নগাঁও,

দীৰ্ঘদিন ধৰি ভয়-ভাবুকিৰে নগাঁও চহৰৰ বৰভেটি, ইছলামপট্টি, মোল্লাপট্টি আৰু হয়বৰগাঁও আদি অঞ্চলত মাটি দখলৰ  বিভিন্ন অভিযোগত অভিযুক্ত লাডেন ওৰফে ৰফিক চোকদাৰক যোৱানিশা ইছলামপট্টিৰ পৰা নগাঁও আৰক্ষীয়ে আটক কৰে। উল্লেখ্য যে ভূ-মাফিয়া লাডেনৰ কু-কীৰ্তিৰ বিষয়ে ইতিমধ্যে সংবাদ মাধ্যমত  বাতৰি পৰিৱেশিত হৈছিল যদিও  নগাঁও আৰক্ষীয়ে তেওঁৰ বিৰুদ্ধে পদক্ষেপ গ্ৰহণ কৰা পৰিলক্ষিত হোৱা নাছিল । ইপিনে যোৱা ২৭ মাৰ্চত লাডেনে গুণ্ডাবাহিনী লৈ খাইৰুল ইছলাম নামৰ এজন লোকৰ মাটি দখল কৰাৰ ওপৰিও লোকজনৰ পত্নীক  চোকা অস্ত্ৰৰে আক্ৰমণ কৰিছিল। উক্ত ঘটনা সন্দৰ্ভত নগাঁও সদৰ আৰক্ষী থানাত এটা গোচৰ ৰুজু কৰা হয় যদিও ৰহস্যজনক ভাৱে আৰক্ষীয়ে কোনোধৰণৰ ব্যৱস্থা গ্ৰহণ কৰা নাছিল। ইয়াৰ উপৰিও লাডেন বাহিনীয়ে নগাঁৱৰ জ্যোতি ফ্লৰ মিলৰ সন্মুখৰ দীপ্তি ৰাজখোৱা আৰু টংক ৰাজখোৱাৰ ম্যাদি পট্টাৰ মাটি দখল কৰি ঘৰ-বাৰী নিৰ্মান কৰাৰো অভিযোগ উঠিছিল। আনকি লক-ডাউনৰ সময়ছোৱাতো লাডেন ওৰফে ৰফিক চোকদাৰৰ  সন্ত্ৰাস অব্যাহত আছিল ।নিজকে এগৰাকী প্ৰাক্তন মন্ত্ৰীৰ ঘনিষ্ঠ বুলি পৰিচয় দিয়া লাডেন ওৰফে ৰফিক চোকদাৰ বিগত কংগ্ৰেছ চৰকাৰৰ কাৰ্যকালত ৰাজনৈতিক ভাৱে প্ৰভাৱশালী হোৱাৰ সুবাদতে তেওঁৰ বিৰুদ্ধে মাত-মতা  লোকক গুলীয়াই হত্যা কৰাৰ ভাবুকিও প্ৰদান কৰিছিল। কিন্তু চামগুৰি আৰক্ষীয়ে দুদিন পূৰ্বে পুৰণিগুদাম পেট্ৰল পাম্পত ডকাইটি কৰিবলৈ অহা ৫জনীয়া ডকাইটৰ এটা দলক গ্ৰেপ্তাৰ কৰাৰ পিছত কালি ডকাইটৰ দলৰ সৈতে সম্পৰ্ক থকাৰ সন্দেহত  নগাঁও আৰক্ষীয়ে লাডেনক আটক কৰে ।  ডকাইটৰ দলটোক লাডেনে অবৈধ অস্ত্ৰ-শস্ত্ৰ যোগান ধৰাৰ অভিযোগ উঠিছে । আনহাতে চামগুৰি আৰক্ষীয়ে নগাঁও সদৰ থানাৰ পৰা লাডেনক সোধা-পোচাৰ বাবে লৈ যায়।ভূ-মাফিয়া লাডেনক আৰক্ষীয়ে আটক কৰাত নগাঁও চহৰবাসীয়ে সন্তুষ্টি প্ৰকাশ কৰিছে ।

তামুলপুৰ

বিটিচি পৰিষদীয় নিৰ্বাচনৰ প্ৰাকমুহূৰ্তত বিটিচিৰ ২৭ নং নাগ্ৰীজুলি পৰিষদীয় সমষ্টিত বিপিএফ দলৰ দুই শতাধিক নেতা-কৰ্মীয়ে পদত্যাগ কৰিছে। তামুলপুৰ জিলা সংখ্যালঘু কোষৰ সভাপতি তথা ২৭ নং নাগ্ৰীজুলি পৰিষদীয় সমষ্টিৰ নিৰ্দলীয় প্ৰাৰ্থী আলাউদ্দিন আহমেদে আজি সংবাদ মাধ্যমৰ আগত বিপিএফ দলৰ পৰা নেতা-কৰ্মী সকলে পদত্যাগ কৰা সম্পৰ্কে ক্ষোভ প্ৰকাশ কৰি কয় যে বিগত পোন্ধৰ বছৰ ধৰি তেওঁ বিপিএফ দলৰ বিভিন্ন পদত অধিষ্ঠিত হৈ নিষ্ঠা আৰু সততাৰে সেৱা আগবঢ়াই আহিছিল। এইবাৰৰ পৰিষদৰ নিৰ্বাচনত ২৭ নং নাগ্ৰীজুলি পৰিষদীয় সমষ্টিত বিপিএফ দলে নিজাববীয়াকৈ কোনো প্ৰাৰ্থী প্ৰক্ষেপ কৰা নাছিল। সেয়েহে তেওঁ বিপিএফ দলৰ পৰা ভিতৰুৱা  সমৰ্থনত  নিৰ্দলীয় প্ৰাৰ্থী হিচাপে প্ৰতিদ্বন্দ্বিতা  আগবঢ়াই মনোনয়ন পত্ৰও দাখিল কৰিছিল। কিন্তু শেহতীয়াভাবে বিপিএফ দলে নাগ্ৰীজুলি পৰিষদীয় সমষ্টিত ৰবীন্দ্ৰ বিশ্বাসক সমৰ্থন দিয়াত তেওঁ বিপিএফ দলৰ তামুলপুৰ জিলা সংখ্যালঘু কোষৰ সভাপতি পদৰ পৰা পদত্যাগ কৰাৰ উপৰিও প্রাথমিক সদস্য পদৰ পৰা পদত্যাগ কৰে। তেওঁ জানিবলৈ দিয়া মতে তেওঁৰ পদত্যাগ পত্ৰ ইতিমধ্যে যোৱা ২৮ মে’ত ডাক সেৱা যোগে তামুলপুৰ জিলা বিপিএফৰ সভাপতি-সম্পাদকলৈ প্ৰেৰণ কৰিছে। ইপিনে যুৱ নেতা আলাউদ্দিন আহমেদৰ নেতৃত্বত ৪ নং কালীপুৰস্থিত ১ নং পূৱ-কুমাৰীকাটা ভিচিডিচিৰ কাৰ্যালয়ত আজি দিনটোৰ ভিতৰত লক ডাউনৰ নীতি-নিয়ম আৰু সামাজিক দূৰত্ব বৰ্তাই ৰাখি  বিপিএফ দলৰ মূল-সমিতি, যুৱ সমিতি, মহিলা সমিতিৰ দুই শ গৰাকী নেতা-কৰ্মীয়ে পদত্যাগ কৰে। এই সকল নেতা-কৰ্মীয়ে ৰবীন্দ্ৰ বিশ্বাসক বিপিএফ দলে সমৰ্থন  দিয়া কাৰ্যত তীব্ৰ অসন্তুষ্টি প্ৰকাশ কৰি বিপিএফ দলৰ বিভিন্ন পদবীৰ লগতে  প্ৰাথমিক সদস্য পদৰ পৰা পদত্যাগ কৰিছে। এই সন্দৰ্ভত বিপিএফ নেতা ভক্ত বাহাদুৰ লিম্বুয়ে সংবাদ মাধ্যমৰ আগত কয় যে বিপিএফ দলে ২৭ নং নাগ্ৰীজুলি পৰিষদীয় সমষ্টিত নিজাববীয়া প্ৰাৰ্থী প্ৰক্ষেপ নকৰি বিপিএফৰ মিত্ৰদল বিজেপিক আসনখন এৰি দিছিল। কিন্তু বিপিএফৰ একাংশ নেতা-কৰ্মী-সমৰ্থকে বিজেপি দলৰ প্ৰক্ষেপিত প্ৰাৰ্থী গৰাকীক সমৰ্থন নজনাই সেই সকলে সেই সময়ৰ বিপিএফৰ নেতা আলাউদ্দিন আহমেদক সমৰ্থন জনাই নিৰ্দলীয় প্ৰাৰ্থী হিচাপে মনোনয়ন পত্ৰ দাখিল কৰিবলৈ হেঁচা দিয়ে। সেই মৰ্মে আলাউদ্দিন আহমেদে কেইবাহাজাৰ সমৰ্থকক লগত লৈ নিৰ্দলীয় প্ৰাৰ্থী হিচাপে মনোনয়ন পাত্ৰ দাখিল কৰিছিল। কিন্তু শেহতীয়াভাবে বিপিএফ দলে নাগ্ৰীজুলি পৰিষদীয় সমষ্টিত নিৰ্দলীয় প্ৰাৰ্থী ৰবীন্দ্ৰ বিশ্বাসক সমৰ্থন দিছে। এনে ক্ষেত্ৰত বিপিএফ দলৰ নেতা-কৰ্মীৰ মাজত বিভ্ৰান্তিৰ সৃষ্টি হয়। আৰু সেই বাবেই তেওঁলোকে বিপিএফ দলৰ পৰা পদত্যাগ কৰা বুলি ভক্ত বাহাদুৰ লিম্বুয়ে সংবাদ মাধ্যমৰ আগত সদৰী কৰে। ভক্ত বাহাদুৰ লিম্বুৰ উপৰিও আজি পদত্যাগী কেইবা গৰাকীও নেতা-কৰ্মীয়ে অভিযোগ কৰি  বিগত ১৫ বছৰ ধৰি নাগ্ৰীজুলিত বিপিএফ দলৰ হৈ নিষ্ঠাৰে কাম কৰি অহা জেষ্ঠ্য তথা তৃণমূল পৰ্য্যায়ৰ কৰ্মীৰ সৈতে কোনো ধৰণৰ আলাপ-আলোচনা নকৰি কেইগৰাকী মান বিপিএফ নেতাই ৰবীন্দ্ৰ বিশ্বাসক বিপিএফ দলৰ পৰা সমৰ্থন জনোৱা বুলি জানিব পাৰি ক্ষোভিত হৈ এই সকলে আজি বিপিএফ দলৰ পৰা পদত্যাগ কৰে বুলিও ব্যক্ত কৰে। আজি বিপিএফ দল পদত্যাগী সদস্যসকলে আগন্তুক বিটিচি পৰিষদীয় নিৰ্বাচনত ২৭ নং নাগ্ৰীজুলি পৰিষদীয় সমষ্টিত নিৰ্দলীয় প্ৰাৰ্থী আলাউদ্দিন আহমেদক সমৰ্থন জনাই কাম কৰি যাব বুলিও মত প্ৰকাশ কৰে।

হোজাই

হোজাই জিলাৰ লংকা উদালীৰ লাচিত পথাৰ গাৱৰ মুজিবুৰ ৰহমান নামৰ এগৰাকী ব্যক্তিয়ে ঈদৰ আগ দিনাখন এক আকস্মিক পথ দুৰ্ঘটনাত পতিত হৈ বৰ্তমান চটফটাইছে বিছনাত। অতি দৰিদ্ৰ ঘৰৰ মুজিবুৰ ৰহমানে জীবিকা হিচাপে ঘোড়াৰ গাড়ী চলাই পৰিয়ালৰ ৯ গৰাকী সদস্যক পোহ পাল দি আহিছিল।পৰিয়ালৰ এক মাত্ৰ উপাৰ্জন কাৰী মুজিবুৰ ৰহমানে ঈদৰ আগদিনা নিজ ঘোড়াৰ গাড়ীলৈ ঈদৰ বজাৰ কৰিবলৈ গৈ পথ দুৰ্ঘটনাত পতিত হৈ বিছনাত ছটফটাই থকাৰ সময়তেই আজি মৌলানা মুস্তাক আনফৰ নেতৃত্বাধীন অসম ৰাজ্যিক জমিয়ত উলামাৰ সম্পাদক মৌলানা কলিম উদ্দিনে তেখেতৰ টীম লগতলৈ মুজিবুৰৰ ঘৰত উপস্থিত হৈ নগত ১০ হেজাৰ টকাৰ আৰ্থিক সাহাৰ্য্য আগবঢ়াই। পৰিয়ালৰ ৯ গৰাকী সদস্যৰ একমাত্ৰ উপাৰ্জনকাৰী মুজিবুৰ ৰহমানৰ বৰ্তমান যথেষ্ট সহায়ৰ প্ৰয়োজন হৈছে।এইক্ষেত্ৰত চৰকাৰ আৰু হৃদয়বান ব্যক্তিসকলৰ পৰা অসহায় মুজিবুৰ ৰহমানে সহায়ৰ হাত বিচাৰিছে। 

দলগাও

দৰঙতো দ্ৰুত হাৰত বৃদ্ধি পাইছে ক’ভিড আক্ৰান্তৰ সংখ্যা । বুধবাৰৰ দিনটোত ছিপাঝাৰ সামূহিক স্বাস্থ্য কেন্দ্ৰত আছুতীয়া কক্ষত থকা দুজন আৰু খাৰুপেটীয়া মহাবিদ্যালয়ৰ কোৱাৰান্টাইন  চেন্টাৰত থকা  ১১ জন লোকৰ শৰীৰত ক’ভিড-১৯ ৰ উপস্থিতি ধৰা পৰে । এই ১৩ জন লোককে মঙলদৈ অসামৰিক চিকিৎসালয়ৰ আছুতীয়া কক্ষত ৰখাৰ ব্যৱস্থা কৰা হৈছে । নতুনকৈ আক্ৰান্ত হোৱা ১৩ জন লোককে ধৰি মঙলদৈ অসামৰিক চিকিৎসালয়ত চিকিৎসাধীন হৈ থকা ক’ভিড আক্ৰান্তৰ সংখ্যা ২০ জনলৈ বৃদ্ধি পালে । বুধবাৰে আক্ৰান্ত হোৱা ১৩ জন ব্যক্তি হ’ল – লালপুল নদীকাষৰ আমিন আলি (২০) আৰু ফোৰচেদ আলম (২২), খিলাধাৰীৰ আচিবুৰ ৰহমান (২৩), ৩ নং চিকণমাটিৰ বাৰেক আলি (২৮), কেগৰাপুল্লীৰ লোকমান হাকিম (২০), নদীকাষৰ নাজিম আলি(১৯), বুৰীগাঁৱৰ চাজিকুল হক(২২), ৩ নং ধলপুৰৰ আব্দুল জব্বৰ (১৭), শান্তিপুখুৰীৰ হিমাংশু চৰৱান(২৯), মোৱামাৰীৰ আবুল হুছেইন  (২১), ৩ নং আৰিমাৰীৰ ৰফিকুল ইছলাম  (৪০), ৪ নং শিয়ালমাৰীৰ হানিফ আলী  (২১) আৰু বৰগুলীৰ চাহিদুল হক (১৯)। ইয়াৰে আমিন আলী আৰু ফোৰচেদ আলম ছিপাঝাৰ সামূহিক স্বাস্থ্য কেন্দ্ৰৰ আছুতীয়া কক্ষত আছিল আৰু পূৰ্বৰ ক’ভিড আক্ৰান্ত নিজামুদ্দিন আলীৰ লগত প্ৰত্যক্ষভাৱে সংস্পৰ্শত অহা। আনহাতে আন ১১জন খাৰুপেটীয়া মহাবিদ্যালয়ৰ কোৱাৰেণ্টাইন চেণ্টাৰত আছিল আৰু তেওঁলোক পূৰ্বৰ ক’ভিড আক্ৰান্ত ছিকন্দৰ আলী, শ্বেখ ফৰিদ আৰু নজৰুল ইছলামৰ লগত  প্ৰত্যক্ষ সংস্পৰ্শত আহিছিল।

গুৱাহাটী

আজি দিনৰ প্ৰায় ১ বজাত গুৱাহাটীৰ বেলতলাৰ ড° ভৱেন্দ্ৰ নাথ শইকীয়া পথৰ পৰা এখন নীলা পালছাৰ বাইক, দুজন যুৱকে চুৰি কৰি লৈ যায়। এই সমগ্ৰ দৃশ্য চি.চি. কেমেৰাত ইতিমধ্যে বন্দী হৈছে। চি.চি টিভিত দেখা গৈছে যে অতি কৌশলেৰে দুজন যুৱকে বাইকখন চুৰি কৰি লৈ যায়। এই সন্দৰ্ভত বাইকখনৰ গৰাকী মোচাদ্দিক হুছেইনে জনায় যে দিনৰ প্ৰায় ১২-৪৫ বজাত তেওঁ অফিচিয়েল কিছু কামৰ বাবে সেই পথৰ সমীপতে তেওঁৰ AS-01-DB8748 বাইকখন ৰখায় মানুহ এজন লগ ধৰিব যায়। প্ৰায় আধাঘন্টা মানৰ ব্যৱধানত তেওঁ উপস্থিত হৈ আহি দেখে যে নিৰ্দিষ্ট স্থানত বাইকখন নেদেখি আচৰিত হৈ পৰে। অৱশ্যে তেওঁ বেছি ব্যাকুল নহৈ ততালিকে বেলতলা আৰক্ষীক খবৰ দিয়াৰ লগতে তাত এটি গোচৰো ৰুজু কৰে। পুলিছে ইতিমধ্যে তদন্ত আৰম্ভ কৰি চি.চি টিভিত বন্দী সমগ্ৰ দৃশ্য অতি সোনকালেই উলিয়াবলৈ সক্ষম হয়।

কলিয়াবৰ : 

কলিয়াবৰ মহকুমাৰ ডিজু ভেলী চাহ বাগিচা চিকিৎসালয়ৰ দুৰৱস্থা। বাগিচাৰ চিকিৎসালয়খনত নাই চিকিৎসক, চিকিৎসাকৰ্মী, নাই পৰ্য‍্যাপ্ত ঔষধ। বছৰ-বছৰ ধৰি অসম চাহ নিগমৰ ডিজু ভেলী চাহ বাগিচাৰ কৰ্তৃপক্ষৰ আওকণীয়া মনোভাৱৰ বাবে দুখীয়া দৰিদ্ৰ চাহ শ্ৰমিককসকলে নাপায় সু-চিকিৎসা। চাহ শ্ৰমিকসকলৰ আহ্বান-গোঁহাৰিক তিল মাত্ৰও গুৰুত্ব নিদিয়া বাগিচা চিকিৎসালয় পৰিদৰ্শন কৰে নগাঁও জিলা চাহ জনজাতি ছাত্ৰ সন্থাৰ এক প্ৰতিনিধি দলে। পৰিদৰ্শন কালত চিকিৎসক, চিকিৎসাকৰ্মীৰ অনুপস্থিতি আৰু পৰ্যাপ্ত ঔষধ নথকা চিকিৎসালয়খন পৰিদৰ্শন কৰি আশ্চৰ্য‍্য প্ৰকান কৰে দলটোৱে। দলটোল প্ৰতিনিধিয়ে চাহ শ্ৰমিককসলক পৰ্য‍্যাপ্ত চিকিৎসা সেৱা আগবঢ়াবলৈ বাগিচা কৰ্তৃপক্ষক দাবী জনোৱাৰ লগতে চৰকাৰকো বিষয়টো প্ৰতি গুৰুত্ব দিবলৈ আহ্বান জনায়।আনহাতে, ভাজপা চৰকাৰখনে পূৰ্বৰ প্ৰতিশ্ৰুতি পূৰণ নকৰি অসমৰ আদিবাসী লোকক চৰম প্ৰতাৰণা কৰিছে বুলি ক্ষোভ প্ৰকাশ কৰে ছাত্ৰ সংগঠনটোৱে।জানিব পৰা অভিযোগ মতে বহু  বছৰ পূৰ্বৰ পৰা বাগিছা কৰ্তৃপক্ষই ভৱিষ‍্যনিধি আৰু অৱসৰকালিন অনান‍্য সা-সুবিধাৰ বাবে মজুৰীৰ পৰা সংগ্ৰহ কৰা ধন দুখীয়া বৃদ্ধ বিধৱা শ্রমিক সকলে পাবলগীয়া ধন মুকলি কৰি দিয়া নাই। এই সম্পুৰ্ণ ধনৰাশি মুকলি কৰি দিয়াৰ দুবছৰৰ আগতেই প্ৰতিশ্ৰুতি দিছিল যদিও আজি পৰ্য‍্যন্ত এটকাও নাপালে অসৱসৰ লোৱা শ্ৰমিকসকলে। নিৰ্বাচনৰ প্ৰাকমুহতত ভাজপা চৰকাৰখনে অসমৰ চাহ উদ্যোগিক ক্ষেত্ৰখনৰ উন্নতিকল্পে গুৰুত্বপুৰ্ণ ভুমিকা লব বুলি দিয়া প্ৰতিশ্ৰুতিৰ ওলোটা ছবি এখনখনহে অতিকৈ চকুত পৰিছে। অসম চাহ নিগম অধিনস্থ বাগিচাসমূহৰ কেইবাটাও কলঘৰ জহি-খহি গৈছে যদিও এই কলঘৰসমূহ পুণৰ নিৰ্মাণত কোনো গুৰুত্ব নিদিলে চৰকাৰখনত। গতিকে অসম চৰকাৰৰ উদোগ মন্ত্ৰী মাননীয় শ্রীচন্দ্ৰমোহন পাটোৱাৰী আৰু বিত্ত আৰু স্বাস্থ্য মন্ত্ৰী মাননীয় শ্রীহিমন্ত বিশ্ব শৰ্মাক অসম চাহ নিগম অধীনস্থ বাগিচাৰ সমস্যা সমাধানৰ ব্যৱস্থা কৰিবলৈ দাবী জনাইছে ছাত্ৰ সংগঠনটোৱে।বিশেষ সুত্ৰে জানিব পৰা মতে যোধা ২ মে’ তাৰিখে ৰাজু তাচা নামৰ এজন ব‍্যক্তিক অসাংবিধানিকৰূপে ডিজু ভেলী চাহ বাগিচাৰ কাৰ্য্যালয়ত ভৱিষ‍্য নিধিৰ কামত নিযুক্তি দিয়ে। বাগিচাখনৰ পৰিচালকে নিয়ম বহিৰ্ভূতভাৱে কোনো ন‍্যস্ত স্বাৰ্থ জড়িত মহলৰ হেঁচাত ৰাজু তাচা নিযুক্তি দিছে বুলি অভিযোগ কৰে সদৌ অসম আদিবাস ছাত্ৰ সন্থাই‌।