১৬ ডিচেম্বৰ,২০২৪: Kakopathar College।তিনিচুকীয়া জিলাৰ বৃহত্তৰ কাকপথাৰ অঞ্চলত উচ্চ শিক্ষাৰ অনুষ্ঠান কাকপথাৰ মহাবিদ্যালয়খন ১৯৯৫ চনত ৰাইজৰ সহযোগত স্থাপন কৰা হয়। পৰবৰ্তী সময়ত চৰকাৰী নিয়ম অনুসৰি কণিষ্ঠ মহাবিদ্যালয় আৰু বিগত ২০২০ চনৰ নতুন শিক্ষা নীতি অনুসৰি জেষ্ঠ মাধ্যমিক বিদ্যালয় ৰূপে মহাবিদ্যালয়খনে সেৱা আগবঢ়াই আছে। কিন্তু এই মহাবিদ্যালয়খনৰে ভূমি দখলত কৰাত নামিছে ভাৰতীয় সেনা ।
উল্লেখ্য যে, মহাবিদ্যালয়খনে কুমচাং চাহবাগিছাৰ পৰা ১৫ বিঘা মাটিৰ আৱণ্টণ লাভ কৰিছিল। বিদ্যালয়ৰ নিচেই কাষতে থকা পর্যটন গৃহটো আজি বহু বছৰৰ পৰা ভাৰতীয় সেনা বাহিনীৰ চাউনী হিচাপে ব্যৱহাৰ কৰি আহিছে যদিও বর্তমান সেনা বাহিনীয়ে বিদ্যালয়খনৰো এক বৃহৎ অংশৰ মাটিত অস্থায়ী শিবিৰ সম্প্ৰসাৰণ কৰিছে। সম্প্ৰতি সেনাই শিবিৰ সম্প্ৰসাৰণ কৰা বিদ্যালয়ৰ মাটিত এটা ‘টাৱাৰ নিৰ্মাণৰ কাম আৰম্ভ কৰিছে। এই নিৰ্মাণ কাৰ্যই মহাবিদ্যালয়খনৰ প্ৰায় দুবিঘা মাটি অধিগ্ৰহণ কৰিব । ইয়াকে লৈ এতিয়া শংকিত হৈ পৰিছে বিদ্যালয় কৰ্তৃত্বপক্ষৰ লগতে স্থানীয় ৰাইজ । কিয়নো বিদ্যালয়খনত নতুনকৈ বাণিজ্য শাখা অন্তৰ্গভুক্ত কৰাৰ উপৰিও বিজ্ঞান শাখাৰ বাবেও আবেদন জনোৱা ।
এনে ক্ষেত্ৰত শ্ৰেণী কোঠা সম্প্ৰসাৰণৰ দিশটোত ভূমি অধিগ্ৰহণ কৰি ৰাখিলে অসুবিধাৰ সৃষ্টি হ’ব । কিন্তু এই স্পৰ্শকাতৰ বিষয়টো জিলা প্ৰশাসনক অৱগত কৰাৰ পাছতো বৰ্তমানলৈকে কোনো যথোচিত ব্যৱস্থা গ্ৰহণ নকৰাটোহে আশ্বৰ্যজনক বিষয় । উদ্বেগ প্ৰকাশ কৰিছে মহাবিদ্যালয় কৰ্তৃপক্ষই । এতিয়া জিলা প্ৰশাসনে বিষয়টো কিদৰে গ্ৰহণ কৰে সেয়া পৰৱৰ্তী সময়তহে লক্ষণীয় হ’ব ।
