ৰহা

লোক সংস্কৃতিৰ বিশিষ্ট গবেষক , ৰহাৰ এগৰাকী জেষ্ঠ নাগৰিক , অৱসৰপ্ৰাপ্ত শিক্ষাবিদ , ৰহা নগৰৰ ১নং ৱাৰ্ডৰ গড়মাৰি নিবাসী চাও লোকেশ্বৰ গগৈ চিকিৎসাধীন । যোৱা কালি লোক সংস্কৃতিৰ গবেষক গৰাকীৰ শাৰীৰিক অসুস্হতাৰ বাবে গুৱাহাটীৰ ছয়মাইলৰ জি. এন. আৰ . চি.ত ভৰ্তি কৰা হৈছে । ৰহাৰ বিভিন্ন দল,সংগঠনে বিশিষ্ট গবেষক গৰাকীৰ আশু আৰোগ্য কামনা কৰিছে ।

কৰিমগঞ্জ

কৰিমগঞ্জৰ বাৰইগ্ৰাম এলেকাৰ ইলাশপুৰ গাঁওত আজি এক চাঞ্চল্যকৰ ঘটনা সংঘটিত হৈছে । সন্তানক বিষ খোৱাই নিজেও  আত্মহত্যা কৰিলে এগৰাকী পিতৃয়ে  । পিতৃ মঞ্জুৰ আহমেদে পুত্ৰক বিষপান কৰাই নিজেও বিষ পান কৰিছিল । এই ঘটনাৰ পিছত  পৰিয়ালৰ লোকে পিতা পুত্ৰক লৈ যোৱা হৈছিল নিলামবজাৰ প্ৰথমিক স্বাস্থ্য কেন্দ্ৰত । স্বাস্থ্য কেন্দ্ৰত যোৱাৰ পিছত তাত থকা  কৰ্তব্যৰত চিকিৎসকে  পিতা পুত্ৰক মৃত বুলি ঘোষনা কৰে । অত্যন্ত নম্ৰ স্বভাবৰ যুৱক মঞ্জুৰ আহমেদ এটা সময়ত মুম্বাইত আজমল পাৰফিউম কোম্পানীত কৰ্মৰত আছিল । বিগত কিছু মাহৰ পৰাই ঘৰত কৰ্মহীন আছিল যুৱকজন । আনহাতে  ক’ৰোনাৰ ভয়াবহ সংক্ৰমনৰ ফলত কিছুদিনৰ পৰাই হতাশ হৈ পৰিছিল মঞ্জুৰ আহমেদ ।হতাশাত ভুগি থকা বাবে আত্মহত্যাৰ পথ বাচি লোৱা বুলি এলেকাৰ লোকে সন্দেহ প্ৰকাশ কৰিছে। । আচলতে কি কাৰনত এগৰাকী নম্ৰ স্বভাবৰ যুৱকে নিজৰ ছমহীয়া সন্তানক লৈ আত্মহত্যাৰ হত্যাৰ দৰে পথ বাছি লৈছে এয়া এতিয়াও ৰহস্যৰ আবৰ্তত । আৰক্ষীৰ উচিত তদন্তৰ অন্তত হয়তো পোহৰলৈ আহিব আত্মহত্যাৰ মুল ৰহস্য।

সোণতলী

দক্ষিণ কামৰূপৰ ছয়গাঁও সমষ্টিৰ অন্তৰ্গত তথা গৰৈমাৰী উন্নয়ন খণ্ডৰ অধীনস্থ দুখনকৈ গাওঁ পঞ্চায়তৰ পঞ্চায়ত সভানেত্ৰীক দলৰ পৰা বহিস্কাৰ কৰা হয়। উল্লেখ্য যে ভাৰতীয় জাতীয় কংগ্ৰেছ দলৰ কামৰূপ জিলা কংগ্ৰেছ কমিটীৰ নিৰ্দেশমৰ্মে গৰৈমাৰী ব্লক কংগ্ৰেছ কমিটিয়ে গৰৈমাৰী উন্নয়ন খণ্ডৰ অধীনস্থ ১২ নম্বৰ মাজোৰটোপ গাঁও পঞ্চায়তৰ সভানেত্ৰী উম্মেল খায়েৰ আৰু ৪ নং টুক্ৰাপাৰা গাওঁ পঞ্চায়তৰ সভানেত্ৰী হালিমা আহমেদক কংগ্ৰেছ দলৰ পৰা বহিস্কাৰ কৰে। স্মৰ্তব্য যে সভানেত্ৰী দুগৰাকীয়ে দল বিৰোধী কাৰ্যকলাপৰ লগতে উন্নয়ন মূলক কামৰ ক্ষেত্ৰত দুৰ্নীতি কৰাৰ অভিযোগত প্ৰাথমিক সদস্য পদৰ পৰাও বহিস্কাৰ কৰা হৈছে।ইয়াৰোপৰি সভানেত্ৰী দুগৰাকীয়ে বিৰোধী দলৰ লগত গোপন মিতিৰালি কৰাৰ অভিযোগত বহিস্কাৰ কৰা হয়।উল্লেখ্য যে যোৱা ৩ জুনত সভানেত্ৰী দুগৰাকীক বহিস্কাৰ কৰি ছয়গাঁও সমষ্টিৰ বিধায়ক তথা অসম প্ৰদেশ কংগ্ৰেছ কমিটীৰ সাধাৰণ সম্পাদকৰ লগতে কামৰূপ জিলা কংগ্ৰেছ কমিটীৰ সভাপতিলৈ প্ৰতিলিপি প্ৰেৰণ কৰে।

নগাঁও

আজি অসম মানৱ অধিকাৰ আয়োগৰ অধ্যক্ষ ন্যায়াধীশ টি, ভায়োহাই, সদস্য এন, কে, বৰা আৰু ডি, কে, শইকীয়া আহি নগাঁওত উপস্থিত হয়। তেওঁলোকে প্ৰথমে নগাঁওৰ অৱৰ্ত ভৱনত উপস্থিত হৈ জিলা প্ৰশাসনৰ লগত এক বৈঠকত মিলিত হয়। এই বৈঠকত জিলা উপায়ুক্ত যাদৱ শইকীয়া, অতিৰিক্ত উপায়ুক্ত  জয়ন্ত বৰা, হেমন্ত ভূঞাৰ লগতে বহুকেইগৰাকী বিষয়া উপস্থিত থাকে।ইয়াৰ পাছতে তেওঁলোকে নগাঁও জিলা কাৰাগাৰ আৰু জিলা প্ৰশাসনে স্থাপন কৰা দুটাকৈ কভিড কেয়াৰ চেণ্টাৰ পৰিদৰ্শন কৰে।  নগাঁওৰ ডচন স্কুলত স্থাপন কৰা কভিড কেয়াৰ চেণ্টাৰ আৰু ৰহা কলেজত স্থাপন কৰা কভিড কেয়াৰ চেণ্টাৰটো পৰিদৰ্শন কৰে আৰু এই চেণ্টাৰ সমূহত থকা লোক সকলৰ বুজ লয়।অসম মানৱ অধিকাৰ আয়োগৰ অধ্যক্ষ টি. ভিফেই ৰ নেতৃত্বত অহা এটা দলটোৱে আজি নগাঁও জিলাৰ কেইবাটাও কোৱাৰেণ্টাইন কেম্পলৈ গৈ পৰ্যাপ্ত সা-সুবিধা আছে নে নাই তাৰ বুজ লোৱাৰ লগতে  কাৰাগাৰত কৰোনা মহামাৰীৰ ভয়াৱতাৰ সময়ত কয়দী আৰু হাজোতী সকলে প্ৰয়োজনীয় সা-সুবিধা ঠিকমতে লাভ কৰিছে নে নাই সেই কথা জানিবলৈ নগাঁও কেন্দ্ৰীয় কাৰাগাৰ পৰিদৰ্শন কৰে ৷ মানৱ অধিকাৰ আয়োগৰ অধ্যক্ষ গৰাকীয়ে জেলৰ ভিতৰত চি চি টিভিৰ কেমেৰাৰ ব্যৱস্থা কৰা,সুৰক্ষাৰ ব্যৱস্থা কৰা আৰু প্ৰতিখন জেলতে এখনকৈ এম্বুলেন্সৰ ব্যৱস্থা কৰিব লাগে বুলিও কয়।ইপিনে মানৱ অধিকাৰ আয়োগৰ সদস্য দেৱ কুমাৰ বৰাই সাংবাদিকৰ আগত কয় যে-অসমৰ কাৰাগাৰত পুৰণি কয়দীয়ে নিৰ্যাতন চলাই কাৰাগাৰলৈ যোৱা নতুন হাজোতী – কয়দীক ৷আনকি যৌন নিৰ্যাতনৰ দৰে ঘটনাও সংঘটিত হয়। মানৱ অধিকাৰ আয়োগৰ সদস্যজনৰ এই অভিযোগ নগাঁও কেন্দ্ৰীয় কাৰাগাৰৰ অধীক্ষক জনে অস্বীকাৰ কৰে।

বটদ্ৰৱা

যিসময়ত আৰক্ষীয়ে লকডাউন মাজত কৰ’ণাৰ বিৰুদ্ধে প্ৰাণে পনে যুঁজি জনসাধাৰণৰ কাষত থাকি কৰ’ণা যুঁজৰ অক্লান্ত সেনানী হিচাপে সেৱাৰ মানসিকতা অৱ্যাহত ৰাখিছিল সেই সময়ত নগাওঁ জিলাৰ জাজৰি উচ্চতৰ মাধ্যমিক বিদ্যালয়ত অৱস্থিত কোৱাৰাইন্টাইন কেন্দ্ৰৰ সন্মুখত অসম আৰক্ষীয়ে তেওঁলোকৰ নিজৰে এটি অংগ স্বৰূপ সংগঠন   গাঁওৰক্ষী বাহিনীৰ এগৰাকী সভাপতিক মাৰপিট কৰা ঘটনাক কেন্দ্ৰ কৰি বটদ্ৰৱাৰ জাজৰি থানাত আজি এক উত্তপ্ত পৰিস্থিতিৰ সৃষ্টি হয়। জাজৰি আৰক্ষীৰ গুণ্ডাগিৰিৰ বিৰুদ্ধে স্থানীয় শ শ ৰাইজ ওলাই আহি আজি ঘেৰাও কৰিলে জাজৰি  আৰক্ষী থানা। গুণ্ডা গিৰি কৰা আৰক্ষীৰ বিৰুদ্ধে শ শ ৰাইজে সমস্বৰে চিঞৰিলে জাজৰি আৰক্ষী লেই লেই চেই চেই / জাজৰি আৰক্ষীৰ অত্যাচাৰী শাসন বন্ধ কৰক/ আৰক্ষীৰ দালালগিৰি বন্ধ কৰক……ইত্যাদি ধ্বনিৰে আজি দুপৰীয়া সময়ত  ওলাই  আহিল জাজৰি অঞ্চলৰ শ শ পুৰুষ মহিলা। ঘটণাৰ বিৱৰণি অনুসৰি জাজৰি ধলপুৰীয়া গাঁওৰক্ষী বাহিনীৰ সভাপতি তথা জাজৰি ব্যৱসায় সমিতিৰ  সভাপতি আৰু জাজৰি আৰক্ষী থানা সমিতিৰ সহকাৰী সম্পাদকৰ দায়িত্বত থকা  ফণীধৰ বৰাক যোৱা ২ জুন তাৰিখ মঙ্গলবাৰৰ নিশা জাজৰি আৰক্ষীৰ সুৰামত্ত অৱস্থাত কৰ্তব্য পালন কৰি থকা দুজন উদণ্ড প্ৰকৃতিৰ  কনিষ্টবল  ক্ৰমে পৰেশ শৰ্মা  আৰু আতিকুৰ ৰহমানে জাজৰি উচ্চতৰ মাধ্যমিক বিদ্যালয়ত থকা কোৱাৰাইন্টাইন কেন্দ্ৰৰ সন্মুখৰ পৰা আৰক্ষীলৈ টৰ্ছ লাইতৰ পোহৰ নিক্ষেপৰ অপৰাধত   গুৰুলা গুৰুলকৈ মাৰপিট কৰি চোচৰাই আনিছিল থানা চৌহদলৈ। থানা চৌহদলৈ আনি অতি বৰ্বৰতাৰে অত্যাচাৰ চলাইছিল জাজৰি আৰক্ষীয়ে ।বৰ্তমান সংকটজনক অৱস্থাত ফনীধৰ বৰা নগাঁৱৰ এখন ব্যক্তিগত নাৰ্ছিং হোমত আই চি ইউত মৃত্যুৰ সৈতে যুঁজি আছে। তেওঁৰ পেটৰ নাৰী পৰ্য্যন্ত চিঙি যোৱাকৈ অতি নিদাৰুণ ভাৱে অমানুসিক নিৰ্য্যাতন চলাইছিল বুলি জাজৰিৰ স্থানীয় ৰাইজৰ অভিযোগত প্ৰকাশ । আজি  ফণীধৰ বৰাৰ ওপৰত জাজৰি আৰক্ষীৰ দানৱীয় অত্যাচাৰক কেন্দ্ৰ কৰি এক উতপ্ত পৰিস্থিতিৰ সৃষ্টি হয় । উল্লেখ্য যে অমানৱীয় ভাৱে নিৰ্যাতন চলাই এজন নিৰ্দোষী লোকক তিল তিল কৈ মৃত্যুৰ মুখলৈ ঠেলি দিয়া ঘটণাৰ লগত   জাজৰিৰ দুজন স্থানীয় যুৱক উৎপল শইকীয়া আৰু নেকিব আহমেদ জড়িত থকাৰ কথাও অভিযোগত পোহৰলৈ আহিছে।  লকডাউনৰ সময়ত জাজৰি আৰক্ষীয়ে অঞ্চলটোৰ সৰ্বসাধাৰণ ৰাইজক সহায় কৰাৰ পৰিবৰ্তে সাধাৰণ কথাতে আতিকুৰ ৰহমান আৰু পৰেশ শৰ্মাই সৰ্বসাধাৰণক হাৰাশাস্তি কৰি ধন ঘটি অহাৰ বিষয়েও উপস্থিত ৰাইজৰ অভিযোগত প্ৰকাশ পাইছে। আনহাতে সাধাৰণ ৰাইজৰ ওচৰত বীৰত্ব প্ৰদৰ্শন কৰা আৰক্ষী জোৱান পৰেশ শৰ্মা আৰু আতিকুৰ ৰহমানৰ উন্মাদ আচৰণৰ বিষয়ে বিভিন্ন সময়ত আৰক্ষীৰ শীৰ্ষ বিষয়া সকলক জনাই থকাৰ পিছতো কোনো ব্যৱস্থা গ্ৰহন কৰা নাই বুলি জানিব পৰা গৈছে। জাজৰি অঞ্চলত সংঘটিত অপৰাধজনিত কাৰ্য্যকলাপ নিয়ন্ত্ৰণত চূড়ান্তভাৱে ব্যৰ্থতা প্ৰদৰ্শন কৰি অহা জাজৰি আৰক্ষীৰ ভাৰপ্ৰাপ্ত বিষয়া মলয় আচাৰ্য্যৰ বিতৰ্কিত আৰু নিৰ্লিপ্ত ভূমিকাই অঞ্চলটোৰ শান্তি শৃঙ্খলা বিঘ্নিত কৰাৰ লগতে অঞ্চলটোৰ সাধাৰণ জীৱন প্ৰক্ৰিয়াত ব্যাঘাট সৃষ্টি হোৱা বুলি প্ৰতিবাদী জনতাই জনাইছে।   প্ৰকাশ থাকে যে এই বাতৰি লিখাৰ সময়লৈ জাজৰিত চেপা উত্তেজনা বিৰাজ কৰিছে। ফণীধৰ বৰাৰ দৰে নিৰপৰাধী গাওঁৰক্ষী বাহিনীৰ লোকক দোষী সজাই ঘৃননীয় অত্যাচাৰ চলোৱা দোষী আৰক্ষীৰ বিৰুদ্ধে দৃষ্টান্ত মূলক শাস্তি গ্ৰহনৰ ব্যৱস্থা নকৰিলে অঞ্চলটোত প্ৰতিবাদ অৱ্যাহত থাকিব বুলি স্থানীয় ৰাইজে জনাইছে। এই সন্দৰ্ভত ফণীধৰ বৰাৰ পৰিয়ালে আৰক্ষীৰ ওচৰত এটা গোচৰ ৰুজু কৰিছে আৰু বিহিত ব্যৱস্থাৰ বাবে ভাৰপ্ৰাপ্ত বিষয়া গৰাকীক জনাইছিল যদিও খোদ গাওঁৰক্ষী বাহিনীৰে এগৰাকী লোকৰ আৰক্ষী থানালৈ চোচৰাই আনি বৰ্বৰতা প্ৰদৰ্শন কৰা আৰক্ষীক ৰক্ষনা বেক্ষন দিবলৈ উঠিপৰি লগা বিষয়া মলয় আচাৰ্য্যই সাধাৰণ জনতাক কি ন্যায় প্ৰদান কৰিব সেইয়া ৰহস্যৰ আবৰ্তত থকা বিষয় বুলি জনাইছে গাওঁৰক্ষী বাহিনীৰ জাজৰি অঞ্চলৰ কৰ্মকৰ্তা সকলে।

ডবকা

 সমগ্ৰ ৰাজ্যজুৰি কৰোনা  আক্ৰান্তৰ সংখ্যা  ক্ৰমাগত ভাবে বৃদ্ধি পাবলৈ ধৰিছে৷ ইয়াৰ ভিতৰত হোজাই জিলা ৰাজ্যখনৰ ভিতৰত কৰোনা সংক্ৰমনৰ  শিৰ্ষ স্থান দখল কৰিছে ৷ আজিৰ দিনত হোজাই জিলাৰ বাবে ভয়ানক খবৰটো হল যে  হোজাই জিলাৰ বিভিন্ন কোৱাৰিন্টাইন কেন্দ্ৰত থকা ৫০ জনকৈ লোকৰ শৰীৰত ধৰা পৰিছে কভিড-১৯ পজিটিভ ৷ ইয়াৰে ভিতৰত ডবকা ৰাজহ চক্ৰৰ অন্তৰ্গত ডবকা, মোৰাঝাৰ আৰু যমুনামুখৰ মুঠ ৪০ গৰাকী লোকৰ শৰীৰত ধৰা পৰিছে কভিড-১৯  পজিটিভ ৷ দৰাচলতে যোৱা ২৭ মে তাৰিখে মুম্বাইৰ পৰা অহা ২১০ জন শ্ৰমিকক মোৰাঝাৰৰ জয়নগৰ মাদ্ৰাছাত কোৱাৰিন্টাইন কৰি ৰখা হৈছিল ৷ এসপ্তাহ উকলি যোৱাৰ পাছত তেওঁলোকক হোম কোৱাৰিন্টাইন ৰ বাবে পঠিয়াই দিয়া হৈছিল ৷ তাৰে ভিতৰত আজি অহা পৰীক্ষাৰ ফলাফল অনুসৰি ৩৪ জন লোকৰ শৰীৰত ধৰা পৰিছে কভিড-১৯ পজিটিভ ৷ আনহাতে ডবকাৰ হাজী আনফৰ আলী মহাবিদ্যালয়ত থকা কোৱাৰিন্টাইনত থকা যমুনামুখৰ ৬ জন যুৱকৰ শৰীৰত কভিড-১৯ পজিটিভ পোৱা গৈছে বুলি জানিব পৰা গৈছে ৷ ইতিমধ্যে হোজাই জিলা স্বাস্থ্য বিভাগে সকলো কৰুনা আক্ৰান্ত ৰোগীক উদ্ধাৰ কৰি একাংশক নগাওঁ অসামৰিক চিকিৎসালয়লৈ প্ৰেৰন কৰাৰ বিপৰীতে আন একাংশক হোজাইৰ যোগীজানৰ কভিড হস্পিতাললৈ প্ৰৰন কৰিছে৷আনহাতে আজি হঠাতে ডবকাৰ NRI PUBLIC SCHOOLত থকা এটি কোৱাৰিন্টাইন কেন্দ্ৰ পৰিদৰ্শন কৰাৰ বাবে উপস্থিত হয় ৰাজ্যৰ  আৰক্ষী সঞ্চালক প্ৰধান ৷ আৰক্ষী সঞ্চালক প্ৰধান ভাস্কৰ জ্যোতি মহন্তই কোৱাৰিন্টাইন চেন্টাৰ পৰিদৰ্শন কৰি নিৰাপত্তা দিশৰ বুজ লয় ৷ লগতে কোৱাৰিন্টাইনত থকা লোক সকলে এই ভয়ংকৰ সময়ত কিছু পৰিমানে এৰা ধৰা মাধ্যমেৰে চলিবলৈ আহবান জনায় ৷ লগতে কালি মুম্বাইৰ পৰা অহা এখন শ্ৰমিক ৰেলৰ চেইন টানি হোজাই ষ্টেচনত নমা একাংশ শ্ৰমিকৰ কাৰ্য্যক লৈ উদ্যোগ প্ৰকাশ কৰে আৰক্ষী সঞ্চালক প্ৰধান গৰাকীয়ে ৷ এই ক্ষেত্ৰত অসম আৰক্ষী কঠোৰ হোৱা বুলি জানিব দিছে ৷  ইতিমধ্যে ৬১ জন শ্ৰমিকৰ বিৰুদ্ধে হোজাই আৰক্ষীয়ে দুটাকৈ গোচৰ তৰিছে ৷লোকৰ জীৱনলৈ ভাবুকি সৃষ্টি কৰা লোকৰ বিৰুদ্ধে  আৰক্ষীক কঠোৰ হবলৈ নিৰ্দেশ দিয়ে সঞ্চালক প্ৰধান  গৰাকীয়ে৷আৰক্ষী আৰু সাংবাদিক সকলোকো সতৰ্ক থাকিবলৈ কয় আৰক্ষী সঞ্চালক গৰাকীয়ে ৷