দৈনন্দিন বাৰ্তা সেৱাঃ কোৰোনা মহামাৰীৰ ত্ৰাস মাজতে আহিছে এক সুখবৰ। কেন্দ্ৰীয় স্বাস্থ্য মন্ত্ৰণালয়ে জনোৱা অনুসৰি বিশ্বৰ ভিতৰত কোৰোনাত আক্ৰান্ত হৈ আৰোগ্য হোৱা লোকৰ সংখ্যাৰ ক্ষেত্ৰত প্ৰথম স্থানত আছে ভাৰত।
আনহাতে প্ৰতিদিনাই হ্ৰাস পাবলৈ ধৰিছে নতুনকৈ আক্ৰান্ত লোকৰ সংখ্যা। যোৱা ২ মাহতে এই সংখ্যা তিনি গুণ হ্ৰাস পাইছে।
ডুবাই, ৩ নবেম্বৰঃ অষ্ট্ৰেলিয়া ক্ৰিকেট দলৰ প্ৰাক্তন খেলুৱৈ আৰু চেন্নাই চুপাৰ কিংছৰ তাৰকা খেলুৱৈ শ্বেন ৱাটছনে ক্ৰিকেটৰ সকলো ধৰণৰ ফৰ্মেটৰ পৰা অৱসৰ গ্ৰহণ কৰিছে। ২০১৮ চনত আন্তৰ্জাতিক ক্ৰিকেটৰ পৰা অৱসৰ গ্ৰহণ কৰা অষ্ট্ৰেলিয়ান ক্ৰিকেটাৰ গৰাকীয়ে এতিয়া আইপিএলৰ পৰা অবসৰ গ্ৰহণ কৰাৰ সিন্ধান্ত গ্ৰহণ কৰে। আইপিএলৰ ১৩ সংখ্যক চিজনৰ লীগৰ অন্তিম খন খেলত বেটচমেন গৰাকীয়ে কিংছ ইলেভেন পঞ্জাৱৰ বিৰুদ্ধে হোৱা খেল খনত জয়ী হোৱাৰ পিছতে চেন্নাই চুপাৰ কিংছৰ কতৃপক্ষক এই কথা জানিবলৈ দিয়ে।
২০০৮ চনত ৰাজস্থান ৰয়েলছৰ হৈ ইণ্ডিয়ান প্ৰিমিয়াৰ লীগত আৰম্ভণি কৰিছিল শ্বেন ৱাটছনে। প্ৰথম বৰ্ষতে আই পি এলত ট্ৰফী জিকিবলৈ সক্ষম হৈছিল। ২০০৮ চনৰ আই পি এলত ৪৭২ ৰান সংগ্ৰহ আৰু ১৭ উইকেট দখল কৰি ট্ৰফী বিজয়ত বিশেষ ভূমিকা লৈছিল ৱাটছনে। ৭ বছৰ ধৰি ৰাজস্থান ৰয়েলছৰ সৈতে আই পি এলত খেলাৰ পিছত ৰয়েল চেলেঞ্জার্ছ বাংগালোৰলৈ আহিছিল শ্বেন ৱাটছন।
আনহাতে ২০১৮ চনত চেন্নাই চুপাৰ কিংছৰ সৈতে চুক্তিবদ্ধ হয় তাৰকা খেলুৱৈ গৰাকী। উল্লেখনীয় যে, ইণ্ডিয়ান প্ৰিমিয়াৰ লীগ ২০১৮ চনৰ চূড়ান্ত খেলত ৫৭ বলত ১১৭ ৰানৰ সংগ্ৰহ কৰি আই পি এলৰ ট্ৰফী বিজয়ত বিশেষ ভূমিকা গ্ৰহণ কৰিছিল ৱাটছনে। ২০২০ চনৰ আই পি এলত চেন্নাইৰ ১১ খন খেলত ২৯৯ ৰান সংগ্ৰহ কৰে।
অষ্ট্ৰেলিয়াৰ ক্ৰিকেট দলৰ হৈ ২০০৭ আৰু ২০১৫ চনত বিশ্বকাপ জয়ত নিৰ্ণায়ক ভূমিকা লৈছিল শ্বেন ৱাটছনে। খেলুৱৈ গৰাকীয়ে ৫৯ খন টেষ্টত ৱাটছনে ৩৭৩১ ৰান কৰে আৰু ৭৫ টা উইকেট দখল কৰে। ১৯০ খন এদিনীয়াত ৫৭৫৭ ৰান সংগ্ৰহৰ লগতে ১৬৮ টা উইকেট দখল কৰে ৱাটছনে। ৫৮ খন টি-২০ ত ১৪৬২ ৰান আৰু ৪৮ টা উইকেট দখল কৰিবলৈ সক্ষম হৈছিল। আই পি এলত ১৪৫ খন খেল অংশ লৈ ৩৮৭৪ ৰান ৯৩ টা উইকেট দখল কৰিছিল।
দৈনন্দিন বাৰ্তা সেৱাঃ অসমত পুনৰ ৪৬৫ জনৰ দেহত ধৰা পৰিছে কোৰোনা। ৰাজ্যত এই ভাইৰাছত আক্ৰান্ত লোকৰ সংখ্যা ২০৬৯৮২ জনলৈ বৃদ্ধি। আনহাতে সুস্থ হৈছে ৭৮৫ জন লোক।
ৰাজ্যত সুস্থ হোৱা লোকৰ সংখ্যা ১৯৭৫৬৬ জনলৈ বৃদ্ধি পাইছে। বৰ্তমান চিকিৎসাধীন হৈ আছে ৮৪৮১ জন ৰোগী।কোৰানা ভাইৰাছত আক্ৰান্ত হৈ অসমত মৃত্যু হৈছে ৯৩২ জন লোকৰ।
দৈনন্দিন বাৰ্তা সেৱাঃ বিহাৰৰ প্ৰাক্তন মুখ্যমন্ত্ৰী সতীশ প্ৰসাদ সিঙৰ দেহাৱসান। সোমবাৰে দিল্লীত পৰলোকপ্ৰাপ্তি ঘটে মুখ্যমন্ত্ৰী গৰাকীৰ।
১৯৬৮ চনৰ ২৮ জানুৱাৰীৰৰ পৰা ১ ফেব্ৰুৱাৰীলৈ ৫ দিনৰ বাবে মুখ্যমন্ত্ৰী হৈছিল সতীশ প্ৰসাদ সিং।
১৯৮০ চনত বিহাৰৰ খাগৰীয়া আসনৰ পৰা কংগ্রেছ পাৰ্টিৰ সদস্য হিচাপে নিৰ্বাচিত হোৱা প্ৰাক্তন মুখ্যমন্ত্ৰী গৰাকীয়ে ২০১৩ চনৰ ২২ ছেপ্টেম্বৰত বিজেপিত যোগদান কৰিছিল।
মৃত্যুৰ সময়ত তেওঁৰ বয়স আছিল ৮৭ বছৰ।
দৈনন্দিন বাৰ্তা সেৱা, ২ নবেম্বৰঃ মিঞা মিউজিয়ামৰ বিতৰ্ক মাৰ নোযাওতেই এই মিঞা নামৰ লৈ বিতৰ্কত নিজৰ প্ৰতিক্ৰিয়া প্ৰকাশ কৰি ‘‘মই বিলাসীপাৰা পশ্চিম সমষ্টিৰ দুবাৰৰ প্ৰাক্তন বিধায়ক আলী আকবৰ মিঞা। মোক মিঞা বুলি নামাতিব, কথা বেয়া হৈ যাব। মিঞা চাহাব বুলি সম্বোধন কৰিব।’’ মন্তব্য প্ৰকাশ কৰে।
মিঞাৰ অৰ্থ সন্মানীয় বুলি উল্লেখ কৰি অসম গণ পৰিষদৰ প্ৰাক্তন বিধায়ক গৰাকীয়ে কয় যে মিঞা উপাধিৰে অসম বিধানসভালৈ নিৰ্বাচিত একমাত্র বিধায়ক ময়েই। মিঞাক লৈ ইতিকিং নকৰিব। ১৯৯৬ চনতে অসম বিধানসভাত মিঞা বুলি নামাতিবলৈ শাসক–বিৰোধীৰ বিধায়কক সকীয়াই থৈছিল তদানীন্তন বিধায়ক আলী আকবৰ মিঞাই।
অগপ চৰকাৰৰ দিনত মই শাসকীয় বিধায়ক আছিলো, মোক বহুতে ঐ মিঞা অলপ মাত দিবচোন’ বুলি কোৱাত মই কৈছিলো– মোক মিঞা চাহাব বুলি কব এইদৰে মন্তব্য আগবঢ়াই সংখ্যালঘু বিধায়কগৰাকীৰ। আনহাতে শেহতীয়াকৈ মিঞা বিধায়ক নিৰ্বাচিত হ’লে বিধানসভাত সোমাব নিদিম বুলি কোৱা বিজেপি নেতাক সমালোচনা কৰি আলী আকবৰ মিঞাই কয় পাবত গজা বিজেপি নেতাৰ বিৰুদ্ধে আমি সাজু আছো। আমাৰ প্ৰত্যাহ্বান গ্ৰহণ কৰক।
দৈনন্দিন বাৰ্তা সেৱা, ২ নবেম্বৰঃ কোৰোনা মহামাৰীৰ ভয়াবহতাৰ প্ৰতি লক্ষ্য ৰাজ্য চৰকাৰে জাৰি কৰা লকডাউনৰ ব্যৱসায়ীক গোষ্ঠীৰ ওপৰত বিৰুপ প্ৰভাৱ পৰা দেখা গৈছে। কিছু বছৰৰ পূৰ্বে ডিফুত সংঘটিত হোৱা দৰে অনুৰূপ এক ঘটনাই সংঘটিত হৈছে গোসাইগাঁৱত।
কোকৰাঝাৰ জিলাৰ গোসাইগাঁৱত তুলসীবিল বজাৰত পিতৃ-মাতৃসহ তিনি কন্যাই চিপ লৈ আত্মহত্যা কৰা ঘটনাই অঞ্চলবাসীক শোকাহত কৰি তুলিছে। প্ৰাথমিক অনুসন্ধানত আৰক্ষীয়ে জানিবলৈ দিয়া মতে, নিৰ্মল পালৰ লগতে তেওঁৰ পত্নী মল্লিকা পাল, কন্যা দীপা পাল, পূজা পাল আৰু স্নেহা পালে একেলগে আত্মহত্যা কৰে।
শোৱনি কোঠাত দেওবাৰৰ নিশা আত্মহত্যা কৰা ঘটনাৰ সন্দৰ্ভত আৰক্ষীয়ে তদন্ত অব্যাহত ৰাখিছে। উল্লেখযোগ্য যে, নিৰ্মল পালৰ তুলসীবিল বজাৰত এখন গেছৰ দোকান আছে। পিতৃসূত্ৰে লাভ কৰা গেছৰ দোকানখন তেওঁ ভালদৰে চলাব পৰা নাছিল। কোৰোনা সংক্ৰমণৰ সময়ত লকডাউন হোৱাৰ বাৰে ব্যৱসায়ত যথেষ্ট ক্ষতি হৈছিল নিৰ্মল পালৰ।
বুজন পৰিমানৰ ধনৰ ঋণ আছিল নিৰ্মল পালৰ। সেই ধাৰ পৰিশোধ কৰিব নোৱাৰি পত্নী আৰু তিনি কন্যাসহ আত্মহত্যা কৰা বুলি অনুমান কৰা হৈছে। পানৰ জ্যেষ্ঠা কন্যা স্নাতকোত্তৰ, মাজু কন্যা উচ্চতৰ মাধ্যমিক আৰু সৰু কন্যা হাইস্কুলত অধ্যয়নৰত আছিল। ইতিমধ্যে আৰক্ষীয় স্থানীয় লোকৰ সহযোগত তেওঁলোকৰ মৃতদেহ সমূহ উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰিছে।
দৈনন্দিন বাৰ্তা সেৱাঃ কোৰোনা মহামাৰীৰ পৰা সুস্থ হৈ উঠাৰ পিছত দেওবাৰে নিশাক হঠাত পুনৰ অসুস্থ হৈ পৰে জ্যেষ্ঠ ৰাজনীতিবিদগৰাকী। দেওবাৰে নিশা ১১ বজাত মুখ্যমন্ত্ৰী গৰাকীক জি এম চি এইচত ভৰ্তি কৰোৱা হয়।
বৰ্তমান জি এম টি এইচৰ আই.চি.ইউ. ত ৰখা হৈছে গগৈ। বৰ্তমান তৰুণ গগৈৰ স্বাস্থ্য কিছু সুস্থিৰ বুলি জানিব পৰা গৈছে।
দৈনন্দিন বাৰ্তা সেৱা, নগাঁও, ২ নবেম্বৰঃ বিশ্ব হিন্দু পৰিষদ নগাঁও জিলা শাখাৰ সৌজন্যত সোমবাৰে নগাঁৱত বাল্মিকী জয়ন্তী দিৱস অনুষ্ঠিত কৰা হয়। নগাঁও চহৰৰ ভাৰত সেৱাশ্ৰম সংঘৰ প্ৰাঙ্গনত অনুষ্ঠিত বাল্মিকী জয়ন্তী দিৱসৰ বন্তি প্ৰজ্বলন কৰি আৰম্ভনী বাল্মিকী সমাজৰ গৌৰী বাচফৰে।
বিশ্ব হিন্দু পৰিষদৰ ধৰ্ম জাগৰণ প্ৰমুখ ব্ৰজ জ্যোতি শৰ্মাই আঁত ধৰা ধৰ্মালোচনী সভাখনত বিশ্ব হিন্দু পৰিষদৰ নগাঁও জিলা সমিতিৰ সভাপতি দিপেন পাঠক, উপদেষ্টা সুখৰঞ্জন ৰয় , উপ-সভাপতি দেবী প্ৰসাদ চক্ৰৱৰ্তী, জগমহোন শৰ্মা, ৰাষ্ট্ৰীয় স্বয়সেৱক সংঘৰ নগাঁও সংঘ চালক নৱ বৰকটকী, বিশ্ব হিন্দু পৰিষদৰ ধৰ্মচায প্ৰমুগ প্ৰফুল্ল গোস্বামী প্ৰমুখ্যে বিশিষ্ট ব্যক্তি সকল উপস্হিত থাকে।
অনুষ্ঠানতে বাল্মিকী সমাজৰ দহগৰাকী ব্যক্তিক বিশ্ব হিন্দু পৰিষদৰ তৰফৰ পৰা সম্বৰ্ধনা জনোৱা হয়। ধৰ্মালোচনী সভাত কেইবাগৰাকীও বক্তাই বাল্মিকীৰ জীৱন- দৰ্শনৰ ওপৰত আলোকপাত কৰে।
দৈনন্দিন বাৰ্তা সেৱা, নগাঁও, ১ নবেম্বৰঃ আজি নগাঁও জিলা বন বিভাগৰ এটা অভিযানকাৰী দলে আজি সদৰ আঞ্চলিক ৰেঞ্জৰ অধীনৰ গান্ধীবৰি আৰু কটহগুৰি অঞ্চলত অভিযান চলাই দুটাকৈ অবৈধ কাঠ ফলা মিল জব্দ কৰিবলৈ সক্ষম হয়৷ জানিব পৰা মতে, নগাঁও জিলাৰ গান্ধীবৰিৰ অঞ্চলৰ শংকৰ নাথ আৰু কটহগুৰিৰ অঞ্চলৰ দিপাংকৰ ডেকৰজা নামৰ ব্যক্তি দুজনে দীৰ্ঘদিন ধৰি অবৈধ ভাবে দুটাকৈ কাঠ ফলা মিল চলাই আহিছিল।
মিলত একাংশ অসাধু কাঠ ব্যৱসায়ীয়ে অতি মূল্যবান চোৰাং কাঠ ফালি জিলাখনৰ বিভিন্ন স্থানলৈ সৰবৰাহ কৰি আহিছিল। গোপন সূত্ৰৰ লাভ কৰি আজি নগাঁও বনাঞ্চলিক বিষয়া জয়ন্ত গোস্বামীৰ নেতৃত্বত যোৱা দলটোৱে অবৈধ কাঠফলা মিল দুটা উৎখাত কৰাৰ লগতে কাঠমিল চলোৱাত ব্যৱহৃত দুটা ডিজেল জেনেৰেটৰ জব্দ কৰিবলৈ সক্ষম হয়। অভিযান কালত বনাঞ্চলিক বিষয়া জয়ন্ত গোস্বামীক সংগ দিয়ে বনপালক এক প্ৰভাত বৰাৰ লগতে কেইবাগৰাকীও বনকৰ্মীয়ে। আনহাতে আজিৰ অভিযানত অবৈধ কাঠমিলৰ লগত জড়িত কোনো লোকক, গ্ৰেপ্তাৰ কৰিবলৈ সক্ষম হোৱা নাই।
দৈনন্দিন বাৰ্তা সেৱাঃ অসমত পুনৰ ৩৩৬ জনৰ দেহত ধৰা পৰিছে কোৰোনা। ৰাজ্যত এই ভাইৰাছত আক্ৰান্ত লোকৰ সংখ্যা ২০৬৩৫১ জনলৈ বৃদ্ধি। আনহাতে সুস্থ হৈছে ১৩৮৬ জন লোক।
ৰাজ্যত সুস্থ হোৱা লোকৰ সংখ্যা ১৯৬০৫১ জনলৈ বৃদ্ধি পাইছে। বৰ্তমান চিকিৎসাধীন হৈ আছে ৯৩৬৭ জন ৰোগী।কোৰানা ভাইৰাছত আক্ৰান্ত হৈ অসমত মৃত্যু হৈছে ৯৩০ জন লোকৰ।
