অসমৰ মুখ্যমন্ত্ৰী (Upcoming Elections) হিমন্ত বিশ্ব শৰ্মাই বুধবাৰে কয় যে শাসকীয় এনডিএৰ ভিতৰত চলি থকা আসন-বণ্টন সম্পৰ্কীয় আলোচনা সুচাৰুৰূপে আগবাঢ়িছে আৰু এই প্ৰক্ৰিয়া ফেব্ৰুৱাৰী মাহৰ মাজভাগত চূড়ান্ত হোৱাৰ সম্ভাৱনা আছে৷ নতুন দিল্লীত কেন্দ্ৰীয় গৃহমন্ত্ৰী অমিত শ্বাহৰ সৈতে অনুষ্ঠিত বৈঠকৰ পাছতেই মুখ্যমন্ত্ৰীয়ে এনেদৰে মন্তব্য কৰে৷ উক্ত বৈঠকত বড়োলেণ্ড টেৰিটৰিয়েল কাউন্সিলৰ মুখ্য কাৰ্যনিৰ্বাহক সদস্য হাগ্ৰামা মহিলাৰীয়েও অংশগ্ৰহণ কৰে৷ ইয়াৰ আগতে ইউপিপিএলৰ সভাপতি প্ৰমোদ বড়োৱেও অমিত শ্বাহৰ সৈতে আলোচনা কৰিছিল৷ এই ঘটনাসমূহে মিত্ৰজোঁট পৰ্যায়ত আলোচনা অধিক তীব্ৰ হোৱাৰ ইংগিত দিছে৷ নতুন দিল্লীৰ পৰা উভতি আহি ধেমাজিত এক কল্যাণমূলক আঁচনিৰ অনুষ্ঠানত সাংবাদিকসকলৰ সৈতে হোৱা বাৰ্তালাপত মুখ্যমন্ত্ৰীয়ে কয় যে এনডিএ অংশীদাৰসকলৰ সৈতে হোৱা আলোচনা গঠনমূলক আৰু উৎসাহব্যঞ্জক হৈছে৷
মুখ্যমন্ত্ৰী শৰ্মাই কয়- ‘মই কেন্দ্ৰীয় গৃহমন্ত্ৰী অমিত শ্বাহক লগ পাইছিলোঁ৷ তাত বিটিচিৰ মুৰব্বী হাগ্ৰামা মহিলাৰীও উপস্থিত আছিল৷ ইয়াৰ আগতে ইউপিপিএলৰ সভাপতি প্ৰমোদ বড়োৱেও তেওঁক লগ ধৰিছিল৷ লগতে মই অগপৰ সভাপতি অতুল বৰাৰ সৈতে দীঘলীয়া আলোচনা কৰিছিলোঁ৷’ এতিয়ালৈকে হোৱা আলোচনাৰ ভিত্তিত এনডিএৰ ভিতৰত আসন-বণ্টনত কোনো ডাঙৰ সমস্যা নহ’ব বুলি তেওঁ আশা প্ৰকাশ কৰে৷ মুখ্যমন্ত্ৰী শৰ্মাই আত্মবিশ্বাস ব্যক্ত কৰি কয় যে ফেব্ৰুৱাৰী ১৫ তাৰিখৰ আশে-পাশে বা তাৰ পাছতে মিত্ৰজোঁটে আসন-বণ্টনৰ সূত্ৰ ৰাজহুৱা কৰিব পাৰিব৷ বিজেপি আৰু অগপকে ধৰি সকলো মিত্ৰদলৰ মাজত কোনো গুৰুতৰ মতবিৰোধ নাই বুলিও তেওঁ স্পষ্ট কৰে৷ তেওঁ লগতে মিত্ৰজোঁটৰ ভিতৰত হোৱা আলোচনা ইতিবাচক বুলি উল্লেখ কৰে৷ উল্লেখযোগ্য যে ২০২৫ চনৰ ২৯ ডিচেম্বৰত অমিত শ্বাহৰ অসম ভ্ৰমণৰ পূৰ্বে মুখ্যমন্ত্ৰীয়ে কৈছিল যে যদি মিত্ৰ দলসমূহে নিজৰ মাজতেই সমস্যা সমাধান কৰিব নোৱাৰে, তেন্তে মাত্ৰ তেতিয়াহে কেন্দ্ৰীয় গৃহমন্ত্ৰীৰ হস্তক্ষেপৰ প্ৰয়োজন হ’ব৷
কিন্তু শেহতীয়া উচ্ছ পৰ্যায়ৰ বৈঠকসমূহে দেখুৱাইছে যে এনডিএৰ নেতৃত্বই যিকোনো সম্ভাৱ্য অসন্তোষ প্ৰকাশ কৰাৰ আগতেই সমাধানসূত্ৰ উলিয়াই শেষ মুহূৰ্তৰ সংঘাত এৰাবলৈ আগ্ৰহী বিজেপি৷ ইয়াৰ মাজতে এনডিএৰ মিত্ৰ দলসমূহে নিজৰ ৰাজনৈতিক আকাংক্ষাও ৰাজহুৱাভাৱে প্ৰকাশ কৰিছে৷ অসম গণ পৰিষদে ৰাজ্যৰ প্ৰতিখন জিলাত অন্ততঃ এখনকৈ বিধানসভা আসনত প্ৰতিদ্বন্দ্বিতা কৰাৰ ইচ্ছাৰ কথা ঘোষণা কৰিছে৷ অগপ বিধায়ক পোনাকণ বৰুৱায়ো বিজেপিৰ দখলত থকা সমষ্টিসমূহত অগপ নেতা-কৰ্মীসকল উপেক্ষিত হোৱাৰ অভিযোগ উত্থাপন কৰিছে৷ আনহাতে এনডিএৰ আন এক গুৰুত্বপূৰ্ণ অংশীদাৰ ইউনাইটেড পিপলছ পাৰ্টি লিবাৰেলে ২০২৬ চনৰ নিৰ্বাচনত নিজৰ সংগঠন শক্তিশালী কৰাৰ উদ্দেশ্যে এককভাৱে নিৰ্বাচনত অৱতীৰ্ণ হোৱাৰ সম্ভাৱনাৰ কথাও আগতেই কৈছিল৷ ২০২৫ চনৰ ডিচেম্বৰত এই অৱস্থান স্পষ্ট কৰিলেও দলটোৱে এতিয়ালৈকে আনুষ্ঠানিকভাৱে মিত্ৰজোঁটৰে আলোচনা এৰি দিয়া নাই৷
ৰাজনৈতিক পৰ্যবেক্ষকসকলৰ মতে, মুখ্যমন্ত্ৰী হিমন্ত বিশ্ব শৰ্মা আৰু কেন্দ্ৰীয় গৃহমন্ত্ৰী অমিত শ্বাহৰ মাজৰ এই বৈঠক এনডিএৰ ভিতৰত থকা বিভিন্ন আকাংক্ষা আৰু দাবীসমূহ সমাধানৰ দিশত এক গুৰুত্বপূৰ্ণ পদক্ষেপ৷ অমিত শ্বাহে অহা ২৯ জানুৱাৰীত পুনৰ অসম ভ্ৰমণ কৰাৰ সম্ভাৱনা আছে৷ মাজতে এনডিএ নেতৃত্বই নিৰ্বাচনৰ প্ৰাকক্ষণত সকলো মিত্ৰ দলে একতা প্ৰদৰ্শন কৰিবলৈ তৎপৰ হোৱা বুলি ধৰি লোৱা বুলি বিশ্লেষক মহলে মন্তব্য কৰিছে৷
