ৰাজ্যৰ উদীয়মান শিল্পীসকলক উৎসাহিত কৰাৰ উদ্দেশ্যে বিশিষ্ট সাহিত্যিক ড° ৰীতা চৌধুৰীয়ে ‘জুবিন গাৰ্গ পুঁজি’ গঠনৰ ঘোষণা কৰে। পাণবজাৰৰ নেহৰু পাৰ্কত আয়োজিত এক সংবাদমেলত ‘ব্ৰহ্মপুত্ৰ সাহিত্য উৎসৱ–২০২৬’ সন্দৰ্ভত বক্তব্য ৰাখি এই গুৰুত্বপূৰ্ণ ঘোষণা কৰে সাহিত্যিকগৰাকীয়ে।
সংবাদমেলত ড° ৰীতা চৌধুৰীয়ে জনায় যে ‘ব্ৰহ্মপুত্ৰ সাহিত্য উৎসৱ–২০২৬’ আগন্তুক ৬ৰ পৰা ৮ ফেব্ৰুৱাৰীলৈ শিৱসাগৰত অনুষ্ঠিত হ’ব। লগতে উৎসৱৰ বিভিন্ন সাহিত্য বঁটা আৰু বঁটাপ্ৰাপকসকলৰ নামো ঘোষণা কৰে তেওঁ।
ঘোষণা অনুসৰি, শিশু-সাহিত্য শিতানত ‘ৰূপা চৌধুৰী সাহিত্য বঁটা’ আগবঢ়োৱা হ’ব দিব্যলতা দত্তলৈ। কবিতাৰ ক্ষেত্ৰত সৃজনশীল সাহিত্য বঁটা লাভ কৰিব বিকিয়ান বাইলুঙে। অনুবাদ শিতানত বঁটা আগবঢ়োৱা হ’ব দিনকৰ কুমাৰলৈ। যুৱ শিতানত ‘মলিনা চৌধুৰী সাহিত্য বঁটা’ লাভ কৰিব পৰিস্মিতা বৰদলৈয়ে। লগতে জীৱনজোৰা সাহিত্য সাধনাৰ স্বীকৃতিস্বৰূপে অৰূপ কুমাৰ দত্তলৈ আগবঢ়োৱা হ’ব ‘ৰংমন বঁটা’।
ড° ৰীতা চৌধুৰীয়ে জানিবলৈ দিয়ে যে উদীয়মান শিল্পীসকলৰ সহায়ৰ উদ্দেশ্যে গঠন কৰা ‘জুবিন গাৰ্গ পুঁজি’ ইউটিউবৰ পৰা পোৱা ধন ২০ বছৰৰ বাবে ফিক্সড ডিপ’জিটত জমা কৰি তাৰ পৰা লাভ হোৱা সুতেৰে আগবঢ়োৱা হ’ব। উল্লেখযোগ্য যে, জুবিন গাৰ্গৰ সৈতে হোৱা তেওঁৰ শেষ সাক্ষাৎকাৰৰ জৰিয়তে ইউটিউবৰ পৰা ২,৯০৯ ডলাৰ, অৰ্থাৎ ২,৬৩,৪৬৮.৪২ টকা লাভ কৰিছিল ড° ৰীতা চৌধুৰীয়ে।
ভাৰতীয় ন্যায় সংহিতাৰ (BNS) ১০৫ নং ধাৰা অনিচ্ছাকৃত হত্যাৰ সৈতে জড়িত। পূৰ্বে এই ধৰণৰ অপৰাধ ভাৰতীয় দণ্ডবিধি (IPC)ৰ ৩০৪ নং ধাৰাৰ অধীনত বিবেচিত হৈছিল। কিন্তু নতুন আইন BNS কাৰ্যকৰী হোৱাৰ পাছত এই অপৰাধক ১০৫ ধাৰাৰ অধীনত অন্তৰ্ভুক্ত কৰা হৈছে।
এই ধাৰা তেতিয়া প্ৰযোজ্য হয়, যেতিয়া কোনো ব্যক্তিয়ে হত্যা কৰাৰ উদ্দেশ্য নাথাকিলেও এনে কোনো কাম কৰে, যাৰ ফলত আন এজন ব্যক্তিৰ মৃত্যু হয়। অৰ্থাৎ অভিযুক্তই জানিছিল যে তেওঁৰ কামৰ ফলত মৃত্যুৰ সম্ভাৱনা আছে, কিন্তু হত্যাৰ স্পষ্ট উদ্দেশ্য নাছিল।
BNS 105 ধাৰাৰ মুখ্য উপাদান
অভিযুক্তৰ কাৰ্যৰ ফলত কোনো ব্যক্তিৰ মৃত্যু হোৱা
অভিযুক্তই জানিছিল যে তেওঁৰ কাৰ্য বিপজ্জনক
হত্যাৰ স্পষ্ট উদ্দেশ্য নাছিল
উদাহৰণ
দায়িত্বহীনভাৱে গাড়ী চলাই দুৰ্ঘটনা সংঘটিত কৰি কাৰোবাৰ মৃত্যু ঘটোৱা
খঙৰ বশৱৰ্তী হৈ কাৰোবাৰ ওপৰত আক্ৰমণ কৰা আৰু মৃত্যু হোৱা
অসাৱধানতাৰে কোনো ব্যক্তিক পানীত ডুবাই দিয়া আদি
কি কি শাস্তি হ’ব পাৰে?
উদ্দেশ্য আছিল বুলি প্ৰমাণিত হ’লে : ন্যূনতম ৫ বছৰ পৰা ১০ বছৰলৈ কাৰাদণ্ড, অথবা আজীৱন কাৰাদণ্ড আৰু জৰিমণা
জানি-বুজি বিপজ্জনক কাম কৰিলে : সৰ্বোচ্চ ১০ বছৰলৈ কাৰাদণ্ড, জৰিমণা বা দুয়োটা
ন্যূনতম শাস্তি : ৫ বছৰৰ কাৰাদণ্ড
জামিনৰ ব্যৱস্থা
BNS 105 ধাৰাৰ অধীনত অপৰাধক গুৰুতৰ আৰু সাধাৰণতে জামিনবিহীন (non-bailable) অপৰাধ হিচাপে গণ্য কৰা হয়। সেয়েহে এই ধাৰাত গ্ৰেপ্তাৰ হোৱা ব্যক্তিয়ে সাধাৰণতে জামিন লাভ নকৰে। অৱশ্যে বিশেষ পৰিস্থিতিত আদালতে জামিন বিষয়টো বিবেচনা কৰিব পাৰে।
(লেখাটো বিভিন্ন দিশৰ পৰা তথ্য সংগ্ৰহ কৰি লেখা গৈছে। গতিকে এই ক্ষেত্ৰত অধিবক্তাৰ পৰামৰ্শ গ্ৰহণ কৰা ভাল।)
নিযুত মইনা আঁচনিৰ জৰিয়তে কলেজত অধ্যয়ন কৰি থকা ছাত্ৰীসকলক আৰ্থিক সহায়তা আগবঢ়োৱা হৈছে বুলি উল্লেখ কৰি মুখ্যমন্ত্ৰীয়ে লগতে ঘোষণা কৰে যে, অহা ১ জানুৱাৰীত ছাত্ৰসকলৰ বাবেও এক নতুন কল্যাণমূলক আঁচনি ঘোষণা কৰা হ’ব।
শোণিতপুৰ জিলাৰ শ্বহীদ নগৰী ঢেকীয়াজুলিত আজি আয়োজন কৰা হ’ল “কা’ আন্দোলনৰ পঞ্চ শ্বহীদক” উৎসৰ্গিত এক শ্ৰদ্ধাঞ্জলি অনুষ্ঠান। ঢেকীয়াজুলি আঞ্চলিক ছাত্ৰ সন্থাৰ উদ্যোগত আয়োজিত এই অনুষ্ঠানটোত উপস্থিতিজনাই ছ’বছৰ পূৰ্বে গুৱাহাটী মহানগৰীত নাগৰিকত্ব সংশোধনী আইন (কা’)ৰ বিৰুদ্ধে আন্দোলন কৰোঁতে প্ৰাণ আহুতি দিয়া পাঁচজন সুঠাম যুৱকক সুমৰি গভীৰ শ্ৰদ্ধাঞ্জলি জ্ঞাপন কৰে।
উল্লেখযোগ্য যে, জাতিধ্বংসী কা’ বাতিলৰ দাবীত পথত নামি জন-জাগৰণ সৃষ্টি কৰা এই পঞ্চ শ্বহীদ—অসমীয়াৰ অস্তিত্ব ৰক্ষাৰ প্ৰতীক হিচাপে এতিয়াও স্মৰণীয়। সদৌ অসম ছাত্ৰ সন্থাৰ কেন্দ্ৰীয় আহ্বানত আজি ৰাজ্যজুৰি সমান্তৰালভাৱে শ্ৰদ্ধাঞ্জলি অনুষ্ঠান অনুষ্ঠিত হ’ল, আৰু সেইয়াৰ অংশ হিচাপে ঢেকীয়াজুলিতো জাতীয় শ্বহীদ বেদীত অনুষ্ঠিত হয় শ্ৰদ্ধাঞ্জলি অৰ্পণ।
অনুষ্ঠানটোত উপস্থিত থাকে সদৌ শোণিতপুৰ জিলা ছাত্ৰ সন্থাৰ শিক্ষা সম্পাদক শংকৰ দাস। শেহতীয়াকৈ তেওঁ পঞ্চ শ্বহীদৰ প্ৰতি শ্ৰদ্ধা জ্ঞাপন কৰি কেন্দ্ৰীয় আৰু ৰাজ্য চৰকাৰক তীব্ৰ ভাষাৰে সমালোচনা কৰে। তেওঁ স্পষ্টকৈ ক’লে— “কোনো কাৰণে জাতিধ্বংসী নাগৰিকত্ব আইন মানি লোৱা নহয়। অসমীয়াৰ স্বাভিমান আৰু অস্তিত্বৰ প্রশ্নত আপোষ নহয়।”
আয়োজিত অনুষ্ঠনত ঢেকীয়াজুলি আঞ্চলিক ছাত্ৰ সন্থাৰ ভাৰপ্ৰাপ্ত সাধাৰণ সম্পাদক বিকাশ কলিতা সহ অন্যান্য বিষয়া-কৰ্মীৰো উপস্থিতি থাকে আৰু পঞ্চ শ্বহীদক একাত্মতাৰে শ্ৰদ্ধাঞ্জলি জ্ঞাপন কৰে।
