গুৱাহাটী : দেশবাসীয়ে ৭৪ সংখ্যক স্বাধীনতা দিৱস শনিবাৰে বিভিন্ন কাৰ্যসূচীৰে উদযাপন কৰে ৷ মধ্য গুৱাহাটী উন্নয়ন সমিতিয়ে স্বাধীনতা দিবসৰ লগত সংগতি ৰাখি এক বিনামূলীয়া স্বাস্থ্য পৰিক্ষা শিবিৰ অনুষ্ঠিত কৰে ৷ সমিতিৰ সাধৰন সম্পাদক ৰাজীব দাসে সংবাদ মাধ্যমক জানিবলৈ দিয়া অনুসৰি শনিবাৰে মহানগৰীৰ পল্টনবজাৰত মধ্য গুৱাহাটী উন্নয়ন সমিতিয়ে বিনামূলীয়াকৈ সংবাদ কৰ্মীৰ লগতে উপস্থিত থকা সাধাৰণ নাগৰিকৰ ব্লাড চুগাৰ, পেছাৰ, পৰীক্ষা কৰা হয় ৷ ডা° অমিত ভি সিং আৰু সত্যজিত দাসে উপস্থিত থাকি চিকিৎসা প্ৰদানত সহযোগ কৰে ৷ উল্লেখ্য যে স্বাস্থ্য পৰীক্ষাৰ অন্তত সমিতিৰ তৰফৰ পৰা বিনামূলীয়াকৈ মাল্টিভিটামিন টেবলেট, মাস্ক আৰু ছেনিজাৰ বিতৰন কৰা হয় ৷ সমিতিৰ সভাপতি তথা প্ৰাক্তন মেয়ৰ মৃগেন শৰনীয়াই অনুষ্ঠানত উপস্থিত থাকি কয় ক’ৰোনা মহামাৰিৰ বাবেই ব্লাড চুগাৰ, বি পি টেষ্ট কৰিব বাবেই সাধাৰণ নাগৰিক যঠেষ্ট অসুবিধাৰ সন্মুখীন হৈছে ৷ ইয়াৰ বাবে আজি কিছু পৰিমানে হলেও সাধাৰণ নাগৰিকক বিনামূলীয়াকৈ টেষ্ট কৰা হৈছে ৷ লগতে মাল্টিভিটামিন এই সময়চোৱাত অতিকৈ প্ৰয়োজন সেয়ে সমিতিৰ তৰফৰ পৰা কিছু পৰিমানে বিনামূলীয়া দিয়ে ৷ ইপানে মধ্য গুৱাহাটী উন্নয়ন সমিতিয়ে এনেকুৱা পদক্ষেপ লোৱাৰ বাবে অঞ্চলবাসী ৰাইজে ধন্যবাদ জ্ঞাপন কৰে ৷

উজনি-মাজুলীঃ সমগ্ৰ ভাৰতবৰ্ষৰ লগতে দ্বীপজিলা মাজুলীৰো বিদ্যালয়-মহাবিদ্যালয় সমূহত শণিবাৰে ৭৪ সংখ্যক স্বাধীনতা দিৱসটি পালন কৰা হয়। এই উপলক্ষে দ্বীপজিলাখনৰ শিক্ষাৰ অগ্ৰণী বাটকটীয়া অনুষ্ঠান মাজুলী মহাবিদ্যালয়ত শণিবাৰে পুৱা ৬ -৩০ বজাত পৰিৱেশ নিকাকৰণ, পুৱা ৭-১৫ বজাত বৃক্ষ ৰোপণ, পুৱা ৭ – ৩০ বজাত আনুষ্ঠানিকভাৱে ৰাষ্ট্ৰীয় পতাকা উত্তোলন আৰু অভিবাদন গ্ৰহণ কৰা হয়, পুৱা ৭ -৪৫ বজাত স্বাধীনতা দিৱস কাৰ্যসূচীত অংশ গ্ৰহণ কৰা শিক্ষক-শিক্ষয়িত্ৰী আৰু ছাত্ৰ-ছাত্ৰী সকলৰ মাজত লঘু আহাৰ বিতৰণ কৰে, সন্ধিয়া ৪ -৩০ বজাত ৰাষ্ট্ৰীয় পতাকা অৱনমন কৰা হয় আৰু সন্ধিয়া ৫ বজাত বন্তি প্ৰজ্বলন কৰে । মহাবিদ্যালয় খনিত অনুষ্ঠিত হোৱা স্বাধীনতা দিৱসত পতাকা উত্তোলন কৰে মহাবিদ্যালয়ৰ বৰ্তমানৰ অধ্যক্ষ ডঃ দেৱজিৎ শইকীয়াই । সম্পূৰ্ণভাৱে সামাজিক দূৰত্ব বৰ্তাই ৰাখি , মুখত মাস্ক পৰিধান কৰি মহাবিদ্যালয়ৰ শিক্ষা গুৰুৰ সকলৰ লগতে কম সংখ্যক ছাত্ৰ -ছাত্ৰী ৭৪ সংখ্যক এই স্বাধীনতা দিৱস কাৰ্যসূচীত অংশ গ্ৰহন কৰে। আনহাতে উজনি মাজুলীৰ চিৰাম উচ্চতৰ মাধ্যমিক বিদ্যালয়তো ৭৪ সংখ্যক স্বাধীনতা দিৱসটি থূলমূলকৈ পালন কৰা হয় | অধ্যক্ষ কৃষ্ণৰাম বৰা, উপাধ্যক্ষ পদুম মহন্ত ,শিক্ষক বৃন্দৰ হৈ মহেন্দ্ৰ বৰা, মহেন্দ হাজৰিকা, অৰুন মিলি, প্ৰভুনাথ ভগত, মৃদুল বৰা, মাধৱ শইকীয়া, চৌকিদাৰ দুতিৰাম বৰা, ছাত্র একতা সভাৰ বিতুপন দাস আদি উপস্থিত থাকি ক’ভিড ১৯ মহামাৰীৰ প্ৰতি লক্ষ্য ৰাখি সামাজিক দূৰত্ব বৰ্তাই ৰাখি, মুখত মাস্ক পৰিধান কৰি সম্পূৰ্ণ লকডাউনৰ নীতি নিয়মৰ মাজেৰে এক চমু কাৰ্যসূচীৰে অনুষ্ঠিত হয় ৭৪ সংখ্যক স্বাধীনতা দিৱসটি | বিদ্যালয়ৰ অৱসৰপ্ৰাপ্ত শিক্ষক গনেশ ৰাজখোৱাই পতাকা উত্তোলনৰ কাৰ্যসূচীৰ পাছত স্বাধীনতাৰ বীৰ বীৰাংগনা সৈনিক সকলৰ দেশৰ প্ৰতি থকা ত্যাগৰ কথা উল্লেখ কৰি তেখেত সকললৈ সশ্ৰদ্ধ প্ৰনিপাত জনাই বক্তব্য ৰাখে লগতে বৰ্তমানৰ ৰাজ্য চৰকাৰৰ বিভিন্ন আঁচনি সমূহৰ শলাগ লয় আৰু ৰাষ্ট্ৰীয় শিক্ষা নীতি ২০২০ক সমৰ্থন কৰাৰ কথা উল্লেখ কৰে | তেখেতৰ মন্তব্যক পতাকা উত্তোলন কাৰ্যসূচীত উপস্থিত থকা বিদ্যালয়ৰ শিক্ষক -শিক্ষয়িত্ৰী সকলেও সমৰ্থন জনায়।

টংলা : ৰবিবাৰে ওদালগুৰি জিলা আক্ৰাছু পশ্চিম আৰু টংলা আঞ্চলিক আক্ৰাছুৰ যৌথ উদ্যোগত টংলা মিলনপূৰ স্থিত চিলাৰায় ভৱনত কোচ ৰাজবংশী জনগোষ্ঠীৰ গুৰি ধৰোতা কমতাৰত্ন অম্বিকা চৰন চৌধুৰীৰ জন্ম জয়ন্তী পালন কৰে। জন্ম জয়ন্তী অনুষ্ঠানত আক্ৰাছুৰ কেন্দ্রীয় সমিতিৰ যুটীয়া সাধাৰণ সম্পাদক দিব্য জ্যোতি কুমাৰ ডেকা, ওদালগুৰি জিলা আক্ৰাছু পশ্চিমৰ সভাপতি হেমন্ত বড়া কোচ, ওদালগুৰি জিলা আক্ৰাছু পশ্চিমৰ সাধাৰন সম্পাদক মুকুন্দ ডেকা, ওদালগুৰি আক্ৰাছুৰ প্ৰচাৰ সম্পাদক মৃন্ময় চহৰীয়া, টংলা আঞ্চলিক আক্ৰাছুৰ সভাপতি মুন ডেকা, সাধাৰণ সম্পাদক সুৰুজ ডেকাৰ, আক্ৰাছুৰ বিভিন্ন বিষয়ববীয়া সদস্য সকলৰ লগতে কেইবাজনো শুভাকাঙ্ক্ষী লোক উপস্থিত থাকে।

নলবাৰী/১৫আগষ্ট:: সমগ্ৰ ভাৰত বৰ্ষতেই আজি ১৫ আগষ্টৰ পৱিত্ৰ দিনটোত ভাৰতমাতাৰ পতকাত পুষ্পঞ্জলি অৰ্পন কৰাৰ লগতে যিসকল মহান পুৰুষৰ সততা,ন্যায়,ধৈৰ্য্য,বিশ্বাস আৰু ত্যাগৰ ফলত ভাৰত বৰ্ষ স্বাধীন দেশ হবলৈ সক্ষম হৈছিল সেই সকল মহান ব্যাক্তিক স্মৰণ কৰি তেখেত সকলৰ আত্মাৰ চিৰ শান্তিৰ বাবে বন্তি প্ৰজ্জ্বলন কৰাৰ সময়তে হিন্দু ক্ৰান্তি দল অসম নলবাৰী জিলা সমিতিয়েও উলাহ মালহেৰে স্বাধীনতা দিবস পালন কৰে। নলবাৰী টিহুৰ ষ্টেচনৰ সমীপত হিন্দু ক্ৰান্তি দল অসমৰ কাৰ্যকৰ্তা দীনেশ শৰ্মা আৰু গণেশ কলিতাৰ নেতৃত্বত অনুষ্ঠিত কৰা কাৰ্যসূচীত পতকা উত্তোলন কৰে ৰাষ্ট্ৰিয় পুৰষ্কাৰ, অবসৰ প্ৰাপ্ত সৈনিক নৰেন্দ্ৰ নাথ দাসে।বন্তি প্ৰজ্জ্বলন কৰে অবসৰ প্ৰাপ্ত অসম আৰক্ষী পুতুল চন্দ্ৰ ডেকা ।উক্ত অনুষ্ঠানত হিন্দু ক্ৰান্তি দল নলবাৰী জিলা সমিতিৰ সংযোজক নিৰ্মল ৰাজবংশীয়ে এক বিবৃতি যোগে কয় যে আমি ভাৰতবৰ্ষৰ সংবিধান, গণতন্ত্ৰ, পতকা, সাৰ্বভৌমত্ব ক সন্মান কৰো।ভাৰতবৰ্ষৰ ইতিহাস অতি বিৰল।যত মহা মহা ঋষি মনীষি সকলে বসবাস কৰিছিল।যাৰ বাবে বিশ্ববাসীয়ে এতিয়াও গৌৰৱ কৰে।তেনেক্ষেত্ৰত অতিকৈ দুখৰ বিষয় অতীতৰ যি ভাৰতবৰ্ষ আছিল বৰ্তমানত হৈ থকা নাই। কাৰণ যি ভাৰতবৰ্ষত মাতৃক দেৱী তুল্য আৰু গো মাতাক পূজা কৰা হৈছিল তেনেস্থলত বৰ্তমান পৰ্যায়ত মাতৃসমাজক নিৰ্যাতন আৰু গো মাতাক হত্যা কৰি একাংশই আহাৰ হিচাপত পৰিণত কৰিছে।লগতে সংযোজক গৰাকীয়ে কয় যে বৰ্তমান শাসিত অসম চৰকাৰ খনে যথেষ্ঠ ভাৱে উন্নয়ন মূলক কামৰ আচনি হাতত লৈছে।আমিও স্বাগতম জনাইছো।কথা হল ভাৰতবৰ্ষৰ সংস্কৃতি বৰ্তমান বিপদাপন্ন তেনে ক্ষেত্ৰত আঁ‌চনি সমূহৰ প্ৰয়োজনীয়তা বোধ কৰা নাই হিন্দু ক্ৰান্তি দল অসমে।সেয়েহে ৰাজ্যচৰকাৰ লৈ আহ্বান জনাই সংযোজক গৰাকীয়ে কয় যে ভাৰত মাতা বা অসমী আইক যদি সন্মান কৰে তেন্তে ভাৰতীয় সংস্কৃতিক যাতে কোনেও কেৰাহীকৈও চাব নোৱাৰে তাৰ ওপৰত আইন প্ৰণয়ন কৰক।উক্ত অনুষ্ঠানত হিন্দু ক্ৰান্তি দল নলবাৰী সমিতিৰ উপদেষ্টা মূলেন বৰ্মন,দীপক হালৈ, কুলেন ডেকা, ব্ৰজেন দত্ত যুতিয়া সম্পাদক অপূৰ্ব কলিতা, সাংগঠনিক সম্পাদক লিংকন কলিতা, গো ৰক্ষা প্ৰমূখ মিন্তু কলিতা, সক্ৰিয় সদস্য গগন ডেকা ,দেৱশিষ কলিতা সহ টিহুৰ বহু সংখ্যক কাৰ্যকৰ্তাৰ উপস্থিতি থাকে।

নগাঁও,১৫ আগষ্টঃ সমগ্ৰ দেশৰ লগতে ৰাজ্যৰ খনৰ ওপৰি নগাঁও জিলাতো আজি ৭৪ সংখ্যক স্বাধীনতা দিৱসটি চৰকাৰী ভাৱে নগাঁৱৰ নুৰুল আমিন ষ্টেডিয়ামত উদযাপন কৰা হয় ৷ আজিৰ এই স্বাধীনতা দিৱসৰ কাৰ্যসূচীত অংশ গ্ৰহণ কৰি ৰাষ্ট্ৰীয় পতাকা উত্তোলন কৰে ৰাজ্যিক স্বাস্থ্য মন্ত্ৰী পিয়ুষ হাজৰিকাই । ইয়াৰ পূ্ৰ্ৱে নগাঁৱৰ শ্বহীদ ভৱন প্ৰাংগন আৰু আৰ্ৱত ভৱনৰ সন্মুখত অৱস্থিত স্বাধীনতা সংগ্ৰামত প্ৰাণ আহুতি দিয়া স্বাধীনতা সংগ্ৰামী সকলক শত সহস্ৰ শ্বহীদসকলৰ লগতে প্ৰতিগৰাকী মুক্তিযুঁ‌জাৰুলৈ মন্ত্ৰী গৰাকীয়ে সশ্ৰদ্ধ প্ৰণিপাত জনোবাৰ লগতে সেৱা আগবঢ়াই দেশৰ অখণ্ডতা আৰু সাৰ্বভৌমত্ব ৰক্ষাৰ হেতু প্ৰাণ আহুতি দিয়া বীৰ জোৱানসকলৰ প্ৰতিও গভীৰ শ্ৰদ্ধা নিবেদন কৰে । আজিৰ এই অনুষ্ঠানত নগাঁও সদৰ সমষ্টিৰ বিধায়ক ৰূপক শৰ্মা প্ৰাক্তন কেন্দ্ৰীয় মন্ত্ৰী ৰাজেন গোহাঁই, অভিনেত্ৰী আইমী বৰুৱাৰ সহিতে জিলা প্ৰশাসন আৰক্ষী প্ৰশাসনৰ বিষয়ববীয়া সকলৰ লগতে অন্যান্য লোক সকল উপস্থিত থাকে ৷ আন আন বৰ্ষ সমূহৰ দৰে বাৰ ক’ৰোনা মহামাৰীৰ বাবে স্বাধীনতা দিৱসটি উদযাপনৰ ক্ষেত্ৰত জিলা প্ৰশাসনে কিছু ব্যতিক্ৰমী পদক্ষেপ গ্ৰহণ কৰি সিমিত পৰিমানৰ লোকৰ উপস্থিতিত দিৱসটি সাফল্য মণ্ডিত কৰি তোলা পৰিলক্ষিত হয় ৷ আনহাতে,আজি স্বাধীনতা দিৱসৰ লগত সংগতি ৰাখি নগাঁৱৰ এগৰাকী জ্যেষ্ঠ সাংবাদিক মুৰুলী বৰুৱাই অতি কম সময়ৰ ভিতৰত ক’ৰোনা কালৰ ওপৰত লিখি উলিওৱা এখনি গ্ৰন্থ মন্ত্ৰী গৰাকীয়ে উন্মোচন কৰে ৷

উজনি মাজুলী : মিচিং স্বায়ত্ব শাসিত পৰিষদ আৰু আয়াং ট্ৰাষ্টৰ উদ্যোগত মাজুলী জিলা টি এম পি কেৰ সহযোগত বুধবাৰে উজনি মাজুলীৰ নদী কাষৰীয়া বানপীড়িতসকলৰ মাজত সাহাৰ্য বিতৰণ কৰা হয়। ৰতনপুৰমিৰি গাঁও পঞ্চায়তৰ ডৱলি চাপৰিত ১৯০ ঘৰ, জাৱৰচুক কাঠনিত ৭৯ ঘৰ, উজনি গেজেৰাত ৬ ঘৰ, লুইতপৰীয়া গাঁও পঞ্চায়তৰ লাচন ধুনাগুৰিত ১৪০ ঘৰ, লাচনচাপৰিত ১৯০ ঘৰ, মধ্যলাচন চাপৰিত ৫০ ঘৰ, কপাঁহতলীত ২৫ ঘৰ সৰ্বমুঠ ৬৮০ টা পৰিয়ালৰ মাজত আঠুৱা, চাবোন, চাৰ্ফ, মাস্ক, চাহ, চেনী, বিস্কুট আদি কৰি বিতৰণ কৰে। সাহাৰ্য বিতৰণ কাৰ্যসূচীত মিচিং স্বায়ত্ব শাসিত পৰিষদৰ ৩০নং চাগা সমষ্টিৰ সদস্য নীলকান্ত দলে, আয়াং ট্ৰাষ্টৰ সঞ্চালক তথা মাজুলীস্হিত হামিংবাৰ্ড বিদ্যালয়ৰ অধ্যক্ষ বিপিন ধানে, আয়াংট্ৰাষ্টৰ সমন্বয়ক দ্ৰন্জিত কুমাৰ, আয়াং ট্ৰাষ্টৰ ট্ৰাষ্টি কৃষ্ণ পেগু, উত্তৰ পূব মাজুলী জিলা পৰিষদৰ সদস্য দেবজিৎ পাতিৰ, মাজুলী জিলা টি এম পি কেৰ সম্পাদক টুটু পাংগিং, কাৰ্যকৰী সদস্য পবিত্ৰ পাতিৰ, মাজুলী জিলা এম এম কেৰ সদস্য অৰুপ পেগু আৰু লুইতপৰীয়া আঞ্চলিক টি এম পি কে, এম এম কে, গেজেৰা আঞ্চলিক টি এম পি কেৰ বিষয়ববীয়া সকলেও অংশগ্ৰহণ কৰে। সাহাৰ্য লাভ কৰা বানপীড়িত সকলে সন্তোষ প্ৰকাশ কৰে।

নলবাৰী : কালি নলবাৰী জিলা প্ৰেছ ক্লাৱত জিলাখনৰ বৰকুৰাৰ সচেতন লোকে বৰকুৰাত নিৰ্মাণ হ’বলগীয়া উৰণীয়া সেঁতু সন্দৰ্ভত এক সংবাদ মেলৰ আয়োজন কৰে। সংবাদ মেলত বৰকুৰাৰ স্থায়ী বাসিন্দাসকলে প্ৰকাশ কৰে যে, উন্নয়ন বৰকুৰাৰ ৰাইজে বিচাৰে কিন্তু আগন্তুক দিনত বৰকুৰাত নিৰ্মাণ হ’বলগীয়া উৰণীয়া সেঁতুৰ ফলত বৃটিছৰ দিনত মুক্তি যোদ্ধাসকলে আশ্ৰয় শিবিৰ হিচাপে নিৰ্মাণ কৰা “বৰকুৰা স্বৰাজ শিৱিৰ কৃষ্টি প্ৰতিষ্ঠান” তথা “বৰকুৰা প্ৰাক প্ৰাথমিক বিদ্যালয়” “অঙ্গনবাড়ী কেন্দ্ৰ” “ঐতিহাসিক বিহু মঞ্চ ধ্বংস হোৱাৰ লগতে স্হায়ী খিলঞ্জীয়া ভূমিপুত্ৰসকলৰ ব্যৱসায়-বাণিজ্য, ঘৰ-বাৰী, কোনো মতে দোকান কৰি পৰিয়ালক পোহ পাল দি জীয়াই থকা বৰকুৰাবাসী ৰাইজৰ ব্যাপক অসুবিধা সন্মুখীন হৈ পানীত হাঁহ নচৰা অৱস্থা হ’ব। বৰকুৰাৰ ৰাইজে আকৌ দোহাৰে যে বৰ্তমান হৰি মন্দিৰৰ সন্মুখত নিৰ্মীয়মান উৰণীয়া সেঁতুৰ লগতে ৩১ নং ৰাষ্ট্ৰীয় ঘাইপথ সংলগ্ন সন্ধাৰ পথচোৱা নিৰ্মীয়মান অৱস্থাত থকাৰ বাবে বৰকুৰাত দিনে দিনে যান-বাহন হেঁচা বৃদ্ধি হোৱাত পৰিলক্ষিত হৈছে। কিন্তু উক্ত দুয়োটা পথ সম্পূৰ্ণ হ’লে বৰকুৰাত কোনো ধৰণৰ যান-বাহনৰ হেঁচা নপৰিব বুলি বৰকুৰাৰ ৰাইজে মন্তব্য কৰে। বৰকুৰাবাসীয়ে প্ৰকাশ কৰে, অতি দুখৰ বিষয় যে যি পৰ্যায়ত অস্বাভাৱিকভাৱে প্ৰশাসনে বৰকুৰাত উৰণীয়া সেঁতুৰ কাম আৰম্ভ কৰিব খুজিছে তাত ৰাইজৰ ভীষণ আপত্তি আছে। সেয়েহে বৰকুৰাবাসীয়ে এই বিষয় সন্দৰ্ভত কেন্দ্ৰীয় ৰেল মন্ত্ৰী, অসম চৰকাৰৰ গড়কাপ্তানি মন্ত্ৰীক লিখিতভাৱে জনাইছিল। তদুপৰি নলবাৰী জিলা উপাযুক্তকো চলিত মাহত লিখিতভাৱে ৰাইজে এই অসুবিধা বিষয়ে জনাইছিল। কিন্তু তাৰ পিছতো চৰকাৰ তথা প্ৰশাসনে কোনো ধৰণৰ ব্যৱস্থা নোলোৱা বাবে কালি বৰকুৰা ৰাইজৰ হৈ বৰকুৰাৰ কেইগৰাকীমান সচেতন লোকে এখন সংবাদ মেলৰ আয়োজন কৰি সংবাদ মাধ্যমৰ দ্বাৰা চৰকাৰ তথা প্ৰশাসনক উৰণীয়া সেঁতু সন্দৰ্ভত বিকল্প ব্যৱস্থা অৱলম্বন কৰিবলৈ আহ্বান জনায়।