গুৱাহাটী, ৬ ডিচেম্বৰঃ উত্তৰ-পূৰ্বাঞ্চলৰ প্ৰকৃতিৰ অপূৰ্ব সৌন্দৰ্যক ভাল পোৱা স্ব-শিক্ষিত শিল্পী ড০ পুষ্প গগৈৰ(Dr. Pushpa Gogoi) একক চিত্ৰ প্ৰদৰ্শনী শ্ৰীমন্ত শংকৰদেৱ কলাক্ষেত্ৰৰ কলা ভৱনত চলি আছে।(Solo Painting Exhibition) বুধবাৰে বিয়লি চাৰি বজাত আৰম্ভ হোৱা চিত্ৰ প্ৰদৰ্শনীখনৰ দ্বাৰ মুকলি কৰে শ্ৰীমন্ত শংকৰদেৱ কলাক্ষেত্ৰৰ(Srimanta Sankardev Kalakshetra) সচিব সুদৰ্শন ঠাকুৰে।

আৰম্ভণি অনুষ্ঠানত বিশিষ্ট শিক্ষাবিদ ড০ শচীন্দ্ৰ কুমাৰ বৰঠাকুৰ, দিলীপ তামুলী, শোভাকৰ লস্কৰ আৰু অতুল চন্দ্ৰ বৰুৱাই বক্তব্য ৰাখে। ড০ পুষ্প গগৈৰ একক চিত্ৰ প্ৰদৰ্শনীখন থানেশ্বৰ ব্ৰহ্মৰ প্ৰতিচ্ছবিৰ সন্মুখত বন্তি প্ৰজ্বলনেৰে দ্বাৰ মুকলি কৰা হয়। ১০ ডিচেম্বৰলৈকে চলিবলগীয়া একক চিত্ৰ প্ৰদৰ্শনীখন শিল্পী মনেশ্বৰ ব্ৰহ্মৰ নামত উৎসৰ্গা কৰিছে চিত্ৰশিল্পী ড০ পুষ্প গগৈয়ে।

বিভিন্ন স্থানত কৰ্মসূত্ৰে লাভ কৰা অভিজ্ঞতাই শিল্পীগৰাকীক চিত্ৰ অংকণত বিষয় নিৰ্বাচনত সহজ কৰি তোলে। বৰ্তমান ধেমাজিত নিগাজিকৈ থকা শিল্পীগৰাকীয়ে শ্ৰীমন্ত শংকৰদেৱ কলাক্ষেত্ৰৰ কলা ভৱনত চলি থকা একক চিত্ৰ প্ৰদৰ্শনীখনত বিভিন্ন বিষয়ত তুলি ধৰা ৯২খন চিত্ৰ দৰ্শকক বাবে প্ৰদৰ্শন কৰিছে।

১৯৪৭ চনত ধেমাজিত জন্মগ্ৰহণ কৰা ড০ পুষ্প গগৈয়ে ধেমাজি হাইস্কুলৰ পৰা মেট্ৰিক পাছ কৰি কটন কলেজৰ পৰা বি এছ চি, গুৱাহাটী বিশ্ববিদ্যালয়ৰ পৰা এম এছ চি, গুৱাহাটী বিশ্ববিদ্যালয়ৰ পৰা ড০ শশীন্দ্ৰ কুমাৰ বৰঠাকুৰৰ তত্বাৱধানত ‘উত্তৰ-পূৰ্বাঞ্চল তাই খামতিসকলৰ লোক উদ্ভিদ বিজ্ঞান’ বিষয়ত পি এইচ ডি লোৱাৰ লগতে গুৱাহাটী বিশ্ববিদ্যালয় পাঠ্যপুথি প্ৰণয়ন বিভাগৰ চিত্ৰ শিল্পী হিচাপেও কৰ্মজীৱন আৰম্ভ কৰে।(Thailand)

বিভিন্ন চৰকাৰী কাৰ্যালয়ত দায়িত্ব পালন কৰাৰ পিছত ধেমাজি মহাবিদ্যালয়ৰ পৰা উদ্ভিদ বিজ্ঞান বিভাগৰ প্ৰবক্তা হিচাপে ২০০৬ চনত অৱসৰ গ্ৰহণ কৰে। ইয়াৰ পূৰ্বে গাৰো হিলছ জিলাত মেঘালয় কৃষি বিভাগত প্লেণ্ট প্ৰটেকচন ইন্সপেক্টৰ হিচাপেও দায়িত্ব পালন কৰিছিল। ধেমাজিৰ পলসুৱা মাটিৰ সোণসেৰীয়া সুৱাসৰ মতলীয়া পৰিৱেশত ছবি অংকণ কৰাৰ অভিজ্ঞতা অভিনৱ।(ASEAN)

শিল্পীগৰাকীয়ে বিদ্যালয়-মহাবিদ্যালয়ত অধ্যয়ন কৰি থকাৰ সময়ৰ পৰাই ছবি অংকণ কৰি বিভিন্ন সময়ত বহু ঠাইত কৰি আহিছে। চিত্ৰ-ভাস্কৰ্য, নাটক, সংগীতৰ এক শিল্প কলা গোষ্ঠী এভাৰগ্ৰীণ আৰ্টিষ্ট এছ’চিয়েচনৰ প্ৰতিষ্ঠাপক সম্পাদক, পূৰ্বাঞ্চল তাই সাহিত্য সভাৰ প্ৰতিষ্ঠাপক সম্পাদক আৰু পিছলৈ সভাপতি, ‘কিংখাপ’ৰ প্ৰতিষ্ঠাপক সম্পাদক, লোক অভিজ্ঞান সমাজ আৰু জনজাতি আৰু অন্য জনগোষ্ঠী গৱেষণা কেন্দ্ৰ ‘উত্তৰ-পূৰ্বাঞ্চল তাই’ৰ সঞ্চালক, ধেমাজিত ১৯৭৭ চনত প্ৰতিষ্ঠা কৰা সদৌ অসম পদ্মনাথ গোহাঞিবৰুৱা সোঁৱৰণি একাংক নাট প্ৰতিযোগিতাৰ প্ৰতিষ্ঠাপক আৰু পিছলৈ উপদেষ্টা, অসম নাট্য সন্মিলনৰ ধেমাজি শাখাৰ প্ৰতিষ্ঠাপক সম্পাদক, অসম বিজ্ঞান সমিতিৰ আজীৱন সদস্য, জাৰ্মানীৰ বাৰ্লিনৰ পৰা প্ৰকাশিত গৱেষণামূলক জাৰ্নেল ‘তাই কালচাৰ’ৰ উপদেষ্টা-সদস্যৰ লগতে অসম সাহিত্য সভাৰ কেইবাবাৰো কাৰ্যকৰী সদস্যৰ দায়িত্ব পালন কৰে।

১৯৭৭ চনত স্থাপন কৰা ধেমাজি কলা মন্দিৰৰ প্ৰতিষ্ঠাপক সম্পাদক, সন্মিলিত সাহিত্য সভা মঞ্চৰ সভাপতিৰ দায়িত্ব পালন কৰাৰ লগতে তাই গৱেষণাৰ বাবে চীন, থাইলেণ্ডকে ধৰি বিভিন্ন স্থানলৈ আন্তৰ্জাতিক আলোচনা চক্ৰত যোগদান কৰাৰ লগতে উদ্ভিদ বিজ্ঞানৰ লোক উদ্ভিদ বিজ্ঞান বিভাগ অথবা বনৌষধি পৰম্পৰাৰ বিভিন্ন ৰাজ্যিক, ৰাষ্ট্ৰীয় আৰু আন্তঃৰাষ্ট্ৰীয় ছেমিনাৰত যোগদান, ডকুমেেণ্টৰী, নাটৰ লগতে অন্যান্য কলা, সাহিত্য, সংস্কৃতিৰ বিভিন্ন সংগঠনৰ সৈতে সক্ৰিয়ভাৱে জড়িত হোৱাৰ লগতে বহু সামাজিক কামো কৰি আহিছে।

কটন মহাবিদ্যালয়ত অধ্যয়ন কৰাৰ সময়তেই ছবি অঁকাত বিশেষভাৱে গুৰুত্ব আৰোপ কৰি জ্যেষ্ঠসকলৰ লগতে শিক্ষাগুৰু আৰু বহুকেইগৰাকী কলাৰ গুৰুৰ পৰা প্ৰশংসা আৰু আশীৰ্বাদ লাভ কৰা ড০ গগৈয়ে ১৯৭৩ চনত গুৱাহাটীৰ নবীন চন্দ্ৰ বৰদলৈ ভৱনত প্ৰথমবাৰৰ বাবে একক চিত্ৰ প্ৰদৰ্শনীৰে কলামোদীৰ মন-প্ৰাণ জয় কৰিবলৈ সক্ষম হয়।

গুৱাহাটীৰ ৰাজ্যিক কলা বিথিকা তথা অসম সাহিত্য সভাৰ ভগৱতী প্ৰসাদ বৰুৱা ভৱনত ১৯৮২ চনত আৰু দ্বিতীয়বাৰৰ বাবে ১৯৮৬ চনত একক প্ৰদৰ্শনী আয়োজন কৰাৰ লগতে ২০০৩ চনত ধেমাজিৰ কিংখাপ আৰ্ট গেলেৰীত, ধেমাজিৰ কবি গোষ্ঠী ‘আৰ্চি’ৰ উদ্যোগত ২০০৫ চনত ধেমাজি প্ৰেছ ক্লাব ভৱনত, শিল্পীগৰাকীৰ ৬২সংখ্যক জন্মদিনত অভিনন্দন গ্ৰন্থ উন্মোচনৰ লগতে ২০০৯ চনত জিলা সাহিত্য সভা আৰু কিংখাপৰ উদ্যোগত ধেমাজি কিংখাপ আৰ্ট গেলেৰীত একক চিত্ৰ প্ৰদৰ্শনীৰ আয়োজন কৰে।

আনহাতে, ৰাজ্যৰ লগতে বিভিন্ন স্থানত দলীয় চিত্ৰ প্ৰদৰ্শনীতো শিল্পীগৰাকীৰ চিত্ৰ প্ৰদৰ্শন কৰা হয়। ১৯৮৫ চনত শ্বিলঙৰ ছেইণ্ট এডমাণ্ডছ কলেজ, ১৯৬৬ চনত কমল বাইলুঙৰ সৈতে ধেমাজি সাহিত্য সভাৰ উদ্যোগত ধেমাজি প্ৰমোদ ভৱনত, ১৯৬৮ চনত বি বৰুৱা মহাবিদ্যালয়ত, অমূল্য বৰুৱাৰ সৈতে ১৯৬৯ চনত কটন মহাবিদ্যালয়ত, ১৯৭০ আৰু ১৯৭১ চনত কটন মহাবিদ্যালয়ত দলীয় বাৰ্ষিক প্ৰদৰ্শনী, ১৯৭২ আৰু ১৯৭৩ চনত গুৱাহাটী বিশ্ববিদ্যালয়ত দলীয় বাৰ্ষিক প্ৰদৰ্শনী, ১৯৭৩ চনত গুৱাহাটী বিশ্ববিদ্যালয়ত গুৱাহাটী বিশ্ববিদ্যালয় যুৱ মহোৎসৱৰ প্ৰদৰ্শনী, ১৯৭৪ চনত অসম ফাইন আৰ্ট এণ্ড ছ’চাইটিত (গুৱাহাটী) আয়োজিত শিল্প কৰ্মশালাত, মেঘালয় কৃষি বিভাগৰ তুৰাত কৃষি মেলাত, ৰবীন্দ্ৰ ভৱনত অসম শিল্পীসকলৰ দলীয় চিত্ৰ প্ৰদৰ্শনী আৰু ইন্দ্ৰ কোচৰ সৈতে চিত্ৰ প্ৰদৰ্শনী, ডিব্ৰুগড়, লখিমপুৰ, বিশ্বনাথ চাৰিআলিকে ধৰি বহু স্থানত দলীয়ভাৱে চিত্ৰ প্ৰদৰ্শনীত অংশগ্ৰহণ কৰাৰ লগতে অসম সাহিত্য সভাৰ উদ্যোগত অসম ষ্টেট আৰ্ট গেলেৰীত চিত্ৰ প্ৰদৰ্শন কৰে।

চীনৰ কুনমিঙত অনুষ্ঠিত কৰ্মশালাত যোগদান কৰাৰ লগতে বেংককৰ থাইলেণ্ড কালচাৰ কমিচনৰ দলীয় প্ৰদৰ্শনীত অংশগ্ৰহণ কৰাৰ লগতে মিজোৰাম, নগালেণ্ড, মণিপুৰ, অৰুণাচল, বেংকক, চীন, বাৰ্লিন, কিংখাপ আৰ্ট গেলেৰীৰ লগতে অসমৰ বিভিন্ন স্থানত ব্যক্তিগত সংৰক্ষণত শিল্পীগৰাকীৰ চিত্ৰ সংৰক্ষণ কৰা হৈছে। শিল্পীগৰাকীয়ে বহুকেইখন গ্ৰন্থ ৰচনা কৰাৰ লগতে ‘পাৱেল ক্লেৰ অন মডাৰ্ণ আৰ্ট’ গ্ৰন্থখন অনুবাদ কৰিছিল।

১৯৮১ চনত অসম সাহিত্য সভাই তেওঁ ৰচনা কৰা চিত্ৰ সম্পৰ্কীয় গ্ৰন্থ ‘আধুনিক পাশ্চাত্য চিত্ৰ শৈলী’, চুম্‌ফ্ৰা প্ৰকাশনৰ ‘প্ৰসংগ চিত্ৰকলা’, ‘চিত্ৰকলাৰ শিক্ষা’, আধুনিক পাশ্চাত্য চিত্ৰ শৈলী (বৰ্ধিত সংস্কৰণ)’, ‘অসমৰ আধুনিক শিল্পকলাৰ ইতিহাস ঃ এক ৰেঙণি’, ‘শিল্পকলাৰ কথা’ প্ৰকাশ হৈছে। ইতিমধ্যে বিভিন্ন প্ৰকাশিত অন্যান্য গ্ৰন্থবোৰৰ ভিতৰত ‘আহোম যুগৰ ভাস্কৰ্য্য আৰু স্থাপত্য’, ‘থাইলেণ্ড এখন তাই দেশ চাই আহিলোঁ’, ‘চ্যুকাফা য’ৰ পৰা আহিছিল’ (শ্বান ৰাজ্য ভ্ৰমণ), উপন্যাস ‘মনালিছা’, ‘চাও-লুং-চ্যুকাফা’, সম্পাদনা ‘তাই সংস্কৃতি’, নাট সংকলন ‘দৰবাৰী ৰাগৰ মুৰ্চনা’, নোমল গগৈৰ সৈতে ভাবানুবাদ ‘পাক পেঞকাকা— আহোম সৃষ্টিৰ তত্ব কথা’, ‘আহোম বুৰঞ্জী’, ‘পাখি লগা সিংহ’, ‘তাই ভাষা আৰু সাহিত্য’, চীনা ভাষাৰ পৰা অনুবাদ ‘ম্যুং মাওৰ বুৰঞ্জী’, ড০ অন্য জ্যোতি গগৈৰ সৈতে যুটীয়াকৈ ‘বহু ব্যৱহৃত বনৌষধ’ প্ৰণয়ন।

ইতিমধ্যে বহু বঁটাৰ লগতে সম্বৰ্ধনা গ্ৰহণ কৰা শিল্পীগৰাকীয়ে বিশেষকৈ ৰাজ্য চৰকাৰে প্ৰদান কৰা চ্যুকাফা বঁটা লাভ কৰাৰ লগতে অসম চৰকাৰৰ সাহিত্য আৰু শিল্পী পেন্সনপ্ৰাপকো। বিভিন্ন ঠাই ঘূৰি ভাল পোৱা শিল্পীগৰাকীয়ে থাইলেণ্ড, দক্ষিণ-পূব এছিয়া, লাওচ, ম্যানমাৰ, উত্তৰ ভিয়েটনাম, চীন, য়ুন্‌নাম প্ৰদেশ, ভূটান আৰু নেপাল ভ্ৰমণ কৰিছে।

শিল্পীগৰাকীয়ে কেৱল চিত্ৰ অংকণতেই ব্যস্ত নাথাকি তথ্য চিত্ৰ আৰু ছবি নিৰ্মাণতো সমানে গুৰুত্ব দি আহিছে। পদ্মনাথ গোহাঞিবৰুৱাৰ জীৱনৰ আধাৰত তথ্য চিত্ৰ নিৰ্মাণ কৰাৰ লগতে এৰাতিৰ কাহিনীও নিৰ্মাণ কৰিছিল। দূৰদৰ্শনৰ বিভিন্ন তথ্য চিত্ৰৰ স্কীপ্ট লিখাৰ লগতে থাইলেণ্ডৰ বিভিন্ন তথ্যচিত্ৰৰ নিৰ্দেশক হিচাপেও কাম কৰিছে। তাই আহোমৰ বিভিন্ন বিষয় সামৰি এখন তথ্য চিত্ৰ নিৰ্মাণৰ পৰিকল্পনা কৰা শিল্পীগৰাকীয়ে নৱবৰ্ষত চিত্ৰ প্ৰদৰ্শনৰ বাবে পুনৰ থাইলেণ্ডলৈ যোৱাৰ আঁচনিও যুগুত কৰিছে।