জালুকবাৰী ,১৬ আগষ্ট : কলকাতাৰ আৰ.জি.কৰ মেডিকেল কলেজৰ তৰুণী চিকিৎসক ধৰ্ষণ- হত্যাৰ গোচৰে সমগ্র দেশক জোঁকাৰি গৈছে। দেশৰ বিভিন্ন প্ৰান্তৰ চিকিৎসালয় মহাবিদ্যালয়ৰ সমান্তৰালভাৱে অসমৰো বিভিন্ন চিকিৎসালয় মহাবিদ্যালযৰ লগতে গুৱাহাটীৰ জালুকবাৰীস্থিত চৰকাৰী আযুৰ্বেদিক মহাবিদ্যালয় চিকিৎসালয়ৰ ছাত্ৰ একতা সভাৰ নেতৃত্বত ১৪ আগষ্টৰ সন্ধিয়া এক শান্তি সমদল উলিওৱা হয় ।

সকলোৱে তৰুণী চিকিৎসক ধৰ্ষণ হত্যাৰ বিৰুদ্ধে প্ৰতিবাদ জনাই আৰু ইয়াৰ উচিত তদন্ত, দোষীক কঠোৰ শাস্তি আৰু চিকিৎসাকৰ্মীৰ সঠিক নিৰাপত্তাৰ দাবী জনায়। সমাজ সেৱাত ব্ৰতী চিকিৎসকসকলে যদি নিজ কৰ্তব্যস্থলতেই সুৰক্ষিত নহয় তেনেহলে কিদৰে আতুৰ জনতাক নিৰ্ভিকভাবে চিকিৎসা সেৱা আগবঢ়াব সেয়া এক প্ৰশ্নবোধক বুলি ছাত্ৰ ছাত্ৰী সকলে ব্যক্ত কৰে। এনেধৰণৰ ঘটনা যাতে পুনৰাবৃত্তি নহয় তাৰ বাবে চিকিৎসা মহাবিদ্যালয়, চিকিৎসালয় সমূহৰ লগতে সকলো শিক্ষানুষ্ঠানতেই সঠিক নিৰাপত্তাৰ ব্যবস্থাৰ দাবী জনায় প্ৰতিবাদকাৰী ছাত্ৰ – ছাত্ৰীসকলে।

আজাৰা,১৬ আগষ্ট:আজাৰা তালুক ভৱন প্ৰাংগণত কালি চতুৰ্থ কামৰূপ জিলা কাৰাটে প্ৰতিযোগিতাখন অনুষ্ঠিত হয় । প্ৰতিযোগিতাত অংশগ্ৰহণ কৰি লংকেশ্বৰ কাৰাটে গীল্ডৰ প্ৰতিযোগি সকলে ২০ টাকৈ পদক লাভ কৰি সুনাম কঢ়িয়াই আনে ।

গীল্ডৰ প্ৰশিক্ষক খগেন কলিতা,ৰাব্বা আহমেদ আৰু প্ৰতিস্মিতা দাসে জানিবলৈ দিয়ামতে গীল্ডৰ হৰ্ষিতা কাশ্যপ , মনজিষ্ঠা কলিতা আৰু প্ৰত্যাশা কলিতাই সোণৰ পদক লাভ কৰে । কৃষ্টাঙ্গী দাস,জিষ্নু কাশ্যপ,গৌৰব জ্যোতি দাস,আৰিফ আলীয়ে ৰূপৰ পদক লাভ কৰে । উপস্যা কাশ্যপ , মৌচুমী দাস,মহৰ্ষি কাশ্যপ, বিটুপন দাস,ৰিয়ান কলিতা, হেমজ্যোতি দাস দুই,আৰ্টিকা কলিতা দুই হৰ্ষজিত কলিতা দুই আৰু তেহজিব ৰহমানে দুটাকৈ ব্ৰণ্জৰ পদক লাভ কৰে।

যোৰহাট, ১৬ আগষ্টঃ আজি যোৰহাট জিলা কৰ্মচাৰী পৰিষদৰ অন্তৰ্গত বাঘচোং আঞ্চলিক কৰ্মচাৰী পৰিষদৰ দ্বি-বাৰ্ষিক অধিৱেশনখন যোৰহাট জিলা কৰ্মচাৰী পৰিষদৰ সভাপতি জীৱকান্ত বৰাৰ সভাপতিত্বত অনুষ্ঠিত হয়। যোৰহাটৰ বাঘচোং উন্নয়ন খণ্ড প্ৰেক্ষাগৃহত বিদায়ী আঞ্চলিক সম্পাদক বিনয় কুমাৰ শইকীয়াই উদ্দেশ্য ব্যাখ্যা কৰা সভাখনত সদৌ অসম কৰ্মচাৰী পৰিষদৰ উপ-সভাপতি তথা যোৰহাট জিলা কৰ্মচাৰী পৰিষদৰ সম্পাদক প্ৰদীপ ৰাজখোৱা আৰু ৰাজ্যিক উপদেষ্টা নৃপেন ভূঞাই ক্ৰমে মুখ্য অতিথি আৰু পৰ্যবেক্ষক হিচাপে অংশগ্ৰহণ কৰি বক্তব্য আগবঢ়ায়।

মুখ্য অতিথিৰ ভাষণত ৰাজখোৱাই কৰ্মচাৰী পৰিষদৰ কৰ্মসূচী, জিলা অধিৱেশনৰ প্ৰস্তুতি লগতে সাংগঠনিক দিশত আলোচনা আগবঢ়ায়। ইয়াৰ পিছতে বাঘচোং আঞ্চলিক কৰ্মচাৰী পৰিষদৰ পুৰণি আঞ্চলিক সমিতিখনে পদত্যাগ কৰাৰ লগে লগে সৰ্বসন্মতিক্ৰমে কেশৱ গগৈক সভাপতি, বিনয় কুমাৰ শইকীয়া, ৰাধিকা দাস, দেৱেশ্বৰ শইকীয়া আৰু পৱিত্ৰ পাঠকক উপ-সভাপতি, প্ৰাঞ্জল প্ৰতীম বৰাক সম্পাদক, শংকুসিদ্ধ নাথ, প্ৰিয়তম বৰুৱা, পৰাগ কলিতা আৰু অতুল বৰাক সহকাৰী সম্পাদক, জিতুল গগৈ, ৰাখী ডেকা, মুহিধৰ বৰা আৰু দিলীপ বৰাক সাংগঠনিক সম্পাদক, ৰূপজ্যোতি বৰা, দিপক বৰুৱা, কৈলাশ বৰা, অজিৎ শইকীয়া, গৌৰৱ গগৈ, মুকুন্দ মাধৱ চাংমাই আৰু মাধূৰ্য মুকুল বৰা প্ৰমুখ্যে কাৰ্যনিৰ্বাহক সদস্যৰে ২১ জনীয়াকৈ আঞ্চলিক সমিতি গঠন কৰা হয়। সদৌ শেষত নতুন সমিতিৰ শপত গ্ৰহণৰ পিছতে সভাপতিৰ সাৰুৱা মন্তব্যৰে দ্বি-বাৰ্ষিক অধিৱেশনখনৰ সফল সামৰণি ঘটে ।।

১৬আগুষ্ট ২০২৪: ভাৰতীয় জনতা পাৰ্টী মহিলা মৰ্চা অসম প্ৰদেশৰ উদ্যোগত আৰু কামৰূপ মহানগৰ জিলা বিজেপি ৰ সহযোগত লতাশিল খেলপথাৰত আজি এক মৌন প্ৰতিবাদী কাৰ্যসূচী ৰূপায়ন কৰা হয়। সমগ্ৰ দেশ কঁপাই যোৱা কলকাতাৰ এগৰাকী মহিলা ডাক্তৰক ধৰ্ষণ কৰি নৃশংস ভাৱে হত্যা কৰাৰ প্ৰতিবাদত লতাশিল খেলপথাৰত সহস্ৰাধিক মহিলা গোট খাই হাতে হাতে মমবাতি লৈ তীব্ৰ প্ৰতিবাদ সাব্যস্ত কৰে।

এই ঘটনাৰ লগত জড়িত সকলো দোষীকে শীঘ্ৰেই চৰম শাস্তি প্ৰদান কৰি ভুক্তভোগী পৰিয়ালক ন্যায় প্ৰদানৰ দাবী জনায়। ৰোগীক জীৱন দান দিয়া, ৰোগীৰ জীৱন ৰক্ষা কৰা ডাক্তৰ সকলক সুৰক্ষা প্ৰদানত ব্যৰ্থ হোৱা মমতা বেনাৰ্জীৰ চৰকাৰ তথা প্ৰশাসনৰ বিৰুদ্ধে ক্ষোভ প্ৰকাশ কৰি বিজেপিৰ জিলা সভাপতি তপন দাসে শীঘ্ৰেই দোষীক দৃষ্টান্তমূলক শাস্তি প্ৰদানৰ দাবী জনায়।

এই প্ৰতিবাদী কাৰ্যসূচীত ৰাজ্যিক মহিলা মৰ্চাৰ সাধাৰণ সম্পাদিকা দ্বয় ক্ৰমে পূৰবী ৰয় আৰু ৰত্না সিং ৰ নেতৃত্বত মহিলা মৰ্চাৰ ৰাজ্যিক বিষয়ববীয়া, ৰাজ্যিক কাৰ্য্যবাহী সদস্যা তথা ৰাজ্যিক আমন্ত্ৰিত সদস্যা সকলৰ লগতে কামৰূপ মহানগৰ জিলাৰ কাৰ্য্যকৰ্তা সকলক উপস্থিত থাকে।

আজাৰা: ১৬ আগষ্ট : কেন্দ্ৰীয় সংৰক্ষিত আৰক্ষী বাহিনী ( চি আৰ পি এফ ) ৰ গুৱাহাটীৰ পশ্চিম প্ৰান্তৰ ৰাণীস্থিত ১৭৫ বেটেলিয়ানৰ মুখ্য কাৰ্যালয় চৌহদত ১৫ আগষ্টত ৭৮ সংখ্যক স্বাধীনতা দিৱস উদযাপন কৰা হয় । পুৱা বিষয়া – জোৱানৰ অভিবাদন গ্ৰহণ কৰি ৰাষ্ট্ৰীয় পতাকা উত্তোলন কৰে ১৭৫ চি আৰ পি এফ বেটেলিয়ানৰ কমাডেণ্ট ৰাজীৱ কুমাৰ ঝাই । ভাষণ প্ৰসংগত ৰাজীৱ কুমাৰ ঝাই বাহিনীটোৰ বিষয়া – জোৱান সকলে বিভিন্ন প্ৰতিকুল পৰিস্থিতিৰ মাজতো নিজৰ জীৱনক তুচ্ছ কৰিও দেশমাতৃক সুৰক্ষা দি অহা কথাটোৰ শ্ৰদ্ধাৰে সোঁৱৰণ কৰে ।

অনুষ্ঠানৰ লগত সংগতি ৰাখি সাংস্কৃতিক অনুষ্ঠানৰ আয়োজন কৰা হয়। অনুষ্ঠানত বাহিনীটোৰ ছেকেণ্ড – ইন – কমাণ্ড মুকুণ্ড মোহন আৰু অমৃত সিনহা, ডেপুটী কমাডেণ্ট ৰবি কুমাৰ শ্ৰীবাস্তৱ, সহকাৰী কমাডেণ্ট এছ জেকচন সিং আৰু জে পি কুমাৰ , চিকিৎসা বিষয়া ডাঃ অজয় কুমাৰকে ধৰি কেবাজনো বিষয়া , জোৱান উপস্থিত আছিল।

দৈনন্দিন বাৰ্তাৰ সেৱা, গোগামুখ, ১৬ আগষ্টঃ সমগ্ৰ দেশৰ লগতে মিচিং স্বায়ত্তশাসিত পৰিষদেও বৃৃৃহস্পতিবাৰে বৰ্ণিল কাৰ্যসূচীৰে দেশৰ ৭৮ সংখ্যক স্বাধীনতা দিৱস উদ্‌যাপন কৰা হয় ৷ ধেমাজি জিলাৰ গোগামুখস্থিত পৰিষদৰ সচিবালয়ত অনুষ্ঠিত হোৱা স্বাধীনতা দিৱসৰ পতাকা উত্তোলন কৰে পৰিষদৰ মুখ্য কাৰ্যবাহী সদস্য পৰমানন্দ ছায়েঙ্গীয়াই ৷ পতাকা উত্তোলন কৰি তেওঁ দেশৰ স্বাধীনতা লাভৰ বাবে প্ৰাণ আহুতি দিয়া দেশৰ বীৰ সেনানীসকলক শ্ৰদ্ধাৰে সোঁৱৰে আৰু দেশৰ বীৰ শ্বহীদসকলক নতুন প্ৰজন্মই সন্মানসহকাৰে হৃদয়ত জীয়াই ৰাখিব লাগে বুলি আহ্বান জনায় ৷ মিচিং স্বায়ত্তশাসিত পৰিষদৰ এলানি উন্নয়নমুখী আঁচনিৰ খতিয়ান ডাঙি ধৰি তেওঁ লগতে কয়- পৰিষদৰ ফালৰ পৰা সকলোধৰণৰ উন্নয়নমূলক কাম ৰূপায়ণ কৰি থকা হৈছে ৷

পৰিষদে জাতি-ধৰ্ম-বৰ্ণ নিৰ্বিশেষে সকলোকে সমানে সুবিধা দিয়াৰ বিপৰীতে অসমৰ বিভিন্ন অঞ্চলত দ্ৰুত গতিত উন্নয়নমুখী আঁচনি ৰূপায়ণ কৰিছে ৷ শৈক্ষিক, ক্ৰীড়া, জীৱন-জীৱিকা, মীন পালন স্কিল ডেভেলপমেণ্টত  পৰিষদে অধিক গুৰুত্ব আৰোপ কৰিছে ৷ বিদ্যালয় গৃহ নিৰ্মাণ, পকী দেৱাল নিৰ্মাণ, শ্ৰেণী কোঠা নিৰ্মাণ, খেলপথাৰ উন্নয়ন, বিভিন্ন সামগ্ৰী প্ৰদান আদি কাৰ্যসূচীসমূহ ৰূপায়ণ কৰা হৈছে ৷ উচ্চ আৰু উচ্চতৰ মাধ্যমিক পৰীক্ষাত সুখ্যাতিৰে উৰ্ত্তীণ ছাত্ৰ-ছাত্ৰীসকলক এককালীন আৰ্থিক সাহায্য, জলপানি আদিৰ ব্যৱস্থা কৰি দিয়াৰ লগতে উচ্চ শিক্ষা গ্ৰহণ কৰি থকাসকলৰ বাবেও জলপানি দি আহিছে ৷ ক্ৰীড়াক্ষেত্ৰত পুৰুষ আৰু মহিলাক সমানে গুৰুত্ব দিয়া হৈছে ৷ পৰিষদে প্ৰতিবছৰে পুৰুষ আৰু মহিলাৰ ফুটবল খেল অনুষ্ঠিত কৰি আহিছে ইয়াৰ পৰা ভাল প্ৰদৰ্শন কৰা খেলুৱৈসকলক উন্নত প্ৰশিক্ষণৰ বাবে বহিঃ ৰাজ্যলৈ প্ৰেৰণ কৰা হৈছে ৷ ইয়াৰে বহুকেইগৰাকী খেলুৱৈয়ে ৰাষ্ট্ৰীয় পৰ্যায়ৰ ভাল ভাল ক্লাবৰ হৈ ৰাষ্ট্ৰীয় পৰ্যায়ৰ খেলত খেলি আছে ৷

একেদৰে এথ্‌লেটিক আৰু পেঞ্চাক চিলাট পৰিষদে প্ৰশিক্ষণ দিয়া খেলুৱৈয়ে ৰাষ্ট্ৰীয় আৰু আন্তঃৰাষ্ট্ৰীয় পৰ্যায়ত মেডেল লাভ কৰিবলৈ সক্ষম হৈছে।  পৰিষদে  খেলুৱৈসকলৰ অভাৱৰ জোৰা মাৰিবলৈ খেলুৱৈসকলক আৰ্থিক সাহায্য আৰু জলপানি দি অহা হৈছে ৷ মীন পালনৰ ক্ষেত্ৰত পৰিষদে বহু সুদূৰপ্ৰসাৰী ভূমিকা পালন কৰি আহিছে ৷ পৰিষদৰ অন্তৰ্গত মীন পালকসকলক উন্নত প্ৰশিক্ষণৰ ব্যৱস্থা কৰি সফল মীনপালক সকলক এককালীন আৰ্থিক সাহায্য দি মীনপালৰ প্ৰতি সাধাৰণ জনতাক আকৰ্ষিত কৰি তোলা হৈছে ৷ সমন্বিত কৃষিপামৰ ক্ষেত্ৰতো পৰিষদে বিশেষভাৱে গুৰুত্ব দি গ্ৰামাঞ্চলত কৃষি বিপ্লৱৰ সূচনা কৰিছে ৷ স্কিল ডেভেলপমেণ্টৰ বাবে গোগামুখত পৰিষদে নিজাববীয়াকৈ স্কিল ডেভেলপমেণ্টৰ স্কুল প্ৰতিষ্ঠা কৰি ইতিমধ্যে পাঠদান দিয়া কাৰ্যসূচী আৰম্ভ কৰাই নহয় স্কিল ডেভেলপমেণ্ট স্কুলখনৰ পৰা ৩০-২৫ গৰাকী ছাত্ৰ-ছাত্ৰীয়ে বহিঃৰাজ্যত কৰ্ম সংস্থাপন লাভ কৰিছে বুলি মুখ্য কাৰ্যবাহী সদস্য গৰাকীয়ে দোহাৰে ৷ ইয়াৰ পূৰ্বে পুৱা ৯–৩০ বজাত শ্বহীদ তৰ্পণ কৰে পৰিষদৰ অধ্যক্ষ সুনীল কুমাৰ পেগুৱে ৷ ১১ বজাত গোগামুখ জ্ঞানজ্যোতি একাডেমীৰ ছাত্ৰ-ছাত্ৰীসকলে দেশপ্ৰেমমূলক নৃত্য পৰিৱেশন কৰে ৷ দুপৰীয়ৰ ১২ বজাত ছাত্ৰ-ছাত্ৰীসকলৰ মাজত বিভিন্ন প্ৰতিযোগিতা অনুষ্ঠিত হয় ৷ অনুষ্ঠানত উপস্থিত থাকে গোগামুখ মহাবিদ্যালয়ৰ অধ্যক্ষ ড° দিলীপ কুমাৰ ঝা,  পৰিষদৰ কাৰ্যবাহী সদস্য দেৱৰঞ্জন মৰাং, বিজু পেগু, ইন্দিৰা চিন্তে, ভৱানী দুৱৰা, প্ৰশান্ত বড়ি প্ৰমূখ্যে পৰিষদৰ সাধাৰণ সদস্য, স্থানীয় জেষ্ঠ ব্যক্তি আৰু বিভিন্ন শিক্ষানুষ্ঠানৰ মুৰব্বীসকলে ৷