২৬ নৱেম্বৰত মহাৰাষ্ট্ৰত নতুন চৰকাৰে শপত লোৱাৰ সম্ভাৱনা৷ পুনৰ মহাৰাষ্ট্ৰৰ মুখ্যমন্ত্ৰীৰূপে চৰ্চালৈ দেৱেন্দ্ৰ ফাড়নাবিছৰ নাম৷ (Maharashtra)

ফলাফল ঘোষণাৰ ২৪ ঘণ্টাৰো অধিক সময় পাৰ হৈ গ’ল। কিন্তু মহাৰাষ্ট্ৰৰ পৰৱৰ্তী মুখ্যমন্ত্ৰী কোন হ’ব সেয়া এতিয়াও স্পষ্ট হোৱা নাই। একনাথ শিণ্ডেৰ শিৱসেনাই দেওবাৰে সন্ধিয়া সংসদীয় দলৰ বৈঠক আহ্বান কৰে। সেই বৈঠকৰ সবিশেষ জানিব পৰা হোৱা নাই যদিও শিৱসেনাৰ সূত্ৰৰ মতে, দলৰ বিধায়কসকলে শিণ্ডেক পুনৰ মুখ্যমন্ত্ৰী হিচাপে নিযুক্তি দিয়াৰ সন্দৰ্ভত প্ৰশ্ন উত্থাপন কৰিছে। এই ক্ষেত্ৰত তেওঁলোকৰ যুক্তি হ’ল- শিন্দেৰ নেতৃত্বত মহাৰাষ্ট্ৰত ‘মহায়ুতি’ মিত্ৰজোঁটে যথেষ্ট সফলতা লাভ কৰিছে। গতিকে তেওঁক মুখ্যমন্ত্রী নিৰূপণ নকৰিলে ভোটাৰলৈ ভুল বার্তা প্রেৰণ হ’ব পাৰে৷(Maharashtra Assembly Election 2024)

খবৰ অনুসৰি বিজেপিয়েও বিধায়কৰ সৈতে আলোচনাত বহিছে। কেৱল এন চি পি (অজিত পাৱাৰ)য়েহে মুখ্যমন্ত্ৰী পদৰ ওপৰত নিজৰ স্থিতি স্পষ্ট কৰিছে। সংসদীয় দলৰ বৈঠকত এন চি পিৰ বিধায়কসকলে অজিতক নেতা হিচাপে বাছি লৈছিল। অৱশ্যে দলৰ জ্যেষ্ঠ নেতা ছগন ভুজবলে বিদায়ী উপ-মুখ্যমন্ত্ৰী অজিত মুখ্যমন্ত্ৰীৰ দৌৰত নথকাৰ কথা স্পষ্ট কৰি কয় যে বিজেপিয়ে যদি দেৱেন্দ্ৰ ফাড়নাবিছক মুখ্যমন্ত্ৰী হিচাপে নিৰ্বাচন কৰে তেন্তে আমি সমৰ্থন কৰিম। এই ক্ষেত্ৰত আমাৰ কোনো আপত্তি নাই।”(Devendra Fadnavis)

২৮৮খন আসনৰ মহাৰাষ্ট্ৰ বিধানসভাত অকল বিজেপিয়ে ১৩২খন আসন লাভ কৰে। আনহাতে মহায়ুটিৰ আন দুই অংশীদাৰ শিৱসেনা (শিন্দে)য়ে ৫৭ খন আৰু এন চি পি (অজিত) ৪১ খন আসন লাভ কৰে। আসনৰ সংখ্যাৰ ক্ষেত্ৰত মহাৰাষ্ট্ৰ বিধানসভা নিৰ্বাচনত বিজেপিৰ এয়া সৰ্বোত্তম ফলাফল। নিজাববীয়াকৈ সংখ্যাগৰিষ্ঠতা লাভ কৰিবলৈ মাত্ৰ ১৩খন আসন বাকী আছে। বিজেপিৰ সূত্ৰৰ মতে, এই পৰিস্থিতিত বহু সংখ্যক বিধায়কে দেৱেন্দ্ৰক মুখ্যমন্ত্ৰী কৰাৰ দাবী উত্থাপন কৰিছে। আৰ এছ এছৰ সমৰ্থনো নাগপুৰৰ এই নেতাৰ সপক্ষে গৈছে। কিন্তু ‘মিত্ৰৰোঁট’ নীতি অনুসৰণ কৰি বিজেপিয়ে এই বিষয়ত এতিয়া কোনো ঘোষণা কৰিব নিবিচাৰে। এই প্ৰসংগত মহাৰাষ্ট্ৰ বিজেপিৰ সভাপতি চন্দ্ৰশেখৰ বাৱানকুলে কয় যে, “মুখ্যমন্ত্ৰী কোন হ’ব সেয়া দলৰ কেন্দ্ৰীয় নেতৃত্ব আৰু সংসদীয় ব’ৰ্ডে নিৰ্ধাৰণ কৰিব।” অংশীদাৰসকলৰ লগত আলোচনা কৰি এই সিদ্ধান্ত লোৱা হ’ব।(Ajit Power)