কাৰ্বি আংলং স্বায়ত্তশাসিত পৰিষদৰ মুৰব্বী তুলিৰাম ৰংহাঙৰ পৰ্বতসম দুৰ্নীতিৰ কথা সংবাদমাধ্যম আৰু- ছ’চিয়েল মিডিয়াত প্ৰকাশ পোৱাৰ পিছতে এতিয়া তুলিৰামৰ নাজল-নাথল অৱস্থা হৈছে। বহুতে জানিবলৈ দিয়া মতে তুলিৰামে দুৰ্নীতিৰ বাতৰি উন্মোচন হোৱাৰ পিছতে বহু দিন ধৰি ঘৰৰ ভিতৰতে মুখত পিঠা ভৰাই সোমাই আছিল যদিও এতিয়া আসন্ন বিপদৰ কথা ভাবিয়েই হয়তো তুলিৰাম ঘৰৰ পৰা ওলোৱা বুলি বিশেষ সূত্ৰই প্ৰকাশ কৰিছে। সূত্ৰটোৰ মতে দুৰ্নীতিৰ অধ্যায়সমূহ এফালৰ পৰা খোল খাই যাবলৈ ধৰাত এতিয়া তুলিৰামে ৰাইজৰ চকুত নিজকে ধোৱা তুলসীৰ পাত সজাবলৈ পাৰ্যমানে চেষ্টা অব্যাহত ৰাখিছে। বিশেষ সূত্ৰটোৱে প্ৰকাশ কৰা অনুসৰি তুলিৰামে নিজকে বচাবলৈ এতিয়া মুখ্যমন্ত্ৰী হিমন্ত বিশ্ব শৰ্মাক ঢাল হিচাপে ব্যৱহাৰ কৰাৰ পাং পাতিছে। সেই মৰ্মে তুলিৰামে বিভিন্ন সভা-সমিতি আদিত এইবুলি ক’বলৈ আৰম্ভ কৰিছে যে তেওঁ এতিয়াও মুখ্যমন্ত্ৰীৰ আপোন মানুহ হৈয়েই আছে। মুখ্যমন্ত্ৰীৰ নিৰ্দেশ মতেই তেওঁ সকলো কাম কৰি গৈছে। দুৰ্নীতি যদি কৰিছে মুখ্যমন্ত্ৰীয়ে যি নিৰ্দেশেই দিছে তাকেই তেওঁ পালন কৰি গৈছেহ্ল সূত্ৰটোৱে প্ৰকাশ কৰা মতে তুলিৰামে এতিয়া এইবুলিও ক’বলৈ আৰম্ভ কৰিছে- মই যদি দুৰ্নীতি কৰিছো তেন্তে সেয়া মুখ্যমন্ত্ৰীৰ নিৰ্দেশ মতেহে কৰিছো। ফলত ডুবন্ত নাওখনত মই ডুবিলে মুখ্যমন্ত্ৰীও ড়ুবিব। তুলিৰামে এতিয়া এনেদৰেই নিজৰ দুৰ্নীতিৰ সৈতে মুখ্যমন্ত্ৰীকো সামৰি নিজে দোষমুক্ত হ’ব বিচাৰিছে বুলি বহুতে আলোচনা কৰিবলৈ লোৱা পৰিলক্ষিত হৈছে। তুলিৰামে মুখ্যমন্ত্ৰীক ঢাল হিচাপে ব্যৱহাৰ কৰি বিভিন্নজনৰ আগত কৈ অহা কথাবোৰ এতিয়া দিছপুৰ গৈ পাইছে। বিশেষ সূত্ৰই প্ৰকাশ কৰা মতে তুলিৰামৰ এনে কথা-বতৰাত দিছপুৰ এতিয়া অত্যন্ত অসন্তুষ্ট। সূত্ৰটোৰ মতে সেয়ে শীঘ্ৰে তুলিৰামক দিছপুৰলৈ তলব কৰা হ’ব পাৰে। উল্লেখ্য ২০২৪ৰ লোকসভা নিৰ্বাচনৰ পিছৰে পৰাই তুলিৰামৰ ওপৰত মুখ্যমন্ত্ৰী হিমন্ত বিশ্ব শৰ্মা খৰ্গহস্ত হৈ থকা বুলি বিভিন্ন মহলত ব্যাপক চৰ্চা হৈ আছে। তুলিৰামৰ মন্ত্ৰণা মতেই মুখ্যমন্ত্ৰীয়ে ২০২৪ৰ লোকসভা নিৰ্বাচনত যোগ্য প্ৰাৰ্থীক একাষৰীয়া কৰি থৈ তুলিৰামৰ পছন্দৰ মানুহক টিকট দিয়া বুলি চৰ্চা চলিছে। ফলত সমষ্টিটোত ইয়াৰ মূল্য ভৰিবলগীয়া হ’ল বিজেপিয়ে।

বিগত লোকসভা নিৰ্বাচনত এনডিএৰ প্ৰাৰ্থীগৰাকীয়ে কাণে কাণ মাৰিহে জয়ী হ’বলৈ সক্ষম হয়। তাকো গেৰুৱা শিবিৰে যদি কংগ্ৰেছৰ ভোট বেংকত খহনীয়াৰ সৃষ্টি কৰিবলৈ আওপাকে এগৰাকী নিৰ্দলীয় প্ৰাৰ্থী থিয় নকৰালেহেঁতেন তেন্তে তুলিৰামৰ লোকসভা সমষ্টিটো হয়তো বিজেপিৰ হাতত ৰখাই সম্ভৱ নহ’লহেঁতেন বুলি সূত্ৰটোৱে প্ৰকাশ কৰিছে। সূত্ৰটোৱে প্ৰকাশ কৰা মতে তেনে কথাৰ বাবেই মুখ্যমন্ত্ৰী শৰ্মা এতিয়া খৰ্গহস্ত হৈ পৰিছে তুলিৰামৰ ওপৰত। হতাশজনক নিৰ্বাচনী ফলাফল আৰু তুলিৰামৰ পৰ্বতসম দুৰ্নীতিৰ বাবেই কাৰ্বিভূমিত এতিয়া তুলিৰামৰ এজন বিকল্প নেতাৰ সন্ধান চলা বুলি বিভিন্ন মহলত চৰ্চা হৈ আছে। ইপিনে কাৰ্বি স্বায়ত্তশাসিত পৰিষদৰ বৰঘৰৰ পৰাই এটা খবৰ আহি পৰিছে যে তুলিৰামে পাকে-প্ৰকাৰে মুখ্যমন্ত্ৰীক লেং মাৰিবলৈ অথবা মুখ্যমন্ত্ৰীয়ে যাতে তেওঁৰ বিৰুদ্ধে কোনো ব্যৱস্থা গ্ৰহণ কৰিব নোৱাৰে তাৰ বাবে এইবাৰ লগ লাগিছে বিটিআৰৰ মুৰব্বী প্ৰমোদ বড়ো। প্ৰমোদ-তুলিৰামে নানান বুদ্ধি-সন্ধি কৰি যিকোনো প্ৰকাৰে মুখ্যমন্ত্ৰীক নিজৰ অধীন কৰি ৰাখিবলৈ কৌশল যুগুতাই থকা বুলিও সূত্ৰটোৱে কয়। সূত্ৰটোৰ মতে তুলিৰাম-প্ৰমোদে ফোনতে মুখ্যমন্ত্ৰীক কিদৰে শ’লঠেকত পেলাব পাৰি তাৰেই নিৰন্তৰ ষড়যন্ত্ৰ ৰচনাত মত্ত হৈছে। সূত্ৰটোৱে লগতে এইবুলিও কৈছে যে ২০২৬ৰ বিধানসভা নিৰ্বাচনলৈ এই দুই নেতাই বাট চাব বিচৰা নাই। তাৰ পূৰ্বেই মুখ্যমন্ত্ৰীক নানান ছল-চাতুৰীৰে কিদৰে বশ কৰি ৰাখিব পাৰি তাৰেই সূত্ৰ নিৰ্ধাৰণত ব্যস্ত হৈ পৰিছে প্ৰমোদ-তুলিৰাম। উল্লেখ্য কাৰ্বিভূমিত যিদৰে তুলিৰাম মুখ্যমন্ত্ৰীৰ অপ্ৰিয় হৈ পৰিছে, একেদৰে বড়োভূমিতো প্ৰমোদ বড়ো মুখ্যমন্ত্ৰীৰ অপ্ৰিয় হৈ পৰা বুলি বিভিন্ন মহলত বহুদিনৰে পৰাই চৰ্চা চলি আহিছে। বিশেষ সূত্ৰই প্ৰকাশ কৰা মতে কাৰ্বিভূমি আৰু বড়ো ভূমিৰ ৰাজনৈতিক নেতৃত্বক লৈ মুখ্যমন্ত্ৰী হিমন্ত বিশ্ব শৰ্মা নিজেই সুখী নহয়। সেই বাবেই হয়তো কলাক্ষেত্ৰৰ দলীয় সভাত মুখ্যমন্ত্ৰী হিমন্ত বিশ্ব শৰ্মাই স্পষ্টকৈ কৈছিল বিটিআৰত প্ৰমোদ বড়োৰ ইউপিপিএলৰ সৈতে পঞ্চায়ত নিৰ্বাচনলৈকেহে বিজেপিৰ মিত্ৰতা থাকিব। মুখ্যমন্ত্ৰীৰ এনে মন্তব্যই নিঃসন্দেহে বড়োভূমিৰ ৰাজনৈতিক দৃশ্যপট সলনি কৰি পেলাব। সূত্ৰটোৱে প্ৰকাশ কৰা মতে হাগ্ৰামা মহিলাৰীৰ দুৰ্নীতি তথা অৰাজক পৰিস্থিতিৰ বাবেই বিটিআৰৰ নিৰ্বাচনত হাগ্ৰামৰ দল বিপিএফে ইউপিপিএলতকৈ বেছি আসন পোৱা সত্ত্বেও মুখ্যমন্ত্ৰী শৰ্মাই হাগ্ৰামৰ সলনি প্ৰমোদ বড়োক বিটিআৰৰ দায়িত্ব গ্ৰহণ কৰিবলৈ আমন্ত্ৰণ জনাইছিল। কিন্তু প্ৰমোদ বড়োৰ দিনতো বিটিআৰত পূৰ্বৰ কোনো কথাৰে পৰিৱৰ্তন নঘটিল। বিপৰীতে বহুক্ষেত্ৰত দুৰ্নীতি, ডকা-হকা আৰু কমিছনৰাজেহে বিটিআৰক গ্ৰাস কৰিলে। খ্ৰীষ্টিয়ান আগ্ৰাসন বাঢ়িল, প্ৰতিটো কামতে কমিছনৰ অংক নহ’লে একো কথাই নিসিজা হ’ল। শ্ৰীৰামপুৰ গে’টৰ কমিছনৰাজ প্ৰমোদ বড়োৰেই একাংশ ঘনিষ্ঠ

লোকে চলাই যোৱা বুলি বহুতে কৈ আহিছে। এনে পৰিস্থিতিত বিটিআৰবাসী, বিশেষকৈ বড়ো সম্প্ৰদায়ৰ জনতাই অসম বিধানসভাৰ অধ্যক্ষ বিশ্বজিত দৈমাৰীক বড়ো জনতাক নতুন দিশৰ সন্ধান দিব পৰা নেতা হিচাপে বিচৰা বুলি সূত্ৰটোৱে প্ৰকাশ কৰে। সূত্ৰটোৱে সদৰী কৰা অনুসৰি বিশ্বজিত দৈমাৰীক প্ৰমোদ বড়োৰ বিকল্প নেতা হিচাপে প্ৰক্ষেপ কৰিবলৈ গেৰুৱা শিবিৰ ইচ্ছুক হৈ পৰিছে। সেয়ে মুখ্যমন্ত্ৰীৰ পৰা ক্ৰমে আঁতৰি যোৱা দুই নেতা ক্ৰমে প্ৰমোদ বড়ো আৰু তুলিৰাম ৰংহাং এতিয়া একত্ৰিত হৈ মুখ্যমন্ত্ৰীৰ বিৰুদ্ধে এঘঁৰি যুঁজ দিয়াৰ ষড়যন্ত্ৰ তলে তলে ৰচনা কৰা বুলি সূত্ৰটোৱে প্ৰকাশ কৰিছে। উল্লেখ্য কাৰ্বি স্বায়ত্তশাসিত পৰিষদত ২৬গৰাকী নিৰ্বাচিত সদস্য থকাৰ লগতে ৪গৰাকী চৰকাৰে বাছি দিয়া মনোনীত সদস্য আছে। সূত্ৰটোৱে দাবী কৰা মতে মুখ্যমন্ত্ৰীৰ সৈতে ব্যৱধান বৃদ্ধিৰ পিছতে তুলিৰামে ৪গৰাকী মনোনীত সদস্যৰ সৈতে একো কথাই ভাগ-বতৰা নকৰা হৈ পৰিছে। কিন্তু ২৬গৰাকী সদস্যৰ মাজতে কথা-বাৰ্তা কৰিলেও কাৰ্বি আংলঙৰ স্বায়ত্তশাসিত পৰিষদৰ বৰঘৰৰ পৰাই প্ৰতিটো মুহূৰ্তত তুলিৰামৰ খবৰ দিছপুৰে পাই আহিছে বুলি সূত্ৰটোৱে প্ৰকাশ কৰে। সেয়ে তুলিৰামৰ দাঁতত ভাত লাগিলেও দিছপুৰে খবৰ পাই বুলি সূত্ৰটোৱে কয়। এটা সময়ত তুলিৰামক মূৰৰ ওপৰত তুলি ৰখা একাংশ লোকেই এতিয়া তেওঁৰ বিৰুদ্ধে নামি পৰা বুলিও সূত্ৰটোৱে কয়। এনে সময়তে বহুতৰে মাজত প্ৰশ্ন উত্থাপন হৈছে তুলিৰাম-প্ৰমোদে মুখ্যমন্ত্ৰীৰ বিৰুদ্ধে সঁচাকৈয়ে ষড়যন্ত্ৰত লিপ্ত হ’বনে বুলি সন্দেহ কৰিছে। বহুতৰে মনত উদয় হোৱা এনে প্ৰশ্নৰ উত্তৰ হয়তো সময়ত ওলাব। কিন্তু তুলিৰামৰ দুৰ্নীতি আৰু অনিয়মৰ ক’লা অধ্যায়সমূহ উদঙাই দিয়াৰ ক্ষেত্ৰত আমি কেতিয়াও পিছ হুঁহকি নাথাকো। পৰৱৰ্তী প্ৰতিবেদনত আমি পুনৰ উদঙাম তুলিৰামৰ আন বহু ক’লা অধ্যায়ৰ কাহিনী।