ডিজিটেল ডেস্কঃ Paran Kumar Boruah নগাঁও চহৰৰ লাওখোৱা পথৰ বাসিন্দা, নগাঁও জিলা সাহিত্য সভাৰ প্ৰাক্তন সভাপতি আৰু বিশিষ্ট সাহিত্যিক পৰাণ কুমাৰ বৰুৱাৰ কালি নিশা প্ৰায় ১১ বজাত হৃদযন্ত্ৰৰ ক্ৰিয়া বন্ধ হৈ ৬৬ বছৰ বয়সত দেহাৱসান ঘটে।
অসমীয়া সাহিত্য জগতলৈ প্ৰায় ১৫ খন গ্ৰন্থৰ জৰিয়তে অনবদ্য অৱদান আগবঢ়োৱা বৰুৱাই “শ্ৰীমন্ত শঙ্কৰদেৱ আৰু বৈষ্ণৱ ধৰ্ম” গ্ৰন্থৰ বাবে ভীমৰাও আম্বেদকাৰ বঁটা লাভ কৰিছিল।
তেওঁ ৰবীন্দ্ৰনাথ ঠাকুৰৰ “গীতাঞ্জলি” গ্ৰন্থখন অসমীয়ালৈ অনুবাদ কৰি সাহিত্য ক্ষেত্ৰখনত বিশেষ অৱদান আগবঢ়াইছে।
নগাঁৱৰ কিশলয় সাংস্কৃতিক গোষ্ঠীৰ প্ৰতিষ্ঠাপক সভাপতি আছিল বৰুৱা।
অসম চৰকাৰৰ উদ্যোগ আৰু বানিজ্য বিভাগত উচ্চপদস্থ বিষয়া হিচাপে কৰ্মৰত থাকি অৱসৰৰ পাছতো তেওঁ সাহিত্য চৰ্চা অব্যাহত ৰাখিছিল।
মৃত্যুৰ সময়ত তেওঁ পত্নী, পুত্ৰ আৰু কন্যাক এৰি থৈ গৈছে।
