“আমি নিশ্চিত যে এই সহযোগিতাই অসমৰ দক্ষ কৰ্মশক্তিক বিশ্ব উদ্যোগৰ সৈতে নিৰৱচ্ছিন্নভাৱে একত্ৰিত হ’বলৈ সক্ষম কৰিব।”- মন্ত্ৰী জয়ন্ত মল্লবৰুৱা

চৰকাৰ আৰু ঔদ্যোগিক প্ৰতিষ্ঠানৰ মাজত শক্তিশালী সহযোগিতা গঢ়ি তোলাৰ লক্ষ্যৰে দক্ষতা নিয়োগ আৰু উদ্যমিতা বিভাগে আজি ঔদ্যোগিক সন্মিলন, ২০২৪-ৰ আয়োজন কৰে য’ত দক্ষতা নিয়োগ আৰু উদ্যমিতা বিভাগৰ মন্ত্ৰী জয়ন্ত মল্লবৰুৱাই মুখ্য অতিথি হিচাপে অনুষ্ঠান সম্বোধন কৰে। অসমৰ দক্ষতা শিক্ষা খণ্ডক শক্তিশালী কৰাৰ লগতে ৰাজ্যৰ যুৱক-যুৱতীসকলক সাম্প্ৰতিক সময়ৰ কৰ্মশক্তিৰ চাহিদা পূৰণৰ বাবে গঢ়ি তুলিবলৈ প্ৰয়োজনীয় সমাধান সূত্ৰ সন্ধান কৰাই আছিল এই অনুষ্ঠানৰ প্ৰধান লক্ষ্য ।

মুখ্য ভাষণত মন্ত্ৰী বৰুৱাই উদ্যোগৰ দ্বাৰা পৰিচালিত শিক্ষানুষ্ঠানৰ গুৰুত্বপূৰ্ণ ভূমিকাৰ ওপৰত আলোকপাত কৰি ঔদ্যোগিক প্ৰতিষ্ঠানসমূহক অসমৰ দক্ষতা শিক্ষা খণ্ডৰ লগত সক্ৰিয়ভাৱে জড়িত হৈ আই টি আই সমূহৰ বাবে পাঠ্যক্ৰম প্ৰস্তুত কৰা তথা পৰিচালনাৰ যোগেদি শিক্ষানুষ্ঠান সমূহ বিশ্ব মানৰ কৰি গঢ়ি তোলাত পূৰ্ণ সহযোগিতা আগবঢ়াবলৈ আহ্বান জনায়। মন্ত্ৰী বৰুৱাই লগতে কয়- “অসমৰ দক্ষতা শিক্ষাৰ ৰূপান্তৰৰ বাবে আমি প্ৰতিশ্ৰুতিবদ্ধ। ইতিমধ্যে আমি প্ৰতিটো বিধানসভা সমষ্টিত আই টি আই স্থাপন কৰাৰ পৰিকল্পনা কৰিছো আৰু পৰ্যায়ক্ৰমে ৰাজ্যৰ প্ৰতিটো উন্নয়ন খণ্ডলৈ এই অনুষ্ঠান সম্প্ৰসাৰণৰ বাবেও চিন্তা কৰিছো। চৰকাৰৰ অভিলাষী পৰিকল্পনাৰ বিষয়ে মন্ত্ৰীগৰাকীয়ে কয়, “এতিয়ালৈ স্থাপন নোহোৱা ৭০টা সমষ্টিত নতুনকৈ আই টি আই স্থাপন কৰিব বিচাৰিছো। আমি উদ্যোগবিলাকক আই টি আই সমূহৰ দায়িত্ব গ্ৰহণ কৰি, উদ্যোগ-কেন্দ্ৰিক পাঠ্যক্ৰম প্ৰস্তুত কৰিবলৈ আৰু তেওঁলোকৰ প্ৰয়োজন অনুসাৰে দক্ষ কৰ্মশক্তি সৃষ্টি কৰাত সহায় কৰি পূৰ্ণ সহযোগিতা আগবঢ়াবলৈ আহ্বান জনাইছোঁ।”

মন্ত্ৰী বৰুৱাই আছিয়ান আৰু দক্ষিণ-পূব এছিয়াৰ দুৱাৰমুখ স্বৰূপ অসমৰ সুবিধাজনক ভৌগোলিক অৱস্থানৰ ওপৰত গুৰুত্ব প্ৰদান কৰি মন্তব্য কৰি কয়- “এসময়ত অসমক প্ৰান্তীয় অঞ্চল বুলি গণ্য কৰা হৈছিল যদিও এতিয়া ই আছিয়ান আৰু দক্ষিণ-পূব এছিয়াৰ সৈতে ভাৰতৰ সংযোগৰ কেন্দ্ৰবিন্দু হৈ পৰিছে। উদ্যোগৰ সহযোগিতাৰে অসম দেশৰ ভিতৰতে বিকাশৰ ইঞ্জিনত পৰিণত হ’ব পৰা থল আছে।”তুলনামূলক ভাৱে ৰাজ্যখনৰ যুৱ জনগাঁথনিৰ শক্তিক স্বীকাৰ কৰি মন্ত্ৰীগৰাকীয়ে জোৰ দি কয় যে নিবনুৱা সমস্যা দূৰ কৰাৰ বাবে দক্ষতা বিকাশক অগ্ৰাধিকাৰ দিয়াটো অতি প্ৰয়োজনীয়। তেওঁ উদ্যোগ ৪.০-ৰ অধীনত বৰ্তমানৰ আই টি আইসমূহক দক্ষতা বিকাশৰ ‘চেন্টাৰ অফ এক্সেলেন্সলৈ’ (centre of excellence) ৰূপান্তৰিত কৰা টাটা টেকন’লজিছৰ দৰে আগশাৰীৰ সংস্থাসমূহৰ সৈতে চলি থকা সহযোগিতাৰ ওপৰত আলোকপাত কৰে আৰু অন্যান্য উদ্যোগসমূহকো এই গতিধাৰাক অনুসৰণ কৰিবলৈ আহ্বান জনায়।মন্ত্ৰী বৰুৱাই ভাষণৰ সামৰণিত কয়- “আমি নিশ্চিত যে এই সহযোগিতাই অসমৰ দক্ষ কৰ্মশক্তিক বিশ্ব উদ্যোগৰ সৈতে নিৰৱচ্ছিন্নভাৱে একত্ৰিত হ’বলৈ সক্ষম কৰিব।”

এই অনুষ্ঠানত ৮৮ টাতকৈও অধিক আগশাৰীৰ ঔদ্যোগিক প্ৰতিষ্ঠানৰ ১৫০-ৰো অধিক প্ৰতিনিধিয়ে অংশগ্ৰহণ কৰে।
আলোচনাৰ অন্তত Scientech, Festo Controls Pvt. Ltd, Honda CSR, ABB Pvt Ltd. and Janatics-কে ধৰি কেইবাটাও ঔদ্যোগিক সংস্থাৰ সৈতে চৰকাৰৰ বুজাবুজিৰ চুক্তি স্বাক্ষৰিত হয়। এই চুক্তিসমূহৰ লক্ষ্য হৈছে কাৰিকৰী প্ৰশিক্ষণ বৃদ্ধি কৰা, কৰ্মসংস্থাপনৰ সুযোগ বৃদ্ধি কৰা, আৰু অসমৰ দক্ষতা বিকাশৰ পৰিৱেশ তথা আন্তঃগাথঁনি শক্তিশালী কৰা।ঔদ্যোগিক সন্মিলন, ২০২৪-য়ে অসমক দক্ষতা বিকাশ আৰু অৰ্থনৈতিক উন্নয়নৰ ক্ষেত্ৰত এক শক্তিশালী মাত্ৰা প্ৰদান কৰিছে। ই চৰকাৰ আৰু উদ্যোগৰ অংশীদাৰিত্বৰ ক্ষেত্ৰত দেশৰ ভিতৰতে এক নতুন মানদণ্ড স্থাপন কৰিছে।