সমগ্ৰ ভাৰতৰ দৃষ্টি আকৰ্ষণ কৰা অষ্টাদশ লোক সভাৰ নিৰ্বাচনৰ যোৰহাট লোকসভা সমষ্টিৰ ফলাফলে অসমৰ শাসক গোষ্ঠীৰ মাজত তীব্ৰ বাদানুবাদৰ সৃষ্টি কৰিছে। দৰাচলতে যোৰহাট লোকসভা সমষ্টিত মুখ্যমন্ত্ৰীৰ কথা নৰজিল। তেওঁৰ দম্ভ অহংকাৰৰ পতন হ’ল যোৰহাটত। কেৱল সিমানেই নহয় এক প্ৰকাৰ ড৹ হিমন্ত বিশ্ব শৰ্মাৰ চৰকাৰ খনেই পৰাস্ত হ’ল মুখ্যমন্ত্ৰীয়ে তাচ্ছিল্য কৰা সৰু ল’ৰাটোৰ হাতত। অসমৰ ভিতৰত সৰ্বাধিক ভোটত যোৰহাট লোকসভা সমষ্টিত ভাজপাৰ তপন কুমাৰ গগৈ জিকিব বুলি বীৰদৰ্পে ঘোষণা কৰিছিল মুখ্যমন্ত্ৰী ড৹হিমন্ত বিশ্ব শৰ্মাই। তিতাবৰ যোৰহাট সঘনে আহি নানাধৰণৰ কূট কৌশল ৰচনা কৰিছিল মুখ্যমন্ত্ৰী ড৹ হিমন্ত বিশ্ব শৰ্মাই। তেওঁৰ মন্ত্ৰী জয়ন্ত মল্ল বৰুৱা ,অজন্তা নেওগ,মন্ত্ৰী পিয়ুষ হাজৰীকা বাহৰ পাতিছিল। তদুপৰি প্ৰায় সকলো মন্ত্ৰী ,ভাজপাৰ বিধায়ক সকল ,ভাজপাৰ ৰাজ্যিক সভাপতি ভবেশ কলিতা আৰু অগপৰ মন্ত্ৰী আৰু নেতা সকলে দিনে নিশাই যোৰহাট লোক সভা সমষ্টিত কংগ্ৰেছ তথা বিৰোধী ঐক্য মঞ্চৰ প্ৰাৰ্থী গৌৰৱ গগৈক পৰাভূত কৰিবলৈ সকলো প্ৰকাৰে প্ৰাণপণে চেষ্টা কৰিছিল। ভাজপাৰ প্ৰাৰ্থী তপন কুমাৰ গগৈক ৰথৰ আগত লৈ যোৰহাট সমষ্টিৰ অলিয়ে গলিয়ে নিৰ্বাচনত জনসাধাৰণক আকৃষ্ট কৰিবলৈ ধনবল জনবল প্ৰলোভন মিথ্যাচাৰ আৰু ৰাজমহলৰ গ্যেৰাণ্টিৰে ওপচাই দিছিল। ৰাজকীয় কোৰ্পৰেট ষ্টাইলত নিৰ্বাচনী প্ৰচাৰ চলাই একপ্ৰকাৰ যোৰহাট লোক সভা সমষ্টিৰ ৰাইজক সন্ত্ৰাসিত কৰিছিল। ৰঙা লাইটৰ পোহৰত ,চাইৰেণৰ শব্দৰ কোলাহলে যোৰহাট লোক সভা সমষ্টিত ভোটাৰ সকলক আকৃষ্ট কৰিব নোৱাৰিলে।তপন কুমাৰ গগৈক ভোট নিদিলে চৰকাৰী হিতাধিকাৰীৰ সুবিধা বন্ধ কৰাৰ ভাবুকি আৰু অৰুণোদয় আঁচনিৰ ভুৱা ফৰ্ম বিতৰণৰ মায়াজালেও কামত নাহিল ভাজপাৰ। মুখ্যমন্ত্ৰী ড৹ হিমন্ত বিশ্ব শৰ্মাই কৈছিল অসমৰ ভিতৰত যোৰহাট সমষ্টিৰ তপন কুমাৰ গগৈ সৰ্বাধিক ভোটত লোকসভালৈ নিৰ্বাচিত হব।

মন্ত্ৰী পীয়ূষ হাজৰীকাই কৈছিল তপন কুমাৰ গগৈ নিজিকিলে তেওঁ ৰাজনীতিৰ পৰাই পদত্যাগ কৰিব। মন্ত্ৰী জয়ন্ত মল্ল বৰুৱা আকৌ উপলুঙাৰ ৰজা। তেওঁৰ মতে এই নিৰ্বাচনতহে গৌৰব গগৈয়ে শিকিব ৰাজনীতি কি বস্তু। আগতে পিতৃৰ নামতহে নিৰ্বাচনত অৱৰ্তীৰ্ণ হৈছিল। বিধায়ক ৰূপজ্যোতি কুৰ্মীৰ মন্তব্য আছিল শিশু সুলভ।বাওঁহাতেহে লিখি দিয়ে গৌৰব গগৈৰ পৰাজয়ৰ বাৰ্তা। বিধায়ক দিগন্ত কলিতা, অমিয় কুমাৰ ভূঞা, মন্ত্ৰী অজন্তা নেওগে তিতাবৰতে বাহৰ পাতি আছিল। তিতাবৰ সমষ্টিৰ বিধায়ক কংগ্ৰেছৰ ভাস্কৰ জ্যোতি বৰুৱাক বিভ্ৰান্ত কৰিবলৈ মুখ্যমন্ত্ৰীকে ধৰি সকলোৱেই চেষ্টা কৰিছিল। আনকি তিতাবৰত প্ৰিয়ংকা গান্ধীৰ নিৰ্বাচনী প্ৰচাৰ কো তুচ্ছ তাচ্ছিল্য কৰিবলৈ এৰা নাছিল। সকলোৱেই ভাজপাৰ নেতা মন্ত্ৰীয়ে ঘোষণা কৰিছিল যে তপন কুমাৰ গগৈ আঢ়ৈ তিনি লাখ ভোটৰ ব্যৱধানত জিকিব। কাজেই ভাজপাৰ কৰ্মী সকলে আত্ম সন্তুষ্টিলৈ থাকিল। এনেই জিকিব, কষ্ট কৰিব দৰকাৰ নাই। তাতকৈও ডাঙৰ প্ৰচাৰ চলালে মুখ্যমন্ত্ৰী ড৹ হিমন্ত বিশ্ব শৰ্মাই যে ২০২৬ চনত অসম বিধান সভাৰ নিৰ্বাচনত তেওঁ যোৰহাট সমষ্টিৰ পৰা নিৰ্বাচনত অৱৰ্তীৰ্ণ হব।তাকো প্ৰচাৰ কৰিলে যোৰহাটৰ হৃদপিণ্ডত জিলা পুথিভঁৰাল প্ৰেক্ষাগৃহত নিউজ লাইভৰ এটা নিৰ্বাচনী অনুষ্ঠানত। ই হিতে বিপৰীত হে হ’ল।যোৰহাট নগৰৰ নৱনিৰ্মিত উৰণীয়া সেতুৰ চমক,যোৰহাট ত লাচিত বৰফুকনৰ প্ৰতিমূৰ্তি প্ৰধানমন্ত্ৰী নৰেন্দ্ৰ মোডীৰ হতুৱাই উন্মোচন কৰিও হাৰ মানিলে যোৰহাট লোক সভা সমষ্টিৰ ভোটাৰ সকলৰ ওচৰত। দুৰ্ভাগ্যজনক কথা যে মাজুলিত সামান্য ভোটৰ ব্যৱধানত গৌৰব গগৈ পিছপৰাৰ বাদে বাকী ৯ টা বিধান সভা সমষ্টিৰ ভোটাৰে বিপুল ভোটৰ ব্যৱধানত গৌৰব গগৈক জিকালে।তিতাবৰ সমষ্টিৰ ৰাইজে সৰ্বাধিক প্ৰায় ৪০ হাজাৰ ভোটৰ ব্যৱধানত ভাজপাক প্ৰত্যাখ্যান কৰিলে।যোৰহাট বিধান সভা সমষ্টিত ভাজপাৰ বিধায়ক হিতেন্দ্ৰ নাথ গোস্বামী থকাৰ পাছতো বিপুল ভোটৰ ব্যৱধানত গৌৰব গগৈক জিকালে। যাৰ ফলত হিতেন্দ্ৰ নাথ গোস্বাময়ে কবলৈ বাধ্য হৈছে যে তেওঁৰ সমষ্টিৰ ৰাইজে গৌৰব গগৈক ব্যক্তি হিচাপেহে ভোটদান কৰিছে, কংগ্ৰেছক নাইদিয়া। খুমটাই সমষ্টিৰ বিধায়ক মৃণাল শইকীয়াই ঘোষণা কৰিলে যে বিজেপিৰ নিজৰ ভুলৰ কাৰণেই,দৰ্প অহংকাৰৰ কাৰণেই তপন কুমাৰ গগৈৰ পৰাজয় হ’ল যোৰহাটত।

তেওঁৰ মন্তব্য আৰু গৌৰব গগৈক অভিনন্দন জনোৱাৰ বাবে মুখ্যমন্ত্ৰীৰ ৰোষত পৰিছে মৃণাল কুমাৰ শইকীয়াই। ৰঞ্জিত দাসে বোলে আগতেই গম পাইছিল যোৰহাটত গৌৰব গগৈ জিকিব বুলি।মন্ত্ৰী জয়ন্ত মল্ল বৰুৱাৰ কথাত ৰাজনৈতিক পৰিপক্কতাৰ অভাব পৰিলক্ষিত হ’ল।ইফালে মন্ত্ৰী পিয়ুষ হাজৰীকাই তপন কুমাৰ গগৈৰ পৰাজয় হলে ৰাজনৈতিক জীৱন ত্যাগ কৰিম বুলি যোৰহাটতে চেলবেলাইছিল। অগপৰ লগত সংঘাত হৈছেই ভোটৰ অংক কেন্দ্ৰ কৰি। যোৰহাট লোক সভা সমষ্টিত কংগ্ৰেছৰ গৌৰব গগৈৰ জয়লাভে কেৱল যোৰহাট লোক সভাৰ সমষ্টিৰ ভাজপাৰ বা অগপৰ মাজত খৰিয়াল সৃষ্টি হোৱা নহয় , সমগ্ৰ অসমতে ইয়াৰ প্ৰভাৱ পৰিছে। খুমটাই সমষ্টিৰ ভাজপাৰ বিধায়ক মৃণাল শইকীয়াই গৌৰব গগৈক অভিনন্দন দিয়া আৰু ভাজপাৰ নেতা সকলে নিৰ্বাচনত যোৰহাট সমষ্টিত গ্ৰহণ কৰা কাৰ্যকলাপত অসন্তুষ্টিৰ প্ৰসংগত নিজা মতামত ব্যক্ত কৰিছে। এই ক্ষেত্ৰত মুখ্যমন্ত্ৰী ড৹ হিমন্ত বিশ্ব শৰ্মাই, ৰাজ্যিক সভাপতি ভবেশ কলিতা, মন্ত্ৰী জয়ন্ত মল্ল বৰুৱাই বিষোদগাৰ প্ৰকাশ কৰিছে।আনকি মৃণাল শইকীয়া ভাজপাত আৰু কিমান দিন থাকিব বুলিও প্ৰশ্ন উত্থাপন কৰিছেখোদ মুখ্যমন্ত্ৰীয়ে।প্ৰাক্তন ৰাজ্যিক সভাপতি তথা প্ৰাক্তন মন্ত্ৰী সিদ্ধাৰ্থ ভট্টাচাৰ্য, প্ৰাক্তন মন্ত্ৰী ৰাজেন গোঁহাই, প্ৰাক্তন বিধায়ক অশোক শৰ্মাই বৰ্তমান ভাজপাৰ ৰাজ্যিক উপ-সভাপতি জয়ন্ত দাস এই সকলোৱেই বৰ্তমান অসম বিজেপিৰ নেতৃত্বৰ ওপৰত অসন্তুষ্টি প্ৰকাশ কৰিছে। মন্ত্ৰী জয়ন্ত মল্ল বৰুৱাই এবাৰ টিভিত ওলালেই এহেজাৰ ভোট বিজেপিৰ হানি হয় বুলি বিধায়ক মৃণাল শইকীয়াই ইতিমধ্যেই প্ৰচাৰ কৰিছে।আনহাতে মুখ্যমন্ত্ৰী ড৹ হিমন্ত বিশ্ব শৰ্মাই নিৰ্বাচনত অসমৰ ফলাফলো হিন্দু মুছলমান খেল খেলিবলৈ এৰা নাই। ধুবুৰী লোক সভাত কংগ্ৰেছৰ ৰকিবুল হুছেইন প্ৰায় দহ লাখ ভোটৰ ব্যৱধানত বদৰুদ্দিন আজমলক পৰাভূত কৰি নিৰ্বাচিত হোৱাৰ অন্তৰালত সংখ্যালঘু ভূতে লম্ভিছে মুখ্যমন্ত্ৰীক। ধুবৰী নগাঁও সমষ্টিত কংগ্ৰেছ জিকা মানে উত্তৰ অসম মধ্য অসম নামনি অসমৰ ৰাজনীতিত অশনি সংকেত ঘনীভূত বুলি মুখ্যমন্ত্ৰীৰ মন্তব্য বৰ তাৎপৰ্যপূৰ্ণ। কিন্তু যোৰহাট লোক সভাৰ নিৰ্বাচন আৰু গৌৰব গগৈৰ জয়লাভত আনন্দিত মুখ্যমন্ত্ৰী ।তেওঁ কৈছে অন্তত: আমাৰ খিলঞ্জীয়াৰ জয়লাভ। ই এক ধৰণৰ মৌলবাদী ৰাজনীতি। কেৱল সংখ্যালঘুৰ সমষ্টিতহে কংগ্ৰেছৰ ভোটাৰ আছে বুলি প্ৰচাৰত সিদ্ধহস্ত ভাজপাৰ নেতা সকলৰ আৰু মুখ্যমন্ত্ৰী ড৹ হিমন্ত বিশ্ব শৰ্মাৰ মুখত উজনিৰ যোৰহাট লোক সভা সমষ্টিত কংগ্ৰেছৰ গৌৰব গগৈৰ জয়লাভে ওলট পালট কৰি দিলে ভাজপাৰ তথা মুখ্যমন্ত্ৰীৰ সপোন। তাৎপৰ্যপূৰ্ণ ভাবে তপন কুমাৰ গগৈৰ পৰাজয় নহয় যোৰহাটত, মুখ্যমন্ত্ৰী ড৹ হিমন্ত বিশ্ব শৰ্মাৰ চৰকাৰৰ পৰাজয় যোৰহাটত। তপন কুমাৰ গগৈৰ সোণাৰী বিধান সভাৰ ৰাইজেও প্ৰত্যাখ্যান কৰিলে তপন কুমাৰ গগৈক। মৰিয়নী সমষ্টিৰ বিধায়ক ৰূপজ্যোতি কুৰ্মীৰ বাতুলামিৰ অন্ত পৰিল। প্ৰতি বিধান সভা সমষ্টিৰ হিচাপ দিব খোজা নাই, কাৰণ সকলোৱেই গম পালে যোৰহাট লোক সভা সমষ্টিত মাজুলিৰ বাদে বাকী ৯টা বিধান সভা সমষ্টিতে বিপুল ভোটৰ ব্যৱধানত গৌৰব গগৈক নিৰ্বাচিত কৰিলে।আগন্তুক অসম বিধান সভাৰ নিৰ্বাচন, ২০২৬ ত মুখ্যমন্ত্ৰী ড৹ হিমন্ত বিশ্ব শৰ্মাই যোৰহাট সমষ্টিৰ পৰা প্ৰতিদন্দিতাত অৱৰ্তীৰ্ণ নহওঁ বুলিয়েই এক প্ৰকাৰ ঘোষণা দিলে নিৰ্বাচনী ফলাফলৰ প্ৰতিক্ৰিয়াৰ মাজতে। অসম চৰকাৰৰ কাৰণে আৰু এটা অশনি সংকেত যে ভাৰতৰ কেন্দ্ৰত এইবাৰ ভাজপাৰ চৰকাৰ নাই, এন ডি এৰ চৰকাৰ।

লেখকঃ বিমান শইকীয়া