নাজিৰা

শিৱসাগৰ জিলাৰ নাজিৰা মহকুমাৰ গেলেকীৰ এজন ছাত্রৰ কভিড-১৯ পজিটিভ বুলি সদৰী হোৱাৰ লগে লগে দেওবাৰে সমগ্ৰ অঞ্চলটোত এক আতংকময় পৰিস্থিতি সৃষ্টি হৈছে৷ নাজিৰা গেলেকীৰ আব্দুল হাচিমৰ একমাত্ৰ পুত্ৰ তথা দিল্লী জাকিৰ হুছেইন মহাবিদ্যালয়ৰ স্নাতক দ্বিতীয় ষন্মাসিকৰ ছাত্র আব্দুল চামিম (১৯) আখতাৰৰ শৰীৰত কভিড-১৯ পজিটিভ হোৱাৰ তথ্য সদৰী কৰে যোৰহাট চিকিৎসা মহাবিদ্যালয়ৰ কুৱাৰেণ্টাইন চেণ্টাৰৰ কৰ্তৃপক্ষই। ঘটনা মৰ্মে গেলেকীৰ আব্দুল হাচিমৰ পুত্ৰ আব্দুল চামিমৰ সৈতে দিল্লীৰ পৰা এখন গাড়ীৰে পৰিয়ালৰ আন আঠজন ঘৰলৈ আহি থকা অৱস্থাত যোৱা ১৫ মে’ত তেওঁলোকক যোৰহাটত কুৱাৰেণ্টাইন কৰে৷ তেওঁলোকৰ পৰীক্ষাৰ পাছত যোৱা নিশা প্ৰায় ১২ বজাত আব্দুল চামিমৰ কভিড-১৯ পজিটিভ বুলি কৰ্তৃপক্ষই স্পষ্ট কৰে। ছাত্ৰজনে দিল্লীৰ উক্ত মহাবিদ্যালয়ত বুৰঞ্জী বিষয়ত সন্মান লৈ অধ্যয়ন কৰি আছিল৷ তেওঁৰ লগত মাতৃ নাচিম আখতাৰো আছিল যদিও এবছৰ ধৰি গেলেকীৰ স্বগৃহলৈ অহা নাছিল। সম্প্ৰতি লকডাউন শিথিল কৰাৰ বাবে তেওঁ লোক স্বগৃহলৈ আহিছিল৷ কিন্তু গৃহ আহি পোৱাৰ পূৰ্বে যোৰহাটত সকলোকে ১৫ মে’ত কুৱাৰেণ্টাইন কৰে। মেধাৱী ছাত্ৰ জনৰ কভিড-১৯ পজিটিভ বুলি স্পষ্ট কৰাৰ পিছতে নাজিৰা মহকুমা প্ৰশাসন, স্বাস্থ্য বিভাগ আৰু গেলেকী আৰক্ষীয়ে বিশেষ তৎপৰতাৰে অঞ্চলটোত উদ্ভৱ হোৱা আতংকময় পৰিস্থিতি নিৰাময়ৰ বাবে পদক্ষেপ গ্ৰহণ কৰে। মহকুমা প্ৰশাসনৰ ৰাজহ চক্ৰ বিষয়া তথা দণ্ডাধীশ কবিতা কাকতি কোঁৱৰ গেলেকী আৰক্ষী থানাৰ ভাৰপ্ৰাপ্ত বিষয়া দি ছেত্ৰীসহ আৰক্ষী প্ৰশাসন আৰু স্বাস্থ্য বিভাগৰ বিষয়া-কৰ্মী আব্দুল হাচিমৰ ঘৰত উপস্থিত হৈ পৰিস্থিতি বুজ লয়। তদুপৰি প্ৰশাসন আৰু স্বাস্থ্য বিভাগৰ তৰফৰ পৰা আব্দুল চামিমৰ পিতৃ গৃহৰ আব্দুৰ ৰহমান, ফাৰহানা আখতাৰ, নিচাদ আখতাৰ, নৌচিন আখতাৰ, মৌচান মেহবিন, ফাৰহান আখতাৰ  আৰু তেওঁলোকৰ গাড়ীৰ চালক চাহাব আলীক হোম কুৱাৰেণ্টাইন কৰে৷ এই ক্ষেত্ৰত অধিক আতংকময় নহ’বৰ বাবে মহকুমা প্ৰশাসন তৰফৰ পৰা গেলেকী তথা নাজিৰা মহকুমা বাসী ৰাগজলৈ আহ্বান জনাইছে৷

টীয়ক

লকডাউন যদিও সকলোকে গৃহবন্দী কৰিছে বা বিভিন্ন ক্ষেত্ৰত সকলো হাহাকাৰ অৱস্থাত পৰিছে তৎস্বত্বেও এই মহামাৰীয়ে যেন স্তব্ধ কৰিব পাৰ নাই মানুহৰ প্ৰতিভাৰ অনান্য যাত্ৰাক৷ তাৰে প্ৰকাশ টীয়কৰ কাকজান বাম কুকুৰাচ’ৰাৰ বিকাশ সাধন ভড়ালী। নিজৰ কৰ্ম ব্যস্ততাৰ মাজতে আবদ্ধ হৈ থকা এইজন যুৱকৰ  বুকুৰ কোণত যেন ক’ৰবাত সুযোগৰ অপেক্ষাৰ বাবে ৰৈ আছিল এক শিল্পী প্ৰতিভাৰ৷ এই মহামাৰীত সমগ্ৰ দেশৰ জনতা গৃহবন্দী, পৰ্যাপ্ত সময় সদাব্যস্ত প্ৰতিজনৰ হাতত, সেই সুযোগকে গ্ৰহণ কৰি বিকাশে নিজৰ কোঠাৰ পৰাই কেইজনমান বন্ধুৰ সহযোগত ছ’চিয়েল মিডিয়াৰ যোগেদি প্ৰকাশ কৰি গ’ল নিজৰ শিল্পী প্ৰতিভা, গাই গ’ল জ্যোতি, বিষ্ণু, ভূপেন, পাপন, জুবিনৰ দৰে প্ৰতিজন মহান শিল্পীৰ গীত। লোকগীতৰ মধুৰ সুৰত সকলোকে মোহি বিকাশ ছ’চিয়েল মিডিয়াৰ এক জনপ্ৰিয় নাম৷ যদিও লকডাউনে বহু মানুহৰ জীৱনলৈ শংকা কঢ়িয়াই আনিছে তাৰ মাজতে কিন্তু এনে বিলাক ইতিবাচক কৰ্ম তথা চিন্তাই কিন্তু সমাজলৈ কঢ়িয়াই আনিছে প্ৰৱল সম্ভাবনা। উল্লেখযোগ্য যে সৰুৰে পৰা সংগীত চৰ্চা কৰি ভাল পোৱা বিকাশ সংগীতৰ সমান্তৰালকৈ এই লকডাউনৰ সময়ত দেউতাকৰ সৈতে খেতি কৰাতো সহায় আগবঢ়াইছে। একেবাৰে সৰল স্বভাৱ বিকাশৰ কন্ঠৰ ধ্বনিয়ে অনাগত দিনতো সমগ্ৰ অঞ্চললৈ সুনাম কঢ়িয়াই আনক তাকে কামনা কৰিছে বিভিন্নজনে৷

নাজিৰা

জনস্বাস্থ্য কাৰিকৰী বিভাগৰ নাজিৰা সংমণ্ডল কাৰ্যালয়ৰ বৰমূৰীয়াসকলৰ কৃপাত মহকুমাবাসীয়ে বছৰ বছৰ ধৰি বিশুদ্ধ খোৱা পানীৰ নামত আৰ্চেনিক যুক্ত পানী সেৱনেৰে তৃষ্ণা নিবাৰণ কৰি ভয়াবহ জীৱন অতিবাহিত কৰিছে। মহকুমাটোৰ অন্তৰ্গত গৰিষ্ঠ সংখ্যক পানী যোগান প্ৰকল্প বছৰ বছৰ ধৰি মেৰামতি নকৰাৰ বাবেই জনগণে বিশুদ্ধ খোৱা পানীৰ পৰা বঞ্চিত হৈ আহিছে। উল্লেখযোগ্য যে বিভাগীয় কৰ্তৃপক্ষৰ ফাইলত এই বিকল পানী যোগান প্ৰকল্প সমূহ মেৰামতিৰ বাবে বছৰি লাখ লাখ টকা আৱণ্টন আহে৷ কিন্তু এই আৱণ্টিত ধনৰ সম্যকভাৱে ব্যয় কৰি কিছু কাম হোৱাৰ বিপৰীতে আন একাংশ প্ৰকল্পৰ মেৰামতিৰ কাম নোহোৱাকৈয়ে সিংহভাগ ধন ঠিকাদাৰ আৰু বিভাগৰ বিষয়া-কৰ্মচাৰীয়ে মিলি গো-গ্ৰাসে ভক্ষণ কৰি আহিছে৷ নাজিৰা মহকুমাটোৰ অন্তৰ্গত হুলাংকাটনী, বিহুবৰ, পদুমপুখুৰী, নিমাইগড় চেতিয়া পুখুৰী, জতকীয়া, শিমলুগুৰি, লক্ষ্মীজান, ৰামু গাঁও আদি বিভিন্ন অঞ্চলৰ জনগণে বছৰ বছৰ ধৰি বিশুদ্ধ খোৱাপানীৰ পৰা বঞ্চিত হৈ আহিছে। এই অঞ্চলসমূহত লাখ লাখ টকা ব্যয় কৰি চৰকাৰে পানী যোগান প্ৰকল্প নিৰ্মাণ কৰি ৰাখিছে যদিও প্ৰায়কেইটা প্ৰকল্প কাৰিকৰী সমস্যাৰ বাবে বিকল হৈ পৰাত এতিয়া দীৰ্ঘদিন ধৰি বঞ্চিত হৈছে খোৱা পানীৰ পৰা। এই বিকল পানী যোগান প্ৰকল্পসমূহৰ যন্ত্ৰপাতিসমূহ মেৰামতি কৰি কাৰ্যক্ষম কৰি তোলাৰ বাবে চৰকাৰী বিভাগৰ পৰা যথেষ্ট পৰিমাণে ধন মোকলাই দিয়া হয় যদিও ইয়াৰ দায়িত্বৰত অভিযন্তা, কণিষ্ঠ অভিযন্তসকলে কোনো ধৰণৰ কাম নকৰাকৈয়ে দায়িত্ব সামৰে। যাৰ ফলত জনগণে তৃষ্ণা দূৰ কৰিবলৈ এটুপি পানীৰ বাবে হাহাকাৰ কৰিব লগা হয় আৰু মেৰামতিৰ দায়িত্বত থকা বৰমূৰীয়াসকলে ৰহস্যজনক ভাৱে মৌনতা অৱলম্বন কৰা পৰিলক্ষিত হয়৷ আনহাতে মহকুমাটোৰ কেইটামান অঞ্চলত খোৱা পানী আঁচনিসমূহৰ কাম সম্পূৰ্ণ হৈ আছে যদিও বিভাগীয় অভিযন্তাৰ হেমাহিৰ বাবেই পানী যোগান ধৰিব পৰা নাই। যাৰ ফলত জনগণে জান-জুৰি, নদ-পুখুৰী আদিৰ বীজানুযুক্ত পানীকে সেৱন কৰিব লগা হৈছে৷ আন এক অভিযোগ মতে নাজিৰা মহকুমাৰ শিমলুগুৰি দেওধাই গাঁৱত অৱস্থিত পানী যোগান প্ৰকল্প এটাৰ পৰা অঞ্চলটোৰ প্ৰায় ৫০ টা পৰিয়ালৰ গৃহলৈ গৃহ সংযোগ দিয়া পানীৰ পাইপেৰে আজি ৫-৬ মাহ ধৰি পানী অহা নাই। অভিযোগ মতে গৃহ সংযোগৰ বাবে প্ৰতিটো পৰিয়ালে এক হাজাৰ টকাকৈ আগধন দিয়াৰ লগতে সমগ্ৰ সামগ্ৰী পৰিয়াল সমূহে নিজেই ক্ৰয় কৰিছিল আৰু শ্ৰমিকৰ পাৰিশ্ৰমিকো পৰিয়ালসমূহে নিজেই বহন কৰিছিল। গৃহ সংযোগৰ বাবে পৰিয়ালসমূহে নিজেই ব্যয় কৰা টকা একাংশ চতুৰ বিষয়াই বিভাগৰ কাৰ্যালয়ৰ ফালৰপৰা ব্যয় কৰাৰ হিচাপ দেখুৱাই বৃহৎ পৰিমাণৰ ধন গ্ৰাস কৰিলে বুলি ৰাইজে অভিযোগ উত্থাপিত কৰিছে। আন এক অভিযোগ অনুসৰি নাজিৰা মহকুমাৰ বাণ্টুং পঞ্চায়তৰ অন্তৰ্গত নিমাইগড় হাবি গাঁও চেতিয়া পুখুৰী পাৰত অৱস্থিত পানী যোগান প্ৰকল্পটোৰ সীমা বেৰা পকীকৰণৰ বাবে ১৯৯৫ চনতে তেতিয়াৰ চৰকাৰে পৰ্যাপ্ত ধন আৱণ্টন দিছিল। উক্ত ধনেৰে চাৰিভাগৰ এক অংশও পকী সীমা বেৰা নিৰ্মাণ সম্পূৰ্ণ নহ’ল সুদীৰ্ঘ ২৫ টা বছৰে। এই সন্দৰ্ভত নাজিৰা জনস্বাস্থ্য কাৰিকৰী বিভাগৰ দায়িত্বপ্ৰাপ্ত অভিযন্তা ফাইজুল ইছলামে বিষয়টোৰ ক্ষেত্ৰত মৌনতা অৱলম্বন কৰাৰ উপৰি এইবোৰ কথা জানি কি ডাল কৰিব বুলিহে মত দাঙি ধৰে বুলি গুৰুতৰ অভিযোগ উত্থাপিত হৈছে। এনে ক্ষেত্ৰত ৰাইজে উচিত তদন্ত কৰি ব্যৱস্থা গ্ৰহণ কৰাৰ লগতে জনগণে যাতে প্ৰকল্প সমূহৰ পৰা বিশুদ্ধ খোৱা পানী লাভ কৰে তাৰ সঠিক পদক্ষেপ গ্ৰহণৰ বাবে মহকুমা প্ৰশাসন কৰ্তৃপক্ষক নিবেদন জনাইছে৷