গুৱাহাটী, ২৪ নৱেম্বৰঃ অৱধাৰিতভাবেই ৩২নং বঙাইগাঁও বিধানসভা সমষ্টিৰ উপ-নিৰ্বাচনৰ ফলাফল অগপ(AGP defeated the Congress) তথা মিত্ৰজোটৰ(Alliance) হাতলৈ গ’ল৷ অক্ষত হৈ থাকিল অগপ দলৰ দুৰ্গ বঙাইগাঁও৷

সমষ্টিটোৰ পৰা নিৰ্বাচিত হ’ল অগপ দলৰ প্ৰাৰ্থী দীপ্তিময়ী চৌধুৰী(Diptimoy Chowdhury)৷ মিত্ৰজোটৰ প্ৰাৰ্থী দীপ্তিময়ী চৌধুৰীৰ বিজয়ে সমষ্টিটোকলৈ যে আন দলে বিজয়ৰ সপোন ৰচি লাভ নাই তাকেই যেন পুনৰবাৰ প্ৰমাণ কৰি দিলে৷(Dainandin Barta)

লগতে অগপ দলৰ জ্যেষ্ঠ নেতা তথা সমষ্টিটোৰ পৰা বিগত ১৯৮৫ চনৰ পৰা একেৰাহে আঠবাৰকৈ নিৰ্বাচিত হৈ অহা ফণীভূষণ চৌধুৰীয়ে সমষ্টিটো যেনেদৰে নিজৰ দখলত ৰাখি আঞ্চলিকতাবাদী ৰাজনীতিৰ দুৰ্গ হিচাপে চিহ্নিত কৰি আহিছিল সেই ধাৰা এই বাৰো অক্ষুন্ন ৰাখিবলৈ সক্ষম হ’ল দলটোৱে৷(NDA vs India)

কেৱল পাৰ্থক্য সমষ্টিটোৰ জনপ্ৰতিনিধিগৰাকী সলনি হ’ল৷ কিন্তু নৱ নিৰ্বাচিত জনপ্ৰতিনিধি গৰাকীও আকৌ অগপ দলকে প্ৰতিনিধিত্ব কৰে৷ তাতোকৈ ডাঙৰ কথাটো হ’ল নৱ নিৰ্বাচিত জনপ্ৰতিনিধি গৰাকী হ’ল সমষ্টিটোৰ প্ৰাক্তন বিধায়ক গৰাকীৰ পত্নী৷ সেয়ে একেখন ঘৰতে সমষ্টিবাসীয়ে লগ পাব সাংসদ আৰু বিধায়িকাক৷

উল্লেখ্য যে ৰাজ্যৰ আন চাৰিটা বিধানসভা সমষ্টিৰ লগতে বঙাইগাঁও বিধানসভা সমষ্টিৰো উপ-নিৰ্বাচনৰ ভোট গণনা শনিবাৰে পুৱা আঠ বজাৰ পৰা আৰম্ভ হয়৷ বঙাইগাঁও মহাবিদ্যালয়ত স্থাপন কৰা ভোট গণনা কেন্দ্ৰত প্ৰথম ৰাউণ্ডৰ পৰাই মিত্ৰজোটৰ প্ৰাৰ্থী দীপ্তিময়ী চৌধুৰীয়ে অগ্ৰগতি লাভ কৰে৷

ইয়াৰ বিপৰীতে কংগ্ৰেছ দলৰ প্ৰাৰ্থী ব্ৰজেনজিৎ সিংহৰ লগতে আন ছয় গৰাকী নিৰ্দলীয় প্ৰাৰ্থীয়ে তেওঁৰ ওচৰ চাপিবলৈকো সক্ষম নহ’ল৷ অৱশ্যে পূৰ্বৰ তুলনাত অগপই ভোট কিছু কম পাইছে৷ ভোট গণনাৰ অন্তত অগপ দলৰ প্ৰাৰ্থী দীপ্তিময়ী চৌধুৰীয়ে মুঠ ৭৪,৭৩৪ টা ভোট লাভ কৰি তেওঁৰ নিকটতম প্ৰতিদ্বন্দ্বী কংগ্ৰেছ দলৰ ব্ৰজেনজিৎ সিংহক ৩৫,১৬৪ টা ভোটৰ ব্যৱধানত পৰাজিত কৰি অসম বিধানসভালৈ নিৰ্বাচিত হয়৷

কংগ্ৰেছ দলৰ প্ৰাৰ্থী ব্ৰজেনজিৎ সিংহই লাভ কৰে মুঠ ৩৯,৫৭০ টা ভোট৷ উল্লেখ্য, কংগ্ৰেছ দলৰো ভোট কমাহে পৰিলক্ষিত হয়৷ কংগ্ৰেছ দলৰ প্ৰাৰ্থীগৰাকীয়ে মিত্ৰজোটৰ প্ৰাৰ্থী গৰাকীক প্ৰত্যাহ্বান জনাব বুলি বহুতে ভাবিছিল যদিও সেয়া নিৰ্বাচনৰ ফলাফলত প্ৰতিফলিত নহ’ল৷

সেইদৰে অগপ দলত প্ৰাৰ্থিত্বকেন্দ্ৰিত সংঘাত সৃষ্টি হোৱাৰ ফলত দলত্যাগ কৰি জিলা সমিতিৰ সাধাৰণ সম্পাদক শৈলেন্দ্ৰ সৰকাৰে নিৰ্দলীয় প্ৰাৰ্থী হিচাপে নিৰ্বাচনত প্ৰতিদ্বন্দ্বিতা আগবঢ়োৱাত অগপ দল তথা প্ৰাৰ্থী গৰাকী শ’লঠেকত পৰিব বুলি বিৰোধী দলৰ লগতে বিভিন্ন মহলত চৰ্চা চলিছিল যদিও তাৰো বিশেষ প্ৰভাৱ নপৰিল৷

একেদৰে পৰিয়ালকেন্দ্ৰিক ৰাজনীতি কৰা বুলি অগপ দলৰ সাংসদ ফণীভূষণ চৌধুৰীৰ বিৰুদ্ধে উত্থাপিত অভিযোগ সন্দৰ্ভতো ভোটাৰ ৰাইজে বিশেষ গুৰুত্ব নিদিলে৷ যাৰ বাবে সকলো জল্পনা-কল্পনাৰ অৱসান ঘটাই শেষ মুহূৰ্তত মিত্ৰজোটৰ প্ৰাৰ্থী দীপ্তিময়ী চৌধুৰীয়ে মাৰিলে বিজয়ৰ হাঁহি৷ নিৰ্দলীয় প্ৰাৰ্থী শৈলেন্দ্ৰ সৰকাৰে লাভ কৰে কেৱল ১৩,৩৮১ টাহে ভোট৷

আনহাতে নিৰ্দলীয় প্ৰাৰ্থী অনুপ কুমাৰ কৰ্মকাৰে ৫,০১৩টা, গৌতম ৰায়ে ২,৮৯৬টা, দীপক দাসে ১,৮৬৮টা, মৃত্যুঞ্জয় ৰাভাই ১,৩৪৫টা আৰু ভদ্ৰেশ্বৰ বৰ্মনে ১,০৯৯টা ভোট লাভ কৰে৷ একেদৰে ন’টাত ভোট পৰে ২,৭১৪ টা৷ সমষ্টিটোৰ পৰা এইবাৰ মুঠ আঠগৰাকী প্ৰাৰ্থীয়ে প্ৰতিদ্বন্দ্বিতা আগবঢ়াইছিল৷

সমষ্টিটোত উপৃনিৰ্বাচনত মুঠ ১,৪২,৬২০ টা ভোট দান হয়৷ ইপিনে মিত্ৰজোটৰ প্ৰাৰ্থী গৰাকীৰ জয় নিশ্চত হোৱাৰ পিছতে ভোট গণনা কেন্দ্ৰৰ বাহিৰত অগপ-বিজেপিৰ দলীয় নেতা-কৰ্মীসকলে প্ৰাৰ্থী গৰাকীকলৈ বিজয় উৎসৱ আৰম্ভ কৰে৷ ফটকা ফুটাই, ৰং খেলি তথা নাচি বাগি আনন্দত আত্মহাৰা হৈ পৰে৷

লগতে দীপ্তিময়ী চৌধুৰীয়ে জয়লাভ কৰাৰ পিছত প্ৰাৰ্থী গৰাকীক দলীয় নেতা-কৰ্মীসকলে বঙাইগাঁও মহাবিদ্যালয়ৰ সন্মুখৰ পৰা এখন ফুলেৰে সজ্জিত বাহনত তুলি বেণ্ড-পাৰ্টী আদিৰে চহৰৰ মাজেৰে বিজয় সমদল উলিয়াই বৰপাৰাৰ জিলা অগপ কাৰ্যালয়লৈ আদৰি আনে৷ এই সময়চোৱাত বিভিন্ন স্থানত সমৰ্থকসকলে ফটকা ফুটাই আনন্দ-উল্লাস প্ৰদৰ্শন কৰে৷

ইপিনে জয়লাভ কৰাৰ পিছত প্ৰাৰ্থী দীপ্তিময়ী চৌধুৰীয়ে সংবাদ মাধ্যমৰ আগত সমষ্টিবাসীৰ লগতে মিত্ৰজোটৰ নেতা – কৰ্মীসকলে ধন্যবাদ জনাই কয় যে ভোটাৰ ৰাইজৰ যথেষ্ঠ সঁহাৰি থকাৰ বাবেই অগপৰ দুৰ্গ অক্ষত হৈ ৰ’ল৷ ৰাইজৰ অগপৰ প্ৰতি আস্থা আৰু বিশ্বাস আছে ৷ সেই বাবেই আমাক ভোট প্ৰদান কৰিছে ৷

তেওঁ বৰ্তমান ৰাইজ তেওঁৰ লগত যিদৰে আছে আগন্তুক দিনবোৰত যাতে থাকে তাৰ বাবে আহ্বান জনায়৷ আনহাতে সমষ্টিটোৰ প্ৰাক্তন বিধায়ক তথা বৰ্তমান বৰপেটা লোকসভা সমষ্টিৰ সাংসদ ফণীভূষণ চৌধুৰীক অগপৰ বৃহৎ জয় সন্দৰ্ভত সোধাত তেওঁ কয় যে বৃহৎ জয় বুলি মই নকওঁ৷ লগতে অগপৰ জয় বুলি নকওঁ৷

এয়া মিত্ৰজোটৰ জয়৷ নিৰ্বাচনটো অগপই অকলে খেলা নাই৷ অগপ, বিজেপি আৰু ইউপিপিএল দল মিত্ৰজোটত আৱদ্ধ হৈ একেলগে খেলিছে৷ সেয়ে এয়া মিত্ৰজোটৰ জয়৷ তেওঁ একেখন ঘৰতে সাংসদ আৰু বিধায়িকাক পালে ৰাইজৰ কিছু সুবিধা হ’ব বুলিও কয়৷ লগতে বিজয়ৰ ব্যৱধানটো তেওঁ ভবাতকৈ কিছু কম হোৱা বুলি কৈ কয় যে এয়া বিভিন্ন কাৰণত হৈছে৷

কিন্তু আমি কিছু ভোট কম পাইছোঁ৷ তেওঁ নিৰ্দলীয় প্ৰাৰ্থী শৈলেন্দ্ৰ সৰকাৰে অগপতকৈ কংগ্ৰেছৰ ভোটহে বেছিকৈ কটা বুলিও কয়৷ ইপিনে কংগ্ৰেছ দলৰ প্ৰাৰ্থী ব্ৰজেনজিৎ সিংহৰ পৰাজয়ৰ মূল কাৰণ সন্দৰ্ভত সাংবাদিকে সোধাত অগপ সাংসদগৰাকীয়ে কয় যে ইয়াত আচলতে ব্ৰজেনজিৎ সিংহৰ পৰাজয় নহয়, মই কংগ্ৰেছ দলৰহে পৰাজয় বুলি কম৷

ইয়াত প্ৰাৰ্থীকেন্দ্ৰিক নিৰ্বাচন নহয়, দল হিচাপে নিৰ্বাচন হৈছে আৰু যিহেতু কংগ্ৰেছৰ প্ৰাৰ্থী গৰাকী পৰাজিত হৈছে, সেয়ে মই কংগ্ৰেছৰ পৰাজয় বুলিহে কম৷ তেওঁ কংগ্ৰেছ দলে প্ৰতিবাৰে পৰাজিত হ’ব বুলিও কয়৷ আনহাতে ২৬ ৰ নিৰ্বাচনকলৈ কি ক’ব বুলি সোধাত তেওঁ কয় যে অসমৰ জনসাধাৰণে মিত্ৰজোটক যেনে ধৰণে আঁকোৱালি লৈছে আৰু আস্থা-বিশ্বাস প্ৰকাশ কৰিছে তাৰ ফলত ২৬ৰ নিৰ্বাচনতো ইয়াৰ প্ৰতিফলন দেখিব৷

সাংসদ গৰাকীয়ে উপ-নিৰ্বাচনত ধৰ্মীয় সংখ্যালঘুৰ ভোট লাভ কৰিবলৈ সক্ষম হোৱা বুলি কৈ কেইবাটাও কেন্দ্ৰত কংগ্ৰেছতকৈ মিত্ৰজোটৰ প্ৰাৰ্থী গৰাকীয়েহে অধিক ভোট লাভ কৰা বুলিও কয়৷ সাংসদ গৰাকীয়ে বঙাইগাঁৱত প্ৰতিষ্ঠান বিৰোধী ঢৌ নাই বুলি কৈ কয় যে আমি ৰাইজৰ যি আশা-আকাংক্ষা আৰু সমস্যা সেইবোৰৰ বুজ লৈ থাকো আৰু ৰাইজে সদায় আমাক কাষতে পায়৷

যাৰ বাবে ৰাইজে যিটো প্ৰতিষ্ঠান বিৰোধী ঢৌ বুলি কোৱা হয় সেইটো তেওঁলোকে পোৱা নাই ৷ সাংসদ চৌধুৰীয়ে লগতে কয় যে সমষ্টিবাসীয়ে তেওঁক যেনেদৰে পাইছিল দীপ্তিময়ী চৌধুৰীকো তেনেদৰে পাব আৰু সহজে ৰাইজৰ লগত মিলি যাব৷ লগতে মিলি গৈ ৰাইজৰ সমস্যাসমূহৰ সৈতে জড়িত পৰিব আৰু সেই সমস্যাসমূহ সমাধান কৰাৰ ক্ষেত্ৰত তেওঁৰো কিছু সঁহাৰি থাকিব বা সহায় পাব৷

তেওঁ কয় যে মই ভাবো মোৰ কাৰ্যকালত যিখিনি উন্নয়ন হৈছিল আৰু হ’বলৈ বাকী আছিল বা আধৰুৱা হৈ আছে এই ডেৰটা বছৰত কৰিবলৈ সক্ষম হ’ব৷ আনহাতে ২৬ত বিজেপিৰে মিত্ৰতা থাকিলে দীপ্তিময়ী চৌধুৰীয়ে পুনৰ প্ৰতিদ্বন্দ্বিতা কৰিব নে বুলি সাংবাদিকে সোধাত কয় যে এতিয়াও সময় আছে৷ সেয়ে আগতিয়াকৈ একো নকওঁ৷ সেইটো সময়ে ক’ব৷ কাৰণ দীপ্তিময়ী চৌধুৰী এগৰাকী গৃহণী আছিল৷ কিন্তু সময়ৰ আহ্বানত আজি নিৰ্বাচন খেলিবলগীয়া হ’ল৷

উপ-নিৰ্বাচনৰ ফলাফল ঘোষণাৰ দিনাই সাংসদ চৌধুৰীক দেখা গল অন্য ৰূপত, বঙাইগাঁৱত চিৰ জীৱন অক্ষুন্ন থাকিব অগপৰ ভেটিঃ

বঙাইগাঁও বিধানসভা সমষ্টিৰ উপ-নিৰ্বাচনত মিত্ৰজোটৰ প্ৰাৰ্থী তথা সাংসদ ফণীভূষণ চৌধুৰীৰ পত্নী দীপ্তিময়ী চৌধুৰী জয় লাভ কৰাৰ দিনাই সাংসদ গৰাকীক দেখা গল এক ব্যতিক্ৰমী ৰূপত৷পত্নীয়ে জয় লাভ কৰাৰ পিছত চাৰিও ফালে দলীয় কৰ্মী-সমৰ্থকসকলে ফটকা ফুটাই তথা নাচি বাগি আনন্দ-উল্লাস প্ৰদৰ্শ কৰাৰ বিপৰীতে সাংসদ গৰাকীক উত্তৰ বঙাইগাঁৱৰ মূল পথৰ দাঁতিৰ এক স্থানত এখন শাক-পাচলিৰ দোকানত বিক্ৰেতাৰ ৰূপতহে দেখা গল ৷

বিক্ৰেতাৰূপী সাংসদ গৰাকীক ক্ৰেতাসকলে আগুৰি ধৰি সামগ্ৰী ক্ৰয় কৰাও পৰিলক্ষিত হ’ল৷এই সন্দৰ্ভত সাংসদ গৰাকীক সোধাত তেওঁ কয় যে কোনো বেলেগ ৰূপত নহয়, ইয়াতে ৰাইজৰ লগত মিলা মিছাকৈ আছো৷ আনহাতে অগপৰ ভেটি অক্ষুন্ন থকাত সুখী নে বুলি সোধাত জ্যেষ্ঠ অগপ নেতাগৰাকীয়ে কয় যে অক্ষু্ন্ন থাকিল আৰু চিৰ জীৱন অক্ষুন্ন থাকিব৷

উল্লেখ্য, কিছু সময় পিছতে মূল পথছোৱাৰে নৱ নিৰ্বাচিত জনপ্ৰতিনিধি দীপ্তিময়ী চৌধুৰীক বাহনত তুলি দলীয় কৰ্মীসকলে বিজয় সমদল উলিয়াই আনি থকাত সাংসদ স্বামীয়ে পুত্ৰ তথা সমৰ্থকৰ সৈতে পথত থিয় হৈ সেই দৃশ্য উপভোগ কৰে ৷ ইপিনে নৱ নিৰ্বাচিত জনপ্ৰতিনিধি তথা পত্নীয়ে তাকে দেখি হাঁহি হাঁহি হাত জোকাৰি যায়৷