১১ জানুৱাৰী,২০২৫ঃ (North West Jorhat )স্বদেশ আৰু স্বজাতিৰ সেৱাত নৱপ্ৰজন্ম উদ্বুদ্ধ হোৱা উচিত; চন্দ্ৰকান্ত সন্দিকৈ ঐতিহ্য ভৱনে সকলোকে আদৰি ল’ব। নৱপ্ৰজন্মৰ বাবে অসম সাহিত্য সভাৰ কেন্দ্ৰীয় কাৰ্যালয়ৰ সকলো দুৱাৰ-খিৰিকী খোলা আছে, এই সুযোগ সকলোৱে গ্ৰহণ কৰা বাঞ্চনীয়। অসম সাহিত্য সভাৰ নৱনিৰ্বাচিত প্ৰধান সম্পাদক লেখক-সংগঠক দেৱজিৎ বৰাই আজি যোৰহাটৰ অগ্ৰণী শিক্ষানুষ্ঠান মালৌআলি উচ্চতৰ মাধ্যমিক বিদ্যালয়ত অনুষ্ঠিত ৰাজহুৱা অভিনন্দন অনুষ্ঠানত অংশগ্ৰহণ কৰি এইদৰে কয়।

অসম সাহিত্য সভাৰ অন্তৰ্গত উত্তৰ পশ্চিম যোৰহাট শতদল শাখা সাহিত্য সভাৰ উদ্যোগত আৰু উত্তৰ পশ্চিম যোৰহাটৰ ৰাইজৰ সহযোগত অনুষ্ঠিত হোৱা বৰ্ণাঢ্য সম্বৰ্ধনা সভাখনত উত্তৰ পশ্চিম যোৰহাট ক্ৰীড়া সন্থা, উত্তৰ পশ্চিম যোৰহাট কবি সন্মিলন, উত্তৰ পশ্চিম যোৰহাট আবৃত্তি আৰু সংস্কৃতি পৰিষদ, মৈত্ৰী, জ্ঞান জ্যোতি কলা কৃষ্টি কেন্দ্ৰ, উত্তৰ পশ্চিম যোৰহাট সাংবাদিক সন্থা,কৃসটেল ডাইগনেষ্টিক চেন্টাৰ, বিজেপি ঢ়েকৰগঢ়া মণ্ডল, ২৯৫ নং কুহুমযোগনীয়া প্ৰাথমিক বিদ্যালয়, তৰাজান নাট্য সন্মিলনী, তৰাজান শাখা সাহিত্য সভা, ফুটবল প্ৰশিক্ষণ কেন্দ্ৰ, জ্ঞান জ্যোতি মহিলা সমিতি, গৰখীয়া দ’ল আৰ্যধৰ্মীটোল আদি কৰি ত্ৰিশৰোধিক অনুষ্ঠান-প্ৰতিষ্ঠানে সম্বৰ্দ্ধনা পত্ৰ, চেলেং, গামোচা, জাপি, কিতাপৰ টোপোলা, অংগ বস্ত্ৰ আদিৰে ব্যাপক অভিনন্দন জনোৱা হয়। শতদল শাখাখনৰ সভাপতি প্ৰদীপ শইকীয়াৰ সভাপতিত্বত অনুষ্ঠিত সভাখনত অসম সাহিত্য সভাৰ কুঁহি উপসমিতিৰ আহ্বায়ক শংকুসিদ্ধ নাথ, প্ৰাক্তন সভাপতিত্ৰয় চিত্তৰঞ্জন বৰুৱা, ডাঃ কৃপাল কুমাৰ শৰ্মা, মানিক চন্দ্ৰ বৰা, প্ৰাক্তন উপসভাপতি বিপুল দুৱৰা, যোৰহাট সাহিত্য সভাৰ সম্পাদক উত্তম কুমাৰ হাজৰিকা, তৰাজান শাখা সাহিত্য সভাৰ সভাপতি জোনা দত্ত, সম্পাদক মনোজ্ঞপ্ৰাণ বৰদলৈ, যোৰহাট ৰেকৰ্ডছ সমিতিৰ সম্পাদক বিদ্যুৎ ভূষণ বৰা, সমাজকৰ্মী অনুপ বৰা, দিলীপ শৰ্মা, প্ৰসেনজিত নেওগ, দেৱানন্দ বৰা, ৰুবুল শৰ্মা, জীনামণি নেওগ, গীতালি কলিতা, সৌৰভপ্ৰাণ বৰা প্ৰমুখ্যে বহু সংখ্যক ভাষাপ্ৰেমীয়ে অংশগ্ৰহণ কৰে । মালৌ আলি উচ্চতৰ মাধ্যমিক বিদ্যালয়ৰ অধ্যক্ষা শ্যামলীমা বৰাই আদৰণী ভাষণ আগবঢ়োৱা সভাখনৰ আঁত ধৰে শাখাৰ প্ৰাক্তন সম্পাদক নৰেন চন্দ্ৰ বৰাই ।

অসম সংগীতেৰে সামৰণি ঘটা ৰাজহুৱা অভিনন্দন সভাখনত শলাগৰ শৰাই প্ৰদান কৰে উত্তৰ পশ্চিম যোৰহাট শাখা সাহিত্য সভাৰ সম্পাদক অশান্ত ৰাতুল দত্তই।

১১ জানুৱাৰী, ২০২৫ গুৱাহাটী : অসমত আধুনিকতাৰ এটা প্ৰধান অংগ হ’ল প্ৰবন্ধ আৰু চিন্তাশীল সাহিত্য। অসমীয়া নৱজাগৰণৰ হোতা আনন্দৰাম ঢেকিয়াল ফুকনে অসমীয়া লৰাৰ মিত্ৰৰ যোগেদি চিন্তাশীল গদ্যৰ পাতনি মেলিছিল। প্ৰশান্ত ৰাজগুৰুৰ সাংবাদিক জীৱনৰ অভিজ্ঞতা আৰু উপলব্ধিৰে সমৃদ্ধ লিখা সমূহে অসমীয়া চিন্তাশীল গদ্যসাহিত্যৰ এক বিশেষ ধাৰাক প্ৰতিনিধিত্ব কৰে। (Prashant Rajguru’s) শুক্রবাৰে গুৱাহাটীৰ প্ৰগতি মেনৰত অনুষ্ঠিত প্ৰশান্ত ৰাজগুৰুৰ ‘ সাগৰ হেৰোৱাৰ দুখ ‘ গ্ৰন্থৰ উন্মোচনী অনুষ্ঠানত আমন্ত্ৰিত বক্তা হিচাপে অংশগ্ৰহণ কৰি লেখক আৰু ৰাজ্যখনৰ আগশাৰীৰ কলা সমালোচক জ্যোতি খাটনিয়াৰে এই মন্তব্য কৰে।

সমালোচক খাটনিয়াৰে কয় যে অসমীয়া জাতীয় জীৱনক চুই যোৱা বিভিন্ন বিষয়ৰ সমীক্ষাত্মক বিশ্লেষণৰে প্ৰাগ নিউজৰ মুখ্য সম্পাদক প্ৰশান্ত ৰাজগুৰুৱে সমকালীন অসমৰ ৰাজনৈতিক আৰু অৰ্থনৈতিক প্ৰেক্ষাপটক বিশেষ দৃষ্টিৰে বিশ্লেষণ কৰিছে। এই গ্ৰন্থত সাহিত্যৰথী লক্ষ্মীনাথ বেজবৰুৱা সম্বন্ধীয় আৰু ভূপেন হাজৰিকাৰ জীৱনী কেন্দ্ৰিক দুটা বিতৰ্কক পূৰ্ণ ৰূপত সন্নিবিষ্ট কৰি জ্যেষ্ঠ সাংবাদিক প্ৰশান্ত ৰাজগুৰুৱে অসমীয়া বৌদ্ধিক জীৱনৰ এক গুৰুত্বপূৰ্ণ অধ্যায় চিৰদিনৰ বাবে সংৰক্ষিত কৰি ৰাখিছে। ৰাজগুৰুৰ গদ্যৰীতিৰ বৈশিষ্ট্য আৰু মানৱতাবাদী চিন্তাধাৰাৰ উৎস সম্পৰ্কেও খাটনিয়াৰে তেওঁৰ বক্তৃতাত উল্লেখ কৰে। ইমানুৱেল কান্টৰ দৰ্শন, মহাপুৰুষ শ্ৰীমন্ত শংকৰদেৱৰ মানৱ প্ৰেম, জাঁ পল ছাৰ্ত্ৰেৰ অস্তিত্ব সম্পৰ্কীয় চিন্তাই কেনেদৰে আধুনিক মানুহক চুই গৈছে, সেই বিষয়েও খাটনিয়াৰে উল্লেখ কৰে।

কুৰি শতিকাৰ তিনিগৰাকী প্ৰখ্যাত গদ্য লেখক বাৰ্ট্ৰেণ্ড ৰাছেল , জাঁ পল ছাৰ্ত্ৰে আৰু জৰ্জ অৰৱেলৰ সাহিত্য আৰু সংবাদ জগতত প্ৰভাৱৰ বিষয়েও খাটনিয়াৰে কয়। গ্ৰন্থখনৰ শিৰোনামটোৰ তাৎপৰ্য সন্দৰ্ভতো খাটনিয়াৰে এক চমু বিশ্লেষণ আগবঢ়ায়। সাগৰৰ ধাৰণাটোৱে মাধৱ কন্দলীৰ দিনৰ পৰা অসমীয়া মানুহক কিদৰে চুই আহিছে, এই সম্পৰ্কেও তেওঁ আলোচনা কৰে। গ্ৰন্থখনত সাংবাদিক ৰাজগুৰুৱে কিদৰে গ্ৰাম্য জীৱনলৈ নামি অহা পৰিবৰ্তিত অৰ্থনৈতিক সংকট, মূল্যবোধৰ অৱক্ষয় আদিক বুদ্ধিদ্বিপ্ততাৰে তুলি ধৰিছে, সেয়া বক্তা খাটনিয়াৰে তেওঁৰ বক্তৃতাত উল্লেখ কৰে। গ্ৰন্থখন উন্মোচন কৰে প্ৰাগ চেনেলৰ স্বত্বাধিকাৰী ড° সঞ্জীৱ নাৰায়ণে। গ্ৰন্থখনৰ সন্দৰ্ভত গুৱাহাটী বিশ্ববিদ্যালয়ৰ ৰাজনীতি বিজ্ঞানৰ অধ্যাপক অখিল ৰঞ্জন দত্ত আৰু চিন্তাশীল লেখক ময়ুৰ বৰাইও দুটা তাৎপৰ্যপূৰ্ণ বক্তৃতা প্ৰদান কৰে। অনুষ্ঠানৰ আঁত ধৰে প্ৰাগ নিউজৰ সাংবাদিক দীপক শৰ্মাই। অনুষ্ঠানটোত ৰাজ্যখনৰ বিভিন্ন ক্ষেত্ৰৰ বহু গুণী জ্ঞানী ব্যক্তি উপস্থিত থাকে। উল্লেখ্য যে গ্ৰন্থখন প্ৰকাশ কৰিছে অসম পাবলিছিং কোম্পানীয়ে।