Kalingapariya: কলংপৰীয়া শাখা সাহিত্য সভাৰ দ্বি-বাৰ্ষিক অধিবেশনৰ সামৰণি: মুখপত্ৰ 'সাঁকো' উন্মোচন
‘অসম সাহিত্য সভা ৰাইজৰ মঞ্চ।ইয়াৰ ১০৮ বছৰীয়া ইতিহাস আছে।অসমৰ ভাষা,(Kalingapariya)সাহিত্য, সংস্কৃতিৰ বিকাশৰ বাবে অসম সাহিত্য সভাই কাম কৰি আহিছে। কিন্তু ১৯ শতিকা আৰু একৈশ শতিকাত যিটো ভাষাৰ সংকট আৰু বিগত ১০ বছৰত আমি যদি চাওঁ, অসমীয়া মাতৃভাষা মাধ্যমৰ ১০ হাজাৰৰো অধিক স্কুল বন্ধ হৈ গ’ল।ই কিন্তু অসমীয়া ভাষা আৰু জাতিটোৰ কাৰণে শুভ লক্ষণ নহয়।’
এই মন্তব্য অসম সাহিত্য সভাৰ নগাঁও জিলাৰ সভাপতি থগিত মহন্তৰ।আজি নগাঁও জিলাৰ কলংপৰীয়া শাখা সাহিত্য সভাৰ ৪৪৭ নং ভোটাইগাঁও নিম্ন বুনিয়াদী বিদ্যালয় প্ৰাংগণত দুদিনীয়াকৈ অনুষ্ঠিত হোৱা পঞ্চবিংশতিতম দ্বি-বাৰ্ষিক অধিবেশনৰ মুকলি সভাত উপস্থিত থাকি নগাঁও জিলাৰ সাহিত্য সভাৰ সভাপতি মহন্তই আৰু কয়- ‘সাহিত্য সমাজৰ দাপোণস্বৰূপ।সকলো মানুহে বুজিব পৰাকৈ সাহিত্য সৃষ্টি কৰিব পাৰিব লাগিব।কলংপৰীয়া শাখা সাহিত্য সভাৰ সভাপতি থুলেশ্বৰ বৰাৰ সভাপতিত্বত অনুষ্ঠিত হোৱা সভাখনত ভাষণ প্ৰসংগত মহন্তই আৰু কয়- ‘আমি নিজকে অসমীয়া বুলি কওঁ।কিন্তু এটা বিশেষ শ্ৰেণী বা সম্প্ৰদায়ক লৈ অসমীয়া জাতি আৰু অসমীয়া ভাষা সৃষ্টি হোৱা নাই।ফৰাচী সাহিত্যিক, বুৰঞ্জী লেখক এডৱাৰ্ড ব্ৰাউনে কৈছিল যে, ভাষাৰ যদি অধঃপতন হয়।ভাষাৰ অধঃপতনে এটা জাতিৰো অধঃপতনৰ আগজাননী দিব পাৰে।কলংপৰীয়া শাখা সাহিত্য সভাৰ উপ-সভাপতি কুমুদ চন্দ্ৰ বৰাই আঁত ধৰা সভাখনত আদৰণি ভাষণ প্ৰদান কৰে কলংপৰীয়া শাখা সাহিত্য সভাৰ প্ৰাক্তন সভাপতি তথা অৱসৰপ্ৰাপ্ত প্ৰধান শিক্ষক কমলা কান্ত বৰাই।
সভাত দীপিকা বৰাৰ সম্পাদনাত প্ৰস্তুত কৰি উলিওৱা শাখাৰ মুখপত্ৰ “সাঁকো” উন্মোচন কৰে অৱসৰপ্ৰাপ্ত অধ্যক্ষ তথা নগাঁও জিলা সাহিত্য সভাৰ নৱ-নিৰ্বাচিত সভাপতি ডঃ শৰৎ বৰকটকীয়ে।উন্মোচক ডঃ বৰকটকীয়ে ভাষণত কয় যে শাখাই প্ৰস্তুত কৰি উলিওৱা মুখপত্ৰখন একোখন ক্ষুদ্ৰ আলোচনীৰ ভিতৰত পৰে। ই সমাজৰ দলিলস্বৰূপ।এটা জাতিক আগবঢ়াই নিয়াৰ ক্ষেত্ৰত এই ক্ষুদ্ৰ আলোচনীবোৰৰ এটা বিশেষ ভূমিকা থাকে।নতুন প্ৰজন্মৰ লেখক সৃষ্টি কৰিব পাৰে এই আলোচনীসমূহে।কিন্তু বৰ্তমান সময়ত উঠি অহা প্ৰজন্মৰ মাজত গ্ৰন্থ পঢ়াৰ মানসিকতা কমি আহিছে বুলি ভাষণত বৰকটকীয়ে উল্লেখ কৰে।সভাত শাখাৰ সম্পাদক দীপাংকৰ ভূঞাই বিগত কাৰ্যকালৰ দুবছৰীয়া প্ৰতিবেদন পাঠ কৰে।সভাত অৱসৰপ্ৰাপ্ত আঞ্চলিক বন বিষয়া তথা লেখক মহেশ নাথে ভাষণ প্ৰদান কৰে।সভাত শাখাৰ প্ৰাক্তন সভাপতি ক্ৰমে কাতিৰাম বৰা, নৰেন্দ্ৰ নাথ বৰা, শৈলেন্দ্ৰ গোস্বামী, অৱসৰপ্ৰাপ্ত শিক্ষক পুনিৰাম শইকীয়া, লেখক ময়ূৰ কুমাৰ বৰা, অৱসৰপ্ৰাপ্ত বিষয় শিক্ষক পুতুল শৰ্মা, কলংপৰীয়া বাৰগঞা সমাজৰ সম্পাদক দিলীপ বৰা, বিশিষ্ট লেখক,শিল্পী গোলাপ বৰা, শাখাৰ প্ৰাক্তন বিষয়বীয়া বিৰিঞ্চি কুমাৰ বৰা,খগেন্দ্ৰ নাথ, উমাকান্ত কলিতা, প্ৰিয়ম্বদা শইকীয়া,শাখাৰ সহ: সম্পাদক গুণকান্ত বৰা, মিত্ৰকমল বৰাকে ধৰি বহু গণ্য-মান্য ব্যক্তি উপস্থিত আছিল।সভাত শলাগৰ শৰাই আগবঢ়ায় আদৰণি সমিতিৰ সম্পাদক তথা সাংবাদিক জয়ন্ত বৰাই।
এই সভাতে অধিবেশনৰ সৈতে সংগতি ৰাখি অনুষ্ঠিত হোৱা ৰচনা, কুইজ, সাধুকোৱা, চিত্ৰাংকন আৰু বৰগীত প্ৰতিযোগিতাৰ স্থানপ্ৰাপ্তসকলক পুৰস্কৃত কৰা হয়।লগতে উক্ত সভাতে ২০২৩ আৰু ২০২৪ বৰ্ষত উচ্চ আৰু উচ্চতৰ মাধ্যমিক শিক্ষান্ত পৰীক্ষাত সুখ্যাতিৰে উত্তীৰ্ণ হোৱা বৃহত্তৰ অঞ্চলৰ ১৫ গৰাকী কৃতী শিক্ষাৰ্থীক অভিনন্দন জনোৱা হয়।সন্ধ্যা বন্তি প্ৰজ্বলনেৰে শাখাৰ দ্বি-বাৰ্ষিক অধিবেশনৰ সামৰণি পৰে। উল্লেখ্য যে আজিৰ সভাতে কালি অনুষ্ঠিত বিষয় বাছনি সভাত ২০২৫- ২৭ বৰ্ষৰ বাবে বাছনিভুক্ত হোৱা নৱ-নিৰ্বাচিত সমিতিখনৰ নামসমূহ ঘোষণা কৰে।
