ধেমাজি জিলাৰ গোগামুখৰ অন্যতম ক্ৰীড়া সংগঠক ন-গাঁও যুৱক সংঘৰ উদ্যোগত গোগামুখ নগৰ হাইস্কুল খেলপথাৰত দেশৰ ৭৮ সংখ্যক স্বাধীনতা দিৱস উপলক্ষে অনুষ্ঠিত হৈ থকা প্ৰয়াত কনকেশ্বৰ গগৈ আৰু ধনবৰ দত্ত সোঁঁৱৰণি প্ৰাইজমানি আৰু ট্ৰফী ফুটবল প্ৰতিযোগিতাৰ আজি বিয়লি অনুষ্ঠিত প্ৰথমখন ছেমিফাইনেল খেলত গা-ডাঙৰচুুুক এফ চিয়ে গোগামুখ চৃঃচাং এফ চিক ৩-১ গ’লৰ ব্যৱধানত পৰাস্ত কৰি ফাইনেলত প্ৰৱেশ কৰিছে ৷
উত্তেজনাপূৰ্ণ খেলখনত চৃঃচাং এফ চিয়ে সুন্দৰ খেল প্ৰদৰ্শন কৰিি অধিক সময় নিজৰ ভৰিত বল ৰাখিবলৈ সক্ষম হৈ যদিও গ’লকীপাৰৰ দুৰ্বলতাৰ বাবে দুটা গ’ল অযথা হজম কৰিবলগীয়া হয় ৷
চৃঃচাং এফ চিয়ে লোৱা তিনিটা সুতীব্ৰ শ্বট গা-ডাঙৰ চুকৰ গ’লবাৰত লাগি ঘুৰি অহাৰ বিপৰীতে গা-ডাঙচুক এফ চিয়েও কেবাটাও নিশ্চিত গ’ল কৰাৰ সুযোগ নষ্ট কৰে ৷ গা-ডাঙৰচুক এফ চিৰ গলকীপাৰে আজি সুন্দৰ খেল প্ৰদৰ্শন কৰি নিজৰ দলক বহুকেইটা নিশ্চিত গ’লৰ পৰা ৰক্ষা কৰে ৷
আজিৰ খেলখন পৰিচালনা কৰে কিৰণ কুলি, মহানন্দ মিলি আৰু আৰু গৌৰৱজ্যোতি দলেয়ে ৷ চতুৰ্থ পৰিচালক হিচাপে থাকে ভূবন পেগুৱে ৷ মেচ কমিছনাৰ হিচাপে থাকে মণিৰাম পেগুৱে ৷ স্বাধীনতা দিৱস কাপ ফুটবল প্ৰতিযোগিতাৰ আয়োজক সমিতিৰ সভাপতি কল্যাণ গগৈ আৰু সম্পাদক সদানন্দ দাসে জনোৱা মতে কাইলৈ প্ৰতিযোগিতাখনৰ খেল বন্ধ থাকিব আৰু ১৩ আগষ্টত গোগামুখ জি এম এছ এফ চি আৰু মৰ্ণিং এফ চিৰ মাজত দ্বিতীয়খন ছেমিফাইনেল অনুষ্ঠিত হ’ব ৷
