নগাঁও :

নগাঁও জিলাত কোভিড-১৯ ত আক্ৰান্তৰ সংখ্যা চাৰি শতাধিক অতিক্রম কৰাৰ সময়তে নগাঁৱৰ দুজন স্বাস্থ্য কৰ্মীৰ দেহত একেদিনাই কোভিড-১৯ চিনাক্ত হোৱাত জিলাখনৰ জনসাধাৰণ  শংকিত হৈ পৰিছে। বিশেষকৈ কোভিড-১৯ আক্রান্ত স্বাস্থ্যকৰ্মী দুগৰাকীৰ কোনো ধৰণৰ ট্ৰেভেল হিষ্ট্ৰি নথকাত জিলাখনত কোভিডৰ  গন সংক্ৰমণৰ আশাংকা কৰা হৈছে।  কোভিড-১৯ পজিটিভ হোৱা এজন ৰোগী হৈছে- চৰকাৰৰ আয়ুস্মান ভাৰত আঁচনিত কৰ্মৰত আৰোগ্য মিত্ৰ নগাঁৱৰ চকলাঘাট চাউলখোৱাৰ কংকন মূদৈ (৩৫) । যুৱকজন ৩১ মে’ লৈকে নগাঁও চহৰৰ ধিং গেটৰ ডিউ কেয়াৰ নামৰ নাৰ্চিং হ’ম খনৰ আয়ুস্মান শাখাত কৰ্মৰত আছিল। পৰৱর্তী সময়ত তেওঁ হ’ম কোৱাৰেণ্টাইনত থকা বুলি জানিব পৰা গৈছে । যকৃতৰ ৰোগত আক্রান্ত যুৱকজনৰ শেহতীয়া ভাবে জ্বৰ হোৱাত নগাঁও চহৰৰ শংকৰ মন্দিৰ পথৰ এখন ফাৰ্মাচীত চিকিৎসকক দেখুৱাই ঘৰলৈ উভটি যায়। আনহাতে ১৫ জুনত নগাঁও ভোগেশ্বৰী ফুকননী অসামৰিক চিকিৎসালয়ত  কংকন মূদৈৰ স্বোৱাব পৰীক্ষাৰ বাবে নমুনা সংগ্ৰহ কৰা হয় । কালি যুৱকজনৰ অসুস্থতা বৃদ্ধি পোৱাত পৰিয়ালৰ লোকে  নগাঁও চহৰৰ হয়বৰগাঁৱৰ ব্যক্তিগত খণ্ডৰ চিকিৎসালয় জি ডি হস্পিতালত ভৰ্তি কৰায়। ইপিনে যুৱকজনৰ অসুস্থতা বাঢ়ি যোৱাত কালিয়েই নাৰ্চিংহ’ম খনৰ আই চি ইউত ভৰ্তি কৰোৱা হয়।  আজি  কংকন মূদৈৰ কোভিড পৰীক্ষাৰ ফলাফল আহে আৰু ফলাফল পজিটিভ হয় । এই খৱৰ লাভ কৰাৰ পিছতে যুৱকজন চিকিৎসাধীন হৈ থকা জি ডি নাৰ্চিং হ’মৰ চিকিৎসক, কৰ্মচাৰী আৰু ৰোগীৰ মাজত হাঁহাকাৰ লাগে। ইতিমধ্যে প্ৰশাসনে নাৰ্চিং হ’মখনৰ আই চি ইউ কক্ষটোত আন ৰোগীৰ প্ৰৱেশ নিষিদ্ধ কৰে। আনহাতে কোভিড-১৯ চিনাক্ত হোৱা নগাঁৱৰ আনগৰাকী স্বাস্থ্য কৰ্মী হৈছে নগাঁও ভোগেশ্বৰী ফুকননী অসামৰিক চিকিৎসালয়ত অস্থায়ী ভিত্তিত কৰ্মৰত গীতাঞ্জলি দেউৰী। গীতাঞ্জলিৰ ঘৰ মৰিগাঁও জিলাত। নগাঁও চহৰৰ দাঁতি কাষৰীয়া উজৰাগাঁও মডেল হস্পিতালত কোভিড চিকিৎসালয়ত আৰম্ভণিৰ পৰা কৰ্তব্য পালন কৰা চিকিৎসা কৰ্মী গৰাকী এসপ্তাহ কোৱাৰেণ্টাইনত  আছিল। স্বাস্থ্য কৰ্মী গৰাকীৰ শেহতীয়া ভাবে জ্বৰ হোৱাত তেওঁৰ ‘স্বোৱাব’ পৰীক্ষা কৰা হয়। এই পৰীক্ষাত তেওঁৰ দেহত কোভিড-১৯ চিনাক্ত হয়। আজি স্বাস্থ্য কৰ্মী গৰাকীক নগাঁৱৰ কোভিড চিকিৎসালয়ত চিকিৎসাৰ বাবে ভৰ্তি কৰোৱা হৈছে। ইপিনে এই স্বাস্থ্য কৰ্মী দুগৰাকী কাৰ কাৰ সংস্পৰ্শলৈ আহিছিল তাক লৈ উৎকন্ঠাৰ সৃষ্টি হৈছে। বিশেষকৈ কোভিড আক্ৰান্ত কংকন মূদৈৰ সংস্পৰ্শলৈ অহা চিকিৎসকৰ পৰা স্বাস্হ্যকৰ্মীলৈকে তালিকা দীঘলীয়া। স্বাস্থ্য বিভাগৰ নিয়ম অনুসৰি ৰোগীজনৰ সংস্পৰ্শলৈ অহা বহুলোক কোৱাৰেন্টাইনত থাকিব লাগিব। ইপিনে বিনা নিযুক্তি পত্ৰ তথা নুন্যতম বেতনৰে কৰ্তব্যত নিয়োজিত আয়ুস্মান ভাৰত অভিযানৰ আৰোগ্য মিত্ৰ সকলৰ মাজৰে কংকন মুদৈ কোভিদ -১৯ ত আক্ৰান্ত হোৱাৰ লগে লগে তেওঁৰ সৈতে একলগে কৰ্মৰত  আৰোগ্য মিত্ৰৰ মাজত প্ৰতিক্ৰিয়াৰ সৃষ্টি হৈছে ।ইতিমধ্যে কংকন মূদৈৰ কৰোনা পজিটিভ খবৰ বিয়পি পৰাৰ লগে লগে চকলাঘাট চাউলখোৱাৰ অঞ্চলৰ ৰাইজৰ মাজত তীব্র চাঞ্চল্যৰ সৃষ্টি হৈছে। জিলা প্ৰশাসনে কংকন মূদৈৰ বাসগৃহ থকা চাউলখোৱা অঞ্চলটো কন্টেইমেন জ’ন ঘোষণা কৰিছে।লগতে নগাঁও জি ডি হস্পিটাল,ভাস্কৰ লেৱ,পেনেছিয়া নামৰ ক্লিনিক খনৰ কাম কাজ সাময়িক ভাবে স্হগিত ৰখাৰ নিৰ্দেশ জাৰি কৰিছে। একেদৰে যোৱা ১৪ জুনত ডেৰাদুনৰ পৰা বিমানেৰে অসমলৈ ঘূৰি অহা চকলাঘাট খোৰামোচৰ   সামৰিক বাহিনীত কৰ্মৰত বিকি বৰা নামৰ ৩২ বছৰীয়া জোৱানজনৰো ক’ৰ’না পজিটিভ বুলি ফলাফল আহিছে ৷ জানিবপৰা মতে তেওঁ কোৱাৰেন্টাইনত আছিল ৷ নগাঁও জিলাত দ্ৰুতগতিত বৃদ্ধি পাইছে কৰ’নাত আক্ৰান্তৰ সংখ্যা। বহিঃৰাজ্যত আৱদ্ধ নগাঁৱৰ লোকসকলৰ নগাঁৱলৈ আগমন ঘটাৰ পিছৰে পৰাই জিলাখনত ক্ৰমশঃ কৰ’নাত আক্ৰান্তৰ সংখ্যা বৃদ্ধি পাবলৈ ধৰিছে। কালি নিশা আৰু আজি দিনটোৰ ভিতৰত নতুনকৈ ১০ জন লোক কোভিড-১৯ ত আক্ৰান্ত হৈছে। ইয়াৰে যোৱা নিশা ৪ জন আৰু আজি ৬ আক্রান্ত হোৱাটো নিশ্চিত কৰিছে স্বাস্থ্য বিভাগে। ইয়াকে লৈ জিলাখনত ক’ভিড আক্ৰান্তৰ সংখ্যা ৪০৯ জনলৈ বৃদ্ধি পায়।

কলিয়াবৰ :

শুকুৰবাৰে বিয়লি স্থানীয় যুৱকৰ প্ৰতিবাদত উত্তেজিত হৈ পৰে জখলাবন্ধাৰ ৰাজপথ ।জখলাবন্ধাৰ ৱঙ্কটেশ্বৰ প্ৰাথমিক বিদ‍্যালয়ৰ সমীপৰ চৰকাৰী মাটি বেদখল মুক্ত কৰাক লৈ তীব্ৰ উত্তেজনাৰ সৃষ্টি। ৩৭ নং ৰাষ্ট্ৰীয় পথ অৱৰোধ প্ৰতিবাদী যুৱকৰ। জখলাবন্ধাৰ সমীপৰ চিকনী গড়কাপ্তানী পথৰ নিবাসী শিক্ষক জনৈক যশোমন্ত চৌহানৰ অভব‍্য আচৰণত তীব্ৰ প্ৰতিক্ৰিয়া স্থানীয় যুৱকৰ। অভিযোগ মতে, শিক্ষক গৰাকীয়ে অবৈধভাবে দখল কৰা তিনি কথা মাটি মুকলি কৰিবলৈ যোৱাৰ সময়তে যুৱকসকলৰ মাজত তীব্ৰ বাক-বিতণ্ডা হয়। প্ৰথমে শিক্ষক যশোমন্ত চৌহানৰ পিতৃৰ লগত যুৱক দলটোৰ কথাৰ কটা-কটি হোৱাৰ পিচত পুত্ৰই ৰুদ্ৰ মুৰ্তি ধাৰণ কৰে। অভব‍্য গালি-গালাজতে ক্ষান্ত নাথাকি শিক্ষক চৌহানে দা লৈ যুৱক দলটো সেই স্থানৰ পৰা খেদি পঠিয়াই। লগতে যুৱকসকলে সেই স্থানত পুথিভঁৰাল গৃহ নিৰ্মাণৰ বাবে যোগাৰ কৰি থোৱা বালি-টিং অনান‍্য সামগ্ৰী লণ্ড-ভণ্ড কৰে। স্থানীয় যুৱকসকলে জনোৱা মতে আন কিছু সামগ্ৰী যশোযন্ত চৌহানে নিজ ঘৰলৈ লৈ যায়। যুৱকসকলে এটা পুথিভঁৰাল আৰু সমপীৰ ৱঙ্কটেশ্বৰ প্ৰাথমিক বিদ‍্যালয় গৃহ নিৰ্মাণ কৰিবলৈ আগ-ভাগ লোৱা যুৱকসকলক কৰা আভব‍্য আচৰণৰ প্ৰতিবাদত যুৱকসকলে সাতত্ৰিশ নং ৰাষ্ট্ৰীয় পথ অৱৰোধ কৰে। স্থানীয় পঞ্চায়ত প্ৰতিনিধিয়ে বিষয়টো শীঘ্ৰে নিষ্পত্তি কৰাৰ আশ্বাস দিয়াৰ ফলত পৰাস্থিতি শাম কাটে। তাৰ পিছতেই দ্বাৰ বাগৰি জিলা পৰিষদৰ সদস‍্য জিতেনজিৎ গড়, জখলাবন্ধা গাঁও পঞ্চায়তৰ সভানেত্ৰী তৃষাৰাণী শইকীয়া আৰু গাঁও সভাৰ সদস‍্য বিজয় কুমাৰ চৌহানৰে আলোচনাত মিলিত হৈ যশোমন্ত চৌহানে অবৈধভাৱে দখল কৰা ভূমি শীঘ্ৰেই চৰকাৰী পক্ষৰ প্ৰত‍্যক্ষ সহযোগত দখলমুক্ত কৰা হ’ব বুলি যুৱকসকলক প্ৰতিশ্ৰুতি দিয়ে। স্থানীয় ৱঙ্কটেশ্বৰ প্ৰাথমিক বিদ‍্যালয়ৰ বাঢ়ি অহা ছাত্ৰ-ছাত্ৰীৰ প্ৰতি লক্ষ‍্য ৰখি পূৰ্ৱতে চৰকাৰী ভূমিত বিদ‍্যালয় গৃহ স্থাপনৰ যো-জা কৰিছিল যদিও সেই একে গৰাকী ব‍্যক্তিয়ে বিধি-পথালি দি আহিছিল।

কাকপথাৰ: সমগ্ৰ দেশৰ লগতে আজি কাকপথাৰ ডিৰাকতো ডিৰাক মণ্ডল কংগ্ৰেছ সমিতি উদ্যোগত প্ৰাক্তন প্ৰধান মন্ত্ৰীৰ পুত্ৰ, যুৱ নেতা তথা কেৰেলাৰ ৱাইনাড লোক সভা সমষ্টিৰ সাংসদ ৰাহুল গান্ধী জন্ম দিনৰ লগত সংগতি ৰাখি “অংগীকাৰ দিৱস” পালন কৰে । ডিৰাক মণ্ডল কংগ্ৰেছৰ সভাপতি সুৰেণ নেওঁগৰ সভাপতিত্বত অনুষ্ঠিত অংগীকাৰ দিৱসত  লাডাখত শ্বহীদ হোৱা বীৰ সৈনিক সকল  আৰু বাঘজান ৫ নং গেছ কূপত সংঘটিত অগ্নিকাণ্ডৰ পৰা নিজকে প্ৰাণ ৰক্ষা কৰিবলৈ গৈ মৃত্যু মুখত পৰা  অইল ইণ্ডিয়া লিমিটেডৰ অগ্নিনিৰ্বাপক বাহিনীৰ কৰ্মচাৰী দুৰ্লভ গগৈ, তিক্ষেশ্বৰ গোহাঁইৰ প্ৰতি শ্ৰাদ্ধ জনাই তেখেতলোকৰ আত্মাৰ সদগতি অৰ্থে এক মিনিট সময়  মৌন প্ৰাৰ্থনা কৰে। কাৰ্যসূচী অনুসৰি ইয়াৰ পিছত “অংগীকাৰ দিৱস” ত উপস্থিত জনসাধাৰণ মাজত  মাস্ক আৰু চাবোন বিতৰণ কৰে । ছৈখোৱা ব্লক কংগ্ৰেছ কমিটি সভাপতি জীৱন সোনোৱালে উপস্থিত ৰাইজক উদ্দেশ্যি কংগ্ৰেছ দলৰ ভৱিষ্যত পৰিকল্পনা, লক্ষ্য উদ্দেশ্যৰ বিষয়ে  অৱগত কৰে । দিৱসটিত উপস্থিত থাকে তিনিচুকীয়া জিলা কংগ্ৰেছ কমিটিৰ সম্পাদক অমৃত গগৈয়ে, ছৈখোৱা মহিলা ব্লক কংগ্ৰেছ কমিটিৰ সভানেত্ৰী কল্পনা হাতীমূৰীয়া ফুকন, ডিৰাক গাঁও পঞ্চায়তৰ প্ৰাক্তন সভাপতি নোমাল ডেকা মৰাণ । শেষত দিৱসটিত উপস্থিত থকা  দলীয় সকলো নেতা, বিষয় ববীয়া, কৰ্মী  মিলি এক অংগীকাৰ নামা পাঠ কৰি অনুষ্ঠানটি সামৰণি মাৰে । অংগীকাৰ নামা পাঠ কৰোৱাই ডিৰাক মণ্ডল কংগ্ৰেছৰ সভাপতি সুৰেণ ফুকনে ।

নাজিৰা : বিধ্বস্ত  গেলেকী নাজিৰা মূল পথটি নিৰ্মাণৰ দাবীত আজি নাজিৰা মহকুমা ছাত্ৰ সন্থা, গেলেকী আঞ্চলিক ছাত্ৰ সন্থাই পথটি অৱৰোধ কৰি প্ৰতিবাদ সাব্যস্ত কৰে। বছৰ বছৰ ধৰি নিৰ্মাণ তথা মেৰামতি নকৰাকৈ থকা নাজিৰা-গেলেকী মূল পথত গেলেকী চাৰিআলিৰ পৰা হাতিপতী পৰ্যন্ত পথটিৰ বিভিন্ন স্হানত পুখুৰী সদৄশ গাঁতৰ সৃষ্টি হৈ একপ্ৰকাৰ যাতায়তৰ অনুপযোগী হৈ পৰিছ। যাৰ বাবে আজি নাজিৰা মহকুমা   ছাত্ৰ সন্থা, গেলেকী আঞ্চলিক ছাত্ৰ সন্থাই গেলেকী চাৰি আলিত পথটি অৱৰোধ কৰি প্ৰতিবাদী কাৰ্যসূচী গ্ৰহণ কৰে। প্ৰদিবাদী আছু কৰ্মীসকলে গড়কাপ্তানী মন্ত্ৰী ডঃ হিমন্ত বিশ্ব শৰ্মা, ৰাজ্যিক গড়কাপ্তানী মন্ত্ৰী যোগেন মহন, নাজিৰা সমষ্টিৰ বিধায়ক তথা বিৰোধী দলপতি দেৱব্ৰত শইকীয়াৰ প্রতিকৃতি দাহ কাৰ্যসূচী ৰূপায়ণ কৰে। প্ৰতিবাদী আছুকৰ্মীসকলে বি জে পি চৰকাৰ মূৰ্দাবাদ, বি জে পি চৰকাৰ লেই লেই ছেই ছেই আদি বিভিন্ন শ্ল’গানেৰে প্ৰতিবাদ সাব্যস্ত কৰে। এই প্ৰতিবাদী কাৰ্যসূচীত উপস্থিত থাকে সদৌ শিৱসাগৰ জিলা ছাত্ৰ সন্থাৰ সভাপতি অসীম দত্ত, নাজিৰা মহকুমা ছাত্ৰ সন্থাৰ সভাপতি মানৱ হাজৰিকা, সাধাৰণ সম্পাদক দেৱজিত গগৈ, সদৌ শিৱসাগৰ জিলা ছাত্ৰ সন্থাৰ সহকাৰী সাধাৰণ সম্পাদক পৰাগ দত্ত, সাংগঠনিক সম্পাদক ধ্ৰুৱ জ্যোতি কলিতা, গেলেকী আঞ্চলিক ছাত্ৰ সন্থাৰ সভাপতি প্ৰাঞ্জল গগৈ, সাধাৰণ সম্পাদক মানস জ্যোতি শইকীয়া, আটছা গেলেকী শাখাৰ সভাপতি সঞ্জয় গুৱালা, সম্পাদক নন্দকিশোৰ গোৱালা। উল্লেখ্য যে পথটি নিৰ্মাণৰ দাবীত বিগত বৰ্ষৰ শেষভাগত গেলেকী বিভিন্ন দল সংগঠনৰ সহযোগ স্হানীয় প্ৰায় ৫ সহস্ৰাধিক ৰাইজে পথটি অৱৰোধ কৰি প্ৰতিবদ সাব্যস্ত কৰাৰ পাছত প্ৰশাসনে মাৰ্চৰ পূৰ্বেই পথটি নিৰ্মাণ সম্পূৰ্ণ কৰাৰ প্ৰতিশ্ৰুতি দিছিল।