কেন্দ্ৰীয় গৃহমন্ত্ৰী অমিত শ্বাহে সোমবাৰে গুৱাহাটীত আৰক্ষী আধুনিকীকৰণৰ দিশত এক ঐতিহাসিক পদক্ষেপ হিচাপে গুৱাহাটী আৰক্ষী আয়ুক্তৰ স্থায়ী ভৱন, স্বয়ংচালিত নগৰ নিৰীক্ষণ ব্যৱস্থা (ICSS) আৰু ফৰেনছিক ভ্ৰাম্যমাণ বাহনৰ আনুষ্ঠানিক উদ্বোধন কৰে।

মুঠ ১১১ কোটি টকা ব্যয় সাপেক্ষে নিৰ্মাণ কৰা গুৱাহাটী আৰক্ষী আয়ুক্তৰ নতুন স্থায়ী কাৰ্যালয় ভৱনটো খানাপাৰা অঞ্চলত অৱস্থিত। ১০ মহলীয়া এই ভৱনত গুৱাহাটী আৰক্ষীৰ সকলো শাখা একেটা ছাতাৰ তলত কাৰ্যনিৰ্বাহ কৰিব পাৰিব। ভৱনটোত ৪০০ জন বিষয়াৰ বহাৰ সুবিধাৰ লগতে আধুনিক পুথিভঁৰাল আৰু আৰ্কাইভ স্থাপন কৰা হৈছে।

এই অনুষ্ঠানত গৃহমন্ত্ৰী অমিত শ্বাহে একে সময়তে ২০০০ চিচিটিভি কেমেৰাৰে সজ্জিত স্বয়ংচালিত নগৰ নিৰীক্ষণ ব্যৱস্থা (Integrated Command and Control System – ICCC) মুকলি কৰে। ১৮১ কোটি টকা ব্যয়েৰে নিৰ্মাণ কৰা এই অত্যাধুনিক ব্যৱস্থাটোৰ জৰিয়তে গুৱাহাটীৰ নিৰাপত্তা ব্যৱস্থা অধিক শক্তিশালী হ’ব বুলি আশা কৰা হৈছে। ইয়াত ৬০ টা নাগৰিক সুৰক্ষা আৰু সতৰ্কতামূলক ব্যৱস্থা সংযোজন কৰা হৈছে, যিয়ে অপৰাধ নিয়ন্ত্ৰণ আৰু তৎক্ষণাৎ প্ৰতিক্ৰিয়াত গুৰুত্বপূৰ্ণ ভূমিকা পালন কৰিব।

ইয়াৰ উপৰিও গৃহমন্ত্ৰীগৰাকীয়ে ৰাজ্যজুৰি মোতায়েন কৰিবলগীয়া ৩৯ খন ফৰেনছিক ভ্ৰাম্যমাণ বাহনৰ ফ্লেগ অফ কৰে। এই বাহনসমূহে ঘটনাস্থলীতেই বৈজ্ঞানিক অনুসন্ধান সম্পন্ন কৰি অপৰাধ তদন্ত অধিক গতিশীল আৰু স্বচ্ছ কৰি তুলিব।

একেলগে গুৱাহাটী আৰক্ষী আয়ুক্তৰ কাৰ্যালয়ত ৰাজ্যিক অপৰাধ অনুসন্ধান বিভাগৰ উদ্যোগত নতুন ন্যায় সংহিতাসমূহ সম্পৰ্কে এখন বিশেষ প্ৰদৰ্শনীও উদ্বোধন কৰা হয়। এই প্ৰদৰ্শনীত নতুন আইনসমূহৰ মূল বৈশিষ্ট্য, প্ৰয়োগ পদ্ধতি আৰু নাগৰিক অধিকাৰসমূহ সম্পৰ্কে জনসাধাৰণক অৱগত কৰা হয়।

উল্লেখযোগ্য যে, নতুন ভৱনটোত পৰিৱেশ-অনুকূল ব্যৱস্থাৰ ওপৰত বিশেষ গুৰুত্ব আৰোপ কৰা হৈছে। ইয়াত বৰষুণৰ পানী সংৰক্ষণ ব্যৱস্থা, নলা পৰিশোধন ব্যৱস্থা আৰু ৪২.৩ কিলোৱাট ক্ষমতাৰ সৌৰ শক্তি উৎপাদন ব্যৱস্থা স্থাপন কৰা হৈছে।

এই সকলো প্ৰকল্পৰ জৰিয়তে অসম আৰক্ষীক অধিক আধুনিক, দক্ষ আৰু প্ৰযুক্তিনিৰ্ভৰ কৰি তোলাৰ দিশত এক গুৰুত্বপূৰ্ণ পদক্ষেপ লোৱা হৈছে বুলি মন্তব্য কৰে গৃহমন্ত্ৰী অমিত শ্বাহে।

কেন্দ্ৰীয় গৃহমন্ত্ৰী অমিত শ্বাহে সোমবাৰে অসম ভ্ৰমণকালীনভাৱে উত্তৰ-পূব ভাৰতৰ সৰ্ববৃহৎ প্ৰেক্ষাগৃহ ‘জ্যোতি-বিষ্ণু আন্তঃৰাষ্ট্ৰীয় কলা মন্দিৰ’ আনুষ্ঠানিকভাৱে মুকলি কৰে। গুৱাহাটীৰ খানাপাৰা অঞ্চলত ৪৫ বিঘা (১৪.৮৫ একৰ) ভূমিত নিৰ্মিত এই প্ৰেক্ষাগৃহটো ২৯১ কোটি টকা ব্যয় সাপেক্ষে গঢ়ি তোলা হৈছে।

৫ হাজাৰ দৰ্শক একেলগে বহিব পৰা এই আধুনিক প্ৰেক্ষাগৃহটোক উত্তৰ-পূব ভাৰতৰ সাংস্কৃতিক ক্ষেত্ৰখনৰ এক নতুন মাইলফলক হিচাপে অভিহিত কৰা হৈছে। মূল প্ৰেক্ষাগৃহৰ উপৰিও ইয়াত আধুনিক কনভেনচন চেণ্টাৰ, পাঁচটা ভিআইপি ছুইট, ৪৫০ খন বাহন ৰখাব পৰা বহুস্তৰীয় পাৰ্কিং ব্যৱস্থা, অত্যাধুনিক দৃশ্য-শ্ৰব্য প্ৰযুক্তি আৰু ডিজিটেল আন্তঃগাঁথনি স্থাপন কৰা হৈছে। এই প্ৰকল্পটো সম্পূৰ্ণৰূপে সেউজ শক্তিনির্ভৰ, যাৰ বাবে ছাদত সৌৰ পেনেল স্থাপন কৰা হৈছে বুলি মুখ্যমন্ত্ৰী হিমন্ত বিশ্ব শৰ্মাই জানিবলৈ দিয়ে।

এই অনুষ্ঠানত কেন্দ্ৰীয় গৃহমন্ত্ৰী অমিত শ্বাহে জন্মগত হৃদৰোগত আক্রান্ত হৈ সুস্থ হোৱা ১,০০০ জন শিশুক বিশেষভাৱে সন্মান জনায়। ইয়াৰ লগতে তেওঁ গুৱাহাটী আৰক্ষী আয়ুক্তৰ নতুন কাৰ্যালয় ভৱন আৰু ২০০০ টা চিচিটিভি কেমেৰা সংযুক্ত আধুনিক নিৰীক্ষণ ব্যৱস্থাৰো শুভ উদ্বোধন কৰে। আৰক্ষী আয়ুক্তৰ কাৰ্যালয়ত ৰাজ্যিক অপৰাধ তদন্ত বিভাগে আয়োজন কৰা নতুন অপৰাধ আইন বিষয়ক প্ৰদৰ্শনীটোও শ্বাহে মুকলি কৰে।

ইয়াৰ পিছতেই কেন্দ্ৰীয় গৃহমন্ত্ৰী অমিত শ্বাহে মহাপুৰুষ শ্ৰীমন্ত শংকৰদেৱৰ জন্মভূমিত নিৰ্মিত ‘শ্ৰীমন্ত শংকৰদেৱ আৱিৰ্ভাৱ ক্ষেত্ৰ’ আনুষ্ঠানিকভাৱে উদ্বোধন কৰে। প্ৰায় ২২৭ কোটি টকা ব্যয়েৰে নিৰ্মিত এই আধ্যাত্মিক আৰু সাংস্কৃতিক ক্ষেত্ৰটো অসমৰ ধৰ্মীয় ঐতিহ্য সংৰক্ষণ আৰু বিশ্বদৰবাৰত অসমীয়া সংস্কৃতিক প্ৰতিষ্ঠা কৰাৰ দিশত এক গুৰুত্বপূৰ্ণ পদক্ষেপ বুলি উল্লেখ কৰে শ্বাহে। উদ্বোধনী ভাষণত তেওঁ কয় যে, এই ধৰণৰ প্ৰকল্পে অসমক আধ্যাত্মিক, সাংস্কৃতিক আৰু পৰ্যটনৰ ক্ষেত্ৰত নতুন উচ্চতালৈ লৈ যাব।

সমগ্ৰ কাৰ্যসূচীৰ জৰিয়তে কেন্দ্ৰ আৰু ৰাজ্য চৰকাৰে একেলগে অসমক সংস্কৃতি, পৰ্যটন আৰু উন্নয়নৰ নতুন দিশলৈ আগুৱাই নিবলৈ দৃঢ় প্ৰতিশ্ৰুতি প্ৰদৰ্শন কৰে।

অসম চৰকাৰৰ উদ্যোগত নিৰ্মিত মহাপুৰুষ শ্ৰীমন্ত শংকৰদেৱ আবিৰ্ভাৱ ক্ষেত্ৰ আজি আনুষ্ঠানিকভাৱে উদ্বোধন কৰে কেন্দ্ৰীয় গৃহমন্ত্ৰী অমিত শ্বাহে। প্ৰতিকূল বতৰৰ বাবে কিছু পলমকৈ গুৱাহাটীত উপস্থিত হোৱাৰ পিছত সেনা হেলিকপ্টাৰৰ জৰিয়তে তেওঁ পোনে পোনে বটদ্ৰৱাত উপস্থিত হয়।

মহাপুৰুষ শ্ৰীমন্ত শংকৰদেৱৰ জন্মভূমি বটদ্ৰৱা থানক এক বিশ্বমানৰ আধ্যাত্মিক আৰু সাংস্কৃতিক কেন্দ্ৰ হিচাপে গঢ়ি তোলাৰ লক্ষ্যৰে অসম চৰকাৰে এই বৃহৎ প্ৰকল্পটো বাস্তৱায়ন কৰিছে। প্ৰায় ১৬২ বিঘা বেদখলমুক্ত ভূমিত প্ৰায় ২১৭ কোটি টকাৰ ব্যয়েৰে নিৰ্মাণ কৰা হৈছে এই ঐতিহাসিক প্ৰকল্প।

এই প্ৰকল্পৰ মূল উদ্দেশ্য হৈছে মহাপুৰুষ শ্ৰীমন্ত শংকৰদেৱৰ ধৰ্মীয়, সামাজিক আৰু সাংস্কৃতিক আদৰ্শ সংৰক্ষণ, প্ৰচাৰ আৰু প্ৰসাৰ কৰা লগতে দেশ-বিদেশৰ দৰ্শনাৰ্থীসকলৰ বাবে এক আধুনিক আধ্যাত্মিক পৰ্যটন কেন্দ্ৰ হিচাপে গঢ়ি তোলা।

প্ৰকল্পটোৰ অন্তৰ্ভুক্ত উল্লেখযোগ্য আকৰ্ষণসমূহৰ ভিতৰত আছে—
বিশ্বৰ আটাইতকৈ ওখ গুৰু আসন, সত্ৰীয়া সংস্কৃতিৰ প্ৰতিফলন ঘটোৱা কলাত্মক উপাদানেৰে সজ্জিত অতিথিশালা, পৰম্পৰাগত অসমীয়া বাদ্য-তালৰ আৰ্হিত নিৰ্মিত শিল্পকেন্দ্ৰ, খোলৰ আকাৰত নিৰ্মিত গৱেষণা কেন্দ্ৰ, নাওৰ আদলত নিৰ্মিত দক্ষতা উন্নয়ন কেন্দ্ৰ আৰু পৰম্পৰাগত জাপিৰ আৰ্হিত নিৰ্মিত এটা আধুনিক থিয়েটাৰ।

এই প্ৰকল্পৰ জৰিয়তে অসমে আধ্যাত্মিক, সাংস্কৃতিক আৰু পৰ্যটন ক্ষেত্ৰত এক নতুন মাইলফলক স্পৰ্শ কৰিব বুলি আশা কৰা হৈছে।