গোলাঘাট, ২৫ নৱেম্বৰঃ চুতীয়া জনগোষ্ঠীক জনজাতিৰ মৰ্যদা প্ৰদান আৰু স্বায়ত্ব শাসন(Tribalization and Autonomy) প্ৰদানৰ দাবীত সোমবাৰৰ পৰা গোলাঘাটত আমৰণ অনশনৰ(Immortal hunger strike) কাৰ্যসূচী গ্ৰহণ কৰিছে সদৌ অসম চুতীয়া ছাত্ৰ সন্থাই(Chutia Students’ Union)।
‘২৬ৰ নিৰ্বাচনত বিজেপিক গাদীৰ পৰা ওফৰাই দিয়াৰ হুংকাৰ
গোলাঘাট জিলাৰ আয়ুক্ত কাৰ্যালয়ৰ সমীপৰ ত্ৰিমূৰ্তি ক্ষেত্ৰত ৰূপায়ন কৰা এই কাৰ্যসূচীত সদৌ অসম চুতীয়া ছাত্ৰ সন্থাৰ সভাপতি মহেন বৰাসহ দহগৰাকী বিষয়ববীয়াই অংশ গ্ৰহণ কৰিছে।
চৰকাৰে জনজাতিকৰণৰ প্ৰতিশ্ৰতি নিদিয়া পৰ্যন্ত এই কাৰ্যসূচী চলাই যোৱাৰ হুংকাৰ প্ৰদান সংগঠনটোৰ।এই কাৰ্যসূচীত অংশ লৈ সদৌ অসম চুতীয়া ছাত্ৰ সন্থাৰ সভাপতি মহেন বৰাই কয় বৰ্তমানৰ চৰকাৰখনে চুতীয়া জনগোষ্ঠীক চূড়ান্তভাৱে প্ৰতাৰণা কৰি আহিছে৷
প্ৰধানমন্ত্ৰীগৰাকীয়েও ছয় জনগোষ্ঠীৰ জনজাতিকৰণৰ ক্ষেত্ৰত শীঘ্ৰেই ব্যৱস্থা গ্ৰহণ কৰাৰ কথা উল্লেখ কৰিছিল যদিও সেইয়া ফুটুকাৰ ফেনত পৰিণত হ’ল৷ চৰকাৰখনে যদি জনজাতিকৰণৰ ক্ষেত্ৰত কোনোধৰণৰ ব্যৱস্হা গ্ৰহণ নকৰে তেতিয়া আগন্তুক ২০২৬ নিৰ্বাচনত উচিত প্ৰত্যুত্তৰ দিয়া হ’ব বুলি সকীয়াই দিয়ে ৷
তেওঁ লগতে কয় যে অসমৰ মুখ্যমন্ত্ৰী আৰু প্ৰধানমন্ত্ৰীক সঁকিয়াই দিব বিচাৰিছোঁ অসমৰ চুতীয়া জনগোষ্ঠীকে ধৰি ছয় জনগোষ্ঠীক অতি সোনকালে জনজাতিকৰণৰ মৰ্যদা প্ৰদান কৰক। জনজাতিকৰণৰ নামত বাৰম্বাৰ ৰাজনীতি কৰণ কৰা হৈছে, প্ৰতাৰণা কৰা হৈছে আৰু চুতীয়া জাতি ছাত্ৰ সন্থাই প্ৰতাৰণা কেতিয়াও মানি নলয়।
ইয়াৰ উপৰি চুতীয়াসকলক স্বায়ত্বশাসন ব্যৱস্থাৰ পৰা আতৰাই ৰখা হৈছে। আগন্তুক ছয় মাহৰ ভিতৰত চুতীয়া সকলক স্বায়ত্বশাসন ব্যৱস্থা প্ৰদান কৰিব লাগিব আৰু ঐতিহাসিক চুতীয়া ৰাজধানীৰ প্ৰাচীন কৃতিচিহ্নসমূহ(Ancient monuments) দেশে স্বাধীনতা ৭৭ বছৰ অতিক্ৰম কৰাৰ পাছতো সংৰক্ষণৰ ব্যৱস্থা নকৰাটো দুৰ্ভাগ্যজনক আখ্যা দিয়ে।
আগন্তুক ছমাহৰ ভিতৰত চুতীয়া জনগোষ্ঠীক জনজাতিকৰণ নকৰে অহা ‘২৬ৰ নিৰ্বাচনত বিজেপি দলক শাসনৰ গাদীৰ পৰা ওফৰাই পেলোৱাৰ ব্যৱস্থা গ্ৰহণ কৰিবলৈ বাধ্য হ’ম। ভুমিপুত্ৰ(Bhumiputra) হিচাপে আজিৰ তাৰিখত চুতীয়াসকল কিয় প্ৰতাৰিত হৈ আহিছে। আমাৰ ভোক লাগিছে, কিন্তু চৰকাৰে আমাক কেৱল ললিপপ চুপিবলৈ দি আহিছে।
গতিকে প্ৰধানমন্ত্ৰী, জনজাতি মন্ত্ৰী, আৰু অসমৰ মুখ্যমন্ত্ৰীয়ে এটা প্ৰশ্নৰ উত্তৰ দিব লাগে যে চুতীয়াসকলক জনজতিকৰণৰ পৰা কিয় বাদ পৰি ৰ’ল? ইয়াৰ সঠিক উত্তৰ চৰকাৰে আমাক দিব লাগিবই বুলি তেওঁ দাবী কৰে।
এই আমৰণ অনশন কাৰ্যসূচীত সভাপতি মহেন বৰাৰ উপৰি সংগঠনটোৰ সাধাৰণ সম্পাদক ৰাজু চুতীয়া, বিষয়ববীয়া অংশুমান শইকীয়া, সত্যৰঞ্জন হাজৰিকা, সূৰ্য হাজৰিকা, লীলাকান্ত চুতীয়া, ভাস্কৰ বৰা,জয়ন্ত বৰা, ধ্ৰুৱ বৰা আৰু লোহিত শইকীয়াই অংশ গ্ৰহণ কৰিছে।
