দেওপানী

 শতবৰ্ষ অতিক্ৰম কৰা অসমৰ জাতীয় অনুষ্ঠান অসম সাহিত্য সভাই ২০২০-২২ বৰ্ষৰ বাবে আঞ্চলিক সম্পাদক হিচাপে মনোনীত কৰা বিশিষ্ট সাংবাদিক তথা সাহিত্যিক জয়ছিঙ টকবিক ডিফুস্হিত আঞ্চলিক কাৰ্যালয় ৰাংছিনা ভৱনত আসাম প্ৰেছ কৰেছপণ্ডেণ্টছ্ ইউনিয়ন চমুকৈ আপকুৰ কাৰ্বি আংলং জিলা সমিতিৰ তৰফৰ পৰা আদৰণি জনায়৷ দেশত চলিথকা মহামাৰী কভিড-১৯ৰ আইন অনুসৰি উপসভাপতি ৰবীন বৰুৱা, কেন্দ্ৰীয় সদস্য ছামছিং ক্ৰ আৰু এগৰাকী সদস্যৰে গঠিত সজাতি দলে আঞ্চলিক সম্পাদক জয়ছিং টকবিক আদৰণি জনায়৷ সাংবাদিকৰে হোৱা বাৰ্তালাপত আঞ্চলিক সম্পাদক গৰাকীয়ে অসম সাহিত্য সভাৰ সভাপতি, উপসভাপতি আৰু প্ৰধান সম্পাদকক কৃতজ্ঞতা জ্ঞাপন কৰে৷ আনহাতে এগৰাকী বিশিষ্ট সাংবাদিক আৰু সাহিত্যিকক অসম সাহিত্য সভাই আঞ্চলিক সম্পাদকৰ দৰে এটা গুৰুত্বপূৰ্ণ পদবীত মনোনীত কৰাৰ বাবে আপকু কাৰ্বি আংলং জিলা সমিতিয়ে অসমৰ সাহিত্য সভাৰ কেন্দ্ৰীয় সমিতিক অশেষ ধন্যবাদ জ্ঞাপন কৰে৷

নাজিৰা

  লকডাউনৰ সময়ছোৱাত চৰকাৰে পত্ৰ নং এল ই ১৬/২০১৮/৪০৩৫-৯৮ তাৰিখ ২১ মাৰ্চ , ২০২০ যোগেদি অসমৰ সমগ্ৰ চাহ বাগিচা কৰ্তৃপক্ষক আদেশ জাৰি কৰে যে চাহ বাগিচাৰ স্থায়ী-অস্থায়ী, শ্ৰমিক, উপ-কৰ্মচাৰী আৰু কৰ্মচাৰীসকল শ্ৰম আইনৰ অধীনত লাভ কৰি অহা প্ৰাপ্যসমূহৰ লগতে সাহায্যৰ ধন আদায় দিব লাগে। কিন্তু বাগিচা কৰ্তৃপক্ষই চৰকাৰৰ এই নিৰ্দেশনাক আওকাণ কৰি হিটলাৰী নীতিৰে নিৰ্দয়ভাৱে দৰমহা, ৰেচন আৰু সাহায্য আদি কৰ্তন কৰি এনে এক মাৰাত্মক দূৰ্যোগৰ সময়ত প্ৰাপ্য সম্পূৰ্ণ আদায় দি শ্ৰমিক, কৰ্মচাৰীসকলক ক’ৰোনা ভাইৰাছ সংক্ৰমণৰ বিৰুদ্ধে যুঁজ দিবলৈ মানসিকভাৱে শক্তিশালী কৰাৰ বিপৰীতে মানসিক ভাৱে দূৰ্বল কৰাহে দেখা পোৱা গৈছে। অসমত এই বৃহৎ চাহ শ্ৰমিক, কৰ্মচাৰীৰ প্ৰতি বাগিচা কৰ্তৃপক্ষ, বাগিচা মালিক গোষ্ঠী আৰু মালিকগোষ্ঠীৰ অভিভাৱক স্বৰূপ সংস্থাসমূহ ক্ৰমে এবিটা, টাই, নেটা, বি চি পি আৰু এ টি পিয়ে শ্ৰমিক, কৰ্মচাৰীসকলৰ প্ৰতি কিমান দায়বদ্ধ? উল্লেখযোগ্য যে ক’ৰোনা ভাইৰাছ বিশ্বৰ ইতিহাসত এটা ক’লি অধ্যায়, এই সময়ছোৱাত প্ৰাপ্য কৰ্তন কৰি এৰিয়া হিচাপে ভৱিষ্যতে দিয়াৰ যি প্ৰলোভন, ই অত্যন্ত দূৰ্ভাগ্যজনক আৰু সেই বিষয়া-মূৰব্বীসকলৰ বাবে লজ্জাজনক বুলি আটছা স্বতন্ত্ৰই সৰৱ প্ৰতিক্ৰিয়া প্ৰকাশ কৰিছে৷ তদুপৰি আটছাৰ শিৱসাগৰ জিলা ( স্বতন্ত্ৰ ) সমিতিয়ে সমগ্ৰ বিষয়টো দণ্ডাধীশ পৰ্যায়ৰ তদন্তৰ যোগেদি এনে বাগিচাৰ জ্যেষ্ঠ, মুখ্য আৰু প্ৰধান পৰিচালখসকলৰ ওপৰত বিহিত ব্যৱস্থা গ্ৰহণ কৰাৰ লগতে শ্ৰমিক, উপ – কৰ্মচাৰী আৰু কৰ্মচাৰীসকলৰ ন্যাৰ্য প্ৰাপ্য সমূহ বাগিচা কৰ্তৃপক্ষৰ পৰি মোকলাই দিয়াৰ দাবীত এখনি স্মাৰকপত্ৰ শিৱসাগৰ জিলা উপায়ুক্তক প্ৰদান কৰি বিষয়টোৰ প্ৰতিলিপি আকাৰে গৃহ সচিব, ভাৰত চৰকাৰ, যুটীয়া গৃহ সচিব, ভাৰত চৰকাৰৰ মুখ্য সচিব, অসম চৰকিৰকো অৱগত কৰিছে৷ এক বিবৃতি যোগে আটছা স্বতন্ত্ৰৰ শিৱসাগৰ জিলা সমিতিৰ সভাপতি সুৰেশ তাতী আৰু সম্পাদক ঔম প্ৰকাশ চিকে জানিবলৈ দিয়ে৷

জামুগুৰিহাট

জৰুৰী সেৱাসমূহৰ ভিতৰত বিদ্যুৎ সেৱাও অন্যতম৷ কিন্তু সেই সেৱাৰ লগত জড়িত লোকৰ সংখ্যা যেতিয়া বিভাগটোত তাকৰ হয়, তেতিয়াই দেখা দিয়ে যথেষ্ট সমস্যাৰ৷ তেনে এটি কাৰ্যালয়েই হৈছে জামুগুৰিহাটৰ জামুগুৰি বিদ্যুৎ উপ সংমণ্ডল বিষয়াৰ কাৰ্য্যালয়৷ এফালে জীয়াভৰলীৰপৰা নাগশংকৰ আনফালে পানপুৰ ঘাটৰপৰা অৰুণাচল চিজুছালৈকে প্ৰায় ১৮শ বৰ্গ কিলোমিটাৰ জুৰি বিস্তৃত উপ সংমণ্ডলটোৰ কৰ্মচাৰীৰ অভাৱে গ্ৰাহক জনসাধাৰণক বাৰুকৈয়ে অসুবিধাত পেলোৱা পৰিলক্ষিত হৈছে৷ বিদ্যুৎ উপ সংমণ্ডলটোৰ অধীনত বিদ্যুৎ যোগান ধৰিবৰ বাবে প্ৰায় ৩শ টাৰো অধিক ট্ৰেন্সফৰ্মাৰ থকা কাৰ্যালয়টোত বৰ্তমান বিষয়া কৰ্মচাৰী আছে মাত্ৰ ২৬ গৰাকী৷ বিশেষকৈ প্ৰাকৃতিক দূৰ্য্যোগ যেনে: বতাহ, ধুমুহা, বৰষুণ আদি হ’লেই লাইন মেন আৰু সহায়কৰ অভাৱে বাৰুকৈয়ে বিপদত পেলাইছে বিদ্যুৎ উপ সংমণ্ডল বিষয়াৰ কাৰ্যালয়টিক৷ প্ৰাপ্ত তথ্য অনুসৰি জামুগুৰি বিদ্যুৎ উপ সংমণ্ডলৰ অধীনত ১১ কেভি লাইনৰ ৫টাকৈ অভিযোগ কেন্দ্ৰ অৰ্থাৎ ফিডাৰ আছে৷ এইসমূহৰ ভিতৰত ৮৬ কিঃমিঃ জুৰি বিস্তৃত এশৰো অধিক ট্ৰেন্সফৰ্মাৰ থকা জামুগুৰি ফিডাৰটোত ১গৰাকী লাইনমেন আৰু ১ গৰাকী সহায়ক, ১১২ কিঃমিঃ জুৰি অতি ভিতৰুৱা অঞ্চললৈকে বিস্তৃত ৭৬ টাকৈ ট্ৰেন্সফৰ্মাৰ থকা ধলাইবিল ফিডাৰটোত ১ গৰাকী লাইনমেন আৰু ২ গৰাকী সহায়ক, ১২৮ কিঃমিঃ জুৰি বিস্তৃত ৮২ টাকৈ ট্ৰেন্সফৰ্মাৰ থকা ইটাখোলা ফিডাৰটোত লাইনমেন শূন্য হোৱাৰ বিপৰীতে সহায়ক ১ গৰাকী, ৭৮ কিঃমিঃ বিস্তৃত ৫৬ টা ট্ৰেন্সফৰ্মাৰ থকা পানপুৰ ফিডাৰটোত আৰু ৪৮ কিঃমিঃ জুৰি বিস্তৃত চতিয়া ফিডাৰটোত বিভাগীয় কৰ্মচাৰীৰ অভাৱৰ বাবেই অন্য অভিজ্ঞ লোকক অস্থায়ীভাৱে লৈ কাম চলাবলগীয়া হৈছে৷ জানিব পৰা মতে ৩০টা ট্ৰেন্সফৰ্মাৰৰ বিপৰীতে এগৰাকী লাইনমেন আৰু ২ গৰাকী সহায়কৰ প্ৰয়োজন যদিও জামুগুৰি বিদ্যুৎ উপ সংমণ্ডলটোৰ অধীনত থকা তিনি শতাধিকৰো অধিক ট্ৰেন্সফৰ্মাৰৰ বিপৰীতে বৰ্তমান বিভাগীয় লাইনমেন আছে মাত্ৰ ২ জন আৰু সহায়ক আছে মাত্ৰ ৭ জন৷ যাৰ বাবে কেবাগৰাকীও অস্থায়ী কৰ্মচাৰী লগত লৈ কাম কৰিবলগীয়া হয় কাৰ্যালয়টিৰ উপ সংমণ্ডল বিষয়াগৰাকীয়ে৷ কেৱল ফিডাৰসমূহত কাম কৰা লোকৰ সংখ্যাই যে তাকৰ তেনে নহয় কাৰ্যালয়টিত কাম পৰিচালনা কৰা লোকৰ সংখ্যাও নগন্য৷ নিয়ম অনুসৰি কাৰ্যালয়টিৰ কামকাজ পৰিচালনা কৰিবৰ বাবে ৪ গৰাকী সহায়ক আৰু ৪ গৰাকী ছশইটছ ব’ৰ্ড অপাৰেটৰ লাগে যদিও আছে মাত্ৰ ৬ জন৷ যাৰ বাবে কৰ্মচাৰীৰ অভাৱৰে জৰ্জৰিত এটি কাৰ্যালয়ে কিদৰে জনসাধাৰণৰ সমস্যা সমাধান কৰিব সেয়া সহজেই অনুমেয়৷ এই ক্ষেত্ৰত সংশ্লিষ্ট বিভাগে শীঘ্ৰে কৰ্মচাৰীৰ অভাৱ দুৰ কৰি কাৰ্যালয়টিৰ কামকাজ সুচাৰৰূপে সমাধান কৰাৰ দিশত ব্যৱস্থা ল’বলৈ দাবী জনাইছে সচেতন মহলে৷

জামুগুৰিহাট

 তলাবন্ধ অব্যাহত থকাৰ মাজতে নদুৱাৰৰ অন্তৰ্গত  ধলাইবিলত মঙলবাৰে সংঘটিত এক ভয়ংকৰ পথ দুৰ্ঘটনাত গুৰুতৰভাৱে আহত হয় দুজন যুৱক। শোণিতপুৰ জিলাৰ জামুগুৰি আৰক্ষী নিবেশৰ অন্তৰ্গত ধলাইবিলত সংঘটিত পথ দুৰ্ঘটনাটোত ধলাইবিলৰ বৰমতা গাঁৱৰ কিষাণ কাৰ্কী আৰু নৰবাহাদুৰ দামাই নামৰ চাইকেল আৰোহী যুৱক দুজন গুৰুতৰভাৱে আহত হৈ উত্তৰ জামুগুৰি চিকিৎসালয়ত ভৰ্তি কৰোৱাৰ লগতে উন্নত চিকিৎসাৰ বাবে চিকিৎসকে দুয়োজনকে তেজপুৰলৈ প্ৰেৰণ কৰে। ঘটনাৰ বিৱৰণী মতে মঙগলবাৰে উক্ত যুৱক দুজন বৰমতাৰ নিজ গৃহৰ পৰা এখন চাইকেলৰে ওলাই আহি ১৫ নং ৰাষ্ট্ৰীয় ঘাইপথেৰে গৈ থকাৰ সময়তে পিছফালে আহি থকা এ এছ ১২ এফ ৮২৮৩  নম্বৰৰ এখন মাৰুতি কাৰে যুৱক দুজনক খুন্দা মৰাৰ ফলতে গুৰুতৰভাৱে আহত হয় দুয়োজন যুৱক৷ জানিব পৰা মতে জিলাখনৰ ৰঙাপৰাৰ ফুলবাৰীৰ গোবিন সিং নামৰ লোকজনে নিজা গাড়ীৰে ইটাখোলাৰ এঘৰ আত্মীয়ৰ পৰা নিজ গৃহ ৰঙাপৰালৈ আহি থকা অৱস্থাতে দুৰ্ঘটনাটো সংঘটিত হয়৷ এই দুৰ্ঘটনাত চাইকেলখনৰ লগতে মাৰুতি কাৰখনৰো ক্ষতি সাধন হয়৷