যোৰহাট, ১২ নৱেম্বৰঃ অসম জাতীয়তাবাদী যুৱ-ছাত্ৰ পৰিষদৰ দক্ষিণ পশ্চিম আঞ্চলিকৰ অষ্টম দ্বি বাৰ্ষিক অধিৱেশন যোৰহাটৰ ধলাজানত অনুষ্ঠিত হৈ যায়(Dholar Oja Mohendra Chutia)।এই অনুষ্ঠানত পতাকা উত্তোলনৰ পিছতেই প্ৰতিনিধি সভাৰ উদ্বোধন কৰে কেন্দ্ৰীয় সমিতিৰ প্ৰচাৰ সম্পাদক অসীমজ্যোতি শইকীয়াই।

এই অনুষ্ঠানৰ প্ৰতিনিধি সভা আৰু বিষয় বাচনি সভাত যোৰহাট জিলা সমিতিৰ যুটীয়া সম্পাদক পল্লৱ দাস আৰু জিলা সমিতিৰ সাংগঠনিক সম্পাদক ৰঞ্জন শইকীয়াৰ লগতে জিলা সমিতিৰ ভাৰপ্ৰাপ্ত সভাপতি উত্তম মহন্ত, জিলা সাংগঠনিক সম্পাদক প্ৰাঞ্জল দাসৰ উপস্থিতত ২০২৪ পৰা ২০২৬ লৈকে অসম জাতীয়তাবাদী যুৱ-ছাত্ৰ পৰিষদৰ দক্ষিণ পশ্চিম আঞ্চলিক সমিতিৰ সভাপতি সঞ্জীৱ বণিয়া, উপ-সভাপতি মনঞ্জিৎ বণিয়া, বিতু নায়ক, সাধাৰণ সম্পাদক বিনোদ বণিয়া, যুটীয়া সম্পাদক দিৱজ্যোতি সন্দিকৈ আৰু বিশ্বজিৎ বৰাক লৈ ৩১ জনীয়া এখন শক্তিশালী আঞ্চলিক সমিতি গঠন কৰি দায়িত্ব অৰ্পণ কৰা হয়।

আনহাতে দ্বিতীয় দিনাৰ কাৰ্য্যসূচীৰ শুভ উদ্বোধন কৰে ধলাজান অঞ্চলৰ ক্ৰীড়া সংগঠক তথা টেকেলা গাঁও উচ্চ মাধ্যমিক বিদ্যালয়ৰ অৱসৰপ্ৰাপ্ত প্ৰধান শিক্ষক দেৱেন দত্তই।

এই সভাতে ঢোলৰ ওজা মহেন্দ্ৰ চুতীয়ালৈ ‘বৰেণ্য শিল্পী বঁটা’ আৰু নৱ প্ৰজন্মৰ কণ্ঠশিল্পী প্ৰাণদ্বীপ হাজৰিকালৈ(Young Singer Prandheep Hazarika) ‘যুৱ নক্ষত্ৰ বঁটা’ প্ৰদান কৰা হয়।

ইয়াৰ পিছতেই ধলাজান খেলপথাৰত যোৰহাট জিলা ক্ৰীড়া সন্থাৰ পঞ্জীয়নভুক্ত চাৰিটা মহিলা ফুটবল দলৰ মাজত প্ৰতিযোগিতা অনুষ্ঠিত হয়।

এই প্ৰতিযোগিতাত জংঘল ব্লক ক’চিং চেন্টাৰে কাকজান ক’চিঙ চেন্টাৰ ২-১ গ’লত পৰাজিত কৰি প্ৰতিযোগিতাখনৰ খিতাপ লাভ কৰিবলৈ সক্ষম হয়।

এই অনুষ্ঠানৰ বঁটা বিতৰণি‌ সভাত সভাপতিত্ব কৰে অসম জাতীয়তাবাদী যুৱ-ছাত্ৰ পৰিষদৰ যোৰহাট জিলাৰ সাংগঠনিক সম্পাদক প্ৰাঞ্জল দাসে।

এই সভাত কেন্দ্ৰীয় সমিতিৰ সহকাৰী সম্পাদক শিৱ কলিতা, কেন্দ্ৰীয় কাৰ্যনিৰ্বাহক নৱ বৰা, যোৰহাট জিলা ক্ৰীড়া সন্থাৰ সম্পাদক জুল খাউণ্ডৰ লগতে ৰাষ্ট্ৰীয় পুৰস্কাৰপ্ৰাপ্ত শিক্ষক যোগেন দত্ত উপস্থিত থাকে।

এই সভাত বিজয়ী আৰু বিজিত দলক ট্ৰ’ফী আৰু মান পত্ৰ প্ৰদান কৰা হয়। লগতে এই প্ৰতিযোগিতাত অংশগ্ৰহণ কৰা সকলক মান পত্ৰ প্ৰদান কৰা হয়।

উল্লেখযোগ্য যে, এই সভাতে তিনিজন কৃতি শিক্ষক ৰূপজ্যোতি গগৈ, জয়ন্ত হাজৰিকা আৰু ৰাজকুমাৰ গুপ্তাক বিশেষ ভাবে সন্মান জনোৱাৰ লগতে অঞ্চলটোৰ কেইবাজনো জ্যেষ্ঠ নাগৰিকক সন্মান জনোৱা হয়।