গুৱাহাটী, ৮ নৱেম্বৰঃ বিশ্বগুৰুৰ দিশত ভাৰত! শপত লৈয়ে ভাৰতলৈ আহিব ট্ৰাম্প(Donald Trump 2.0)। দ্বিতীয়বাৰৰ বাবে আমেৰিকাৰ ৰাষ্ট্ৰপতি পদত অধিষ্ঠিত হ’বলৈ অগ্ৰসৰ হৈছে ড’নাল্ড ট্ৰাম্প।
ট্ৰাম্প হ’ব আমেৰিকাৰ ৪৭ সংখ্যক ৰাষ্ট্ৰপতি। ট্ৰাম্পে মাৰ্কিন ৰাষ্ট্ৰপতি নিৰ্বাচনত বিজয়ী হোৱাৰ পিছতে এতিয়া আন্তৰ্জাতিক বাণিজ্যত(Global Trade) এক সুদূৰপ্ৰসাৰী প্ৰভাৱ পৰিব বুলি বিভিন্ন বিশেষজ্ঞই মন্তব্য কৰিছে।
বিশেষকৈ ভাৰত(India), ইউৰোপ(Impact On Europe), চীন আদি দেশৰ ড’নাল্ড ট্ৰাম্প ৰাষ্ট্ৰপতি হোৱাৰ সুদূৰপ্ৰসাৰী প্ৰভাৱ পৰিব বুলি বহুতে কৈছে। লক্ষ্যণীয় কথাটো হ’ল ট্ৰাম্পে ৰাষ্ট্ৰপতি(US President) নিৰ্বাচনত বিজয়ী হোৱাৰ পিছতে বিশ্বৰ শ্বেয়াৰ বজাৰত উল্লেখনীয় উত্থান হোৱা পৰিলক্ষিত হৈছে।
ইউৰোপ আৰু অষ্ট্ৰেলিয়াৰ বাহিৰেও লেটিন আমেৰিকাৰ দেশসমূহতো ট্ৰাম্পৰ আগমনে বিশেষ প্ৰভাৱ পেলাব বুলি বিশেষজ্ঞমহলে ধাৰণা কৰিছে। ভাৰতৰ সৈতে আমেৰিকাৰ বাণিজ্যিক সম্পৰ্ক অতি পুৰণি। কিন্তু জ’ বাইডেনৰ দিনত শুল্কক লৈ হোৱা বিবাদৰ বাবে সেই সম্পৰ্কত কিছু ঘূণে ধৰিছিল।
কিন্তু লক্ষ্যণীয় কথাটো হ’ল ড’নাল্ড ট্ৰাম্প যেতিয়া আমেৰিকাৰ ৪৫সংখ্যক ৰাষ্ট্ৰপতি আছিল সেই সময়ত পিছে ভাৰতৰ সৈতে আমেৰিকাৰ বাণিজ্যিক সম্পৰ্কত কোনোধৰণৰ বাধাৰ সৃষ্টি হোৱা নাছিল। ট্ৰাম্পে ইউৰোপ আৰু চীনৰ সৈতে শুক্ল সম্পৰ্কীয় সংশোধনৰ প্ৰস্তাৱ গ্ৰহণ কৰিব পাৰে বিভিন্নজনে এতিয়া ধাৰণা কৰিছে।
যদি ট্ৰাম্পে সুৰক্ষামূলক বাণিজ্য নীতিসমূহ পুনৰ প্ৰৱৰ্তন কৰে তেন্তে তাৰ নেতিবাচক প্ৰভাৱো বিশ্বৰ বিভিন্ন দেশৰ ওপৰত পৰিব পাৰে বুলি বহুতে মন্তব্য কৰিছে। উল্লেখ্য, সুৰক্ষামূলক বাণিজ্য নীতিয়ে ঘৰুৱা উদ্যোগসমূহক অধিক সুৰক্ষা প্ৰদান কৰে আৰু স্থানীয়ভাৱে উৎপাদিত সামগ্ৰী গ্ৰাহকক ক্ৰয় কৰিবলৈ বেছি উৎসাহিত কৰে।
আমেৰিকাই যদি তেনে নীতি গ্ৰহণ কৰে তেন্তে বিশ্ব বহু দেশে আমেৰিকালৈ কৰি অহা সামগ্ৰীৰ ৰপ্তানী ভালেখিনি হ্ৰাস পাব বুলি ধাৰণা কৰা হৈছে। আমেৰিকাই চীনৰ পৰাও বহু সামগ্ৰী আমদানি কৰে।
চীনে আমেৰিকালৈ ৰপ্তানি কৰা বহু সামগ্ৰীৰ ওপৰত পূৰ্বে অতিৰিক্ত শুক্ল লগাইছিল। যি কথাই আমেৰিকাক ক্ষুণ্ণ কৰি তুলিছিল। আমেৰিকাই বহু সামগ্ৰী আমদানি কৰা বন্ধ কৰি দিছিল। বিশেষকৈ চীনৰ পৰা আমেৰিকাই ইলেকট্ৰনিক সামগ্ৰী অধিক আমদানি কৰে।
মেক্ৰ’ হাইভৰ মুখ্য কাৰ্যবাহী বিষয়া বিলাল হাফিজে প্ৰকাশ কৰা অনুসৰি চীনে যদি পূৰ্বৰ সেই নীতিতেই অটল হৈ থাকে তেন্তে ট্ৰাম্পৰ দিনতো চীনৰ সৈতে হয়তো আমেৰিকাৰ বাণিজ্যিক সম্পৰ্ক অধিক শক্তিশালী হৈ নপৰিব। উল্লেখ্য চলিত বৰ্ষৰ অক্টোবৰ মাহত চিকাগ’ৰ ইকন’মিক ক্লাবক ট্ৰাম্পে দিয়া ভাষণত এই বুলি কৈছিল যে তেওঁৰ প্ৰিয় শব্দ হৈছে শুক্ল বা কৰ।
তেওঁ এনে কথাৰ জৰিয়তে আমেৰিকাত উৎপাদিত সামগ্ৰীৰ ওপৰত অধিক শুক্ল আৰোপ কৰাৰ ইংগিতেই হয়তো দিছিল। যদি সেয়াই হয় তেন্তে বহু দেশে আমেৰিকাৰ পৰা আমদানি কৰা বহু সামগ্ৰীৰ আমদানি হ্ৰাস কৰিবলৈ বাধ্য হ’ব।
লক্ষণীয় কথাটো হ’ল ট্ৰাম্পে তেওঁৰ নিৰ্বাচনী প্ৰচাৰৰ সময়তো সকলো আমদানিকৃত সামগ্ৰীৰ ওপৰত দহ শতাংশ শুল্ক আৰোপ কৰা হ’ব বুলি প্ৰতিশ্ৰুতি দিছিল।
যদি সেই প্ৰতিশ্ৰুতি ট্ৰাম্পে পূৰণ কৰে তেন্তে বহু দেশে সামগ্ৰী ৰপ্তানি কৰাৰ ক্ষেত্ৰতো অধিক ধন ভৰিব লাগিব। ইউৰোপৰ বহু দেশে বিলাসী সামগ্ৰীৰ লগতে প্ৰযুক্তি খণ্ডৰ বহু সামগ্ৰী আমেৰিকালৈ ৰপ্তানি কৰি আহিছে।
যদি তেনে সামগ্ৰীৰ ওপৰত দহ শতাংশ কৰ লগোৱা হয় তেন্তে বিভিন্ন দেশে ব্যাপক অৰ্থনৈতিক সংকটৰ গ্ৰাসত পৰিব লাগিব বুলি বিশেষজ্ঞমহলে ধাৰণা কৰিছে।
