয়া অভিজ্ঞতা হৈছে। মই শাসক বিৰোধী য’তেই আছোঁ ত’তেই কেতিয়াও আনে বক্তব্য ৰাখোঁতে মাজত মাত মতা নাই। চাহ জনগোষ্ঠীক লৈ নিজকে ৰজাঘৰীয়া বুলি ভবা অখিল গগৈ, দেৱব্ৰত শইকীয়াই ব্ৰিটিছৰ দৰেই নীতি লৈ অপমান কৰি আহিছিল। ধোদৰ আলিক লৈ মই বক্তব্য ৰাখিছিলোঁ। সেই সময়ত মাত মতাত মই খঙত যি কৰিলোঁ তাৰ বাবে ক্ষমা বিচাৰিছোঁ। ঝুমইৰ বিনন্দিনীক অপমান কৰা অখিল গগৈ, দেৱব্ৰত শইকীয়াই সদায় চাহ জনগোষ্ঠীক সদায় গৰু যোৱা বাটেৰেই অহা যোৱা কৰা বিচাৰে।”

ভাৰতবৰ্ষৰ বহু লোকৰ তামোল-পান খোৱাটো এটা চখ, কিন্তু আহাৰ খোৱাৰ পিছত পান চোবাই খালে স্বাস্থ্যৰ বাবে কিমান ভাল জানেনে ?(Betel leaf)

ভাৰতীয় সংস্কৃতিত পানৰ এক বিশেষ তাৎপৰ্য আছে। পৰম্পৰাগতভাৱে ধৰ্মীয় অনুষ্ঠান, শুভ অনুষ্ঠান আৰু বিশেষকৈ আহাৰ খোৱাৰ পিছত পান খোৱা হয়। পানে সোৱাদ সতেজ কৰাই নহয়, ইয়াৰ আন আন উপকাৰো আছে। আয়ুৰ্বেদৰ মতে পানে হজম শক্তি উন্নত কৰে, মুখ পৰিষ্কাৰ কৰে আৰু বহু ৰোগ প্ৰতিৰোধ কৰাত সহায় কৰে। খোৱাৰ পিছত পান খালে চোবাই কি কি স্বাস্থ্য উপকাৰ পাব পাৰে জানো আহক-

১/ হজম শক্তি উন্নত কৰে
পানৰ কাৰ্মিনেটিভ গুণ থাকে, যাৰ ফলত হজম শক্তি উন্নত হয়। ই গেছ, বদহজম আৰু এচিডিটিৰ দৰে সমস্যা দূৰ কৰে। খাদ্য খোৱাৰ পিছত পান খালে লালা উৎপাদন বৃদ্ধি পায়, যাৰ ফলত হজম প্ৰক্ৰিয়া ক্ষিপ্ৰ হয় আৰু খাদ্য ভালদৰে হজম হয়।

২) মুখৰ দুৰ্গন্ধ নাইকিয়া কৰা
খাদ্য খোৱাৰ পিছত বহু সময়ত মুখত বেয়া গোন্ধ ওলায়, যাৰ বাবে অস্বস্তি অনুভৱ হয়। পানে প্ৰাকৃতিক মুখ সতেজতা হিচাপে কাম কৰাৰ লগতে মুখৰ দুৰ্গন্ধ নাইকিয়া কৰে। ইয়াৰ এন্টি-বেক্টেৰিয়েল গুণে মুখত বেক্টেৰিয়াৰ বৃদ্ধি ৰোধ কৰে, যাৰ ফলত উশাহ সতেজ হৈ থাকে।

৩) দাঁত আৰু আঁঠুৰ বাবে উপকাৰী
পানৰ এন্টিচেপ্টিক আৰু এন্টি-বেক্টেৰিয়েল গুণ থাকে, যিয়ে দাঁত আৰু দাঁতৰ গুৰি সংক্ৰমণৰ পৰা ৰক্ষা কৰে। ই দাঁতত গহ্বৰ আৰু প্লেক গঠন হোৱাত বাধা দিয়ে। মিঠা পানৰ সলনি সাধাৰণ পান চোবাই খালে ই আপোনাৰ দাঁতৰ বাবে অধিক উপকাৰী হ’ব পাৰে।

৪/ ওজন কমা
পানে বিপাকীয় ক্ৰিয়া বৃদ্ধি কৰাত সহায় কৰে, যাৰ ফলত ওজন কমোৱাত সহায় কৰে। ই শৰীৰত আবদ্ধ হৈ থকা বিষাক্ত পদাৰ্থবোৰ ফ্লাছ কৰি উলিয়াই দিয়াত সহায় কৰে আৰু চৰ্বি জ্বলোৱা প্ৰক্ৰিয়াটো ক্ষিপ্ৰ কৰে।

৫) চৰ্দি আৰু কাহত উপকাৰী
পানত এন্টি-মাইক্ৰ’বিয়াল গুণ থাকে, যাৰ ফলত চৰ্দি, কাহ আৰু ডিঙিৰ বিষৰ পৰা উপশম পোৱা যায়। গৰম পানীত পান উতলাই খালে ডিঙিৰ বিষ আৰু কাহৰ পৰা উপশম পোৱা যায়।

আহাৰ খোৱাৰ পিছত সাধাৰণ পান চোবাই খালে ভাল। ইয়াত তামোল, ধঁপাত বা অতিৰিক্ত মিঠা ব্যৱহাৰ নকৰিব।